آکواریوم/حیکایه
2
گوموشو بدنی ایله آچیق ماوی‌یه چالان قانادجیق‌لاری اولان بالاجا بالیق، هاوا پومپونون یانیندان آدام بالیغینین او چیلغین ایشلرینه باخیردی. تله‌سیک اونون یانینا گئدیب دئدی:
- سنی هئچ گؤرمه‌میشدیم؟
- واللاه هئچ بیلمیرم نجور اولدو من بیردن بیره گلدیم بورا؟
- حتما سنی ده او کیشی آتدی بورا؟
سونرا آرتیردی:
- هله کئفین سازدی سونرا بیله‌جکسن هارا آتیب سنی...
آدام بالیغی بو سؤزلره چوخ‌دا باش قوشماییب اؤزونو آکواریومون اوبیری بوجاغینا چاتدیریب اورالاردا گزمه‌یه باشلادی.
گوموشو بالیق ایسه اؤز-اؤزو ایله؛ "دئدیم دا... هله چوخ چکر بیله‌سن هانسی جهنمه دوشوبسن" دئییب پومپون یانینا قاییتدی.
3
گوموشو بالیغین یولداشی اولان زیغ بالیغی دونن‌دن صدف‌لرین قیراغیندا گیزلی قالمیش بیر قیدا دنه‌سینی توو ایله قاپیب یئیه-یئیه اؤزونو بالاجا گوموشو بالیغا چاتدیری. بیرآز یولداشینا باخیب سونرا دئدی:
- نه‌دی؟ یئنه نمنه اولوب؟ کاش بیله‌یدیم هارا زیلله‌نیسن... نه آختاریرسان...
گوموشو بالیق اونا ساری باخماسادا جاواب وئردی:
-بیرزادلار واردا...
- ال چک او بیرزادلاردان نه اولار؟... گل گئدک بیرآز دولاناق... فنکوس‌لار قالان یئره تزه بیر ساخسی قاب دوشوب... گل گئدک اورا باخاق...
- سن گئت باخ! سونرا منه ده تعریف‌لرسن...
- بس اوندا حوصله‌ن اولسا، ایستیردیم سنی بیر یئنی یولداشیمیزنان تانیش ائدم... دئییر من آدام بالیغی‌یام...
-گؤرموشم... قاشلاری‌دا ساریشین‌دی...
سونرا زیغ بالیغی اونو اؤز خیالاتی ایله تک قویوب اوندان ال چکمه‌سی اوچون آرتیردی:
- سن گئت تزه گلن له اوینا منده سونرا گلرم...
زیغ بالیغی ایسه اونون سؤزو قورتولمادان اورادان آیریلیب گئتدی.
4
آدام بالیغی آکواریومو آلت-اوست ائتمکدن بیرآن‌دا یورولماییب بویان-اویانا اوزوردو. چوخ چکمه‌دی آجیخدی. بویان-اویانی آختارارکن گؤزو زیغ بالیغی ایله آتاسینا ساتاشدی. زیغ بالیغی داشلارین دیبینده، آتاسینین یانیندا دئشه‌له‌نیردی. آدام بالیغینی گؤروب اونا ساری گلدی.
آدام بالیغی سولقون- سولقون دئدی:
-بس نیه قیدادان خبر یوخدو. من آجیمدان اؤلورم.
- بیلمیرم... گاهدان گؤروسن نئچه گونه کیمی وضعیت بئله اولور. هئچزاد تاپیلمیر یئیک...
- اوندا نه ائلیرسیز، نه یئیرسیز
- باخیب گؤرسه‌یدین اؤیره‌نردین... داشلارین دیبیندن بایات قیدا تاپیب یئییریک... گل سن ده دئشه‌لن...
آدام بالیغی ایندی بیلدی بورادا اولدوغونا گؤره بولار آج قالیب. اؤزو ده آجیندان بیلمیردی نه ائتسین. اؤزونو بویان-اویانا ووردو بلکه یوخودان دورسون، آما فایدا وئرمه‌دی. او ایناندی بالیق اولوب قالاجاغینی. زیغ بالیق‌لارینین یانینا دؤنوب اودا باشلادی داشلاری دئشه‌له‌مه‌یه.
5
گوموشو بالیق داریخمادان سولقون اولوب اوره‌یی دئشیلیب آتاسی ایله دانیشماق ایسته‌سه ده، آتاسی آج قارین بیلمیردی هانسی داشی دئشه‌له‌سین هانسی قالسین. آز قالیردی داشلارین اؤزون ده یئسین. سونوندا مجبور اولوب اوغلونون؛ " آتا ائشیدیرسن نه دئییرم" -سؤزونو ائشیدیب دئدی:
- دئ گؤرک نه دئییرسن... حتمن یئنه ده قاباقکی سؤزلردن دی
- آتا منه کؤمک اول من گئدیب بورادان... من بورا بالیغی دئییلم...
