اورکده بوغولموش آرزولار Ürəkdə boğulmuş Arzular
اورکده بوغولموش آرزولار
یازان: حسین واحدی
آنا، اوشاغین قولوندان چكه-چكه، كوچه‌دن ائوه آپارماق ایسته‌ییردی، قیزجیغاز ایسه، آغلایا- آغلایا، "منه دوندویما آل، من دوندویما ایستیرم!" دئییردی. آنا قونشولارین یانیندا اوزو قیزارا-قیزارا اوشاغی ائوه آپاردی. چورویوب پاسلانمیش قاپینی ایشیلله‌ییب، حیطه گیردیلر.
اوشاغین آغلاماق سسی ائوی آلتینا آلمیشدی. اوشاق حیطده قالیب گؤز یاشلاری اونون تكجه یولداشی اولدو.
آنا، اوتاقدان، گئجه یاغیش یاغان زامان ایچه‌ری‌یه قویان قابلاری حیطه گتیریب تاوان‌دان دامان سولاری كردی‌یه بوشالتدی. قیزجیغاز، باشین حیطده اولان بؤیوك تاغارا دایاییب، درین یوخویا جومموشدو.
قاپی دؤیولدو، آنا قاپینی آچماغا گئتدی، قاپینی آچارکن ارینی گؤروب:
"آى كیشی نه اولدو؟" "یئنه قاییتدین؟" – حزین سسله دئدی.
کیشی باشینی آشاغی سالیب، اوزوجو سسله: «اوچ ساعاتدی، فحله مئیدانیندا بونا-اونا یالوارماقدان یورولدوم، ایش یوخویدو» -دئییب، یاواشجا ایچه‌ری گیردی.
آدسیز حیکایه‌جیک
حاضیرلایان: حسین واحدی
ـ آلو، سالام آنا...
ـ علیکوم سالام... هاراداسان؟
ـ آنا قیزلار گئدیر گزمه‌یه... من‌ده گئدیم؟
ـ من بیلمرم ... اونو آتان بیلر... ده‌سته‌یی وئردیم اونا...
ـ سالام آتا...
ـ سالام، نه اولوب؟
ـ آتا برزیل بوگون اویونون اوددو؟
ـ هه...
ـ یاخشی دسته‌یی وئر آناما...
ـ آنا آتام هه دئدین ائشیتدین؟ من گئتدیم!
آناسی‌نین قیز کیمی بؤیوتدوگو هئمینقوئی
آناسی‌نین قیز کیمی بؤیوتدوگو هئمینقوئی
حاضیرلایان: حسین واحدی
ائرنئست هئمینقوئی اؤز ادبی نسلی، اؤزون‌دن اول و سونراکی یازیچی‌لار آراسیندا یقین کی ان رنگارنگ حیات یاشایان یازیچی‌دیر. آخی نه‌یه ده اولماسین؟! نئچه یازیچی ایسپانیالی وطنداش ساواشی 2-جی دونیا ساواشیندا اولوب، اورا‌دان ان ایستی خبرلری مطبوعاتا اؤتوروب؟ او، 1-جی دونیا ساواشیندا ایتالیادا قیرمیزی خاچ تشکیلاتی‌نین تعجیلی طبی یاردیم ماشینی سوروب، اوسته‌لیک آیاغین‌دان یارالانیب. بوتون بونلار اونون اثرلرینده اؤزونو عکسینی تاپیب. یازیچی ادبیات دونیاسی‌نین ان یاخشی ایکی موکافاتی - پولیتزئر و نوبئل موکافات‌لارینا لاییق گؤرولوب.
