عادی بیر آدام
عادی بیر آدام
تورکجه‌یه چئویریب حاضیرلایان: حسین واحدی
فرانس کافکا*، 1883-جو ایلده بیر آلمانلی عایله‌ده پراق شهرینده دونیایا گلدی. فرانس عایله‌نین ایلکین اوشاغی ایدی. ایکی قارداشی، یئددی یاشلارینا یئتیشمه‌میش دونیادان گئتمیشدیلر. اوچ باجی‌سی ایسه نئچه ایللر سونرا ایکینجی دونیا ساواشی‌نین اؤلوم کمپ‌لرینده اؤلدورولدولر. کافکانین آتاسی چوخ مذهبی و جدی ایدی. اونون بو اخلاقی آتا-بالا آراسیندا بؤیوک اختلافلارا نه‌دن اولدو. البته بو جدی‌لییی کافکانین اثرلرینده ده گؤرمک اولور.
ادبیاتدا رومانتیزم
ادبیاتدا
رومانتیزم
یازار:
میر جلال *
کؤچوروب حاضیرلایان:
حسین واحدی
رومانتیزم[1] -اونو
دوغوران اجتماعی نه‌دن‌لر- سئنتیمئنتالیزم[2] ایله فرقی رومانتیزمین ماهیت و باشقا‌لیغی-
اساس سجیه‌لری[3]: کولتورو اینکار، طبیعته رغبت، خالقا دوغرو مئیل، حسیات حاکم‌لییی،
سئوگی صحنه‌لری، شفقت و مرحمت، حیات‌دان راضی‌لیق، اسکی‌لییی ایدئاللاشدیرما،
فردیت باشقا‌لیغی- رومانتیزمین موختلیف شکیل‌لری (آلمان، فرانسیز، تورک) -
رومانتیزم رئالیزم کیمی…
ادبیات هوس‌کارلاریمیزین
ان چوخ بیلدییی و ان چوخ بیلمه‌دییی ادبی آخیم‌لاردیر؛ کلاسیزم[4]، رومانتیزم،
رئالیزم کیمی کلمه‌لری ائشیتمه‌ین هوسکارلاریمیز هامان یوخ کیمی‌دیر. ائله‌ده بو
آدلارین ماهیتی باره‌ده ده‌یرلی ایضاحات و معلومات وئره بیلن ادبیات ماراق‌لی‌لاریمیز
آزدیر. ادبی آخیم‌لار [جریان‌لار] ماراق‌لی‌لیغی ایله نه قدر وقتی جلب ائدیرسه ده،
تورکجه قایناق[مأخذ/منبع] و ماتئریال یوخلوغو او قدر ده گنج‌لر ائشیتدیک‌لری
معلوماتی آلا بیلمه‌ییرلر. اینتیباه و ترقی دؤورلرینده ادبیاتدا حاکم اولان
رومانتیزم جریانی حاقین‌داکی بو مقاله‌میزله گنج‌لرده بیر هوس، بیر تدقیق مئیلی
اویان‌دیرا بیلسک، وظیفه‌میزی ائتمیش سایاجاییق، رومانتیزمی مؤوجودیتی ایله
تانیتماق ایسه سویه‌میز فؤوقونده[اؤته‌سینده/پس‌زمینه] دوردوغون‌دان بو باره‌ده
ادبیاتچی‌لاریمیز شخصی تدقیق مطالعه‌لرینه اهمیت وئرمه‌لی‌دیرلر.
اورتا عصرده آذربایجان تورکجه‌سینین دیلمانج‌لاری
اورتا عصرده آذربایجان تورکجه‌سینین دیلمانج‌لاری
حاضیرلایان: حسین واحدی
بدیعی ادبیاتیمیزین آیریلماز ترکیب حیصه‌سی اولان ترجومه صنعتی‌نین آذربایجان تورکجه سینده قدیم تاریخی و زنگین عنعنه‌لری واردیر.
اورتا عصرلر شرقینده اورتاق ایسلام مدنیتی‌نین فورمالاشماسی نئچه- نئچه یئته‌نکلی آذربایجان تورکجه‌سینین مترجم‌لری‌نین یئتیشمه‌سینه رواج وئردی. بو دیلمانج‌لار آنا دیلیمیزه چئوریلدیگی ترجومه نومونه‌لرینه نظر سالدیقدا اونلارین بو اثرلری ساده‌جه ترجومه ائتدیک‌لری دئییل، حتی ساده، آنلاشیق‌لی بیر دیلله شرح ائتدیک‌لرینی ده گؤروروک.
