اورمو
اورمو
اورمو
آذربايجانيمين ياشيل اؤلكه سي
بؤيوك تورك ائلينين مهربان سسي
دده ميز قورقودون ايستي نفسي
سنده دير، سنده دير اي گؤزل اورمو
گؤزللر يوردوندا سن اؤزل اورمو
گؤزلليكلريني تانيان اولسا
زرينين محكين سينايان اولسا
تئز تانيار اونو، تانيان اولسا
گؤزللر ايچينده گؤزلدير اورمو
اوزون بير قصيده، غزلدير اورمو
گؤزلليكلري بير، ايكي، اوچ دگيل
دولودور، هئچ نهيي اونون بوش دگيل
زنگين وارليقلاري اونون هئچ دگيل
تورك ديلين دانيشار ديلي اورمونون
اوغوزدان يارانيب ائلي اورمونون
دولاشماق ايسته سن سن بيزيم ائلي
اييلهمك ايستهسن سن بيزيم گولو
اوخوماق ايستهسن سن بيزيم ديلي
بيزيم ديل شيپ-شيرين اورمو ديليدير[1]
تاريخي چوخ درين اورمو ديليدير
بؤيوك سومئرلرين[2] يادگاريندا
نئچه آشيقلاري[3] وار كناريندا
تورك موسيقيسينين كتابلاريندا
بير اوزون مطلبدير اورمو آشيغي
اؤزونه مكتبدير اورمو آشيغي
)اورمونون يوللاري دوزوم-دوزومدور
اورمو كاروانينين يوكو اوزومدور([4]
وطندير، ايشيقلي ايكي گؤزومدور
اينجيلره بنزر اورمو اوزومو
تاباقلاري بزر اورمو اوزومو
جمعه مسجديميز بيزه عزيزدير
سؤيومبت[5] بيناسي آبيدهميزدير
كاظمخانين داشي سودان تميزدير
اوُلولارا چاتير اورمو تاريخي
دولولارا چاتير اورمو تاريخي
نازلي چاي، باراندوز، كندلري بزر
دره چاي، ،شهرچاي، شهري گزر
اوچ گؤزلو كؤرپويه كيم دوداق بوزر؟
صفالي، گزمهلي اورمونون بندي
گئيينيب سوزمهلي اورمونون بندي
اورمونون گؤلونه دوشن دوزلانار
اوستونده سئيريشن[6] قوشلار نازلانار
آدالاري[7] گزن قيشدا يازلانار
سولاري دوزلودور باخ اورمو گؤلو
دنيزجه سؤزلودور باخ اورمو گؤلو
باغچالاري اولار ميوهيه دولو
آغاجي بار وئرر بوداق دولوسو
انسانين الينين امگيدير بو
خونچالاري بزر اورمو آلماسي
الدن اله گزر اورمو آلماسي
گل توت باغلاريندا گزمگه دادان
آغزي شيرين اولار كيشميشين دادان
دادليدير دوشابي، حالواسي بالدان
ديلي تك شيريندير اورمو نوغولو
ياد يوخ، بو يئريندير اورمو نوغولو
الدهكي بودور، چوخ ايتميشي واردير
يئدديسين آختارسان يئتميشي واردير
بادرشبيسي وار، بيتميشي واردير
خاصيتلي اولار اورمو آراغي
درده درمان قيلار اورمو آراغي
بوردا وار حقيقت، حقّين جاداسي
آلپ ارتونقا[8] يوردو، زردشت اوباسي
دانيال درهسي، امامزاداسي
درويشلر مكاني اورمو داغلاري
ارميشلر مكاني اورمو داغلاري
وطندير، وطنه گووهنريك بيز
چون اجداديميزدان اوندا واردير ايز
چؤكريك آدينين قارشيسيندا ديز
آذربايجانيمين گؤزودور اورمو
گؤزل آذربايجان سؤزودور اورمو.
شعر: بهرام اسدي
[1] آذربايجان فولكلوروندا گليبدير:
................
گل اوخو بيزيم ديلي
بيزيم ديل اورمو ديلي
......................
[2] يئني تاپينتيلارا اساساً سومئرلر، اورمو منطقهسيندن كؤچموش انسانلار اولوبلار.
[3] موسيقيچيلرين آراشديرمالارينا گؤره اورمو ساز شيوهسي سومئرلر ايله عينيدير.
[4] ديرناق آراسينداكي بئيت شاه اسماعيل صفوي زامانيندا ياشايان آشيق قوربانيدندير.
[5] آديني سهگنبد يازسالار دا بو آبيدهنين آدي سؤيومبتدير.
[6] ناز ايله اوچانلار، يئريينلر. فارسجا: خراميدن.
[7] آدا: جزيره، ياريم آدا: شبه جزيره.
[8] توركلرين(ساكالارين) بؤيوك سركردهسي، فارس ديلينده افراسياب آدلانيب. روايتلره گؤره آلپ ارتونقا بير مدت كاظم داشيدا اولوبدور.
