یاغیش آلتیندا پیشیک Yağış altında pişik
آمئریکا‌لی قادین پنجره‌دن چؤله باخیردی. کوچه‌ده یاشیل اوتوراجاق آلتیندا بیر پیشیک بوزوشموشدو. اوتوراجاق بیر قیراغینا قیسیلمیش پیشی‌یین تکجه دردی ایسلانماماق ایدی.
“گئدیرم پیشیگی گتیرمه‌یه.” آمئریکا‌لی قادین دئدی.
“من گتیررم.” أری یاتاقدان دیلله‌ندی.
“یوخ، اؤزوم گئدرم. یازیق پیشیک صندلی‌نین آلتیندا قیسیلیب قالیب.”
أری ایکی یاستیغی باشی آلتینا قویوب کیتابی اوخوماغا داوام ائتدی.
“چالیش ایسلانما.” قادین اوتاقدان چیخارکن آرخاسینجا أری سسله‌ندی.
قادینسا پیلله‌لردن یئیین دوشوب چؤله چیخماغا تلَسدی. مسافر‌خانا صاحبی قادینی گؤرن کیمی باشی ایله سلاملادی .اونون ماساسی گیریشین قیرناسیندا یئرلشیردی. هوندور یاشلی بیر کیشی ایدی.
“Il piove”، (یاغیش یاغیر) قادین دئدی. مسافر‌خانا صاحبین‌دن خوشو گلیردی.
“Si, Si, Signora, brutto tempo”. (بلی، بلی خانیم. پیس هاوا‌دیر) چوخ پیس.
کیشی قارانلیق اوتاغین سونونداکی ماسانین آرخاسیندا دایانمیشدی. قادین اونو به‌یه‌نیردی. مسافر‌خانا صاحبی اولا‌راق گیلئیلره جدی یاناشماسینی به‌یه‌نیردی. عظمتینی به‌یه‌نیردی. اونا قوللوق ائتمه‌یه چالیشماسینی به‌یه‌نیردی. مسافر‌خانا صاحبی اولماق قورورونو به‌یه‌نیردی. یاشلی، سرت اوزونو و بؤیوک أللرینی به‌یه‌نیردی. بونلاری دوشونه-دوشونه قاپینی آچیب کوچه‌یه چیخدی. ائله یاغیش یاغیردی کی، توت اوجوندان گؤیه چیخ. پلاش‌لی [یاغمورلوق گئیمیش] کیشی بوش مئیدانی کئچیب کافه‌یه گئدیردی. پیشیک هارداسا بورا‌لاردا اولما‌لی ایدی، ساغ طرفده. ایسلانماماق اوچون پرواز بویو [قوش بالاسی اوچوشو] گئتمک اولاردی. قاپی آغزیندا دایانمیشدی کی، بیردن باشی اوستونده چتیر آچیلدی. چؤننده اوتاق‌لارینا قوللوق ائدن خادیمه‌نی تانیدی.
“ایسلانماماغینیز اوچون،” ایتالیانجا دئییب گولومسه‌دی. شوبهه‌سیز کی، مسافر‌خانا صاحبی گؤندرمیشدی. چتیری توتان خادیمه ایله بیرگه بیر آز گئتدیک‌دن سونرا پنجره‌لری‌نین آلتینا چاتدیلار. اوتوراجاق اورادایدی، یاغیشدا اوتوراجاغی یاخشیجا تمیزلندیگین‌دن یاشیل بویا بیر باشقا گؤزل گؤرونوردو. آما پیشیک‌دن بیر ایز یوخ ایدی. یامان راحاتسیز اولدو.
“Ha perduto qualque cosa, Signora?” (نسه ایتیرمیسینیز خانیم؟)
“بوردا پیشیک اولما‌لی ایدی.” آمئریکا‌لی قیز دئدی.
“پیشیک؟”
“Si, il gatto.” (بلی، پیشیک)
پیشیک؟ خادیمه گولدو. “یاغیش آلتیندا پیشیک؟
“بلی،” آمئریکا‌لی جاواب وئردی، “اوتوراجاغین آلتیندا. ائله ایسته‌ییردیم کی. من پیشیک ایسته‌ییرم.”
او اینگیلیس دیلینده دانیشاندا خادیمه‌نین سانکی اوزو تاریم [کیپ/محکم] چکیلمیشدی.
“گلین، سیگنورا،” او دئدی. “ گرک گئری قاییداق. یوخسا ایسلاناجاقسینیز.”
“دوز دئییرسن،” آمئریکا‌لی قیز بیر آنلیق دوشوندو، “ قاییداق.”