پاریس، کی-اوئست، کوبا، تورونتو، شیکاقو و دیگر یئرلرده یاشایان هئمینقوئی آفریقادا یاشادیغی واخت‌لاردا ایکی دفعه اوچاق [طیاره] قضادان ساغ چیخیب. اونون ف.ایسکوت فیتسجئرالد و جئیمس جویسلا ایچمه‌یی، دؤرد دفعه ائولنمه‌یی هئچ کسه سیرر دئییل. آما یازیچی حاقیندا داها 10 فاکت اؤیرنمک یاخشی اولار:
1. هئمینقوئی‌له ژ.د.سئلینجئر[آمئریکالی یازیچی] 2-جی دونیا ساواشیندا گؤروشوب‌لر. سئلینجئر 12-جی پیادا آلاییندا [پیادا نظام] ووروشورموش.
2. یازیچی‌نین پاریس حیاتی ایله باغلی "همیشه سنینله اولان بایرام " آدلی خاطیره‌لر کیتابی 20-جی ایللرده یازیلسا دا، 1964-جو ایله‌دک چاپ اولونماییب.
3. ایکینجی دونیا ساواشیندا خبرمن [خبرنگار] کیمی چالیشاندا جسورلوغونا گؤره بورونج اولدوز موکافاتی ایله اهدا اولونوب.
4. یازیچی‌نین باجی‌سی، قارداشی، اوسته‌لیک آتاسی دا حیاتینی انتحارلا سونا چاتدیریب.
5. یازیچی‌نین بیوقرافیاسینی یازان کئننئت لینین یازدیغینا گؤره، هئمینقوئی گون عرضینده مختلف ایچکی‌لردن ایچه‌رمیش. آخشام دا ایچکی‌لردن موطلق دادارمیش. سحری گون یئنه عینی قیوراق‌لیقلا ایچمه‌یه داوام ائدرمیش.
6. یازیچی‌نین اعلا اووچولوق قابلیتی وارمیش. بیر دفعه گون عرضینده 400 دووشان اوولاییب. هله بو ندیر کی؟! گون عرضینده 2 مینه یاخین بالیق اوولایان یازیچی آلچاق کؤنوللوک له: “بالیقچی‌لیق منیم اوچون ایلنجه‌دیر”،- دئییب. اووچولوغون اونا اؤیرتدیگی یاخشی بیر درسی وار ایدی: “اگر حیوان اؤلدورمک ایستیین یوخ‌دورسا، اونو یئمک حاقین دا یوخ‌دور”.
7. آناسی 4 یاشینا قدر هئمینقوئیی قیز کیمی گئییندیریر، اوزون ساچ‌لارینی هؤرور، اونو ائوجیک‌له [بالاجا ائو اویونجاغی]، گلینجیک‌لرله اویناماغا مجبور ائدرمیش. یقین اونا گؤره‌دیر کی، یازیچی حیاتی بویو هامیدان داها “کیشی”، “ارکک” اولماغا جان آتیب.
8. هئمینقوئی اوچ ساواش‌دا ایشتیراک ائتسه ده، هئچ واخت عسگر اولماییب. بونا اونون گؤز ضعیف‌لیگی مانع اولوب.
9. یازیچی‌نین نوه‌سی 24 یاشلی دری[Dri] هئمینقوئی حاضیردا مودئل کیمی فعالیت گؤستریر. آنجاق دری موصاحیبه‌سینده باباسی‌نین اثرلرینی چوخ جانسیخیجی حساب ائتدیگینی و اوستونلوگو “هری پاتئر” کیتاب‌لارینا وئردیگینی دئییب.
10. یازیچی‌نین آتاسی ایله آناسی ائولندیک‌دن سونرا باباسی (آناسی‌نین آتاسی) ائرنئست هوللون ائوینده یاشاییب‌لار. هئمینقوئی عائله‌نین ایلک نوه‌سی اولدوغونا گؤره اونا باباسی‌نین آدینی وئریب‌لر. آنجاق ائرنئست آدی، اوسکار وایلدین[Oskar Vayld] “جدی اولماق نئجه ده واجیب‌دیر” اثرین‌دکی ساده‌لوح، حتی آخماق قهرمانین آدین‌دان گؤتورولدوگو اوچون یازیچی آدینی هئچ سئومزمیش.
