آذربايجان فولكلوروندا اوشاقلارين يئري
اوشاغين آنا قارنيندا ياشايان دؤورو:
آذربايجان خالقلاريندا اوشاق دونيايا گلمه‌ميش، هله آناسي بويلو اولان واختلار بئله بير عادتلري وار: بير قادين بويلو چاغلارين كئچيرن زامان خصوصي ايله ايلك اوشاغينا بويلو اولاندا قوهوم اقريباسي‌له ياخين دوستلاري اونو قوروياراق قارانليقدا يالقيز بوراخماييب حامام و قبير اوسته تك گئتديييني مصلحت گؤرمزلر. بو قادينين اوشاغي داها هوشلو و گؤزه‌ل اولماق اوچون اونون يئريكلمه دؤورونده يئمك ايستكلرين يئرينه يئتيريب و اوشاغين هر يوندن قورونماسينا چاليشارلار.
دوغوش زاماني چاتديقدا اوشاق و آنايا اولدوقجا ده‌ير وئريب قيرخ گونه قده‌ر آنا و بالاني خطر و بلالردن قوروماغي اؤزلرينه بير گؤره و سانارلار. اوشاغين گله‌جكده؛ دانيشغي شيرين، واري چوخ و عؤمرو اوزون اولسون دييه باشي اوسته؛ قند، قيزيل و چؤره‌ك قويارلار.
آد قويما گونو
كؤرپه‌نين يئددينجي گونو چاتديقدا گونو آدلانيب قوهوملاري بير يئره توپلاناراق چاليب اويناملاق و شنليك دولو ييغينجاقلاريندا ملي احساسلارينا داياناراق خالق قهرمانلارين اونوتماسينلار دييه جوانشير، بابك، نبي، ستار و كؤكو ديلرينه باغلي اولان آدلاردان سئچيب اوشاقلارين او آدلارين بيري ايله آدلانديرارلار.
دده قورقود بوي لاريندا اوشاق آنادان اولدوقدا آد قويولمور. هر اوشاغين اجتماعي ده‌يري اونون جومرودلوك، قوچاقليق و ائل اوچون چاليشمالاري اوزره سئچيلير. ائلين يامان گونلرينده خالقا يارديم ائتمه‌ين قورخاق و آياق دالي قويان اوره‌كسيزلره هر يئرده نيفرت و آلچاق گوز ايله ياناشيليب و «مخنث» آدلانيرلار.
اوشاقلار حيات و ساواش مئيدانيندا اؤزلريندن هنرله باجاريقلاين گؤسترديكده آدا لاييق اولورلار. اؤرنك اوچون: ديرسه خان اوغلو؛ بوغايلا دويوشدوكده اونو يئره ووروب بوغازين كسنده‌ن سونرا اوغوز بگلري ييغيليب اوغلاني تحسين ائديب دده‌م قورقود گلسين بو اوغلانا آد قويسون دئييرلر. دده قورقود اوغلانين آتاسينا واريب بير نئچه تعريفدن سونرا: «بايندر خانين آغ ميدانيندا بو اوغلان جنگ ائتميش دير. بو بوغا اؤلدورموش. سنين اوغلونون آدي بوغاج اولسون. آديني من وئرديم، ياشيني آللاه وئرسين- دئدي.»
(دده قورقوت كيتابي- فرزانه انتشاراتي- ايلك چاپ- صايفا 27)
بو گون بيزيم خالقيميز اوره‌ك دولو اينام و آرزولارلا اؤز كئچمشينه داياناراق هئچ بير چتينليكلردن بويون قاچيرماييب «آماجلاري يولوندا آجي‌لار عشق اولسون» دييه چوخلو مانعه‌لردن آشماليديلار.
خالقيميز اؤز دوغال حاقلارين ياساقلاردان قورتاماق اوچون بوخوولانميش ووقارلارين اؤزگورلويه چاتديرماغا هر ساحه‌ده جانلاريندان مايا قويماغا حاضيرلانمالاري يئرلي اولاجاق.