بدیعی ادبیاتیمیزین آیریلماز ترکیب حیصه‌سی اولان ترجومه صنعتی‌نین آذربایجان تورکجه سینده قدیم تاریخی و زنگین عنعنه‌لری واردیر. آذربایجان تورکلرینین یوز ایللر بویو عرب‌لرله، فارس‌لارلا سیخ ادبی- مدنی علاقه‌ده اولماسی و مشترک ایسلام مدنیتی‌نین فورمالاشماسیندا ایشتیراکی ترجومه صنعتی‌نین تاریخی ضرورت کیمی اورتایا چیخماسینی شرطلن‌دیریردی" .کیتابی- دده قورقود"دا مقدس قورآنی-کریمین "اخلاص " سوره‌سی‌نین بدیعی و بیر او قدر ده سربست شکیلده ترجومه‌سی‌نین وئریلمه‌سی بو صنعتین آذربایجاندا، ائله‌جه ده بوتون اوغوز دونیاسیندا قدیم‌لیگینی ثبوت ان باشلیجا و توتارلی دلیل‌لردن بیری ساییلا بیلر.
سعدی شیرازی‌نین آذربایجان تورکجه‌سینده غزلی وارمیش
سعدی شیرازی‌نین آذربایجان تورکجه‌سینده غزلی وارمیش
حاضیرلایان: حسین واحدی
فیلولوگیا[دیل تانیما] علم‌لری دوکتورو، پروفئسور شامیل جمشیدووون “علم و حیات” ژورنا‌لی‌نین 1987-جی ایل 10-جو ساییندا درج ائدیلمیش “سعدی شیرازی‌نین آذربایجان تورکجه‌سینده بیر غزلی” یازی‌سینی و همین غزلی تقدیم ائدیر.
XIII [13-جو میلادی] عصر فارس پوئزیاسی‌نین[شعرینین] بؤیوک کلاسیکی مصلح‌ددین شئیخ سعدی شیرازی‌نین اثرلرینی آذربایجان اوخوجولاری همیشه بؤیوک ماراقلا اوخویورلار. حتی بیر زامان‌لار شاعرین مشهور “گولوستان” کیتابی مکتب و مدره‌سه‌لریمیزده درس‌لیک کیمی تدریس اولونموش‌دور. بو یاخین‌لاردا ال‌یازما‌لار خزینه‌سین‌دکی قدیم جونگ‌لر و توپلولار اوزرینده آراشدیرما‌لار آپارارکن شاعرین XVIII [18-جی میلادی]عصرده یازیلمیش نادیر بیر غزلی دقتیمیزی جلب ائتدی. باشلیقدا “کلامی شئیخ سعدی شیرازی” یازیلمیش، سون بئیتی “سعدی” تخللوصو ایله قورتاران بو غزل آذربایجان تورکجه‌سینده یازیلمیش‌دیر. اثرین ترجومه و یاخود اوریژینال اولماسینی گؤسترن هئچ بیر قئید و علامت یوخدور.
بیسکویت/ چئویریلمیش حیکایه
بیسکویت
تورکجه‌یه حاضیرلایان:
حسین واحدی
بیر گنج قیز هاوا آلانی‌نین[فرودگاه‌ین] گؤزلمه سالونون دا اوچوشو[پروازی] گؤزله‌ییردی. اوچوشونا نئچه ساعات قالدیغی اوچون، واختین سوووشماسینا گؤره گئدیب بیر کیتاب آلدی. او بیر پاکئت بیسکویت ده آلیب بیر اوتوراجاغین اوستونده ایله‌شیب کیتاب اوخوماغا باشلادی.
یانیندا بیر کیشی ده اوتورموشدو. اودا قزئته اوخویوردو. گنج قیز بیرینجی بیسکویتی یئینده، کیشی نین ده بیردنه بیسکویت یئمه‌سینی آنلادی. او چوخ حیرصله‌نیب آنجاق هئچزاد دئمه دی.
اؤز یانیدا، «راحاتسیز اولماسام یاخشی دیر. اولا بیلر یالنیش ائدیب دیر» دئدی.
بو ایش بیرداهادا تئکرار اولدو. هردفعه قیز بیسکویت یئیینده، کیشی ده بیر بیسکویت یئییردی، کیشی‌نین بو ایشی اونو لاپ حیرصله‌ندیرمیشدی، آنجاق تپکی [عکس العمل] گؤسترمک ایسته‌میردی.
پاکئت‌ده تکجه بیردنه بیسکویت قالاندا، اؤز یانیندا دئدی، «گؤروم ایندی بو ادب‌سیز کیشی نه ائده جک؟».
کیشی سون بیسکویتی یاری بؤلوب، یاریسین یئدی. بو ایشه چوخ اوز ایسته ییردی! او چوخ حیرصله‌نمیشدی. بوآن هاوا آلانین یوکسلته‌جی [ایسپیکئری] اوچاغا مینمک زامانیدی، دئدی.
