ياشلي لار؛ دونه نين گنج لري، بوگونون اونودولموشلاري
ياشلي لار؛ دونه نين گنج لري، بوگونون اونودولموشلاري
ايندي يه دك ياشلي لاري (سالمندان) دوشونموشوك مو؟ اونلارين ايستك لريني و احتياجلاريني بو گونكو ايمكانلارلا اويغونلاشديرميشيك مي؟ ياشلي لارا ده ير وئرمه يه نه قدر اؤنم (اهميت) وئرميشيك؟ ... و بونلارا تاي چوخ سورولار اولا بيلر، آمما جاواب لاري نه قدر منطق ليدير؟ خزل (مهر) آيينين دوققوزو ياشلي لار گونو آدلانيب، آمما كيم لر بو گوندن خبري وار و كيم لر بو گونه ده ير وئريب؟
ياشلي لار ايستر- ايسته مز هر بير توپلومون (جامعه نين) ده يرلي و تجروبه لي اينسانلاري ساييلير، دئمك اولار ياشلي لاريميز دونن ايله بوگون آراسيندا كؤرپو قوران و كولتوروموزو و ده يرلريميزي ساباح لارا داشييان (انتقال وئرن) ان ده يرلي وارليق لاريميزدير. بو اينسان لار عؤمورلرينين چوخونو توپلوما و اؤلكه يه قويدوقلاري اوچون عؤمورلرينين سونونا كيمي راحاتچيليق دا اولماق و ايستك لرينه ده ير وئريب اونلارا يئتيشمك حق لري واردير. اونلار بيزلري بو گونلره و گله جه يه حاضيرلاييب لار و گرك بيزده اونلارا دينج و راحات بير ياشاييش ياراداق، قويماياق بيرينه موحتاج اولسونلار. دؤؤلت ده بونلارا ده ير وئرمه ليدير و توپلومدا بونلار اوچون بعضي ايشلري ائتمه ليدير. اوتوبوس دا، خيياوان لاردا، پارك لاردا و... هر يئرده بونلار اوچون دينجلمك و راحاتجا گزمك ايمكانلاري قويماليدير. كئچميش لرده بير آغ ساققال آدام اوتوبوسا مينن ده گنج لر و اوشاق لار اؤز يئرلريني بو اينسانلارا وئررديرلر، آمما گئتديكجه بو گؤزل دب اؤز يئرين الدن وئرير و عاييله لر بو ده يرلي كولتوره ديققت ائتميرلر، چوخ گؤرونور بير آتا يوخسا آنا 10 ياشيندا اوشاغيني يانيندا اوتوردوب و بير ياشلي آدام اوتوبوسا ميننده اوشاغا اؤيرتمير، اينسان ياشلي يا حؤرمت ائتمه ليدير و بو حؤرمتي ساخلاماق اوچون يئرين ياشلي يا وئرمه ليدير، البته بو حق دن كئچمك دئييل و باتي (غرب) اؤلكه لري كيمي بيزيم ايسلامي اؤلكه ميزده بو قونو فرق ائلير و كوتله (مردم) بو ايشي بير سايغي و حؤرمت بيلير و بو ايش گرك هر يئرده قورونا و ساخلانيلا.
جامعه ده دؤولت و ميللت نه قدر ياشلي لارا ايمكانلار ياراتسا ائله بيل اؤزوموزون گله جه ييميزه ايشله ييرك، هئچ فيكيرلشميريك بير گونده بو دؤوران بيزه چاتاجاق دير و بيزده توپلومون ياشلي سي اولاجاييق و او زامان بعضي گؤرمه دييميز ايشلرين حسرتين چكه جه ييك! سانكي ياشام بويو گنج قالان كيمي ياشلي لارا يان گؤز له باخمامالييق و اونلاري ياشاميميزين آرتيق تيكه سي بيلمه مه لييك! بعضي اؤؤلاد لار بو ايشده يامان مهارت لري واردير و بير آز دينجلييه يئتيشنده ياشلي آتا- آنالاريني قوجالار ائوينه تاپشيريرلار، بعضي لري آياق لارين بوندان دا داها چوخ اوزالديب، اونلارين مال- مولك لرين اله كئچيرديب بيله لرينه زحمت چكيب بؤيودوب بورا يئتيرديك لري اينسان لاري ائودن ائشيگه آتيب هئچ بير ذره ده آتا- آنا لاريني دوشونمه ييرلر.
ياشلي ليك دا، اوشاق ليق و گنج ليك دؤورانينا تاي بير عؤمور سيراسي دير و او بيري دؤوره لرين ترسينه بو دؤوره ده انرژي و گوج دن خبر يوخدور و بدنين قووتي آزالير و بدن راحاتچيليق ايسته يير و بونو دوشونن هر كيمسه ياشلي لارا دينج بير ياشام حاضيرلاماليدير. بعضي ديققت سيزليك لره گؤره بعضن خيااوانلاردا و ايش يئرلرينده اوشاق لارين آتا- آنالاريندان صاحاب چيخماماسي اوچون ياشلي لار يئنيدن بو دؤوره ده ايشله ييرلر.
ياشلي ليق فقيرچيليك و يوخسول لوق لا بير يئرده اولماسي ياشلي اوچون زور بير دوروم ياراداجاق و ياشلي نين ياخين لاري و اوغول- اوشاق لاري بو دورومون يارانماسينا ايجازه وئرمه مه ليديرلر، يوخسا عؤمورون سون لاريني فلاكته دوغرو آپاراجاق دير.
ياشلي لارا نه لر ائده بيله ريك:
1. اونلار بيزلري اوشاق واختي قول- قانادلاري آلتينا توتوب بئجه ريب لر و بيزده اونلارا تاي بو ايشي ياشلي ليق دؤورانيندا گؤرمه لييك.
2. اونلارين ريفاه لاري اوچون ايمكانلار ياراتمالييق.
3. بو ياش قوروپونا فايدالي قانون لار يازمالييق.
4. ياشلي لارا حؤرمت ساخلماغي اوشاق لاريميزا اؤيرتمه لييك.
5. اونلارين بوش واخت لارينا ده ير وئريب، علاقه لري اولدوغو ايش لري ائتمك لرينه و گزمك لرينه يول آچمالييق.
6. ايشلريميزده اونلاريدا ساييب و اونلارين تجروبه لريندن يارالانمالييق.
7. جامعه ده راحاتجا گزيب، ائشيگه چيخماقلارينا ايمكانلار قويمالييق.
8. ايستيراحت واخت لاري اونلارين دينج بير يئرده ياشامالاريني دوشونمه لييك.
9. اؤنجه دن بو دؤوره يه حاضيرلانمالييق و پول و راحات ياشاييش اوچون واخت آييرمالييق.
10. اونلاردان ياشاماق اومودونو كسمه ييب، بيزيم يانيميزدا شن (شاد) بير ياشاييش كئچيرمه له رينه ايمكان وئرمه لييك...
بو قونودا چوخ سؤزلر دئمك اولار و هر كيمسه نين چئشيتلي باخيشي اولا بيلر، آنجاق بو قيسا يازيدا هدفيم بو عزيزلري خاطيرلاماق و اونلارا واخت آييرماغي گؤسترمك اييدي و اومود ائديرم بيزيم جامعه ميزده هئچ بير ياشلي اومودسوز و دينجسيز بير ياشامي اولماياجاق و گنج لر داها آرتيق بو اينسانلارا ده ير وئره جك لر. سونوندا دئمه لييم اونوتماياق ساباح بيزده ياشلي اولاجاييق و او گونون گليب يئتيشمه سينه حاضير اولمالييق.
يازان: حسين واحدي