Ernest Hemingway اینگیلیزجه: /Ernest Heminqueyذربایجان تورکجه‌سینده: آ *
دیله‌ییش
دیله‌ییش
یازار: حسین واحدی
اولو تانریم سن باغیشلایان و یاخشیلیق ائدنسن، یالنیز سنه سیغینیرام.
سن هرنه‌یی بیلن‌سن، من ایسه هئچ نه بیلمه‌ییرم.
سن منه بیر اؤدول وئرمک اوچون، بیر بهانه آختاریسان، سنین یاخشیلیغینا مؤحتاجام.
سن منی اشرف- ی مخلوقات ائدیبسن، بونو ساخلاماق اوچون منه یاردیم ائت.
سئویملی تانریم، بو یالنیزلیق دونیا سیندا، سندن باشقا کیمسه‌م یوخ، هر زامان سیغیناجاغیم سنسن.
مهریبان تانریم سندن هر زامان یاخشیلیق و گوناهلاریمین باغیشلانماسین ایسته‌ییرم، سن باغیشلایانلارین، ان باغیشلایانی ایله یاخشیلیق ائدن‌لرین ان یاخشیلیق ائده‌نی‌سن.
ده‌یرلی تانریم، منی بوتون اینسانلارا و جانلی لارا فایدالی بیر کیمسه ائتمه یینی دیله‌ییرم.
دونیادا ان عزیز اولان آتا- آنالارا سندن اوزون ایله برکتلی عؤمور ایسته ییرم. اونلار گرچکدن بیزیم اوچون عزیز دیرلر. بیزی اونلارا لاییق بیر اؤولاد ائتمه‌یینه یالواریرام.
اولو تانریم، اوره کلریمیزده سؤز، دیله‌ک-ایسته‌ک چوخدور، اونلاری سندن سونرا هئچ کیمسه‌یه دئیه بیلمه‌ییریک.
عزیز تانریم بو دونیا گئچری ایله گئده ریدیر، بو دونیا ایله سون ائویمیزده بیزی اؤز باشیمیزا بیراخماییب، سونوجوموزو خئیر ایله برابر ائت.
رحم ائدن تانریم، باغیشلایان تانریم، یاخشیلیق ائدن تانریم، سنه سیغینیرام.
دیغیر دول/ حسین واحدى
دیغیر دول/ حسین واحدى
اوغلوم آراز، «آتا، آتا، گل منی پارکا آپار، چرخ سوروم.» دئییب، زور ایله بیلگی سایارین باشیندان آییردى. اینترنتدن چیخیب، بیلگی سایاری سؤندوروب، آرازلا بیرگه «ائلیمیز» پارکینا گئتدیک. پارکین کوچه‌میزدن ایکی خیاوان آراسی وار ایدی. او آرانی‌دا آراز چرخی سوره‌رک پارکا چاتدیق. گئدیب پارکین بؤیوک حووضونون یانینداکی صندلده اوتوروب، آرازین چرخ سورمه‌سینی ایزله‌دیم. اونوتمامیش دئییم: آرازین یئددی یاشی واردیر.
آراز حووضون یانیندان اوزاغا گئتمه‌یرک اورالاردا فیرلانیردی. گؤزومو بویان-اویانا آتیب اورا گلنلره باخدیم. بیری دیزی اوستو بیلگی سایار ایله باشین قاتمیشدی. بیری کتاب اوخویوردو. بیری سئوگیلیسی ایله دانیشیردی و…. آراز ایسه سئوگی ایله چرخ سوروردو.
