سئوگي يولچولاري-ني آلماق يوللاري
قورخولوق (حيكايه‌جيك)
يازار: حسين واحدي
قورخولوق آنلاملي سس‌سيزليك له، باغين اورتاسيندا اليندن بير ايش گلمه‌دن اونلارا گؤز تيكيب، توستولو آه‌لار ايچينده گله‌جه‌ييني دوشونوردو! قولاغيندا, باغ ييه‌سينين آخشاما ياخين دئديگي سؤزلر ويزيلداييردي.
سئرچه ايله اود
سئرچه ايله اود
چئويرن: حسين واحدي
بير سئرچه تله‌سيك بوتون گوجو ايله اوْدا ياخينلاشيب قاييديردي.
سوروشدولار: نه ائديرسن؟
دئدي: بو ياخينلاردا بير بولاق وار، من تئز-تئز دومدوگومو سو ايله دولدوروب، اود اوستونه تؤكورم.
دئديلر: اود چوخ آلوولودور، سن گتيرن سو ايله سؤنمز!
دئدي: اولا بيلر اوْدو سؤندوره بيلمه‌يم آنجاق، تانري مندن سوروشاندا، يولداشين اوْددا ياناندا نه ائتدين؟
جاواب وئره‌رم: اليمدن نه گليردي ائتديم!
حكايه‌جيك‌لر
۱- دايان، يارديم ايسته‌يير بو قادين!
هر گون شهرين كمر يولوندان كئچنده او ياشماقلي و اوزونو اؤرتموش ياشلي
قاديني گؤروردو، چوخ راحاتسيز ائديجي بير آن اولوردو. بئلي آزجا
بوكولموشدو و الين اللره آچميشدي…
ائلمان اوركدن آه چكيب تانريدان اونا يارديم ايسته‌دي. اونا ياخينلاشيب،
آراباني ساخلاييب، شوشه‌ني ائنديريب، آزجا پول وئريب؛ ننه تانريم سني
قوروسون، منه ده دوعا ائت- دئدي!
ياشلي قادين؛ اوغلوم! عؤمور بويو ساغلام ياشاياسان، تانري سني ساخلاسين، ايجاره ائوده اوتورورام و كيمسم يوخدور … دئدي.
ائلمان دريندن آه چكيب، حزين باخيشلا اوندان آيريليب، يولونون آردين توتدو…
۲- اوشاق محبتي
سئوين، پالتارلارين گئيمك ايسته‌ييردي، آمما كؤينه‌يين باشينا كئچيرده
بيلمه‌ييردي. تومانين ترسينه گئييردي! آناسي گليب اونا يارديم ائديب،
گئيينديردي. يانيجا آليب بازارا گئتديلر. بازارين توكانلارين بير- بير
گزير، آناسي ايسته‌دييي شئي‌لري آليردي. قيزيل بازاريندا، توكانلارين
بيرينين يانيندا، اوزو ياشماقلي بير قادين اونلارين يانينا گليب يارديم
ايسته‌دي! سئوين- ين آناسي اؤزونو توتاراق ائشيتمك ايسته‌مه‌دي بو سسي! او
حئيني آبيرلي ديله‌نن قادينين اوشاغي سئوين-دن دوندورماسيني ايسته‌دي.
سئوين ايسه، ائشيتدي بو سسي! سئوين ايكي الي ايله ياپيشدي دوندورماسيندان.
سئوينه- سئوينه وئردي اوشاغا!!
۳- يورولماز قاريشقا
اؤزوندن نئچه قات بؤيوك و آغير اولان بير بوغداني داشيييردي. چوخ دقتله
يولونو گئديردي. قاباقدا بير چؤپ واريدي و قاريشقا اونا يئتيريب داياندي.
سانكي “اورست” داغينين اؤنونده دايانميشدي.
ساعاتلارجا اورادا دايانمادان بوغداني اويانا كئچيرمه‌يه چابا گؤسته‌ريردي.
بؤيوك بير يئر كوره‌سي، اوجسوز- بوجاقسيز بير عالم و خيرداجا بير چؤپ و
بير يورولماز قاريشقا!
بوغداني ديكينه توتوردو، بوغدا يئنه آشيردي؛ آمما يوز دفعه بو يوران ايشي
تكرارلادي. بير دفعه اونو ديك توتماغي باجارا بيلسه‌يدي اونا يئترلييدي!
بويانا كئچيب،اويانا كئچيب، بوغدادان واز كئچمك ايسته‌ميردي. دونيادا بوتون
يئمك‌لر سونا چاتميش كيمي!!