ايراندا ايللر دير سيستملشميش بير آخين تورك خالقي آراسيندا آنا ديل و وارليقلارينا سويوقلوق ياراتماغا جان آتماقدادير. آنا ديل مكتبلرده تعليم اولونمادان ديل گونده‌ليك داياز دانيشيقلارا حصر ائديليب سؤزجوكلر اونودولوب ديل يوخسوللاشير آرديندا دانيشانين باشينا قاخيج اولاراق ديليني بؤتووكله آرادان آپارماغا چاليشانلارين يئرآلتي ايشله‌ييب يالان تبليغ‌لرينه اينانانلار آز دئييل كي، بو دورومون سونوجوندا يانليش دوشونن كيمسه اؤز كؤكلو وارليغنا خبرسيز قاليب حقارت حيسي دوياراق اؤزو ايله ديلين دانماغا باشلايير. اوشاغينا ائلينين گوزه‌ل كؤكلو آدلارينين يئرنه هئچ توركون آغزيندا دوزگون دئييلمه‌ين فارس و يابانجي آدلار تاخيب و آنا ديلده دانيشماغي اسكيكليك ساناراق بير هويت سيز شخص كيمي حيات سوروب و آخيرده ايكي مسجد آراسيندا نامازسيز ياشايير.
اوشاقلارا شعر اوخوماق اونلارين فيكرلرين گوجلنديرمكده و بئش دويغولارين تحريك ائتمكده فايدالي اولور. اوشاق روانلاري اوزره چاليشان بيلگينلره گؤره: بو ايش اوشاقلارين حيس و عاطيفه‌لرين تربيت لنديريب و باشقا اينسانلارين حيسلي ايله تانيش اولماغا و آيري يؤندن باجاريق و هيجانلارين كنترل دا ساخلاماغا و دانيشيق ديللرين گوجلنديرمك و درين خيالا ال تاپماق، شعر اوخوماغين فايدالاريندان اولابيلر.
شعر اوخوماق؛ اوشاغين هوشلا قولاق گوجون تقويت ائديب و اوندا گؤزلليكلره درين حس يارالدار. هر سؤزجويون اؤزونده داشيديغي عاطيفي معنا اوشاغين ذهئنين گوجلنديريب و بوللو سؤزجوكلر اؤيره‌نمه‌سينه اؤنملي تاثير بوراخار. بو شعرلر خاص بير آهنگ ايله دئييلنده موسيقي هونر سئحر ياراديجي اولدوغو اوچون سسلرين ده‌يري معنادان آرتيق اوشاغين روحوندا يئر سالير. ائله اوندانديركي بيزيم فولكلور شعرلريميزده معنانادان باشقا ريتم و آهنگه اؤزه‌ل بير يئر وئريليب.
لايلالار
«سوفره‌نين ياراشيغي قوناق، ائوين يارشيغي اوشاق» دئيه‌ن آنالاريميزين چوخلو حيصه‌سي سودامه‌ر اوشاغين اميزديره‌ندن سونرا قيچلارينين اوسته، بئشييكده و يا قواغيندا ساخلاييب ياتيرماغا چاليشان زامان اؤزل آهنگ ايله بير سيرا سؤزلر زمزمه ائديرلر، آنادان باشقا عائله‌نين ديگر عضولري او جومله‌دن بؤيوك ننه، خالا، بي بي و باجي كيمي ائوآداملاري آشاغيدا اؤرنك اوچون وئريلن سؤزلردن اوخويارلار.
