◄███▓▒░░ -[ Xatirələr durağı ]- ░░▒▓███►

من ايتن گون

يازان: ايساك بشويس سينگر(1)

چئويرمن: حسين واحدي

مني تانيماق راحات ايش اولمالي. خياواندا اوزون ايله گئن پالتو گئين بير كيشي گؤردويونوزده، اوشاق قبيري باشماق آياغيندا، چوخ بوزوشموش شاپقالي بؤرك باشيندا اولان، گؤزلوگونون بير شوشه سي اولمايان، گونش ده ايسه چتير گؤتورن بير كيشي گؤردويونوزده، او منم، شك ائتمه يين: «پروفسور اشلميل.»

 اورميه آدليم لاريندان

عليقلي اوغلو اولان علي دهقان، 1289- نجو گونش ايلينده، اورميه ده دونيايا گلدي. ابتدايي تحصيلاتيني «احمديه» مدرسه سينده كئچيردي. ميرزا حسين مجتهد ايله ميرزا ابو تراب مجتهد، اونون جدد لري اولاراق، آذربايجانين عاليم لريندن ساييليرديلار. او 1305 ايلينده اورميه نين پهلوي اورتا اوخولولندان بيرينجي ديپلوم آلانلاردان اولوب، اوزامانين معارف وزارتيندن بيليمسل (علمي) بويون باغي سي آلميشدي. دهقان، تحصيلاتيني رياضي قولوندا (رشته سينده) تئهرانين علوم بيليمگه سينده (دانشكده سينده) و تربيتي علوم درس لرين ايسه تئرانين يوكسك (عالي) اؤيرتمنليگينده (دانشسراسيندا) سون وئريب، ليسانس بيليم بلگه سيني (دانشنامه سيني) آلير. او اينيگيزجه، فرانسه جه ديللرينه تانيشليغي وارييدي. دهقان تبريزين اؤيرتمنليگينين قوروجولاريندان ايدي و 1323- نجو ايلينه كيمي – اون ايل- اورانين رييسي اولور. او، رحمتليك محمد معزي (اورميه نين پهلوي اورتا اوخولوندان تحصيل آلانلاردان ايدي و 1320 دن 1323 كيمي باتي آذربايجانين كولتور -فرهنگ- رييسي اولموشدو) -دن سونرا، باتي اذربايجانين كولتور رييسي سئچيلير و اورميه ده قالديغي زامانا كيمي، كوتله (مردم) و خيريه مؤسسه لرين يارديمي ايله بير باب كيتاب ائوي و كيتاب اوخوما يئري آچير و ايندي اوستانين لاپ قديمي كيتاب ائوي ساييلير. رحمتليك علي دهقان، آذربايجاندا پيشه وري حوكومتي زاماني، تئهرانا گئديب، 1326 ايلينده يوكسك اؤيرتيم اوچون اون نفر له بيرليكده فرانسه يه گئدير. او وطنه دؤنندن سونرا 1329-ونجو گونش ايليننه كيميكولتور وزارتينده، مختلف مقاملاردا چاليشير و 1329 ايلينين خزل (مهر) آييندان تبريزين كولتور رييسي اولوب، 9 ايلين ايچينده چوخلو ديرلي ايشلر اؤزوندن ياديگار قويور. اونلاردان نئچه سي:

ـ يئتميش سگگيز باب كولتورل تيكينتي نين تيكمه سي –مدرسه، كيتاب ائوي و ...

ـ تبريزده، اؤلكه ميزده بيرينجي دفعه اولاراق، كيتاب هفته سينين آپارماسي. بو ايشيي هر ايل دوزنلي (مرتب) آپارماسي، ميللي بير ايشه چئويريلدي.

ـ آذربايجان-نين كولتور تاريخينين چاپ ائتمه سي.

ـ اوستاد شهريارين مقاميني عزيزلنديرمك و تبريزده بير اورتا اوخولا اونون آدينا قويماق و بايرام (اسفند) آيينين اون آلتي سيني شهريار گونو آدلانديرماق.

ـ يئني اوخول لارين آدلارينا، ادبسل (ادبي) و كولتورل (فرهنگي)، شخصيت لرين آديني قويماق – اؤزلليك له مشروطه چاغيندان-.

