یئنی امکداش/حیکایه Yeni əməkdaş
یئنی امکداش
یازار: حسین واحدی
اورمیه‌نین لاستیک فابریکاسینین آمبار بؤلومونده چالیشان 43 یاشلی جاوادین داخلی تئلفونو زنگ چالماغا باشلادی. جاواد بیلگی‌سایاردان ال چکیب دسته‌یی گؤتوروب اینجه سسله دئدی:
«آلو، سالام بویورون»
خط دالیندا عصب‌لی سسله دئییلدی:
«علیک! تئز تئلفونو وئر جاوادا ایشیم وار»
«آغا جاواد بورادا دئییل»
«هارا گئتدی»
«گئدیب حاماما، یووونا اولا شاماما»
«سن کیمسن؟»
«من رجبم، آمبارین یئنی ایشچی‌سی... آلو...»
اؤزگورلوگون دادی Özgürlüyün dadı (حیکایه)
اؤزگورلوگون دادی
یازان: حسین واحدی
«توتون , توتون» دئیه, اووچولار آرخامجا قاچیردیلار. اوره‌گیم ثانیه‌لره ماجال وئرمه‌ییردی. کؤپک‌لر ایسه منی توتوب صاحیب‌لرینین یانیندا باش اوجا اولالار دئیه, دؤرد آیاق دا، بورج آلیب, یئیینجه قاچیردیلار. آیاق‌لاریمین گوجو تؤکنمیشدی. یازیق کؤپک لره اوره‌ییم یانیردی. هئچ زاد الده ائده بیلمه‌یه‌جک‌دیرلر، آنجاق, بیر سوچ‌سوزو توتوب, یییه‌لرینه وئرمه‌کدن سونرا هئچ نه‌یی دوشمونمه‌ییردیلر. او یازیق‌لار یالنیز یییه‌لرینه قوللوق ائتمک اوچون یارانیب لاری, سانماق اولوردو. اووچولار ایسه اونلاری قیزیشدیرماق اوچون, چئشیدلی سس‌لر چیخاریدیلار. سون نفسیمه‌دک, آیاقلاریما زور وئریب, آددیم‌لاریمی بؤیوک گؤتوروب بوروق وئره- وئره قاچیردیم. بیر آن, آیاغیم بیر آغاجا ایلیشیب باشی اوسته یئره دوشدوم.
گؤبه‌لک‌لر ایله چینار/ Göbələklər ilə Çinar
یئنی‌یئتمه‌لر اوچون حیکایه
گؤبه‌لک‌لر ایله چینار
یازار: حسین واحدی
یاغیش یاغماق اوزره‌یدیر. قارا بولودلار های-کوی سالمیشدیرلار. ایلدیریم‌لار چاخاراق یاغیشین گلمه‌سینی قورتلاییردیلار.
بیرآزدان یاغیش یاغمایا باشلادی. آغاج‌لار سئوینج ایچینده یاشاییردیلار. هر یئر ایسلانمیشدی. بالاجا بؤجکلر،چکیرگه‌لر، ایلبیزلر و... اوت‌لارین یارپاقلارینین آلتینا سیغینمیشدیرلار.
بولودلار کؤینک‌لرین سیخیب قورتولاندان سونرا، دوم- دورو ماوی گؤی اورمانا گولومسه‌دی. گونش ایسه بولودلارین کؤچمه‌سیندن سونرا کئفی سازالیب، گؤیون دورولوغوندا اؤزونه باخیب ساچلارینی داراماغا باشلادی.
بو آرادا قوجا چینارین دیبیندن ایکی گؤبه‌لک ایلدیریم‌لارین چاخماسیندان سونرا یئردن پیرتلامیشدیلار. چوخ سئوینیردیلر. باشلارین بویان-اویانا چئویریب بؤیوک بیر یئرین صاحیبی اولدوقلارینی ساندیلار.