اونلارا باخا-باخا اؤز اوشاقلیغیم گؤزلریمین قاباغینا گلدی. کوچه‌ده یئددی داش، پیلله‌دسته، شعبه-شعبه، زو- زو، … اویونلارین اوینایاردیق. او اویونلارین یانیندا ان چوخ سئودیگیمیز باش قاتما «دیغیر دول»ایدی. کوچه‌میزده یئددی-سگگیز ائو وار ایدی. هر یئر تورپاقلیق‌ایدی. اون یولداش ایدیق. آنجاق، یالنیز اوچوموزون دیغیر دولو وار ایدی. او اوچ نفرین، بیری ده من‌ایدیم. یولداشلاریمین ایچینده «بایرام» ایله هامیدان چوخ صمیمی‌ایدیک. آتا-آنالاریمیز قویسایدیلار گئجه‌نی ده کوچه‌ده دیغیر دول‌لاریمیزلا اوینایاردیق. دیغیر دول بیزه تکجه چرخین بیر تکری دگیلدی. او، دونیا ایدی بیزیم اوچون.
گونلرین بیرینده، یئنه دیغیر دول یاریشی قویموشدوق. ساعاتلارجا اوینایاندان سونرا بایرام ایلکین اولدو. پول ییغیب بیله‌سینه کانادا آلدیق. اوست-باشیمیز بوتون توز-تورپاق اولوب آلنیمیزدان تر سوزوردو. آنجاق، دیغیر دول سورمکدن دویمایاراق، یئنه اویناماقدان ال چکه بیلمه‌ییردیک. گون باتیب، آی گلمیشدی. اوزاقدان بیر کیشی بیزه ساری گلیردی. بیزه یاخینلاشاندا آتامدیر گؤردوم. گؤزلری باشینا چیخمیشدی. یاخینیما گلیب، «هئچ بیلیرسن ساعات نئچه‌دی؟ نه زامان ائوه دؤنه‌جکسن؟ گل جهنم اول گؤروم!»-دئییب، قولومدان یاپیشیب سوروتله‌یه-سوروتله‌یه، ائوه سارى آپاردی. بیر الیم ایله دیغیر دولومدان یاپیشمیشدیم. یاری یولدا آتام دیغیر دولا باخیب الیمدن آلیب، گوجو وارکن تولازلادی. روحوم بدندن آیریلدی، ساندیم. آغلامایا باشلاییب، «آتا، نه‌دن آتدین؟ قوی گئدیم گتیریم. سن آللاه!»-دئییب دیغیر دولا ساری قاچماق ایسته‌دیگیمده، آتام یئنه الیمی توتوب قولاغیمین دیبین قیزدیردی! سونرا یئنه قولومدان یاپیشیب ائوه آپاردی.
ائوده، شام یئمه‌میش یاتدیم. صبح آتام ایشه گئدندن سونرا، کوچه‌یه گئدیب، هر یئری آختاردیم، آنجاق، دیغیر دولومو تاپا بیلمه‌دیم. ائوه سارى قاییتدیم. یولدا، اوشاقلار اویناماق اوچون منی ده چاغیردیلار. آنجاق اونلاری سایماییب، ائوه گئتدیم.
آنام نه قدر، «نه اولوب؟ نه‌دن توموبسان؟ کیمله ساواشیبسان؟ … »-دئدی. هئچ زاد دئمه‌دیم. اوتاغا گئدیب، دیزلریمى قوجاقلاییب، سس‌سیزجه آغلاماغا باشلادیم. اوره‌گیم پارتلاماق ایسته‌ییردى. بیلمیردیم نه ائدم. گئجه-گوندوزوم الدن گئتمیشدی. دونیادا یاشاماق ایسته‌میردیم.
ایکی گون بئله کئچیب، گئتدی. آنام گلیب، دیله توتماق ایسته‌دی. بوغازیم پارتلاییب، آغلاماغا باشلادیم. آنام باغرینا باسیب، «یاشار بالام نه اولوب سنه؟ دئ گؤروم آنانا»-دئدی.
اوره‌کدن آه چکیب، «آنا، دیغیر دولوم! آتام دیغیر دولومو ائشیگه آتیب. من دیغیر دولومو ایسته‌ییرم.»-دئدیم. آنام ایسه باشیمی تومارلاییب، «اولسون، بیر دنه آیریسینی تاپاریق.»-دئییب، اوره‌گیمی یوموشالتمایا چالیشدی.
