اۆزۆک ÜZÜK
آردینجا اونو سئوگی ماجراسی یاشاماق حاقداکی آرزوسونون هئچ ده یاخشی فکر [فیکیر] اولمادیغی ایله باغلی خبردار ائتمک اوچون اؤز نیشان اۆزۆیۆمۆ چیخاریب دئدیم:
- باخ، سنین اۆزۆیۆن منه بالاجادی، بارماغیمی سیخیر. بلکه اونون اؤلچوسونو بؤیوتمک اوچون زرگره وئره‌سن.
قادین ألینی قالدیرا‌راق پیچیلدادی:
-اونو منه وئر. تئزلیکله دوزه‌لر.
و من اۆزۆیۆ اونا وئردیم
اونونلا بیر آی سونرا راستلاشدیق. اۆزۆیۆن عاقبتی حاقدا سوروشماق ایسته‌سم ده سوروشمادیم. زامان صبرلیدی، من ده صبر ائدیب قادینی ته‌له‌سدیرمه‌مک قرارینا گلدیم. بو زامان او، باخیش‌لارینی آشاغی دیکیب :
- دوغرودان-سنین اۆزۆیۆن. بلا اۆز وئریب، من اونو هاراداسا گیزلتمیشدیم، ایندی ایسه تاپا بیلمیرم. – منیم سوسدوغومو گؤرۆب راحاتسیز‌لیقلا آرتیردی – بونا گؤره منه غضب‌لنمیرسن؟
-یوخ.
آمان آللاه، اونا غضبلنمدیگیم اوچون ائله آرخایین‌لیقلا چیخیب گئتدی …
بئله‌جه بیر ایل کئچدی. بیر گون من أسکی مکان‌لارا اۆز توتوب، منه اولدوقجا تانیش اولان کوچه ایله یورومه‌یه باشلادیم. بودور، اونونلا یئنی‌دن گؤروشدوک. گؤزلری بیر آز داها ماوی، بیر آز داها پارلاق ایدی. دوداقلاری ایسه سانکی خئیلی بؤیوموش و سولوخموشدو.
منی گؤرن کیمی هله اوزاقدان سسلندی:
- باخ، سنین اۆزۆگۆن، نیشان اۆزۆگۆن. اونو تاپدیم، عزیزیم. او، آرتیق بؤیوکدور و بارماغینی سیخمایا‌جاق.
من بو ترک اولونموش قادینا، اونون سولوخموش دوداقلارینا، سونرا ایسه اۆزۆیه باخدیم. قادینا تعظیم ائده‌رک، - آه…دئیه‌سن بیزیم بو اۆزۆکله بختیمیز هئچ گتیرمیر. ایندی ده او، بارماغیما بؤیوک گلیر. – دئیه بیلدیم.
* روسجادان چئویرن: نورگۆل