ایکی گوندن سونرا بیر آز تؤره‌لیب، قول-قاناد آچیب یاخینلیق‌لاریندان کئچن کیچیک بؤجکلری دیسکیندیریب، "بورالارا دولانمایین بورا بیزیم‌دیر" دئییب اونلاری قوولاییردیلار.
اوجا چینارلار ایسه بو بالاجا قوناقلارین ایشلرینه یاخیندان باخیب هئچ نه دئمه‌ییردیلر.
ایکیز گؤبه‌لک‌لر بیرگون یاخینلیق‌لارینداکی چیناریدا اورادان قوومالارینی دوشوندولر. چینارا ساری اوز توتوب:
"هئی یئکه دوه! بورادان تئز چیخ گئت بورا بیزیم یورد-یووامیزدیر" دئییب چیناری تعجب‌لندیردیلر.
قوجا چینار گؤبلک‌لرین بو سؤزوندن هویوخوب، اونلارا:
"آی قونشولار نه اولوب سیزه، نه دئییرسیز؟" دئدی.
سونرا داوام ائتدی: "دؤرد گون عؤمرونوزدن کئچیر، باشینیزا کولگه سالدیم، یئل‌دن قورودوم، یووا وئردیم سیزه، ایندی ایسه گمی‌ده اوتوروب گمی‌چی گؤزو چیخاریرسینیز؟"
گؤبلک‌لر اوجادان گولوب:
"سن نه دئییرسن قوجا، سن یوخ‌ایدین! بیز بورادایدیق! سن نه زامان گلیب‌سن؟ صاباحادک گئتمه‌سن اؤزوموز سنی قووالایاجاغیق، آنجاق بیزدن دئمک" دئییب، پیچیلداشدیلار.
چینار ایسه اؤزونو ایتیرمه‌ییب:
"اولسون زامان هر شئیی آچیق- آیدین ائده‌جک» دئیه اونلارا جاواب وئردی!
بو دئییشمه‌نین صاباحی، گونش ساچلارینی اورمانا سرنده، چیناری یوخودان اویاتدی. چینار اسنه‌ییب آیاغی آلتینا باخاندا، گؤردو گؤبله‌ک همیشه‌لیک یوخویا گئدیبلر.
گونش ایله گونه‌باخان
گونش ایله گونه‌باخان
یازان: حسین واحدی
ساری ساچلی گونش، گؤیه دیرماشمیش داغلارین آرخاسیندا، خوروزون بانلاماسینی گؤزله‌ییردی. آخشامدان، بوغدا تارلاسیندا اولان یالنیز گونه‌باخان ایسه قارا دنه‌لرینی گونشین باتان یئرینه توتوب، گونشی گؤرمك اومیدی ایله یوخلامیشدی.
بیر آزدان، خوروز، سسی‌نی باشینا آتدی. كند ائولرینین چیراق‌لاری بیر-بیر ایشیقلاندی. گونش گؤزله‌دییی آنی گؤرونجه دوغماغا باشلادی. گونه‌باخان، سئوینجك اولوب، اویاندی. سئودییی گونشی بیرداها گؤره بیله‌جه‌یینه چیچه‌یی چارتلادی...
آرتیق، گونش گؤی اوزونده، هر یانی باخیشی آلتینا آلمیشدی. گونه‌باخان، گونش بونون اوچون گلیب‌دیر دئیه، اوزون اوندان چئویرمیردی. او، اوچوب گونشین یانینا گئتمك آرزوسوندایدی.
یاواش-یاواش آخشام گلیب چاتیردی. گونش یئره سردییی ساچلارینی داراییب، هؤرمه‌یه باشلامیشدی. گونه‌باخان ایسه گونشین گئتمه‌سیندن اوزولوردو. او، بیلیردی بیرآزدان گونش باتی‌داكی اوجا داغین آرخاسینا گئدیب یوخ اولاجاقدیر...
گونش، گئتدی! آنجاق هئچ بیلمه‌دی گونه‌باخان‌نین آدیدا اونون آدیندان آلینیب‌دیر. او هئچ بیلمه‌دی، گونه‌باخان بوتون یاشاییشیندا اونون سئوگی‌سی ایله یاشادی!