… سونوندا بوغداني ديك توتوب چؤپه دايانديرا بيلمه‌يي باجاريب، اويانا آتدي
و اؤزوده چؤپدن كئچيب اوزون بير يولونا داوام ائتدي! گؤرن بو اوزون يولدا
نه قده‌ر چؤپ وار؟
۴- كؤچمن قارانقوش
سون باهار گلمك اوزره‌دير. يولداشلاريم دئيير: قالديغيميز يئردن باشقا يئره
گئده‌جه‌ييك. آتامدان سوروشاندا: هاراگئده‌جه‌ييك؟ من تانيماديغيم يئرلردن
سؤز آچير. هردن اؤز- اؤزومه ائله داريخيرام! دئييرم نه اولار ائله بو
يام-ياشيل يئرده قاليب ياشاياق. آمما آتام دئيير:
-بير آيين ايچينده بورادان گئتمه‌سك هاميميز سويوقدان اؤله‌ريك. قارانقوش‌لار ايستي يئرده ياشايارلار. ائليميزين بؤيوگو دئييب.
ايكي گوندن سونرا اورمو گؤلونون يانينا گئده‌جه‌ييك. آتام دئيير:اورمو
گؤلو، چوخ گؤزلدير و اورادا آياقلاري اوزون فيلامينقولار، ساري جئيرانلار،
قوچ‌لار و… ياشاييرلار. ايندي چوخ ماراقلي اولموشام تئزليك‌له قالديغيميز
يئردن اورمو گؤلونو گؤرمه‌يه گئدم…
كؤچمك گونو گليب يئتيشميشدي و يولداشلاريم‌ايله بيرليكده بير قيراقدا
اوچماغا حاضير اولموشدوق. ائلين بؤيوگونون اوچماغي‌ايله هاميميز گؤيه ساري
يوللانديق. شهرلرين اوستوندن كئچنده اوشاقلارين هاميسي بيزه ال
ساللاييرديلار و ائله بيل اونلار بيزيمله بيرگه اوچماق ايسته‌ييرديلر…
يول چوخ اوزونويدو، آمما هئچ يورولماق بيلمه‌ييرديم، يالنيز اورمو گؤلونه
چاتماق ايسته ييرديم. بؤيوكلو-كيچيكلي داغلاري، اورمانلاري، شهرلري آشيب
گئديرديك. گئتديگيميز يئره آز قاليرديق. آتام، آنام‌ايله بيرليكده يانيمدا
اوچوردولار و من چوخ سئوينيرديم.
… اوزون يولچولوقدان سونرا، آرزيسين چكديگيم يئره يئتيشميشديك، آمما اورمو
گؤلو… اورمو گؤلو من آرزيسين چكن دئييلميش. چوخ آغلاديم بورا گلديگيمه،
بورا چؤلدن باشقا بير زاد دئييلميش. آتام يانيما گليب، آغلاما قيزيم بورا
سولو بير گؤلويدو، قوروماسينين نده‌نيني بيلمه‌ييرم، سني آپاراجاغام گؤزل
«وان» گؤلونه، دئييرلر اورا چوخ سولو و گؤزل دير… سن آغلاما، گؤزل قيزيم …!
حكايه‌جيك‌لر
حكايه‌جيك‌لر/ حسين واحدي
شانس‌سيز اوغرو
گئجه‌نين لاپ او شيرين يوخو گلن زاماني، دووارين ياپيشيغينداكي آغاجدان ديرماشيب ائوين حيطينه آتيلدي. سينه-سينه ائوه ساري گئديب، الين ياپيشاجاغا آتيب قاپينين آچيق اولدوغونو گؤروب، سئويندي!
ايچه‌ري گيرنده، بير كيشي‌نين اوتاقدا يوخودا اولدوغونو گؤردو. آيين ايچه‌ري‌يه دوشن ايشيغيندا ائوي آلت-اوست ائتدي، آما آپارماق اوچون درده ده‌ين بير زاد تاپا بيلمه‌دي. اومودو پوزولوب قاچماق ايسته‌ديگي آن، ائو ييه‌سي يوخولو-يوخولو، “آي باشي داشلي اوغرو گون ايشيغيندا من بو ائوده بيرزاد تاپا بيلميرم، سن، آي ايشيغيندا تاپماق ايسته‌ييرسن؟” دئييب، يورقاني تپه‌سينه چكدي!
