رحمتليك عابباس بارز-ين وفاتي موناسيبتينه
رحمتليك عابباس بارز-ين وفاتي موناسيبتينه
دوغوم ايلي: 1300
اؤلوم ايلي: 1390/8/24
قوچاقلار يوردو قارداغ
ماحالي‌نين تانينميش موباريز شاعيري عابباس اسلامي «بارز» بركتلي عؤمرونو
وطن، ائل، تورپاق، آزادليق و... سورموش، باش آغارتميش سادا، ائللر ايچره
اوزو آغ، آلني آچيق و باشي اوجا ياشاماقدادير پاك و تميز احساسلي و درين
دوشونجه‌لي آغ ساققال شاعيريميز عباس بارز اولو خالقي‌نين بوتون اينساني
حاقلاري ساحه‌ده قلم چالميش، اؤزوندن زنگين ادب اثرلر يادگار قويموشدور،
ائله‌جه‌ده چاغداش ادبيياتيميزا گؤركملي و اؤنملي خدمت‌لر ائتميشدير.
علي داشقين «اوستاد بارز ين شعيرلرينه بير باخيش» سونوجوندا يازير:
«1
- شاعير عاطفه ايله باغلي غزللرينده هر تصنع دن اوزاق،صميمي
-صداقتلي-دويونسوز و اوز آخديغي حاليندا شعرلريني يازميشدير و اونا گوره
،يارين ايسته گيله موافق باشلانان غزللره بير نئچه بئيت دن سونرا ايستر
ايستمز اجتماعي مضمون لارلاكي شاعرين اورك طلبيندن آسيلي اولور بزه نير و
سونا چاتير. توتاق كي بعضا شعر اوزونه عاميانه ديل آلير،و نه ياخشي دير كي
شاعرلرده بارز كيمي كونلو(باطني)ايله موافق حركت ائله سينلر و ظاهرسازليق
لاردان و لفاظليق لاردان اوزاق گزسين لر.
2- شاعرين بو گون قوجاليقدان
آسيلي اولاراق سياستدن اوزاق گزيب و هئچ بير اجلاسدا اشتراك ائتمه سينه
باخماياراق اونون كئچميشلرده ملي حركتلري و يازديغي اثرلري بارزي ائل
شاعيري و ملي بير شخصيت كيمي تانيتديرميشدير...»
اوز دوغما وطنينده
غريب‌لركيمي حيات سورن شاعير چاغي‌نين غدارلالرين، ستمكارلارين گؤزگؤره‌سي و
آيين شايينجاسينا ايرنج داورانيشلاريني سئير ائدركن، اوز اوره‌ك سؤزلريني
قالارغي يادگار اولسون دئييه، مكتوبلاشديرميشدير. يادداشسيز
اوستاد
شهريارين اونلارجا نظيره يازيلميش «حيدربابايه سلام» تيپيك پئوماسينا نظيره
كيمي يازيلميش، «ياسلي ساوالان» آدلي منظومه‌سي اودلار يوردونون ماوي
سمايه اوج ائتميش ساوالان داغينه خطابيه كيمي سؤيله‌ميش كي، بو گؤزه‌ل و
اوره‌يه ياتيم شاه اثر، دوشونجه‌لي شاعيرين درين حزنلي احساسلارين داشير و
اونون حسرتلي نيسكيللريني اؤز خوليا دونياسيندا تصوير ائدير.
