چيلله گئجه سي..
«چيلله گئجه سي» سني گؤزله ييريك!
آي چيلله چيلله قارداش آتين قمچي‌له قارداش
بير گلدين دانيشماديق قلبيم آچيلا قارداش
آذربايجانين ان گؤزل و سئوملي دب لريندن بيري «چيلله گئجه سي»-دير. چيلله گئجه سي ان قديم دبلريميزدن دير. بؤيوكلو-كيچيكلي بو گئجه ني سئويب، ائلين لاپ بؤيوگو اولانين ائوينه ييغيشيرلار. چيلله گئجه سينده حالوا، ميلاق،بادام، باسليق، جئويز-كيشميش، قارپيز و... اؤزلرينه مخصوص يئرلري واردير. كئچميش ده، اينديكي ايمكانلارين اولماديغي اوچون و گئت-گلين چتينليغينه گؤره، ياي مئيوه لرين، خوصوصي ايله قارپيزي، سامانليقدا و سرين يئرلرده ساخلايارديلار.
چيلله گونو، «چيلله ليك آلماق» ايسه گؤزل دبلردن دير. چيلله گئجه‌سي اوغلان ائويندن آداخلي قيزا چيلله‌ليك گؤندريلر، دئمه‌لي چيلله گئجه‌سينه عاييد يئمكلر او جمله‌دن: پشمك، قوووت، حالوا، قورو يئميشلر، نار و ان واجيب اولان چيلله قارپيزيني (عموما بزه‌يه رك)، بير خونچادا توپلانيب، آخشام باشي قيز ائوينه گؤندريلر. ائولنديكدن سونرا دا بير نئچه ايل قيز گلينه چيلله‌ليك گئدر، آمما بو دؤنه خونچا اوغلان ائويندن دئييل، قيز ائويندن گؤندريلر. قيزين آتا-آناسينا گؤره بو هديه‌لر اوغلان ائوي يانيندا قيزلارينين باش اوجاليغي ساييلير.
كئچميش لرده بو دب لر تشريفات دان اوزاق اولاراق داها چوخ صميمت لرله قورولاردي. كورسو باشينا توپلانيب، قديم ناغيللاريميز دئييلردي. تاپماجا سؤيله مك، باياتي دئمك ايسه بو گئجه نين اونودولماز ايشلريندن اولاردي. آمما تأسوفله ايندي او گونلردن فقط بير قورو آد قالماق دادير. بعضي لري بؤيوك ائوينه گئدير، بعضي لري ايسه ائوده اؤز عاييله سينين يانيندا قالماغي خوشلايير. بير يئره ييغيشماق داها خوش و سئويمليدير. قوهوم لار بير-بيريني گؤروب، كوسولو اولانلار ايسه باريشيب، بؤيوگ ايسه يوخلانيلير. تشريفادان اوزاق دوشسك بو قديم دب خاطيره لي اولوب، كولتوروموزده ديري قالاجاق دير. ائوده اوتوروب تلويزيون لا مشغول اولوب چيلله گئجه سي كئچيرتمكدن «چيلله گئجه سي» چيخماز. بير آزجا اوره ييميزي گئنيش لنديريب، تشريفاتي قيراغا قويساق، ساده يئمك لر ايله ده چيلله گئجه سيني توتا بيله ريك.
گؤزل گونلر بيزي گؤزله يير. قاليب بيز دونياني نجور توتاق. چيلله سني گؤزله ييرم. سنين گلمه گينله ائليميزه شنليك گله جك دير... تئز گل!
يازان: حسين واحدي
