من ايتن گون
قويون، اونودماميش دئييم، مني تانيماغا، سؤزو اولمايان، باشقا بير ايپ اوجو ايسه واردير. جيب لريم تئيخا (هميشه) گونده ليك، درگي ايله كاغيذ لا دولودور. ال چانتاسي ايسه واريمدي. اونوندا ايچي تيخيلي دير. زيپي زور ايله باغلانير. چوخ السيز- آياقسيز ايله آوارايام. شهرين يوخاريسينا گئتمك ايسته ديگيم ده، اؤزومو شهرين آشاغيسيندا تاپيرام. دوغويا گئتديگيم چاغدا ايسه، باتي دان باش چيخارديرام. گون آللاهين گونو گئجيكيرم. ياديمدا، هئچ كيمسه ني ساخلايانميرام.
تئيخا زاد- ماديمي يئرده قويورام. گونده يوز دؤنه اؤزومدن، «قلميمي هارا قويدوم؟ پولوم هارادادير؟ اي واي منديليم هاني؟ دفتريم هانسي قبيرده؟»- سوروشورام. من، آدليم آشاغي حافظه لي، پروفسورلاردانام.
فلسفه بيليم يوردوندا، ايللردير درس وئريرم. درس كيلاسيمي تاپماقدا، هله ده سورون (دردسر) چكيرم. فاكولته نين (دانشكده نين) آسانسور ايسه من له دوز دئمير. سون قاتا گئتمك ايسته ينده، مني يئر آلتينا آپارير. گون لرين چوخوندا قاپيسي منيم اوزومه آچيق اولمايير. آسانسورون قاپيلاري منيم بؤيوك دوشمنيم ساييلير.
داواملي گيجليك ايله، اشيالاريمي ايتيرمك دن علاوه ايسه اونوتقانام(فراموشكارام). پالتو ايله قهوه خانايا كئچسمده، ائشيگه چيخديغيمدا پالتو اينيمده اولمور. هله ياديما گلنده، هانسي قهوه خانادا اولدوغومو خاطيرلايانميرام. بؤرك، كيتاب، چتير، ياغمورلوق (باراني) ايله هر نه دن پيس ال يازيلاريمي ساغ- سول ايتيريرم.
بير گئجه، ائوه چاتاغيما تله سيرديم. تاكسي چاغيرديم. تاكسي سوروجوسو، «هارا؟» دئدي. من ائويمين هارادا اولدوغونو يادا سالانميرديم.
«ائوه گئديرم!» دئديم.
ـ چاشقين ليق لا، «ياخشي، آغانين ائوي هاردادير؟» سوروشدو.
ـ «نه دئييم، ياديما گلمير!» دئديم.
ـ شريف آدينيز؟
ـ پروفسور اشلميل.
سوروجو، «پروفسور، من سيزي بير تئلفون كؤشكونون يانيناجان آپارارام. تئلفون باشقاريجي سيني (راهنماسيني) يارپاقلاييب، ائوينيزين آدرسيني تاپين.» دئدي.
سونرا، مني يول اوستونده اولان بيرينجي توختاجيليغاجان (داروخانه يه جن) آپاردي. توختاجليق دا بير، هاميسال تئلفون كؤشكو وارييدي. ائنديگيمده، ايگيتليگي اولمايان سوروجو، دايانمادان گازلاييب گئتدي.
هله، توختاجليغا گيرمه ديگيمده، چانتامين تاكسي دا قالديغيني خاطيرلاديم. تاكسي نين داليجا قاچديم. باغيرديم: «چانتام! چانتام!». آنجاق، تاكسي سسيمي ائشيتمه يه قه در اوزاقلاشميشدي.
توختاجيليق دا تئلفون كيتابچاسيني گؤتوروب، يارپاقلاديم. «ش» حرفين آلتينا باخديغيمدا باشيمدان توستو قالخدي. يئددي- سگگيز اشلميل-ي سيرالاميشديرلار. آنجاق منيم آديم آرالاريندا دئييل دير. او آندا، نئچه آي بوندان اؤنجه ياشام يولداشيمين، تئلفون باشقاريجي دفتريندن (دفتر راهنماي تلفن)، آديميزي پوزماق تصميمينين توتماسيني خاطيرلاديم. ندني ايسه منطق لي ايدي. اؤيرنجيلريم، گئجه- گؤندوز تانيماييب، ايسته ديكلري ساعاتدا بيزي راحاتسيز ائديرديلر. اوندان كئچسكده، باشقا اشلميل لر له ايشلري اولانلار يانليشجا بيزيم نمره ميزي توتوردولار.
باشيما نه كول اله ديگيمده قالميشديم. نه ته هر ائوه دؤنوم. اولدوقجا، اليمه چاتان بيتيك (نامه) لري، يان جيبيمه قويارديم. آنجاق پيس شانسيمدان اوگون جيب لريمي تميزله ميشديم. آيريجا ايشي گتيرديگي بو گون دوغوم گونوم اولدوغو اوچون ياشام يولداشيم دوستلاريميزي شاما چاغيرميشدي. بالاجيق، بؤيوك كئيك پيشيريب، اوستونه گؤزل شمع لر ايله بزه ميشدي.