لايلاي بئشيگيم لايلاي
ائويم ائشيگيم لايلاي
سن گئت شيرين يوخويا
چكيم كشيگين لايلاي
لايلاي دئديم ياتاسان
قيزيل گوله باتاسان
قيزيل گولون ايچينده
شيرين يوخو تاپاسان
لايلاي دئديم گونده من
كولكده‌ده سن گونده سن
ايلده قوربان بير اولار
سنه قوربان گونده من
نازلامالار
«اوشاغي يئمك يوخ سئوينج بؤيوده‌ر» آتا- بابالاريميز درين دوشونجه‌لريندن توره‌نن بو سؤزه آرخا دوران اوشاق نازلامالاري آذربايجان فولكلوروندا باشقا بير بؤلومدور، كي كؤرپه‌لري شنلنديرمك و آتا ـ آنا محبتينين بال بولاغيندان اونالارا داديزديرماق هدفي ايله آچيق و گولر اوزله ايفاده اولونار. بئله بير نازلامالاري دينله‌ين اوشاق گولش قاباق و مهربان بير اينسان كيمي ديرچه‌ليب بويا ـ باشا چاتار.
بالاما قوربان اينكلر
بالام هاچان ايمكلر
بالاما قوربان ايلانلار
بالام نه واخت ديلآنلار
سود ديبي، قايماق ديي
قوربانين اولسون بي بي
سود يالا، قايماق يالا
قوربانين اولسون خالا
آتين توتون بو بالاني
شكره قاتين بو بالاني
تولوق سني آسايديم
ياغين تاسا باسايديم
بالام بؤيوك اولاندا
قوپلو قازان آسايديم
چالخالان، چالخالان ياغ اولسون
بالام يئييب ساغ اولسون.
آغي
اؤز كؤرپه‌لرين «لايلالار» و «نازلامالار» لا بويا- باشا چاتديران آنالار، بير واخت‌دا ايتيرديگي اوره‌ك بندلري و اؤلولولرينه آغيتلار دئيه ياس توتارلار.
آغاجدا خزل آغلار
ديبينده گؤزه‌ل آغلار
بالاسي اؤلن آنا
سرگردان گزه‌ر آغلار
تاپماجالار
تاپماجلار بيزيم اوشاق آغيز ادبياتيميزين زنگين بير قولودور، سنه‌لري آشيب گلن تاپمماجالار ديلدن ـ ديله گزيب هئچ واخت يئني لييين الدن وئرمه‌ميشلر. تاپماجالارين ظاهيرده ساده اولدوقلارينا باخماياراق درين مضمون داشييرلار. اوشاقلار اونلارين يانيتين تاپماق اوچون درين فيكره دالماق مجبوريتينده قاليب و بو يول ايله بيليك‌له دوشونجه‌لرين يئتگينلشديرمه‌يه چاليشارلار.
دئمك تاپماجالار؛ اؤيرنمك، هوش، باجاريق و ... ساحه‌لرده هامي اينسانلارا اؤزلليكله اوشاقلاريميزا اؤنملي بير كمك ائدن اولابيلر.
- اويان مرمر/ بويان مرمر/ ايچينده بولبول اوينار. (ديشلر- ديل)
- ديلي يوخ، آدام ايله دانيشار (كيتاب)
- آداي اودار، جاني يوخ. (قبر)
- آغ اوتاق قاپيسي يوخ. (يومورتا)
- آلتيندان ايچر، اوستوندن دوغار. (اكين)
ياهالماجالار
ياهالماجالار اوشاقلارين هوشون سيناماق و اونلارين بئينين آرتيق چاليشديرماق اوچون ووجودا گليب و عموميتله شعر ديلي ايله ايفاده اولونماسينا گؤره، آهنگيله دئييلديكه اوشاق چاليشار جاوابي تاپمادان اؤنجه اونو اؤيره‌نيسن. ياهالماجالاري اؤيره‌نن اوشاق اؤز تاي توشلارين باشينا توپلاييب بو نوعيله فيكيرلرين چاخناشديريب هوشلارين سينار.