آدي جانلي قالميش دهقان 1338 ايليندن 1348 ايلينين سونونا كيميتبريزين ميللي كيتاب ائوينين باش يازاني ايدي و ايندي ده دؤرد نوسخه او نشريه دن، آستان قدس رضوي و ارشاد و كولتور وزارتينين كيتاب ائولرينده قاليري. دهقان، 1338 ايلينده گيلان اوستانداري و 1340 ايلينين قويروق دوغان (مرداد) آييندان، 1343 ايلينين قورا بيشيرن (تير) آيينا كيمي دوغو (شرقي) آذربايجان اوستانداري اولموشدو. تبريزين گؤي مچيدينين گونبزي رحمتليك دهقان و اوستاد رضا معمار-ين ايستك و يارديم‌ لاري ايله مرمت اولدو.

رحمتليك علي دهقان دان ياييلميش اثرلريندن؛ «سرزمين من زرتشت» -بو كيتاب ايندي يه كيمي اورميه اوچون چاپ اولونان مهم قايناق لاردان بيريدير- ، «انگلستان و ايران و تعليم و تربيت در آمريكا»، «تعليم و تربيت در كشور استراليا و مدارس يك اتاقه و چند كلاسه»، آد آپارماق اولار.

اونون حاضيرلاييب، چاپينا عؤرو يئتيرمه ين كيتابلاردان ايسه؛ «حكومت يك ساله پيشه وري در آذربايجان»، « تاريخ روابط ايران و روسيه در دوران تلط اسلاوها بر سرزمين روسيه تا فرو پاشي اتحاد جماهير شوروي-حدود6 جلد-»، «رسالة تعليم و تربيت در فرانسه و تربيت ممالك فرانسه»، «تاريخچة وجه تمسية مدارس تبريز»، « فرهنگ آذربايجان»، آد آپارماق اولار.

رحمتليك علي دهقان، 1381-ينجي گونش ايلينين اوغلاق (دي ماه) آييندا، دوخسان ايكي ياشيندا تئهراندا، دونيا ايله ويداعلاشيب، دونياسين دَييشير. اونو كرج شهرينين امامزادا طاهير، مقبره سينده توپراغا تاپشيريبلار.

حاضيرلايان: حسين واحدي

ديريييك يوخسا ياشاييريق؟

قاتارين گلمه سينه بير ربع دا واختيم قالير.بو 15 دقيقه ده نه ايشلر گؤره بيلرم؟ لاپ ياخشيسي، بير آز تخصصي سؤزلوك اوخوماغيم دير. يوخ،ائله بيل كيتابيمي گتيرمه ميشم.باشقا بير كيتاب اوخوماغادا يئترلي واختيم يوخدور. كيتابي آچديغيما، قاطار يولدان يئتيشيب،دوشونجه لريمين تئليني قيرار.

لاپ ياخشي سي، ايشيم اوچون اولان زنگ لريمي آچيم. يوخ،صبح ساعات 6- دي و ايندي امكداشلاريم ياتيبديلار. نه ايش گؤروم آللاهيم؟ آزجا يئني پروژه مي دوشونوم. توتدوغوم بو تصميم خوشدو، داها بوندا ترديد ائتمك ايسته مز. بو بوش واخيميمين بوشونا گئتمه سينه حئييف اولسون. بو گونلر بير داها اله دوشمزلر..

بير آندا اوره ييم بير زاد  ايسته يير. سئويرم بير قدر آدديم آتيب، هئچ زادادا فيكير وئرمه يم. دينج اولام.نيگرانسيز دونيايا باخام. دمير يولونون دوراغينين ديكينتيسيندن ائشيگه چيخيرام. راحاتجاسينا آدديم آتيرام.