قادین کیتابی بوکوب، کیشی‌دن آجی باخیش‌لاری ایله آیریلدی. اوچاغین ایچینده صندلینده ایله‌شدی. گؤزلوگونو چانتاسینا قویاندا، چوخ تعجب ائتدی. آلدیغی بیسکویت چانتاسیندایدی. آچیلمامیش و ال دیمه‌میش!
چوخ اوزولموشدو! اؤزوندن آجیقلاندی...
آلدیغی بیسکویتی چانتاسینا قویدوغونو اونوتموشدو. او کیشی، بیسکویت‌لرینی حیرص یئمه‌دن اونلا پایلاشمیشدی.
بو یازینین یازاری بللی دئییل
تورکجه نین, اوخول لاردا, درس وئریلمه گرکلیگى
تورکجه نین, اوخول لاردا, درس وئریلمه گرکلیگى یازان:
حسین واحدى دونیادا، نئچه دیل
واردیر؟ نئچه سی رسمی دیر؟ نئچه سی غیر رسمی دیر؟ فلان دیلی نه قدر جمعیت دانیشیر؟
نئچه سى آدلیم ایله گوجلودور؟ نئچه سى یاشاماق دا و نئچه سى یاشاما سون وئرمکده
دیر؟ بو سؤال لارین هئچ
بیرینه جاواب آختارماییرام! آنجاق اوره ییم اؤز آنا دیلیمین یانیندادیر. اونا
چیرپینیر. اون لا یاشاییر. آنام دیر منه ان قیمت
لى بیر وارلیق. اونون دیلیده یوزده-یوز منه چوخ دگرلى و عزیزدیر. هامیمیز تورکجه
میزین ایندیکى وضعیتین مندن داها یاخشی بیلیرسینیز. ماشاللاه هر کیمسه ده اؤزونه
مخصوص دانیشیغی واردیر. بیری تکجه فعلی تورکجه دئییر. بیری یاری تورکجه،
یاریسینیدا باشقا دیللردن استفاده ائدیر! و... . گؤره سن نه زاماناجان
بو وضعیت قالاجاق دیر؟ بو دیل بیزیم اوچون عزیز دئییل مى؟ اونو یاشاتماق، دوزگون
دانیشیب، دوزگون دانیشماق، بیزه وظیفه دئییل مى؟ بلى، آنا دیلیمیزه قوللوق ائتمک،
وظیفه میزدیر. بو عزیز آنا دیلیمیزى اوخول لاردا اوخویا بیلمه یه نه جن، وضعیت
بئله اولاجاق دیر. گونو-گوندن ده ...! اوشاق دان- بؤیوگه قدر عدد لرى، تلفن سایی
لارین و... گئت-گئده تورکجه سینى دئمک دن چکینیرلر. جمله لر قایدادان چیخیر. آنا
دیلدن بئله صاحاب چیخارلار مى؟ بو گون مسئول لاردان،
جماعته قدر، چالیشیب، تورکجه میزى اوخول لار (مدرسه لر) ایله بیلیم یوردلارا
(دانشگاه-ا) گتیرسه لر، آنا دیلیمیزه تاریخی خدمت ائده بیلرلر. طاغوتى رژیمین دوشمه سیندن سونرا، ایسلامى حکومتین باشلانما
تاریخیندن برى یوزلرجه تورکجه کیتاب، نشریه و یئترى (رسانه) چیخیب دیر. بو گؤسته
ریر، اؤلکه میز ایسلام بایراغى التیندا یاشاییر. ایسلام دا برابرلیک ایله بیرلیک دینی
دیر. بو گؤزللیک ده امکان اولا-اولا، استفاده ائتمک داها یاخشی اولار. قونشو اؤلکه
لر ده یوخسا چوخلو اوزاق ایله یاخین اؤلکه لرده بو تجربه الده ائدیلیب دیر. عزیز
ایران دا ایسه بو ایش هر یئردن چوخ راحات ائدیله بیلر، اودا اینشاللاه عزیز مسئول
لاریمیزین ال ایله اولاجاق دیر. اومود وار, آنا
دیلیمیز، یاشام بویو یاشایاجاق دیر.
تورکجه یاز! تورکجه اوخو! !Türkcə yaz! Türkcə oxu
!Türkcə yaz! Türkcə oxu
توركجه یاز, توركجه اوخو!
!Türkcə yaz! Türkcə oxu
سن یازماسان, من یازماسام,
,sən yazmasan, mən yazmasam
كیم یازار؟
?kim yazar
كیم اوخویار؟
?kim oxuyar
آتا بابا سؤزلرینی!!