گونش ايله گونه‌باخان
ساري ساچلي گونش، گؤيه ديرماشميش داغلارين آرخاسيندا، خوروزون بانلاماسيني گؤزله‌ييردي. آخشامدان، بوغدا تارلاسيندا اولان يالنيز گونه‌باخان ايسه قارا دنه‌لريني گونشين باتان يئرينه توتوب، گونشي گؤرمك اوميدي ايله يوخلاميشدي.
بير آزدان، خوروز، سسيني باشينا آتدي. كند ائولرينين چيراق‌لاري بير-بير ايشيقلاندي. گونش گؤزله‌دييي آني گؤرونجه دوغماغا باشلادي. گونه‌باخان، سئوينجك اولوب، اوياندي. سئودييي گونشي بيرداها گؤره بيله‌جه‌يينه چيچه‌يي چارتلادي…
آرتيق، گونش گؤي اوزونده، هر ياني باخيشي آلتينا آلميشدي. گونه‌باخان، گونش بونون اوچون گليب‌دير دئيه، اوزون اوندان چئويرميردي. او، اوچوب گونشين يانينا گئتمك آرزوسوندايدي.
ياواش-ياواش آخشام گليب چاتيردي. گونش يئره سردييي ساچلاريني داراييب، هؤرمه‌يه باشلاميشدي. گونه‌باخان ايسه گونشين گئتمه‌سيندن اوزولوردو. او، بيليردي بير آزدان گونش باتي‌داكي اوجا داغين آرخاسينا گئديب يوخ اولاجاق‌دير…
گونش، گئتدي! آنجاق هئچ بيلمه‌دي گونه‌باخان‌نين آدي‌دا اونون آديندان آلينيب‌دير. او هئچ بيلمه‌دي، گونه‌باخان بوتون ياشاييشيندا اونون سئوگي‌سي ايله ياشادي!
قورخولوق
آخشام اوستو كئچن گونلره تاي، قارغالار، اوزوم باغينا هجوم چكديلر. كئفلري چكينجه اوزوم يئييب باغي كورلاديلار.
قورخولوق آنلاملي سس‌سيزليك له، باغين اورتاسيندا اونلارا باخيردي. اليندن بير ايش گلميردي، او ساده‌جه اؤز گله‌جه‌ييني دوشونوردو! دونن آخشام، باغ ييه‌سي، باغدان آيريلاندا، «صاباح‌دا گليب گؤرسم قارغالار، باغي كورلاييب، قورخولوغو يئريندن چيخارديب، يانديرجايام» دئميشدي!
بونلاري دوشونه‌رك، قورخولوغون اوره‌يي دولوب، خيمير-خيمير آغلاماغا باشلادي!
ياغيش
ياغيش
يازار:حسين واحدي
آيين‌شايين، هاوا چاخدي. بولودلار ديسكينيب آغلادي.
Yağış
yazar: Hüseyn vahidi
"صباحي" ايلليك اؤيكو اؤدولو
"صباحي" ايلليك اؤيكو اؤدولو(بيرينجي ايل-1392)
SABAHI SHORT STORY AWARD :2013
اؤدول: بير ميليون تومن (بيرينجي اؤيكو اوچون)
(ايلك اون اؤيكو اوچون ياديگارليق هديه و تقدير لؤوحه سي وئريله‌جك.)
- اثرلرين گؤندرمه مؤهلتي: 31 شهريور 1392
- ياريشمانين سونوجو اعلان ائديلن گون: 1 آذر 1392
- اثرلر آذربايجان توركجه‌سينده و عرب اليفباسيندا يازيلمالي دير.
- هر يازيچي بير اثر گؤندره بيلر.
- اثرلرين ايندي‌يه‌دك باشقا يئرده (كيتاب، درگي، سايت) چاپ اولونماماسي گركلي دير.
- حيكايه لر word دا تايپ اولونوب بو آدرسه گؤندر مه لي دير: sabahi.odulu@gmail.com
- اثرله بيرليكده اؤزونوزدن بير قيسا بيوگرافي گؤندرين.(شكيلينيز، تيلفون نومره نيز اونوتولماسين)
- ايلك اون حيكايه بير كتابدا چاپ اولونوب ياييلاجاق.