کئچدی باهار- ی عؤمروموز
کئچدی باهار- ی عؤمروموز، ایت کوره‌دن کئچن کیمین
بیر گونش حیكایه‌سی
بیر گونش حیكایه‌سی
یازان: حسین واحدی
هامی شیرین یوخودایدی. شهرین زحمت‌چكن تمیزچی‌لرینین سوپورگه‌لریندن اولان خیس-خیس سسی، كوچه‌دن گلسه‌ده، هئچ كیم شیرین یوخوسوندان اولماییردی.
دوغودان، قارانلیقلار سیلینمكده‌یدیلر، اوره‌یه یاتان اذان سسی، شهری بزه‌مه‌یه باشلامیشدی. قارانلیقلار واختی الدن وئرمه‌دن باتی‌یا ساری یورویوردولر.
شهرین چینار اوستونده اویانمیش سئرچه‌لرین جوك-جوك ائتمه‌لری ایسه بیرینین گلمه‌سینی بللی ائدیردی. یاواش-یاواش، دوم-دورو گؤی، اوزه چیخیردی، بو آرادا، دان اولدوزو یالنیز قالمیشدی. بئله‌لیكله، گونش چیخیب، یاشاییشا سلام وئریب، قارانلیقلاری یوخ ائتدی!
بیر گونش حیکایه سی
بیر گونش حیکایه سی
یازان: آیدین اوجال
کؤچورن: حسین واحدی
گون او گون ایدی. صبیرلرین داشدیغی گون... اومیدلرین تؤکندیگی گون... دونیا گونشین یولونو گؤزله ییردی. ظولمت‌دن چیخماق ایسته ییردی. ظولمتله چارپیشماق‌دان یورولموشدو. گونش دوغا‌جاق و بوتون دونیانی ایشیغا بورویه‌جکدی ...
و بیر صاباح گونش دوغدو. ظولمتین سارای‌لاری باشینا چؤکدو. آددیم-آددیم دونیانین گؤزدن اوزاق یئرلرینه چکیلمه یه باشلادی. اونونلا گلن نه واردیسه، ائله اونونلا دا گئتدی. تکجه اوردا- بوردا قالان کؤلگه لردن باشقا ...
گونش نورونو یایدیقجا یاییردی. کؤلگه لر ایسه قورخوردو. کؤلگه لر بیر گون گونشین اونلاری دا یوخ ائده جه یین دن قورخوردولار. ائله بو قورخو ایله ده گونشه لکه یاخماغا باشلادیلار. آنجاق گونش لکه گؤتورموردو. اونلار, گونشین لکه گؤتورمزلیگینی بیلمه ییردیلر...
گونش قالخدیقجا کؤلگه لر اریمه یه باشلاییردی. بیر- بیر اریگیب یوخ اولدولاقلاریندان, چوخ کئچمه دی. آنجاق گونش نورونو یایدیقجا یاییر، گئت- گئده ظولمتین سیغیندیغی یئرلره قدر اوزانیردی...
گونش اوزاقلاشدیقجا کؤلگه لر باش قالدیریردی. سونرا کؤلگه لر بؤیومه یه باشلادی. و بؤیویه- بؤیویه هر بیری اؤز یئرینی آلدی. سئوینیردیلر. نئجه اولسا، خلاص اولموشدولار. نئجه اولسا، بیر آزدان ظولمت ده گله‌جکدی. چونکی گونش اوزاقلاشدیقجا اوزاق‌لاشیردی. بئله گئتسه، داغ لارین آرخاسیندا گؤرونمز اولا‌جاقدی...