بیر یئددیجه دیغیر دولومو ایتیردیگیمدن کئچمیشدی. نئچه سفر بایرام قاپیمیزا گلمیشدی، آنجاق یئنه ائشیگه چیخمامیشدیم. اوره‌گیم چوخ داریخیردی. گون اورتا ایدى. حیه‌طده اوتوروب جوجه‌لریمه دن وئریردیم. بیردن قاپینین ایشگیلی آچیلدی. آتام ایدی. آیاغا قالخیب سلام وئردیم. یاخینیما گلیب، اوزومو اؤپدو.
-منیم گؤزل اوغلوم، سنه بیر زاد آلمیشام. بوگون چرخچی احمدین یانینا گئدیب اوندان بیر دیغیر دول آلدیم. گئت قاپینین دالیندان گؤتور.
ـ آتاجان چوخ یاشا. سنى چوخ سئویرم. سؤز وئریرم یاخشی اوشاق اولام!
ـ سن یاخشیسان. لاپ یاخشی اولاجاقسان انشاللاه!
سئوینه- سئوینه کوچه قاپیسینی آچیب دیغیر دولو گؤتوروب بایرام‌گیلین قاپیلارینا ساری گئتدیم. گؤیلرده اوچوردوم. بایرام قاپیلاریندا تک باشینا اوتورموشدو. منی گؤردوگونده دیغیر دولا باخیب او دا سئویندی. ایکیمیز ده، دیغیر دوللاریمیزى سوره-سوره دیغیر دول میدانینا گئتدیک. ساعاتلارى بیلمه‌یرک، گونشین ساغ‌اوللاشما چاغیناجان، هئچ دایانمادان، اوینادیق. گونش بالا-بالا داغین دالیندا گیزلنیردى. بیز ایسه دونیامیز دیغیر دول‌دادیر دئیه هله ده اویناییردیق …
اوشاقلیق خاطره‌لریمده یاشاماقدان، آیریلماق ایسته‌مزدیم، آنجاق، آرازین بیر داها، «آتاجان» سسى ایله پارکا قاییتدیم! آراز، «آتا، من دوندورما ایسته‌ییرم.»-دئییب، الیمى توتدو. آیاغا قالخیب، دوندورماچى یانینا گئدیب، اوشاقلیغیمدان ایسه آیریلدیم…
تورکجه یاز! تورکجه اوخو! !Türkcə yaz! Türkcə oxu
!Türkcə yaz! Türkcə oxu
توركجه یاز, توركجه اوخو!
!Türkcə yaz! Türkcə oxu
سن یازماسان, من یازماسام,
,sən yazmasan, mən yazmasam
كیم یازار؟
?kim yazar
كیم اوخویار؟
?kim oxuyar
آتا بابا سؤزلرینی!!
!! ata-baba sözlərini
اوشاق لاریمیز و آذربایجان ناغیل لاری
اوشاق لاریمیز و آذربایجان ناغیل لاری
حسین واحدی
هامیمیزین اوشاق لیغیندا، ناغیل خاطیره لری واردیر و بؤیوك اولدوغوموزدادا او گون لری خاطیرلایاندا گؤزل دویغوسال آن لار (لحظه لر) یاشادیریق. او دؤوراندان الوان خاطیره لریمیز قالیر و بو خاطیره لرده او زامانین ناغیل لاریندان آلینیب دیر. عیبرتلی و فایدالی ناغیل لاریمیز ایندیده قولاق لاریمیزدا سسلنمكده دیر. آمما ایندیكی اوشاق لار بئلنچی ناغیل لاردان اوزاق قالیبلار.
آتا- آنالاریمیزدان اوشاق لیق لاریندان سوروشاندا، او زامانین تندیر داملاریندان، كورسو باشیندان و ناغیل سؤیله مه لریندن دئیه جكلر و او گون لردن سؤز آچماق دا، اونلارا یاخشی لحظه لر یارادیر.