آرتيق بيلگي اوچون بوراني تيكلايين
هامي‌نين دوستو آنتون
هامي‌نين دوستو آنتون
يازار: ايستئفان سوئيق
حاضيرلايان: حسين واحدي
حياتدا چوخ آز آدامين باجارا بيلديگي ايكي چتين ايش وار. همجينس‌لري آراسيندا بير نفرده دوشمن قازانما‌دان ياشاماق و داخلي آزادليغي سايه‌سينده بو يئر اوزونون ان بؤيوك گوجو اولان پولا بويون ايمه‌مه‌ك.
بئله بير اينسانلا تانيشليغيم چوخ ساده بير شكيلده باش توتدو. او دؤنمده كيچيك بير شهرده ياشاييرديم و بير گون آخشام اوستو ايتيمي گزديرمه‌يه چيخميشديم. بيردن-بيره ايت عجايب حال‌لارا دوشمه‌يه باشلادي: دليجه‌سينه يئرده ائشه‌لنير، زينگيلده‌يير، اولايير، آغاج‌لارا سورتونوردو.
سئوگي يولچولاري
بو تئزليگه ياييلاجاق:
Sevgi yolçuları ... سئوگي يولچولاري
Hikayələr حيكايه لر
حسين واحدي
كيتاب ياييلاندا ساتيش يوللاري و يئرلري وئريله جك.
بوكيتاب بوتون آناديليميزه چاليشان اينسانلارا اتحاف اولونور...
قوشلارين هوتئلي
قوشلارين هوتئلي
يازان: جيل اگلتون
توركجه يه چئويرن: محمد عابدين پور
بير گون واريدي. بير گون يوخويدو. گونلرين بير گونونده بير قوجا ننه وار ايدي. او تك قالماغي سئويردي. او هر زامان دئييردي: يالقيز ياشاماق چوخ گؤزل دير.
بير گون قوجا ننه پنجره دن ائشييه باخاندا گؤردو يوزلرجه قوش باخجاسيندا آغاجين اوستونه قونوب يووا دوزلديبلر و جوججولتو سسي هر يئري گؤتوروبدو.
قوجا ننه چيغيردي: «بورادان چيخين گئدين. من تك ياشاماغي سئويرم.» آمما قوشلار باغچادا قاليب بوتون گونو سس ساليب اويان بويانا اوچدولار. او چوخ راحاتسيز ايدي.
ياز گلنده قوشلار لاپ چوخ جوججولده ديلر. قوجا ننه دئدي: «بو نه سس دي؟» پنجره دن ائشييه باخاندا گؤردو؛ قوشلار آغاجين بوتون بوداقلاريندا جوجه له ييب لر.
آنا قوشلار آغاجين اوستونه قونوب قوزانيرديلار. جوجه لرينه يئر قوردو، پيسپيسلي و تيرتير گتيريرديلر. اونلار بوتون گونو اويان بويانا اوچدولار.
قوجا ننه قيشقيردي: «ائي واي بو قوشلارين اليندن، من يالقيز قالماغي ايسته ييرم.»
بير نئچه گون سونرا آداملار قوشلارين گؤرمه يينه گلميشديرلر. اورا، اوتوبوس و اينسانلاريلا دولموشدو. بؤيوك لر آغاجين آلتيندا شكيل ساليرديلار. اوشا قلاردا اويناييرديلار.
قوجا ننه هيرسلانيب دئدي: «من تك ياشاماغي سئويرم.»
نئچه آي سونرا بير گون، قوجا ننه يوخودان دوراندا، قوشلارين سسيني ائشيتمه دي. نه قوش قالميشدي، نه يووا، نه ده جوجه!
قوجا ننه گؤي ده كي قارلي بولودلارا باخيب دئدي: «آخ قيش گلير، چوخ ياخشي. قوشلار گئتديلر. ايندي دينج ياشايا بيله رم.»
قيش گئچي. قوجا ننه باغچاسينا ييغيشان آدام لاري، شكيل سالانلاري و آغاج لارين آلتيندا اوتوران اوشاق لاري اؤزله دي و قوشلاري گؤيلو ايسته دي.
بونا گؤره ده قوجا ننه بير تابلو دوزه لديب، آغاجدان آسلادي: «قوشلارين هوتئلي»
سونرا بير ياز گونو قوجا ننه يوخودان دوراندا، قوشلارين جوججولتوسونو ائشيتدي. پنجره دن ائشييه باخاندا گؤردو هر يئر قوش ايله دولوبدور. چوخ سئوينيب دئدي:
«چوخ ياخشي اولدو قوشلار گلديلر. من داها يالقيز ياشاماغي سئوميرم.»قايناق:
http://huseynvahedi.ir/post/178