- گؤردون... گؤردون... آی بالیق‌لار! گلین ائشیدین گؤرون منیم بو پاپاق اوغلوم نه دئییر... دئییر بو گؤزللییی، بو یئمک‌لری، بو دیلخوشلوغو بوراخیب قاچاق بورادان... باخ گؤر سن آللاه نه گؤزل منظره‌لر وار...
- آتا بیرآزدا اوجادان دئ... سن دئییرسن بلکه من پیس دانیشیرام همده باغیریرسان؟ دئ قوی هامی ائشیدسین، او تازا گلن ده بیلسین هارا گلیب.
- آخماق اوغلان سن هئچ بیلیرسین نه دئییرم... او یازیق آنانی دا سن گودازا وئردین...
- یوخ-یوخ آنام منه اینانمیشدی... آما دوز واختیندا آتیلمادی، بیزی قابلامالارا بوشالداندا دئدیم آتیلاق قاب یووان یئرین گیلیفینه، آما او قولاق آسمادی، اورانی باغلایاندان سونرا آتیلدی قالدی اورادا... سونوندا...
-دئ... دئ سونوندا اؤلدوردوم اونو... اؤلومه گؤندردیم...
- آی آتا نه دئییرسن... او بیلدی هانسی یولو گئتدیینی هرنه اولسادا بو حیات دان اؤزونو قورتاردی بلکه ده ایندی دیری‌دی...بؤیوک بیر گؤل‌ده، دنیز‌ده، نه بیلیم اقیانوس‌دا یئنی بیر حیات باشلاییب... ٱی آنا... هر یئرده‌سن خوش اولارسان...
- آی بیلردیم کیم سنه بولاری اؤیردیب... کیم سنی یولدان چیخاردیب... دری‌سینه سامان تپردیم... باخ او عاغیللی زیغ بالیق‌لارینا... اولاردان اؤیرن، نئجه گؤزل اوینورلار... نئجه گؤزل کئچینیرلر...
آتاسی سونرا بیرآز ساغا گئدیب، بیرآز سولا گه‌لیب آرتیردی:
- آی بالا یادیما گله‌نی بیز آتالی- بابالی بورالارداییق هئچ کیم ده دئمه‌ییب بورادان گئدک دنیزلره... اصلن دنیز هارادی؟
- آتا نه‌یه گیزله‌دیرسن؟
- نه‌یی گیزله‌دیرم...
- من بیلرم سنین آتان دا چالیشیب بوردان قاچسین آما سنه گؤره قاچماییب...
گوموشو بالیغین آتاسی بو سؤزو ائشیدر-ائشیتمز داها هئچ نه دئمه‌ییب اورادان اوزاقلاشیب بیر قیراقدا توموب دایاندی.
نئچه دقیقه‌دن سونرا بیر بالیغین اورادان کئچنده اونا ده‌یمه‌سی ایله اؤزونه قاییدیب باشلادی دئیینمه‌یه:
-هن من قورخاغام... من‌دن هئچ نه چیخماز... من بورادان آیریلاسی دئییلم...
6
آدام بالیغی هر یانی دئشه‌له‌ییب بیرزادلار تاپیب قارنی‌نی دویورسادا، یئنه راحاتسیز ایدی. او بیلیردی بورادا اولاناجان هم بولار همده اؤزو آج قالاجاق. بئله دوشونجه‌لر ایله گوله‌شرکن، بویلو بالیق‌لارین بیری اوبیری بالیق‌لاردان آرالی بیر قیراقدا دوغماغا باشلادی. آج بالیق‌لارین هامیسی‌نین گؤزو گؤیده‌کی اولدوزلارا تای پاریلداییب گؤز آتمایا باشلادیلار.
بویلو بالیغین دوغماغی قورتولار- قورتولماز، گؤزو آج‌لارین هامیسی‌نی، اؤز یانیندا گؤردو. نه قدر یالوار-یاخار، آندا-ماند ائتسه ده کار سالماییب نئچه ثانیه‌نین ایچینده هر نه‌یی الدن گئتمیش گؤردو.
آدام بالیغی بو دورومو گؤروب هویوخوب قالمیشدی. نه ائدیب-ائتمه‌یه‌جه‌یینی ده بیلمه‌ییردی. سونوندا دوغان بالیغین یانینا یئتیردی اؤزونو. اؤزونو ایتیمیش آداملار کیمی نفس وورا-وورا دئدی:
- بس بئله نییه... نه اولدو؟
دوغان بالیق‌دان سس چیخمادی. سانکی بوتون هایقیرتیلاری ایچینده بوغماغا چالیشیردی.