چئشیتلی ائشیتملی آذربایجان ناغیل لاری، گئتدیكجه اونودولوب گئتمكده دیر و نسیلدن نسیله گلن او عیبرتلی ناغیل لار كولتوروموزون بیر بؤلومو اولاراق، اونودولوب گئدیرسه كولتوروموزده آرادان گئده جك دیر. ایندینین اوشاق لاری باتی (غرب) اؤلكه لرین ناغیل لارینین بیر- بیر آدلارین ساییب قهرمان لارین دئییرلر و بو ایش گئتدیكجه اوشاق لا اؤز كولتورونون آراسیندا آرا آچیب اؤزگه كولتورونه یاخینلیق دویغوسونو یاراداجاق دیر.
قاباقجالار عاییله نین بؤیوك آتا یوخسا آناسی، اوشاق لاری بیر یئره ییغیب اونلارا ناغیل سؤیله ردیلر. اوشاق ایسه او ناغیل لاردا اؤزونو ناغیلین قهرمان لارینین یئرینه قویوب درین بیر خییالا جوماردی. آنجاق بو ناغیل لار اؤزوموزون ایدیلر و قهرمان لاریدا بیزیم قهرمان لارییدیلار. زیرناچی ناغیلی، پیس پیسه لی پوسته خانیم، قوردون ناغیلی، گؤزل فاتما ایله ساری اینك، تولكو ایله قارغا، یالانچی چوبان، ... و مین لرجه بئله گؤزل ایله ائشیتملی ناغیل لاریمیز اؤز یئرلرین، بیزیم كولتوروموز ایله غریبه اولان و ساواشجیل باتی ناغیل لارینا وئریرلر.
تلویزیون ایله رادیودادا بو ناغیل لار اؤز یئرلرین ایتیریب لر و یئرلرینه یابانجی اؤلكه لرین كارتون لارین گونو گوندن داها چوخ یاییرلار. اوستانی شبكه لر بو قونودا اؤنملی رول اویناییرلار و آنا دیلیمیزده اولان ناغیل لارین كارتون لارین توركجه ده دوزلدیب اوشاق لاریمیزا گؤسترمكده كئچمیشدن قالان گؤزل ناغیل لاریمیزیدا دیری ساخلایا بیله جكلر.
آتا- آنالار ایسه بو ناغیل لار ایله تانیش اولوب اونلاری گله جك نسیل لره تاپشیرمالیدیرلار. بونلارین یانیندا اوشاق لار باخچالاری ( مهد كودك لری) داها مهم نقش ایفا ائدیرلر. اوشاقلارین چوخو اوشاق واختی بو یئره گئدیرلر و اورادا رسمی دیلیمیزین یانیندا اوشاق لارین آنا دیللرینین دیری قالماسی و كئچمیشدن قالان كولتوروموزو دیری ساخلامالیدیرلار و فایدالی و تجروبه لی آذربایجان ناغیل لارین سؤیله مكله گله جك نسیل لره بؤیوك قوللوق ائده بیلرلر.
ناغیل لاردا ایسلامی و ایرانی (هر بولگه ده اؤز دیل لرییله) كولتوروموزه یئر آییریب بو روحیه نی اوشاق لارا وئرمه لییك. ناغیل عؤمور وار كن اوشاغین ذهنینده قالیر و اوشاق اؤزون او ناغیل لار ایچینده یاشادیر. چوخلو اوشاق لار نصیحتدن قاچارلار و بونا گؤره چوخلو سؤزلری ائله بو ناغیل لارلا اوشاق لارا دئیه بیله ریك و اوشاغا نصیحتیده ناغیل عونوانیندا چاتدیرا بیله ریك.