بو آغاجلار نه زاماندان بورداديرلار؟ بو ايكي ايلده بير سفر(سئري) - ده اونلاري گؤرمه ميشم. سون سئري يالنيز اؤزوم اوچون و باشقا شئي اوچون يوخ،نه زامان ائودن ائشيگه چيخميشام؟ هئچ ياديما گلمير. هميشه نيگران و تله سه – تله سه ائودن چيخميشام.گرك گؤرم، ايشلري دوشونورم. امكداشيمداندا باشقاسينين قوصورونا گؤره ايشينين دالي دوشمسيندن عذر ايستمه ييمين گؤرونتوسو(تصوير) بير آن مندن آيريلمير. داها باشقا بير شئي لري گؤرمورم. نه بو ماوي گؤيو، نه بو آغاجلاري، نه ده بؤيوك آتامين قديمي ائوين ياديما سالان بو گؤيچك حوووضو. ائله بيل بو دغدغه لرين ايچينده ايتميشم. ائله بيل، قاچماقلا ديري قالماق اوچون قاچماغين آراسيندا، ياشاماغي اونوتموشام. اوره ييم چوخ ايسته يير بو باساراق گونلرين بيريني تعطيل ائدم؛ سحر چاغي دينجليك له اؤزومه سحر يئمه يي حاضيرلايام. راحاتجا بير بوتون سحر يئمه يي يئييب، ملايم بير موسيقي يه قولاق وئرم. سونرا اوره ييم ايسته دييي ايشلري ائلييم. هر هانسي ايشي من ايسته ييرم.

سئويرم، بير سله (سبد) گؤتورم، دينجليكله گون بازاريندا آدديم آتام. ديققت له علاقه م اولدوغو غذايا لازيم اولانلاري سئچم. بير بوش گونوم اولسا، اوره ييم نه لر ايسته مير! اوره ييم ايسته يير مبل اوستونده لم وئريب تئلويزييونا باخام، يوخومدا آپارسا، نيگران اولمايام. اوره ييم ايسته يير، گئجه، سويوقدا، او ائشيكده هامي قاچديغي چاغدا، دونيايا باخام. خالقا، نه اوچون قاچيرسيز، دئيم؟ ياخشي باشاريلارا يئتيره سيز؟ نه اولا؟ داها چوخ پول اله گتيره سيز؟ نه اولا؟ ياخشي ياشاياسيز؟ داها چوخ قاچيرسيزياخشي دوروم لار اله گتيره سيز و ياخشي دوروملاري الده ائتديغينيز زامان،داها چوخ قاچماغا مجبورسونوز. هر آنداندا بير، بو سورونو (سؤالي) اؤزونوزدن سوروشون: من نه اوچون ياشاييرام؟ ياشاماق اوچون ايشله ييرم يوخسا ايشله مك اوچون ياشاييرام؟

ائله بيل چوخوموز ياشاماغي اونوتموشوق. ياشاييشدا، لاپ ياخشي كيفيت هميشه ياخشي مقام ايله، لاپ چوخ پول، ان پارلاق اجتماعي موقعيت و ...اله گلمز.

آما سيزين خوشبختچيليق دويغونوز (احساسينيز) يوخدور. سوروملولوقلار (مسئوليت لر) ندني سيزي آييله نيزدن اوزاق ساليبلار. بلليدير ايشينيز سيزه چوخ استرس وئرير. پوللارينيز سيزه راحاتچيليق وئرمك يئرينه، سيز اونلارا گؤزتچي (نگهبان) اولوبسونوز. سيزين خوشبخت اولماغينيز، يالنيز خوشبختچيلغي دوشوندويونوز زاماندير. بوتون دونيا سيزين اولوبدور، آما اوره يينيز بير تعطيل گونونده ساحيلده اوتوروب، دنيزه باخماق اوچون داريخير، دئمك سيزين بير يئرده آزليغينيز واردير، حتتا بوتون دونيا سيزين اولدوغو زامان.

آما بير سيزسئون معمولي ايشينيز وارسا، آييله نيزين يانيندا اولماغا يئترلي فورصتينيز وارسا، بير كلمه ده، ياشاييشدان لذذت آپاريرسينيزسا، سيز خوشبختسينيز.

سيزين دونيانيز، اؤز ايچينيزده دير، ياشام دان (زندگي دن) راضي اولماق دويغوسو(حيسسي)، خوشبختچيليق دويغوسو، چتينليكلرين بؤيوك و كيچيك اولماغيني دوشونمك و ... هاميسي سيزين ايچينيزدن ، ائشيگه داشير. ائله بيل هر تك-تكيميزين ياشاييشيندا اولان يوك بوتونلوكجه اؤز چيگين لريميزده دير و هر بيريميز اؤزوموزه عاييد اولان دونيانين سوروملوسويوق. واختيميز اولورسا،اؤزوموزه ده باش چكه ك.

ياديميزدا اولسون: ياشام يولوندا،باشيميزين قاتيشماسي ندن ايله يولون سونونو اونوتماياق.

يازان: مليكا بهزادي