آدام بالیغی بیرده سوالینی تئکرارلادی:
- بس بئله نییه؟ ... آخی بوجور اولماز...
دوغان بالیق آغلار گؤز ایله اوتقونا-اوتقونا دئدی:
- بورا اورمان‌دی... مه‌یه بیلمیرسن... بولاری قیناماسان آجیلیقدان منی ده یئییرلر بیرگون...
بو سؤزو ائشیدن آدام بالیغی، بیر آندا گوموشو بالیغین سؤزلرینی خاطیرلایارکن ائله بیلدی دونیا باشینا فیرلانیر.
7
آدام بالیغی گیجه‌له-گیجه‌له، بولانا- بولانا گئتدی گوموشو بالیغین یانینا. گوموشو بالیق آتاسی ایله دانیشاندان سونرا، پومپون اوستونه گئدیب آدامین ائویندن، پرده‌سی چکیلمیش پنجره‌نین قیراغیندان قاش-گؤز آتان یاریمجیق آی-ا باخیردی.
آدام بالیغی، گوموشو بالیغین یانیندا سس‌سیزجه دایانیب، او باخان منظره‌یه زیلله‌ندی. خئیلاقدان سونرا گؤز یاشلاری سئله دؤندو.
گوموشو بالیق بو دورومو گؤروب آجی قاتیلمیش بیرگولومسه ایله دئدی:
- من بیلیردیم بیرگون کئیلیکدن چیخاجاقسان... سنده بورا بالیغی دئییلسن...
- یورولدوم بورادان... نه قدر گؤزلویوم او آدام بیزه یئمک وئرسین... نئجه دؤزوم بوراداکی ظولوم لره، داها بورا منه قفس کیمی دیر...
- بورانی یاخشی گلدین!
آی کیشی بورا قفس‌دی... قفس... قفس کیمی دئییللللللل... -گوموشو بالیق بونو باغیراراق دئدی.
- بس نئیله‌ییم؟
- منه تای دؤز!
- دؤزوم؟ ... نجور یانی؟
- من دؤزموشم آکواریومون سویو کیفیرله‌شسین. اوندا او آدام بیزی تور ایله توتوب قابلامالارا آتاجاق. قابلامالاریدا قویاجاق قاب یووان یئره، سونرا گیلیفین آغزین آچاجاق کیفیر سویو قاب ایله اورا تؤکه، بیزده تئز آتیلمالی‌ییق اورایا...
- آخی نه قدر دؤزه‌ک بورا کیفیر اولسون؟
- چوخ چکمز... بیر-ایکی آی!...
ایکی‌سینین ده صؤحبتی بیر-بیری ایله توتوب، شیرین-شیرین دانیشیب، آی لا اولدوزلار لا واخت کئچیردیک‌لری زامان، نئچه ایلان بالیغی اونلارا ساری گلدیلر.
گوموشو بالیق مؤوضونو آنلاییب تئز آدام بالیغینا دئدی:
- ایلان بالیق‌لاری یئنه قودوروب‌لار... هرکیمی ضعیف بیلسه‌لر یئیه‌جک‌لر آجلیقدان... تئز قاچ... قاچچچچ...
آدام بالیغی هانسی یانا قاچدیغی‌نی بیله‌نه، ایلان بالیق‌لاری اونو دؤوره‌له‌ییب ائهمال- ائهمال اونا یاخینلاشدیلار.
آدام بالیغی هارای چکه- چکه دئدی:
- منه رحم ائدین... منیم اتیم آجی‌دی.. من مین بیر اومید ایله بورا گلدیم، منی یئمه‌یین ن ن ن ن...
ایلان بالیق لاری اونو سایمایاراق بیرآن اونا هجوم چکدیلر.
8
کیشی موبل اوستونده ال- قولون بویان-اویانا چیرپیب یوخودا دیسکینیب اویاندی. یئیین اؤزونو آکواریوما یئتیردی. گوموشو بالیق پومپ اوستونده ایدی، او بیری بالیق لار ایسه اویان- بویانا فیرنیخیردیلار. آدامی گؤررکن تئز قویروق بولامایا باشلادیلار.
کیشی ساغا دؤننده، گؤزو، پرده‌سی چکیلمیش پنجره‌نین قیراغیندان گؤرونن پارلاق آی-ا ساتاشدی.
گولومسه‌ییب، گئجه یاریسی اولدوغونا باخمایاراق ال-قولون چیرمالاییب، بؤیوک قابلامانی سو ایله دولدوروب قویدو قاب یویان یئره. سونرا بالیق لاری قابلامایا آتیب گیلیفین قاپاغین آچیب، یاتاغینا دؤندو.