عزیز آنام
عزیز آنام
یازان: حسین واحدی
آنام چوخ سئویر منی، من ایسه آنامی. او، «بالا جاندیر، آتا- آنا اولمایینجا بیلمه یه جكسینیز بونون آنلامین.»- دئییر. نه یسه، بونو بیلم، یوخسا بیلمه یم، منیم سئوگیمی، آنامین اوره ییندن آزالدا بیلمه یه جك!
آنام هر گون، منى یوخلار. منی ایش ائوینه گئتمك اوچون یولا سالار. باشقا آنالارا تاى، دالیمجا دا، دوعا ائدر. آنالار یورولمایان بیر موجوددورلار. اونلار، هئچ زامان اوشاقلارا محبت ائتمك دن داریخمازلار. اوركلرین سیندیران زامان ایسه، بیزی اونوتماییب، تئزجه، آللاها: «آللاهیم من اوشاغیمی باغیشلادیم، سنده باغیشلا، نه اولار؟»-دئییرلر!
آنامین باخیشلاری دا منه گوج وئریر. ائودن ائشیگه چیخاندا، اؤنجه گؤزلرینه باخیرام. منه باخسا سئوینه-سئوینه ائشیگه گئدرم. آنام ایسه منیم باخیشمی گؤزله ییر. ائله بیل او دا، اوغلوم ائودن چیخاندا منه باخسین ایسته ییر. آنا قایغیسی، قورتولماز قایغی دیر. آنام، هر زامان منی باش اوجا گؤرمك ایسته ییر. او، من گلنده، فخر له، «اوغلوم-دور گلیر»-دئییر. منیم دیلیمی بئله، تكجه آنام بیلیر!
آنامین توكلر‌ی ندن بئله آغارماقدادیر؟ بیلمه ییرم! دایماً نامازیمدا تانریدان اونا بركتلی ایله اوزون عؤمور ایسته ییرم. آللاهیم عؤمرومو ایسته میرم، آل، آناما وئر. آنام یاشاسا محبت یاشایاجاقدیر. محبت یاشاسین ایسته ییرم.
بیلمیرم ندن، هامی چالیشیر دوز ایش گؤرمك له جنته گئتسین. بیلمه ییرلر، جنت آنانین آیاغی آلتیندادیر ...
آناجان! سنى چوخ سئویرم.
گنج اوغلانین آتاسینا سوال‌لاری..
کؤچورن: حسین واحدى
اوغلان: آتا، دونیادا اینسانی یاشا‌دان ان بؤیوک ایستک ندیر؟
آتا: اؤولادلاری‌نین ساغ‌لیغینی گؤروب، خوشبخت‌لیک‌لرینه سئوینمک.
اوغلان: بس اؤولادی اولمایان‌لاری حیاتدا یاشا‌دان ان بؤیوک ایستک ندیر؟
آتا: بیلیرسن، اوغلوم، حیاتدا اینسانی یاشا‌دان هر هانسی بیر هیسس‌لردیر. بونلار دا شرایطه اویغون اولاراق دییشیر. کیمی ائولادینا گؤره یاشاییر، کیمی وار-دؤولته گؤره، کیمسه ده هئچ یاشادیغینی بئله آنلامیر، ساده‌جه حیات یول‌لاریندا سورونور.
اوغلان:آتا دئمه‌لی اینسان نیه گؤره‌سه یاشاییر؟
آتا: بلی اوغلوم، اینسانی حیاتدا یاشا‌دان هر هانسی بیر قوه اولما‌لی‌دیر کی، حیات یول‌لارین‌داکی بوزلو یول‌لاردا بودره‌ییب ییخیلان زامان آیاغا دورماغا مجبور ائدن قوه کمکه گلسین.
اوغلان:بیردن اینسانی حیاتا باغلایان همین قوه اینسانی ترک ائتسه نئجه؟
آتا: باخ اوندا اوغلوم اصل عذاب باشلاییر. نه اوچون یاشادیغینی آنلامیرسان، ساده‌جه وئریلن عؤمورو بیرتهر یاشاماغا چالیشیرسان. اما بو بئله اوزون چکمیر. ایللر اینسانا ان گوج‌لو درمان اولور. یئنی‌دن صیفیردان باشلاییرسان. او خوشبخت آنلارینی یئنی‌دن گئری قایتاراجاغینی اؤزونه سؤز وئریرسن. بزن مومکون اولور، بعضنسه یوخ...