يقين، يازيق قوناقلار، منه تبريك دئمه يه ايله شيب، گؤزله ييرلر. من ايسه بورادا توختاجيليق دا دوروب، ائويمين تاپماغينا چاليشيرام.
آنسيز(ناگهان)، يولداشلاريمين بيرينين تئلفون نومره سين خاطيرلاديم. «دوكتور مادرهه، ايندي اونا زنگ آچارام.» نومره سين توتدوم. بير گنج قيز دسته يي گؤتوردو.
ـ «دوكتور مادرهه بي ين تشريفي وار؟»
ـ بالاجا قيز، «يوخ» دئدي.
ـ خانيمي ايسه يوخدورلار؟
ـ يوخ، ايكيسيده ائشيكده ديرلر.
ـ هارادا تاپا بيلمك لريني، بيليرسينيز؟
ـ من اوشاق باخيجي سييام (پرستارييام)، آقا ايله خانيم، پروفسور اشلميل-ين ائوينه تشريف آپاريب لار. سؤزونوز اولورسا بويورون. اونلارا كيم تئلفون ائديب دير، دئييم؟
ـ پروفسور اشلميل.
ـ آقا ايله خانيم، بير ساعات اؤنجه، سيزين ائوه گئتمه يه، يولا دوشوبلر.
ـ باغيشلايين هارا گئتديكلريني بيليرسينيز؟
ـ ايندي سؤيله ديم، اونلار، سيزين ائوه گئديبلر.
ـ منيم ائويمي تانيييرسينيز؟
ـ آغا شوخلوق ائديرسيز؟
نئچه دقيقه دن سونرا باشقا يولداشلاريمدان نئچه سينين آد ايله تئلفون نومره لري ياديما گلدي. اونلارين هاميسينا تئلفون ائتديم. آنجاق هاميسي پروفسور اشلميل-ين ائوينه گئتميشديرلر. گيج ايله مايماق ليق لا، خياواندا دايانيب، نه ائتديگيمي بيلمه ييرديم. آنسيز ياغيش ياغدي. چتيريمي آچماق ايسته ديم:«چتيريم هاردادي؟» بونودا سوروشارلار؟
ياديما گلدي. اولا بيلر، بير يئرده قويموشام! ياواشجا، بير ائوين قاپي اوستو تالواري-نين (سايبان) آلتينا سيغينديم. ائله بيل گؤيون تاواني (سقفي) دلينيب دير. ايلديريم باغيريب، پارلاييردي. بو شانسا لعنت!
گونون بوتونو هاوا ايستي ايله گونشلي ايدي. ايندي ايسه من ايتميشديم، همده چتريمي ايتيرميشديم، توفان گليب دير.
ائله بيل ياغيش كسيلمك ايسته مه ييردي. اؤزومو مشغول ائتمك اوچون تويوق ايله يومورتانين اؤنجه ليك فلسفي قضيه سينين چؤزمه سينه، باشلاديم. هئچ باجاريقلي فيلسوف بو قضيه يه اويغون ايله دوزگون جاواب وئره بيلمه ييب دير. قاچينماز (لابد)، تقديريميش من بو مسئله ني دوشونم. اولابيلر، بير اويغون جاواب تاپام.
سويو گؤيدن دولچا ايله تؤكوردولر، سانيرديم. ياغيش سويو اوست- باشيما داميب، مني ايسلاديردي. سويوق جانيمين كؤكونو بوروموشدو. بورنومون سويو آخيردي. آسقيريق، آسقيريق داليجا.
بورنومو سيله جك (دستمال) ايله تميز له مك ايسته ديم. آنجاق سيله جه گيمي ايسه باشقا يئرده ايتيرميشديم.
او آندا، ياغيشدان ايسلانميش، تيتره ييب ، كدرلي باخيشيني منه ديكن، بؤيوك قارا بير ايتي گؤردوم. تئزجه باش بارماغيم، ايت ايسه اؤزيولونو ايتيريبديري دويدو (حس ائتدي). او ايسه ائوينين آدرسيني خاطيرلاميردي. يازيق ايت! بيله سينه فيشقالاديم. ايت دايانمادان يانيما قاچدي. محبتي اورگيمه ياتدي. اونلا دانيشديم. ائله بيل آدام ديلي بيليردي. «يولداش من له سن قايغيداشيق. من شانسي اولمايان، آوارايام. سن ايسه آوارا ايله يازيق ايت سن.
قاچينماز، بو گون سنينده دوغوم گونوندور. يقين، سنه ده قوتلاما (جشن) توتوبلار. ايندي ايسه مينم كيمي شانس سيز، آدامين اوره گي سنه يانماق اوچون، بورادا دايانيب تيتره يير سن.
حتمن ييه ن ايسه قاپي- قاپي سني آختارير. اولمايا سنده منيم كيمي آجسان؟»- دئديم.