او نه دير ايكي دير هر جاندا
لاكن اوچ اولار هر حيواندا
مصره گئتديم گؤرمه‌ديم بر دانه‌سي
شاميده گؤردوم دوروب اوچ دانه‌سي
سنده‌وار، منده وار، آدام دا يوخ
جومله ده وار، دئسم عالمده يوخ
بير ايكي او چدن زياده اولماميش
دؤردونو عالمده هئچ كس گؤرمه‌ميش (نوقطه)
دويمه‌لي سؤزلر
دويمه‌لي سؤزلرده بير يا ايكي حرفين تكرار گلمه‌سي (تنافر حروف)، اونو تلفظ ائده‌ني كاريخديريب يالنيشا سالماق و بو ايشله ائشيدنلرين گولمك‌لرينه سبب اولماق ايلك آماج دير.
آمما بو نوع سؤزلرين تكرار دئييلمه‌سي اوشاغين آغيزدا ديلين راحات دولانماسينا بوللوجا كؤمك ائديب دئييمي بير- بيرينه اوخشايان سؤزجوكلرين تلفظ ائتمه‌سين راوانلاشديرار.
دويمه‌لي سؤزلرده بير حرفين آرديجيل يئر توتماسي ايلك دؤنه دئييلنده؛ ديل آغيزدا راحتجاسينا دولانماييب و يالنيش سؤز آغيزدان چيخماسينا سبب اولار. آنجاق اوشاقلار چاليشارلار دويمه‌لي سؤزلريدئين زامان آرتيق هوشلارين ايشله ساليب و سؤزجوكلري دوز تلفظ ائتسين‌لر.
گئتديم گؤردوم ايكي؛ كار، كور، كيرپي ياتيپ. هئچ بيلمه ديم؛ اركك كار، كور، كيرپي ديشي كار، كور كيرپينين كوركونو يامير، يا ديشي كار، كور كيرپي اركك كار، كور كيرپينين كور كونو.
قلمه؛ قلمه‌لنمه! قلمه‌لنسنده قلمه‌لنه‌جه‌يم، قلمه‌لنمه‌سنده قلمه‌لنه‌جه‌يم.
اويونلار
هر بير ميللتين ايچينده اوشاقلاري اوچون اويونلاري اولدوقدا تورك خالقينين ايسه اؤز اوشاقلارينا بوللو اويونلاري وار بو اويونلار يالنيز باش قاتيب واخت سووماقدان اؤتري يارانماييب. آذربايجان هاوا دورومون نظرده آلاراق خالقينين اينانج و ياراديجيليقلا ريندان گوج آلان جسمي و روحي ساغلامليقلارا سبب اولان بو اويونلارين هر بيريسي بير آماجي ايزله‌يه‌رك اوشاقلارين توپلومسال ياشاماق، هر ساحه‌ده بئيني ايشه سالماق، خالقي و وطني سئويب اونا يييه دورماق و ... حيسلري گوجلنديرمك اوچون يارانيب.
آذربايجان اوشاق اويونلاريندا ايشه آپاريلان نسنه چوخ ساده و ابتدايي اولوب و اويون قورتولدوقدا هئچ كيمسه‌ده اويون وسيله‌سينه يييه‌ليك حسي يارانماز. اؤرنك اوچون: «بئش داش، قوندوم- كؤچدوم، آياق جيزيق، اته‌يه داش قويدو، ايپ كئچدي، ايينه ـ ايينه، گيزلن- قاچ، گؤزده قولاق، كباب ـ كباب، ناققيشلي و ...» اويونلاريندا هئچ بير اؤنملي وسيله آرادا اولمادان ساعاتلار اوشاقلاردا شنليك تؤره‌ديب، روحلارين تميزله‌يه‌رك فيكيرلرينين آيدينلانديرار.
بو گون بو اويونلارين چوخو، ياشليلاريميزين يادداشيندا ياشاياراق نه يازيقلاركي اوشاقلاريميزا منتقل اولماييب و اونودولوب آرادان گئتمك‌ده دير. نه ياخشي اولاردي گونوموزون مدرن اويونلاري يئرينه اؤز اسكي و آتا ـ بابالاريميزدان قالان اويونلاري اوشاقلاريميزا اؤيره‌ديب عصبي خسته‌ليك گتيره‌ن كامپيوتر اويونلاري و يوخاري قيمته آلينان اويونچاقلاردان جان قورتاريب ساغلامليق وئره‌ن اويونلاريميزا يييه دوراق.