اوغلان: آتا، حیاتدا مومکون اولمایانی مومکون ائتمک مومکوندورمو؟
آتا: اللهین سنه بخش ائتدیگی حیات سنین اؤز علینده‌دیر. ایستییرسن اونو دوزگون یؤنلدیریب ساوادلی بیر شخص اول، اینسانلارا خئییر وئر، و یاخود قاتی بیر جانی اولوب حتی والیدئیین‌لری‌نین ده قاتیلینه چئوریل.
اوغلان: آتا، بیر گون گؤزونو آچیب یانیندا اؤلموش وضعیتده اوزاندیغیمی گؤرسن نه هیسس‌لر کئچیررسن ؟
آتا: او نه سؤزدور دانیشیرسان، اوغلوم؟ سنین حیاتین هله قارشیدا‌دیر. سن هله جاوانسان یاشاییب یاخشی ایله پیسی آییرد ائتمه‌لیسن. پیس دوشونجه‌لی اینسان‌لار آراسینا دوشرکن اونلار کیمی پیس اولمایاسان، عکسینه اونلاری یاخشی یولا سؤوق ائده بیله‌سن.
اوغلان: آتا پیسله یاخشی‌نین فرقی نده‌دیر؟ نیه هر زامان نیه‌سه یاخشی، نیه‌سه ده پیس دئییرلر؟
آتا: اوغلوم، هر هانسی بیر حادثه‌نین و اینسانین پیس و یاخود یاخشی آدلاندیریلماسی هر کسین حیاتی درک ائتمه‌سین‌دن آسی‌لی‌دیر. بزن بیرینه یاخشی هیسس‌لر بخش ائدن حادثه‌لر دیگرینه نیفرتینه سبب اولور. بزنسه ده عکسینه...
اوغلان: آتا حیات نه دئمک‌دیر؟
آتا: اینسان حیاتی بیر زنجیره بنزییر. هر حرکت بیر هالقا،هر اویغونلوق ایسه باغلانتییا سبب اولور. زنجیر هالقا‌لاری بیر بیرینه باغلا‌راق اوزانیر. بزن هالقا‌لاردان بیری بالاجا، بزنسه دیگری نیسبتن بؤیوک اولور. هالقا کیمی بیر-بیرینه بنزه‌سه ده آزجا دا اولسا فرقی هیسس اولونور. عؤمور صحیفه‌لری ده بو جوردور. بزن سئوینج ایچینده اولوب فرح دویورسان، بزن ده سیخینتی ایچینده اولوب بیر کونجه قیسیلیرسان.یئنه ده گوج تاپیب آیاغا قالخیرسان، اما سونرا یئنه ده فیکیر اوممانینا قرق اولورسان.
آتا
آتا
یازان: حسین واحدی
هر بیر اینسانین آرخاسی، قوللاریمیزین توم گوجو، اورگیمیزین اورگی،كرال لار- كرالی، آتادیر.
گئجه- گوندوزون یوخ ائدیر. عایله سی ایسه شن یاشاییر. جننت ایسه آنالاریندیر!
آتا، بوتون دونیانین پادیشاهیدیر. دونیانین كؤكو بیزیمده اولسا، «یئنه سولطان آتادیر.»
آتا، گوجدور، باشا تاج، قلبه فرحدیر. او حورمت دیر، كیشیلیكدیر، تومجه لره (جمله لره) گلمه ین بیر دیریلیک دیر.
آتا شرفدیر، شؤوكتدیر، زیروه دیر، ربّ دیر. آتا بیزی دونیایا پای وئرن ان قیمت لى ملک دیر.
آتا، آتادیر...