اونلار چینقیل یول بویو گئری قاییدیب ایچه‌ری گیردیلر. خادیمه آرخادا قالیب چتیری باغلادی. قیز ایچه‌ری کچه‌رکن padrone (صاحبکار) ماسانین آرخاسین‌دان خفیفجه باشینی ترپتدی. قیزین ایچینده آنلاشیلماز حس‌لر اویاندی. padrone اونا اؤزونو هم بالاجا، هم ده واجب حس ائتدیریردی. بیر آنلیق او، اؤزونو تامامیله واجب بیری کیمی حس ائتدی. پیلله‌لرله یوخاری قالخدی. قاپینی آچدی. گئورگ یاتاقدایدی، هله ده کیتاب اوخویوردو.
“پیشیگی گتیردین؟” کیتابی باغلایا‌راق سوروشدو.
“یوخویدو.”
“گؤره‌سن هارا گئتمیش اولار؟!” گؤزلرینه استراحت وئریب سوروشدو.
قادین یاتاقدا اوتوردو.
“چوخ ایستردیم منیم اولسون. هئچ اؤزومده بیلمیرم کی، نه‌یه بو قدر چوخ ایسته‌ییرم. یازیغین بو یاغیشدا چؤلده اولماسی هئچ یاخشی دئییل.”
گئورگ یئنی‌دن اوخوماغا باشلادی.
قادین یاتاقدان قالخیب بَزک اوتوراجاغینین آرخاسیندا اوتوردو. أل گوزگوسونده اؤزونو سوزدو، گوزگوده‌کی سیماسینا اوزون اوزادی باخدی. سونرا باشینین و بوینونون آرخاسینی نظردن کئچیردی.
“ساچیمی اوزاتسام نئجه اولار، نه دوشونورسن؟ “ یئنی‌دن گوزگویه باخیب أرین‌دن سوروشدو.
گئورگ اونون اوغلان کیمی کسیلمیش ساچلارینا باخدی.
“منیم بئله ده خوشوما گلیر.”
“آرتیق یورولموشام،” قادین دئدی، “ اوغلان کیمی گؤرونمک‌دن یورولموشام.”
گئورگ یاتاق‌داکی وضعیتینی دییشدی. یولداشی دانیشماغا باشلایان‌دان بری گؤزونو چکمه‌دن اونا باخیردی: “سن چوخ گؤزلسن.”
گوزگونو اوتوراجاغا قویوب پنجره‌یه یاخینلاشدی، گئتدیکجه تورانلاشان [قارانلاشان] هاوایا گؤزلرینی زیلله‌دی. “ساچ‌لاریمی اوزاتماق ایسته‌ییرم، داراییب آرخا‌دان ییغماق، اونلارین کولَکده دالغالاندیغینی حس ائتمک ایسته‌ییرم. دیزیمده اوتوران، من سیغاللادیقجا میریلدایان پیشیک ایسته‌ییرم.”
“دوغوردان؟” گئورگ ائله یئرینده جاواب وئردی.
“بیرده کی، اؤز یئمک سئتیم اولان ماسامین آرخاسیندا اوتورماق ایسته‌ییرم و بیرده شام [شمع]. ایسته‌ییرم یاز اولسون، سونرا ألیمی ووراندا ساچیمین اوزون اولدوغونو بیلمک، پیشیک و یئنی پالتارلار ایسته‌ییرم.”
“آز دانیش، نسه گؤتور اوخو.” گئورگ دئدی و اوخوماغا داوام ائتدی.
اونون حیات یولداشی پنجره‌دن قارا بوشلوغا باخیردی، یاغیش هله ده پالما‌لارین [نخل‌لرین] یارپاق‌لارینی دؤیج‌له‌ییردی.
“نه اولورسا اولسون من پیشیک ایسته‌ییرم. ایسته‌ییرم. ائله ایندیجه. اوزون ساچیم یا دا مشغولیتیم یوخدورسا، پیشیگیم مطلق اولما‌لی‌دیر.”
گئورگ آرتیق قولاق آسمیردی. کیتاب اوخویوردو. قادین دا ساده‌جه میدان‌داکی کؤزَرَن [گؤز قاماشدیران] ایشیغا باخیردی.
قاپی دؤیدولدو.
“Avanti.” (بویورون) گئورگ باشینی قالدیریب سسلندی.
خادیمه قاپینین آغزیندا دایاندی .قوجاغیندا قارا-قهوه‌یی رنگ‌لی پیشیک واردی و اونو اؤزونه دوغرو سیخیردی.
“باغیشلایین،” دئدی، “Padrone (رئیس) بونو Signora (خانیم) اوچون گؤندریب.”
آچیقلاما:
1. تورکجه‌یه چئویرن: آرزو فاریز
2. قایناق: agta
