تولكو و حاجي لئيلك
آذربايجان اوشاق ناغيل لاريندان
تولكو و حاجي لئيلك
گونلرين بير گونو بير حاجي لئيلك ايله بير تولكو قارداشليق ائديرديلر. اونلار بير يئرده چيخير، بير يئرده گزيرديلر. بير گون تولكو حاجي لئيله يه دئدي:
ـ قارداش، آخشام بيزه قوناق گلرسن؟
حاجي لئيلك او گون آخشامادك چؤرك يئمه دي، اؤزونو تولكونون قوناقليغينا ساخلادي. آخشام حاجي لئيلك قارداشليغي تولكونون ائوينه گلدي. تولكو دوردو بير قازان دووغا بيشيردي. بير بوشقابا تؤكدو، سوفره يه گتيردي. يئمه يه باشلاديلار. حاجي لئيلك هر دفعه ديمديگيني اوزادانا آنجا بيرجه دوگو گؤتوره بيليردي. او، بئش- آلتي – دوگو گؤتورمه ميش تولكو دووغاني تامام يالاييب قورتاردي.
حاجي لئيلك آج قالدي. اؤز- اؤزونه دئدي: « ياخشي، آي تولكو، عوضيني سندن چيخارارام».
حاجي لئيلك او گئجه ساباحادك آجيندان ياتا بيلمه دي، قارنيني اوووشدورا- اوووشدورا قالدي.
بير نئچه گون كئچدي. بير گون حاجي لئيلك ده دووغا بيشيريب، قارداشليغي تولكونو قوناق چاغيردي. حاجي لئيلك دووغاني بير بارداغا تؤكوب سوفره يه قويدو. سونرا اوزو ديمديگيني ساليب بارداقداكي دووغاني تامام ايچدي، تولكو آنجاق بارداغين قيراغينا تؤكولنلري يالادي. او، گئجه آج- آجينا ياتدي. سحر تئزدن دئيينه- دئيينه اؤز ائوينه گليب دئدي: «سندن منه قارداش اولماز، من سني يئييم، سنده تاماشا ائله».
بير موددت كئچدي. تولكو اوره ييندن آجيغيني چيخارتمادي. بير سحر تئزدن تولكو، حاجي لئيله يين يانينا گليب دئدي:
ـ قارداش، اوره ييم برك داريخير، دور گئدك گؤي چمنده بير آز گزك.
حاجي لئيلك راضي اولدو. هر ايكي سي بير- بيرينه قوشولوب، بير چمنه چاتدي. تولكو دئدي:
ـ قارداش، گل بو چمنده بير آز ياتاق.
ياشيل چمنده اوزانديلار. تولكو اؤزونو يالاندان يوخويا ووردو. حاجي لئيلك، يوخويا تزه جه گئتميشدي، تولكو بيردن يئردن قالخدي، حاجي لئيله گين بوغازيندان توتماق ايسته ينده، حاجي لئيلك اويانيب دئدي:
ـ قارداش نه ائله ييرسن؟
ـ تولكو دئدي: سني يوخودا گؤرموشدوم، اونا گؤره سني اؤپمك ايسته ديم.
حاجي لئيلك اونون حيله سيني باشا دوشدو. اؤز- اؤزونه دوشوندو.
ـ « ياخشي، گؤرك كيم كيمي اؤلدورر».
او، تولكويه دئدي:
ـ قارداش، داها ياتميرام، گل منيم قانادلاريمين اوستونه مين، هاوايا قالخاق، بير آزدا گؤيده گزك، سونرا گليب آرخايين ياتاريق.
تولكو حاجي لئيله گين قانادلارينين اوستونه ميندي. حاجي لئيلك هاوايا قالخدي. بير چوخ قالخاندان سونرا سوروشدو:
ـ قارداش نئجه گؤرونور؟
ـ خيرمان بويدا.
حاجي لئيلك بير آزدا قالخيب سوروشدو:
ـ قارداش ايندي نجور گؤرونور؟
ـ تولكو دئدي:
ايندي هئچ گؤرونمور؟
ـ حاجي ائيلك دايانيب دئدي:
قارداش داها قانادلاريم آغرييير، دوش بير آز دينجه ليم.
تولكو يالواريب دئدي:
ـ آي قارداش باشينا دؤنوم، قوربانين اولوم، من نه تهر دوشوم؟ آماندي مني آشاغي ايندير.
حاجي لئيلك دئدي:
ـ قانادلاريم آغرييير، دوشمه سن سني يئره سالاجاغام.
تولكو چوخ يالواريب، ياخاردي، گؤزلرينين ياشيني تؤكدو، آمما حاجي لئيله يي اوره يي يومشالمادي. حاجي لئيلك اونو توللاييب دئدي:
ـ حيله چي تولكو، بو مني يوخودا اؤپدويونون عوضيدير.
تولكو يئره دوشوب، شيل- كوت اولدو. حاجي لئيلك ده بالالارينين يانينا گليب، كئف له گون كئچيردي.
حاضيرلايان: حسين واحدي
قايناق:
آذربايجان اوشاق ناغيل لاري/ معصومه اژدري