!! ata-baba sözlərini
اورمیه ده "سازیمین سؤزو" آدیندا تورکجه گؤستریش
اورمیه ده "سازیمین سؤزو" آدیندا تورکجه گؤستریش
4-ونجو «نسلى از آفتاب» فستیوالینین قورتولوشو - اورمیه
4-ونجو «نسلى از آفتاب» فئستیوالینین قورتولوشو- اورمیه
بو فستیوال دا الده ائتدیگیم، «طنز داستان» بؤلومون ده، سئچیلمیش (بیرینجیلیک) سیراسینى بوتون سئویملى آنالار ایله اؤز آنا دیلیمه (تورکجه یه) تقدیم ائدیرم.
بو گون (91/2/21) «اورمیه» شهرینده، دؤردونجو «نسلى از آفتاب» فستیوالینین قورتولوشو ایدى. بو فستیوال دا، مختلف قول لاردا، سیرالار بللى اولونوب، اوستون نفرلر تانیندیلار.
تانرى نین یاردیمى ایله طنز داستان بؤلومون ده، بیرینجیلیک سیراسینى اله گتیردیم. «چوخ بیلمیش قولو» آدیندا تورکجه طنز یازیم بو سیرانى قازانیب دیر.
اؤز نوبه مده، بو فستیوالى یولا سالیب، بو گونه کیمى اداره ائدنلرین هامیسیندان تشککور ائدیب، بو ایلده کى، سئچیلنلرین هامیسینا تبریک دئییرم.
الده ائتدیگیم بو قازانجى، تورکجه یازى اولدوغو اوچون منه داها اؤنملى ایله دگرلى دیر. من بو مقامى، آنالار گونون یاخینلاشما مناسبتى ایله بوتون آنالارا لا اؤز آنا دیلیمه تقدیم ائدیرم.
یئرى وار بوتون اوستادلاریم ایله قلمداشلاریمدان دا تشککور ائدیب، اونلارا یاشاملارین دا، باشاریلى ایله باش اوجا یاشاماقلارینى اولو تانرى دان ایسته یم.
هامینیزا اوغورلار، سئویملى یولداشلار
درین حؤرمتله- حسین واحدی
(شکیل: حسین واحدى/ آشیق نباتعلى)
(شکیل: حسین واحدى/ اوستاد خسرو دستگیر ایله نوروزى جنابلارى)
(عکس: حسین واحدى/ آشیق دهقان)
{ بو آدرس ده بوتون سئچیلمیش لرین آدینى گؤره بیلرسینیز }
کیتاب تانیتیمى (آشنایى با زبان ترکى خراسانى)
کیتاب تانیتیمى (آشنایى با زبان ترکى خراسانى)
حسین واحدى/ نئچه واخت بوندان قاباق، خوراسان تورکلریندن اولان، عزیز اسماعیل سالاریان-ین وبلاگیندان، بیر دگرلى کیتاب ایله تانیش اولوب، اونو یازان ایله علاقه قوروب، کیتاب لار الیمه یئتیشدى. منیم اوچون خوراسان تورکلرین دن بیلگى اله گتیرمک چوخ ماراقلى ایله دگرلى ایدى. بو کیتابین آدى «آشنایى با زبان ترکى خراسانى» دیر. کیتاب، عزیز قارداشیم، اوستاد «جلال قلى زاده مزرجى» بگین الى ایله یازیلیب دیر.
قلى زاده جنابلارى، کیتابى ساده و آخارلى دیلده، آلتى بؤلومده یازیب دیر. ایلک بؤلوم ده، دیل ایله یازماغین ایلگیسیندن سؤز گئدیب. ایکینجى بؤلوم ایسه، تورک دیلینین کئچمیشى ایله خوراسان تورکجه سیندن یازیلیب دیر. اوچونجو بولوم ده، ساده دیلده قایدالار آچیقلانیب دیر. دؤردونجو بؤلوم ده، سؤزجوک لر یئرلشیبلر. بئشینجى بولوم ده ایسه، ائیلملیک لر (مصادر) ایضاح ائدیلیب دیر. سون بولوم ده، خوراسان تورکجه سینده اولان بعضى آتا-بابا سؤزلریندن اوخوجولار اوچون اؤرنک گتیریلیب دیر.
یئرى وار «قلى زاده» جنابلاریندان بو تایسیز و دگرلى ایشى اوچون اؤز تشککورومو بیلدیرب، بو عزیز قارداشیما اللرین وار اولسون دئیم. بو کیتابى، خوراسان دا، «دامینه» ایله «واسع» یایین ائولریندن، باشقا شهرلردن ایسه یازیچى ایله بیرباشا ایلگى قوروب، پست واسطه سیله، الده ائده بیلرسینیز.
قلى زاده جنابلارینین ایمیل ایله تئلفون سایى سى:
qolizadehmezerji@yahoo.com
09379081183
