آشيق دهقان: آشيق سس سيز لرين سسيدير
ـ آشيق، اؤزونوزو اوخوجولاريميزا تانيتديرين لوتفن.
منيم كيچيك آديم «محمد حسين» و سوي آديم (شهرتيم)، «دهقان» -دير. 1313/12/10 –دا اورميه نين ايگدير كندينده آنادان اولموشام. اوشاقليغيمدان آشيقليغا علاقه تاپميشديم. آتام بو ايشيمله موخاليفييدي و 3-4 سازيميدا سينديرميشدي. آمما آنام آشيق اولدوغومدا منه چوخ يارديمجي اولوبدور. اوشاقليق واختي، آشيق لار كندين قهوه خاناسينا گلنده آنام لا بيرليكده قهوه خانانين آرخا پنجره سيندن گيزليجه اونلارا قولاق آسارديق.
ـ اوستادلارينيز كيم لر اولوب لار؟
منيم اصلي و بؤيوك اوستاديم اوولده آنام اولوب دور. آنامدان، «قولام حيدر»، «سيدي» و «احمد ايبراهيم» داستانلارين اؤيرنميشم. 14 ياشيمدان مجليسلره قاتيلارديم. كدولاردان اؤزومه ساز قاييريب، چالارديم و اوشاق ليغيمدان اليمده ساز اولدوغو اوچون، سونرالار رحمتليك آشيق «درويش» ايله بيرليكده، رحمتليك آشيق «فرهاد»-ين ياينيا گئديب، آشيقليغين اوصول لاريني اوندان اؤيرنميشم. دئديگي سؤزلرين باشيني يازيب، قالانين ازبر ائدرديم.
آشيق فرهاد، قديم قاپاندا، كئچه چيلر كوچه سينده اولاردي و سونسوزويدو. تاسف له آشيق فرهاد رحمتلييين قبيريندن صاحاب چيخيلماييب و آغا قبيرينده پوزولوب آرادان گئديب دير و كيمسه صاحاب چيخماييب دير.
ـ آشيق نئچه نفر شاگيردينيز اولوب دور؟
منيم 22 نفر شاگيرديم اولوب دور. بعضي لري حوضوري و بعضي لري ايسه كاسئتلريمله منيم شاگيرديم اولوبلار. اونلاردان، آشيق بولود ساعد، آشيق حئيدر نيرومند، آشيق هيدايت، آشيق حميد عباسزاده، آشيق علي قره آغاجي،آشيق محمد، آشيق باهار،آشيق آللاه وئردي، آشيق مناف و... آد آپارا بيلرم.
ـ آلديغينيز ميدال لاردان و لؤوحه لردن اوخوجولاريميزا دئيه سينيز.
منيم يوزلرجه تقدير لؤوحه واريمدي. اونلارين چوخون وزيرلردن اؤزلليكله اسلامي ايرشاد وزيريندن آلميشام. منيم توركيه، فرانسه، آلمان، ايرانيميزين اؤزوندن، تنديس و ميداليم وار. افتخاري ديپلم، دوكتورا و گواهينامه م واردي. دوكتوراني و داورليك كارتيميدا كرماندان آلميشام.
ـ ياشاييش نيزين فيلمينيده، چكيبلرمي؟
بلي، منيم ياشاييشيمي تقريبا 22 ايل بوندان اؤنجه تئهرانين حوضه هنري سي، آتا- آنام ساغ اولان زامان فيلمه چكيبلر. اوندان سونرا اورميه-ده ده تازاليق دا بو ايش باشلانيب و آز قالير قورتولا. همده آذربايجان جومهورييتينده ده بو ايش باشلانماق اوزره دير. اورميه ده فيلم وحدت تالاريندا چكيلنده اينه سالماغا يئر يوخويدو، او زامان آتام ايله آنامدا ساغييديلار و چوخلو يئرلردنده فيلميمي چكيب لر.
ـ بيمه نيزدن و امكلي اولدوغونوز نئجه اولوبدور؟
بيمه دئييلم، هنرمندلرين دفتريندن امكلي اولموشام. اينقيلابدان اؤنجه بيمه يديم و اينقيلابدان سونرا گئتديكجه بيمه ميز كسيلدي. مني بوتون فئستيوال لارادا هنرمندلرين دفتري چاغيريب دير.
ـ گليرينيز آشيق صنعتيندن اولوبمو يوخسا باشقا يئردن؟
منيم آتا- بابادان كنديميزده يئريميز اولوب و اكينچيليكله مشغول اولموشام و گليريمين چوخو بو يولدان اولوبدور. آشيق ليقداندا گليريم اولوبدور و اليمه گلني يئنه ده باغ-باخچايا وئرميشم و تانريدان راضي يام.
ـ سؤزلرينيز و آشيق هاوالاريني چاپ ائديبسيزمي؟
يوخ من كيتاب چاپ ائتمه ميشم. 77 هاواميز وار و هاميسين من ازبرم و هاميسيده يازيليب همده CD –لري واردير. هاميسين بير-بير چاليب اوخويا بيله رم.
ـ آشيق صنعتينده ان چوخ هاوالاري بيلن سيزسينيز، گله جك نسيل لره بونلاري نئجه ياديگار قوياجاقسينيز؟
منيم 142 كاسئت و اللي يه ياخين سي ديم واردير و هاميسي ضبط اولوب ساخلانيليب دير. علاقه سي اولانلار بونلاري آليب فايدالانا بيلرلر. بيزيم دؤولتيميزده هنرمندلرين اثرلرين ساخلاييب، گنج لره گؤستريب هاوالاري اونلارا اؤيرتمه ليديرلر و بو ايشله آشيق لارين اثرلري قالارگي اولاجاق دير.
ـ آشيق صنعتي ني اورميه ده و اوستانيميزدا نئجه گؤروروسونوز؟
آشيق لار چاليشير و ياشاييرلار، آمما آرخالاريندا دوران يوخدور. بعضن اذيت اولورلار و آشيق صنعتي ياشاياجاق دير و گرك حمايت اولوناق و بونو ياشاداق.
ـ اورك سؤزونوز؟
مسئول لاردان ايسته ييرم بو صنعت دن صاحاب اولوب، گله جك نسيل لره ساخلاسينلار. منيم يئتميش يئددي ياشيم وار و هر كيمسه يه تاي بير گون بو دونيادان كؤچه جه يم، آمما بو صنعت قالماليدير. بو بيزيم آنا ديليميزدير، بيز ديلسيزلرين ديليييك، سسسيزلرين سسي ييك، ائلين سؤزون دئييريك، اوركده قالان سؤزلري دئيه نيك، ائل سئوني سئويريك و ائل دئيه بيلمه ين سؤزلري دئييريك. بو صنعت (هنر) دير، معريفت دير، حقيقت دن دانيشان دير، ايسلاميتي ساخلايان صنعتيدير. آشيق، عاليم و عاريف ايسلامي ساخلاماليديرلار. اؤزگه لرين كولتورنون قاباغيندا دورماق اوچون اؤز صنعتيميزي قوروماليييق. راديو- تلويزيوندادا بو صنعتي ياييب ساخلامالييق. اوندا اؤز موسيقيميز اولان يئرده گنج لريميز اؤزگه موسيقي اوخوتمازديلار و اؤز كولتوروندن فايدالانارلار. سيزدنده مني يوخلاديغينيز اوچون تشككور ائديرم.
*دانيشيغي آپاران: حسين واحدي