ناغيل، داستان، حيكايه
آذربايجان فولكلورونون ديقت مركزينده دوران قوللاردان بيري ده ناغيل، داستان و حكايه‌لردير. كي اونلاردا يئر سالان فيكير اوشاقلار و يئتيشمكده اولان گنج نسيلين دوزگون تربيه‌سي اوچون ايلك آماج دير. اوشاقلارين معنوي صافليغينا يئرلي ياناشماق، آتا ـ بابالارميزي دريندن دوشوندورموش و ايلك نؤوبه اونلاري دوغما وطنه، بركتلي تورپاغا، باغلاماغا چاليشميش و نهايت بؤيوكلره حؤرمت ائتمك، هاميا محبتلي اولماق، يوخسولدان ال توتماق، اوره‌يي گئنيشلي‌يي، الي آچيق ليق، باشقاسينين دردينه اورتاق اولماق كيمي اخلاقي داوراينشا آشئيلاميشلار.
فولكلوروموزون بو نوع قوللاريندا بير چوخ عبرت آميز احوالاتلارا تصادف ائديريك كي، اوشاقلار، يئني يئتمه و گنج‌لره دوز يول گوسترير، اونلاري چتين آنلاردا دؤزوملو اولوب و عاغيلي يولو سئچمه‌يه يؤنه‌لدير، جهالت و گئريليكدن اوزاقلاشديرماغا مثبت شرايط يارالدير.
وطن پرورليك حيسلري يارالدان اوشاق فولكلوروموزون ناغيلار قولوندا؛ يوردوموزون صلابتلي داغلارين، چؤللر قولاغينا ماهنيلار اوخويان چايلارين، شهر و كندلريميزين دوزنلرينين تصويرني ائله باجاريقلا گوستريبلركي اوشاقلار دينله‌ديكجه شووقا گليب اونلاري سئوير، طبيعتين قوينوندا گزمك، گؤزلليكلري اؤز گوزلري ايله گؤرمك ايسته‌ييرلر. آغيز ادبياتيميزين بو فورماسيندا اؤلكه‌ميزين مئشه‌لرينده، چؤللرينده، دوزه‌نلرينده دولاشان وحشي حيوانلارين، قوشلارين سسي ائشيديلير و گولل- چيچه‌كلرينين عطري دويولور.
بيزيم عائيله دوروموموزدا اوشاقلارين تعليم و تربيه‌لري آتالاردان آرتيق آنالارين بوينونا دوشوب، آنا هر اينسان اوچون ايلك اوستاد سانيلاراق، اوشاغين ديرچه‌ليب بويا- باشا چاتماغي اوچون اؤز ووجودون شام كيم يانديريب تجروبه‌لرين ميننت سيز بالاسينا بوراخير. عموميتله قيسا اولان ناغيل، حكايه و داستانلار اوشاقلار ياتاغا گئدن واختلار آنالار ديلي ايله دئييلر باشقالاري ايسه؛ قيش گئجه‌لري بوتون عائيله عضولري بير يئره ييغيلان زامان بؤيوك ننه‌لر، آتالار يا بابالارين حرارتلي ديلي ايله نقل ائديلير. گاهدان ناغيلارين لازيم گلن يئرلرينده، نئي يا سازدان دا فايدالانيلير. ناغيلين اؤزوندن قاباق بير اؤن سؤز يا مقدمه دئييلركي آذربايجاندا (ناغيلار ياراشيغي يا دؤشمه) آدلانار.
