اوشاق لار و آذربايجان ناغيل لاري
اوشاق لار و آذربايجان ناغيل لاري
هاميميزين اوشاق ليغيندا، ناغيل خاطيره لري واردير و بؤيوك اولدوغوموزدادا او گون لري خاطيرلاياندا گؤزل دويغوسال آن لار (لحظه لر) ياشاديريق. او دؤوراندان الوان خاطيره لريميز قالير و بو خاطيره لرده او زامانين ناغيل لاريندان آلينيب دير. عيبرتلي و فايدالي ناغيل لاريميز اينديده قولاق لاريميزدا سسلنمكده دير. آمما اينديكي اوشاق لار بئلنچي ناغيل لاردان اوزاق قاليبلار.
آتا- آنالاريميزدان اوشاق ليق لاريندان سوروشاندا، او زامانين تندير داملاريندان، كورسو باشيندان و ناغيل سؤيله مه لريندن دئيه جكلر و او گون لردن سؤز آچماق دا، اونلارا ياخشي لحظه لر يارادير.
چئشيتلي ائشيتملي آذربايجان ناغيل لاري، گئتديكجه اونودولوب گئتمكده دير و نسيلدن نسيله گلن او عيبرتلي ناغيل لار كولتوروموزون بير بؤلومو اولاراق، اونودولوب گئديرسه كولتوروموزده آرادان گئده جك دير. ايندينين اوشاق لاري باتي (غرب) اؤلكه لرين ناغيل لارينين بير- بير آدلارين ساييب قهرمان لارين دئييرلر و بو ايش گئتديكجه اوشاق لا اؤز كولتورونون آراسيندا آرا آچيب اؤزگه كولتورونه ياخينليق دويغوسونو ياراداجاق دير.
قاباقجالار عاييله نين بؤيوك آتا يوخسا آناسي، اوشاق لاري بير يئره ييغيب اونلارا ناغيل سؤيله رديلر. اوشاق ايسه او ناغيل لاردا اؤزونو ناغيلين قهرمان لارينين يئرينه قويوب درين بير خييالا جوماردي. آنجاق بو ناغيل لار اؤزوموزون ايديلر و قهرمان لاريدا بيزيم قهرمان لارييديلار. زيرناچي ناغيلي، پيس پيسه لي پوسته خانيم، قوردون ناغيلي، گؤزل فاتما ايله ساري اينك، تولكو ايله قارغا، يالانچي چوبان، ... و مين لرجه بئلنچي گؤزل و ائشيتملي ناغيل لاريميز اؤز يئرلرين، بيزيم كولتوروموز ايله غريبه اولان و ساواشجيل باتي ناغيل لارينا وئريرلر.
تلويزيون ايله راديودادا بو ناغيل لار اؤز يئرلرين ايتيريب لر و يئرلرينه يابانجي اؤلكه لرين كارتون لارين گونو گوندن داها چوخ ياييرلار. اوستاني شبكه لر بو قونودا اؤنملي رول اويناييرلار و آنا ديليميزده اولان ناغيل لارين كارتون لارين توركجه ده دوزلديب اوشاق لاريميزا گؤسترمكده كئچميشدن قالان گؤزل ناغيل لاريميزيدا ديري ساخلايا بيله جكلر.
آتا- آنالار ايسه بو ناغيل لار ايله تانيش اولوب اونلاري گله جك نسيل لره تاپشيرماليديرلار. بونلارين يانيندا اوشاق لار باخچالاري ( مهد كودك لري) داها مهم نقش ايفا ائديرلر. اوشاقلارين چوخو اوشاق واختي بو يئره گئديرلر و اورادا رسمي ديليميزين يانيندا اوشاق لارين آنا ديللرينين ديري قالماسي و كئچميشدن قالان كولتوروموزو ديري ساخلاماليديرلار و فايدالي و تجروبه لي آذربايجان ناغيل لارين سؤيله مكله گله جك نسيل لره بؤيوك قوللوق ائده بيلرلر.
ناغيل لاردا ايسلامي و ايراني (هر بولگه ده اؤز ديل لرييله) كولتوروموزه يئر آييريب بو روحيه ني اوشاق لارا وئرمه لييك. ناغيل عؤمور وار كن اوشاغين ذهنينده قالير و اوشاق اؤزون او ناغيل لار ايچينده ياشادير. چوخلو اوشاق لار نصيحتدن قاچارلار و بونا گؤره چوخلو سؤزلري ائله بو ناغيل لارلا اوشاق لارا دئيه بيله ريك و اوشاغا نصيحتيده ناغيل عونوانيندا چاتديرا بيله ريك.
حسين واحدي