یاغیش اولماق ایسته ییرم، اورمو گؤلومه
یاغیش اولماق ایسته ییرم، اورمو گؤلومه
یازان: حسین واحدی
یاغیش یاغاندا، اوره ییم سیخیلاردی، دئمك اولار دونیا بیله مه دارالاردی، ندنی، گونش اولاندا فوتبال اویناماغا واخت تاپاردیق اولا بیلردی! نه یسه نه بیله یدیم بیر گون ائله بو یاغیش حسرت اولاجاقدیر بیزه! گونشه، دایان، آزجا یاغیش یاغماغا زامان وئر دئمك ایسته ییردیم، بولودلار قاچین گونش دایانیب، سیز یاغاسیز، آغلایین، واخت قورتولماقدادیر، آماندیر یاز – یای – گوز(güz) – قیش دئمه یین، آنجاق یاغیش یاغدیرین...
سئومك آنلامینی بو دویغولار منه وئردیلر. هئچ نه یی یارادانیمدان سونرا بو قدر سئوه بیلمه میشدیم، هئچ نه یی بو قدر دوشونمه میشدیم، هئچ نه یه بو قدر نیسگیل ائتمه میشدیم...
یارادانیم! سن، ایشیق وئرن كیتابیندا هر ندن چوخ، «من، باغیشلایان و یاخشیلیق ائده نم» دئییبسن و منده بونا اینانیرام، سن سونسوز سئوگیندن و اوجسوز – بیجاقسیز یاخشیلیغیندان بیزه باغیشلایاجاقسان، بیلیرم...
یاغمور، نه اولار دایانمادان، یاغ، بوتون كدریمی سن آلمالیسان، سئوگیمی منه قایتارمالیسان، جانیما جان قاتمالیسان...
یاراداینم، بولودلار، یاغمور، اینسانلار، یارانیش لار و بوتون جانلی و جانسیزلار دویون و آنلایین منیم اورمو گؤلومو...
یارادانیم؛ بوتون سئوگینله قورو سئوگیمی. یاغ یاغیش؛ هئچ دایانما، گؤلوم سنی گؤزله ییر. گونش؛ چیخما هئچ. بولودلار؛ یولو آچین، گلین یوردوما، آغلایین، اؤلو اورمو گؤلومه!!
اوغرو اولماق ایسته ییرم
اوغرو اولماق ایسته ییرم
یازان : حسین واحدی
هامی نی دیندیردیم، دئدیم« نه اولماق ایسته ییر دینیز؟» بیلمه دیم ندن هئچ كیمسه اوغرو اولماق ایسته مدی؟ اؤز- اؤزومله؛ «چوخ گؤزل یوردوما دوزلوك گلیب دیر، اوغرولار بو یورددان كؤچوب لر، دوزلوك لره یئرلرین وئریب لر، نه گؤزل!» -دئدیم.
سونوندا اؤزومدن سوروشدوم بو سورویو؟ آی اوغلان سن ایسه نه اولماق ایسته ییرسن؟ هئچ بونا بیر آن دا دوشونوبسن می؟ قاییدیب اؤزومه بیله سؤیله دیم:
من اوغرو اولماق ایسته ییرم یوردوما، دام- دوواریندان دیرماشام هر گون، ائلیمین ائولریندن كدری- غمی اؤزومله اوغورلایب آپارام !
اوغرو اولماق ایسته ییرم، گیزلیجه گیرم خالقیمین اوركلرینه، الجك تاخام اللریمه، اوركلریندن كینی- نیفرتی، قازدیریب اؤزومله آپارام!
اوغرو اولماق ایسته ییرم، آخشام اوستو ائولره گئدم، تلویزیونلاری اوغورلایام، بلكه سئوگینی یئرینه قویام، اینسانلار آیریلمایا بیر- بیریندن، فیكیرلر عاییله یانیندا اولا، سریال لار- فیلم لر آرادان گئده، اوشاقلار، عاییله مئیدانا گیره!