اؤيره‌نك اوچون: «سيزه هاردان دئييم آز دانيشانلاردان، قاري دينمز يئره ياخانلاردان، سو كيمي لام آخانلاردان، ده‌يمه دوشرلردن، كوسن‌لردن، اوغرولاردان، يالانچيلاردان، وفاسيزلاردان، بؤهتانچيلاردان، اوغورسوزلاردان، ايلقاريندان دؤننلردن، بوزو مينيب چاي گئچنلردن، خوروز بئلينده بوستان اكندن، لعنت قويروقلو يالانا، رحمت قويروقسوز دوزه، آلقيش يازانا، قارقيش پوزانا، سؤز قالسين انسان گئتسين، دوست وار اولسون، دوشمن خار اولسون، ايندي يئتك مطلبه»
بو مقاله‌نين حووصله‌سي چكمه‌دن قيسا و اوزون ناغيلار اؤيرنه‌ييندن واز كئچديك. اوشاقلار اوچون سؤزلريميزين چوخلو دئييلمز قالدي. آرتيرمالييام اوشاق ماهنيلاري و اونلاردا اولان گؤزل آهنگلر اوشاق فولكلوروموزون ان اؤنملي بير حيصه‌سين تشكيل ائدير بو قونودا آراشديرمالار، بيلگينلريميزين اطرافلي چاليشمالارين طلب ائدير.
سون سؤز
آيديندير اينسانلارين بيرـ بيرينه اولان موناسيبيتي آنادان گلمه دئييل. ياشاديغي كوتله آراسيندا اونلاري بوروين اجتماعي ـ اقتصادي شرايطدن آسيلي دير. بيلگينلره گؤره: شرايط ده ييشديكجه، اقتصادي موناسيبتلر ده‌ييشديكجه آداملارين باخيش‌لاري، اونلارين معنوياتي‌دا ده‌ييشير.
آذربايجاندا ياشايان خالقلارلار باشقا يئرلرده حيات سوره‌ن ميللتر ايله كوكلو فرق‌لر وار. همين كوتله‌وي قورولوشلاردا ياشايان آداملارين باخيش و حيسلري آيري خالقلاردان سئچيلر. اخلاق، داورانيش و دونيا گؤروشلري باخيميندان يقين كي بير اولابيلمزلر. اؤز ائل ـ اوباسينا باغلي اولان و دوغما يورودوندا چاليشيب اؤز آنا ديلينده دانيشان آداملار هئچ واخت وطن، ديل و وارليقلارينا لاقئيد قالا بيلميرلر. اونو اوره‌كدن سئويب و دردلرينه اورتاق اولورلار. لازيم گلديكده وارليقلاري يولوندا بئله جانلاريندان دا اسيرگه‌ميرلر. آنجاق اجتماعي محيط و سياسي قورولوش ده‌ييشديكجه آداملارين داورانيشيدا ده‌ييشير.
يوخاريدا گئده‌ن فيكره اينام وارسا؛ بو گون اوز اجتماعي و سياسي دوروموموزو دريندن دوشونوب و اوشاقلاريميزي اؤز كؤكلو مدنيت و وارليقلارينا وارماليييق. اونلاري دوغال حاقلاريندان محروم ائديب بير قوندارما و يابانجي حالا سالانلارين قارشيندا منطقي شكيلده دايانمالي و بالالاريميزين اؤز كؤكلري و اونو تمثيل ائدن مدنيت قوروشونا داير محبت حيسي، ظولمت و اسارت دونياسينا، انسانين انسان طرفيندن استثمار ائديلمه‌سينه نفرت حيسي و خالقي دوشونوب، فردي باجاريقدان گوج آليب ياراديجيليق و جوشغونلوق حسي ياراتماق دانيلماز گؤره‌ولردن سانيلا بيلر.
بو يازيدا گئدن فولكلور اؤيرنكلري؛ دكتر سلام جاويد توپلايان (آذربايجان فولكلوروندان نمونه‌لر) كيتابيندان آلينيب.
يازان: احمد فرهمندي (اوياق)