ايتين ايسلاق باشينا ال چكديم. ايت ايسه قويروق توولاييب، باشين ترپتدي. «هر نه منيم باشيما گلسه، سنين ده باشينا گله جكدير. سني يالنيز بيراخمارام. هر ايكي ميز ايسه ائويميزي تاپاجاييق. سنين ييه ني تاپمازساق سا، سني ائوه آپارارام. اليني وئر گؤروم.»- دئديم.
ايت ساغ الين قووزاييب، اليمه قويدو. قوشقوسوز (بي ترديد)، نه دئديگيمي آنلاييردي. بير تاكسي توو ايله يانيميزدان كئچيب، خياوانين پالچيغيني اوست- باشيميزا سپه له دي. نئچه مئتر قاباقدا آنسيز داياندي. بيري هاراي چكدي: «اشلميل، اشلميل». باشيمي قالديرديم. گؤردوم، تاكسي نين قاپيسي آچيلدي. بيري ائشيگه چيخيب، هاراي چكدي: «اشلميل، بورادا نه ائديرسن؟ بيريني گؤزله ييرسن؟»
ـ «هارا گئديرسن؟» دئديم.
ـ «بونو سوروشماق ايسته مير. سيزين ائوه گئديرم. گئج اولوب، آنجاق گئج گئتمك، گئتمه مكدن ياخشي دير. هله ندن اؤزون ائوه گئتمه ييب سن؟ بو ايتي هارادان گتيريب سن؟» -دئدي.
ذوق لو اولوب، سئوينج له «سني، تانري يوللاييب دير! نه گئجه يدي! ائويمين آدرسيني اونوتموشدوم. چانتام تاكسي دا قاليبدير. چتيريمي ايسه ايتيرميشم. ياغمورلوغومو ايسه هارادا قالديغيني بيلمه ييرم.» - دئديم.
يولداشيم، «اشلميل! دونيادا آشاغي حافيظه لي پروفسور گئرچك دن وارسا، سن اؤزون اونون كسين سيمگه سي سن!» - دئدي.
آپارتمان-ين زنگين چالديغيمدا، ياشام يولداشيم قاپيني آچدي. مني گؤردويو آن، «اشلميل، ايندي يه جه هانسي خارابادايدين؟ چانتان هاني؟ بوقوناقلارين هاميسي آخشامدان ايندي يه جن سني گؤزله ييب لر. چتيرين؟ ياغمورلوغون؟ بو ايتي هارادان گتيردين؟»- دئييه چيغيردي.
يولداشلاريم بيزي دؤوره له يب، سوروشدولار: «هاردايدين؟ سنه چوخ نيگران اولدوغوموزدان، قوناقليق بورنوموزدان گلدي. اولا بيلر، باشينا بير قادا گليب دير، دوشوندوك.» ياشام يولداشيم بير داها، «بو ايت كيمين دير؟»- سوروشدو.
آزاقدان (بالاخره)، «بيلميرم! ويلان خياوانيندايدي. ائوه گتيرديم. اينديليك (عجالتا‍ً) آديني هاپي قوياق!»- دئديم.
حيات يولداشيم (همسرم) آغزيني بوروب، «هاپي! اللرين آغريماسين. پيشيگيميزين ايت دن آجيغي گلديگيني بيليرسن. پاپاغانلار ايسه اونو گؤردوكده، يقين سكته ائدرلر.»- دئدي.
ـ «اينجيدن ايت دئييل. پيشيك ايله آليشار. يقين قوشلارا دا سئوگي باغيشلار. ياغيش دا تيتره مه ده قويدوغوم اينصاف دئييل دير. گؤزل حئيواندير.»- دئديم.
بو سؤزو دئديگيمده، ايت اورك ياخان ونگيلتي چكدي. پيشيك اوتاغين ايچينه قاچدي. ايتي گؤردوكده آرخاسيني اَييب، اوستونه آتيلدي. ائله بيل گؤزونو چيخارماق ايسته ييردي. پاپاغانلار ايسه قفس لرينده قاناد چاليرديلار. چيغيريب هاراي چكيرديرلر. داغيناق بازاركيمي ايدي. گل گؤره سن!
اوره يينيز، ماجرانين سونون بيلمك ايسته يير؟ هاپي، هله ده بيزيم ائوده قالير. پيشيك له او بير- بيرله آليشيب لار.
حيات يولداشيم، هاپي- ني مندن چوخ سئوير. هر زامان ايتي ائشيگه آپارديغيمدا، ائشيم، «ايندي ائوينيزين آدرسيني اونوتماياسينيز! ايكي نيزيده دئييرم.»- دئيير.
چانتام هئچ زامان تاپيلمادي، سؤز يوخ، چتير ايله ياغمورلوغودا. مندن اؤنجه كي بوتون فيلسوفلارا تاي، تويوق ايله يومورتا چتينليگي نين چؤزمه سينين خئيريندن واز كئچديم. يئرينه بير كيتابين يازماسيني باشلاميشام. آدي «اشلميل، خاطيره لري»- دير.
البته، ال يازيلاريمي تاكسي دا، رستوران دا، يوخسا پارك اوتوراجاغيندا (نيمكت ده) قويماسام سا، تئزليك له اونو گؤره جكسينيز. اينديليك بو بؤلومو، اؤرنك اولاراق ساخلايين.