هـر زامان كي باخيرام باشينـا قار وار گؤرورم
اوغلو اؤلموش آنا تك گؤزلرين آغلار گؤرورم
هـر طـرفدن چكيليب سينه‌وه داغـلار گؤرورم
آي آلان اوستونو غم چيسگيني هرياني دومان
آي ياغان باشينا غملــر اودو ياسلي ساوالان
گؤرموشوك يازدا كوچكلـرده چيچكلر آچيلار
هـر طـرفدن چمنين سينه‌سينه گـول ساچيـلار
ماهني‌لار قوشماغا باشلار يئنه‌ده قوشماچيــلار
ياز گليب گئتدي يئنه گولمه‌دين اوچ آيدا بير آن
آي آلان اوستونو غم چيسگيني هر ياني دومان
آي ياغان باشينا غملــر اودو، ياسلي ساوالان
قرينلـر كئچدي سنين گولمه‌دي بيـر لحظه اوزون
قانلي ياش توكدو سارالميش اوزونه ياشلي گؤزون
غصه‌دن دونـدو قارانـليق گئجه اولـدو گونـوزون
نه سوران حاليني اولدو نه‌ده بير ياده سالان
آي آلان اوستونو غم چيسگيني هر ياني دومان
آي ياغان باشينا غملــر اودو، ياسلي ساوالان
آنـد وئـريـرم سنــي او قانه بلنميش داشيوا
گئجه گوندوز او گؤزوندن توكولن قان ياشيوا
اورگين درديني بيلديـر او سهنــد قارداشيوا
سني وارليق، سني تانري، سني بو آه و فغان
آي آلان اوستونو غم چيسگيني هر ياني دومان
آي ياغان باشينا غملــر اودو، ياسلي ساوالان
سالارام ياديما بير لحظه او كئچميشلريوي
توكولن سنگ جفا ائيله او دور ديشلريوي
ايزلرم بيربير او حيرت يارادان ايشلريوي
هاميدان من سنين احوالينا آرتيق نيگاران
آي آلان اوستونو غم چيسگيني هر ياني دومان
آي ياغان باشينا غملــر اودو، ياسلي ساوالان
ساكيت اول آغلاما قوي بيرجه چكيلسين بو دومان
گون چيخيب ظولمتي بير يوللوغا قووسون بورادان
«نبي» گلسين «بوزآت» اولسون يئنه داغلار آتيلان
«هجرين» بلكه ييغيلسين گـؤزو يـولـدان آناجان
آي آلان اوستونو غم چيسگيني هر ياني دومان
آي ياغان باشينا غملــر اودو، ياسلي ساوالان
سوندوره بيلمدي گؤز ياشين اوركدن اودووي
چاغيريم قوي كومك ائتسين سنه اوز اولاديوي
ايفتيخاريله بوگون ذيكـر ائـده‌رم پاك آديوي
مرد اوغولـلار بئجـريب خلقينه شهرت قازانان
آي آلان اوستونو غم چيسگيني هرياني دومان
آي ياغان باشينا غملـر اودو، ياسلي ساوالان
بابكين گئتديسه بوش قالمادي آمما قوجاغين
دولودور مين ائله اوغلانلاريلا هـر بوجاغين
نه قدر يئل اسه طوفان قوپا سؤنمز اوجاغين
آي بـلالـر سپري خلقه يامان گونــده آمان
آي آلان اوستونو غم چيسگيني هر ياني دومان
آي ياغان باشينا غملــر اودو، ياسلي ساوالان
چنلي بئلده «ده ليلر» قوي يئنه قورسون بوساطي
«قوچ كور اوغلو» يئنه جولانه گتيرسين قير آتي
هئچ زامان اصلين ايتيرمز او كي دوزگوندو ذاتي
آند اولا آديوا آي گؤزلري آغـــلار ياشي قان
آي آلان اوستونو غم چيسگيني هر ياني دومان
آي ياغان باشينا غملـــر اودو ياسلي ساوالان
بابالاردان بيزه قالميش بو مثل هاممي بيلير
سو گلن آرخا دئييبلر يئنه بير گون سو گلر
فلكين داش اوره‌گين داش اوخو آخيردا ده‌لر
«بارز» اوغلوندا يئتر سئوديگي ياره او زامان
آي آلان اوستونو غم چيسگيني هر ياني دومان
آي ياغان باشينا غملـــر اودو ياسلي ساوالان
-------------------------------------------------------
اوستاددان نئچه شكيل:
---------------------------------------------------
اوستادين تشييع جنازه سي:
-----------------------------------------------------------------------------------------------------------------
http://tarnabozan.blogfa.com/post-155.aspx
شكيللرين قايناغي:
http://kh1353.blogfa.com/