اوغرو اولماق ایسته ییرم، دینمه دن، سس سیزجه یوردوما گیرم، هئچ كیم بیلمه دن ائله جه گئدم، كیمسه بیلمه یه آیریلیق نئجه اولدو، كیم اوغور لادی كیم قویمادی قارداش-قارداش دان، آتا- بالادان، باجی- باجی دان آیریلا بیلسین، هئچ كیمه دئمه رم من اوغورلادیم ، من آپارمیشام آیریلیغینیزی، تاپا بیلمه سیز اونو هئچ یئردن، قایتارمارام بیر داها سیزه!
اوغرو اولماق ایسته ییرم، آنا دنیزلرین سویونا گئدیب دنیز بیلمه دن سو لارین قاپام، اؤزومله، قورموش گؤلومه گتیرم، قویمایام قورویا، اوركلر سولا!
اوغرو اولماق ایسته ییرم، قارانلیق دوشنده، گیرم یوردوما، آج لیغی، یوخسول لوغو گؤتوروب قاچام، قویمایام بیر اوشاق آج یاتا بیلسین، حسرت ده قویام یوخسول لوغو من!
اوغرو اولماق ایسته ییرم، من لیغی- غرورو، سوی تاپینماسین، اوغورلاییب آپارام، قویمایام كیمسه دئیه بیرینه من سندن اوستونم، اؤنجه گلمیشم!
اوغرو اولماق ایسته ییرم، گونش چیخمامیش گیرم یوردوما، بوتون دوشمنلیك لری گؤتوروب قاچام، قویمایام ساواشی، قالا یوردوما، یئرینه باریشی- صولحو وئرم من!
اوغرو اولماق ایسته ییرم، بوتون ساتقین لاری اوغورلایام ائلیمدن، ائلیمده راحاتجا نفسین چكه، قویمایام یارپاقلاری سولا ائلیمین!
اوغرو اولماق ایسته ییرم، بوتون سیلاحلاری یئر اوزوندن اوغورلاماق ایسته ییرم...
اوغرو اولماق ایسته ییرم من، یازیلاریمدان حاققی سیلن اولسا، اونو اوغورلاماق ایسته ییرم من، قویمارام یازیلاریمدان حاق سؤزو سیلینیب آلینسین مندن!
تاپماجالار
تاپماجالار
حاضیرلایان:
حسین واحدی
ادبیاتیمیزین ان
ماراقلی بؤلوملریندن بیری، تاپماجالاردیر. ائلیمیز، بیر-بیرینین بیلگیسین اؤلچمك
ایله مشغول اولدوقلاری اوچون بیر- بیره تاپماجا دئیه رلر. آشاغیدا سیز عزیز
اوخوجولاریمیز اوچون نئچه تاپماجانی گتیرمیشیك. اونلاری اوخویوب، جاواب لارینی
دوشونون. بیلمه دیگینیز زامان، جاوابلارا باخین.
1ـ آرابا گئدر ایزی یوخ، یانار، یانار، كؤزو یوخ؟
2ـ چؤلده داغدی، پامبیق لیقدا آغدی، ائوه گلر، سویا دؤنر؟
3ـ بیری گئدر گلمز، بیری یاتار دورماز؟
4ـ او نه دیر، ایشیغی وار، ایستی سی یوخ؟
5ـ آغاجین توتماق اولماز، عطیریندن دویماق اولماز؟
6ـ بیر تندیریم وار، ایكی چؤرك توتور؟
7ـ بیر دامیم وار، تك دیركلی؟
8ـ گوندوز یاتار یووادا، گئجه گزر، اوبادا؟
9ـ نه ائوده دی، نه چؤلده، نه یئرده دی، نه گؤی ده؟
10ـ او نه دی، یئتمیش ایكی دیل بیلیر؟
11. الیم ایله اكه رم، دیلیم ایله بیچه رم؟
12. آخشام آچیلار، سحر ییغیلار؟
13ـ آچماز، اوچماز، یئره دوشسه، بئلی سینماز؟
14ـ بیر دامیم وار، قاپیسی یوخ؟
15ـ من گئدیرم، اودا گئدیر؟
تاپماجالارین جاوابی، یازینین آردیندا
