توركجه ميزي قوروماق، آناديلي بورجوموزدور
توركجه ميزي قوروماق، آناديلي بورجوموزدور
يازان: حسين واحدي
اولو يارادان، اينسانلاري ياراداندا اونلارين دانيشديقلاري اوچون ديلي پاي وئريب و اينسانلارلا حئيوانلاري فرقلنديريب دير. بيز موسلمانلارين قوتسال كيتابي، قورآن-دا ايسه بو ديل لر تانري-دان بير بَليرتج (نشانه) اولاراق گؤسته ريليبدير. بللي اولدوغو كيمي ديل تانري وريندن، چوخ اؤنملي ساييليب و يوكسك يئره صاحيب دير.
بوتون ديللر گؤزل دير و يئرينده هاميسينا دَير وئريب اونلاري قورويوب ساخلاماق بيز اينسانلار اوچون آغير گؤرَودير(وظيفه)–دير. بونون يانيندا هر اينسانين اؤز آنا ديلي داها فرقلي و اؤنملي ساييلير. اينسان اؤز آنا ديلينده دويغولاريني اوزه چيخاريب، اونلاري ياشادير. آنا ديليني بيلمه ين اينسان ايسه اؤز آنا ديلينده اولان دويغولاردان اوزاق قالاراق، اؤزگه دويغولاري ايله ياشاياجاق دير!
اينديكي چاغيميزدا آنا ديلينين يانيندا، هر اينسان دونيانين باشقا ديللريندن، بير- ايكي سيني ايسه باجاراندا، دونيايا نئچه آچي-دان و نئچه يؤن-دن باخا بيليب و نئچه اينسان ساييلير. آمما آنا ديلين بيلمه ين ايسه، اون ديل بئله بيلسه ده، ظولوم آلتيندا ياشايير. آنا ديلي بير اينسانين وارليغي ساييلاراق اونو بيلمه ين اينسان، اؤز وارليغيندان اوزاق دوشه رك، آنا ديلينده اولان بوتون دويغولار ايله گؤزلليك لردن محروم قالير.
دونيانين او بيري اينسانلارينا تاي بيزم ده، اؤز آنا ديليميز واردير. بيزيم آنا ديليميز اولان توركجه (آذربايجان توركجه سي)، دونيانين گوجلو، گؤزل، قايدالي و دَيرلي ديللريندن ساييلاراق، ياشاماقدادير. بيز ايسه اونو ياشاتماليييق. اؤنجه اؤلكه ميزين قانونوندان فايدالاناراق، اونو اوخول-لار ايله بيليم يوردلاردا ديري ساخلاماق ان واجيب اولان دير و بودا رؤيالاردان اوزاق قالان بير زاد دئييل دير. ايسلامي اؤلكه ميزده بو ايمكان وار و تئز-گئج ياراناجاق دير و بو ايشله تانري وَريندن وئريلن پاي-ا يييه (صاحب) چيخاجاييق.
اونون يانيندا اينديكي دورومدا، يئتيري (رسانه)-لرين هاميسيندا، اؤزلليك له راديو-تلويزيون دا، توركجه ميزي تميز و دوزگون دانيشماق ايله، ديليميزه بير آيري يارديم ائده بيله ريك. تأسفله بو ايكي يئتيري (رسانه) ده، اؤزلليكله اوستاني شبكه لرده (آذربايجان تورك لري ياشايان اوستان لارين شبكه لرينده) توركجه ميزه هر ديلدن بير آز قاتيب يئني بير ديل ياراديب لار و يقين اولاراق كوتله نين ده (مردم) دانيشيغيندا تأثير قويولور.
گؤزل توركجه ميز راديو-تلويزيون دا دوغرو-دوزگون و تميز دانيشيلسا، يوزده-يوز كوتله نين ده دانيشيغي دوزگون توركجه اولاجاق دير. جمله نين سونوندا تكجه بير توركجه فعل گتيرمه يه، توركجه دانيشماق دئمزلر!! گركليدير بونا چوخ دقت ائديب ديليميزين آرادان گئتمه سينه يارديم ائتمه يك. اينديكي وضعيت ده توركجه كيتاب لار ايله نشريه لردن ايسه فايدالانا بيله ريك. بو ايشله هم اونلار آياق اوسته قالار همده توركجه ميز ياشايار.
اؤزوموز ايسه دانيشيغيميزا دقت ائتمه ليييك، نه زامانادك ديليميزه خور گؤز ايله باخا جاييق؟ ندن توركجه دانيشاندا جمله ميزين چوخونو باشقا ديلده دئييريك، بودا كيلاسمي؟ منجه كيلاس و افتخار، توركجه ميزي دوزگون دانيشماقدادير. پيس عادت لريميزدن بيري عددلري، بويالاري و... باشقا ديلده دئمك دير. تورك، توركجه!! دانيشاندا اؤلكه ده ياشايانلارين هاميسي نه دانيشديغيني آنلايا بيلير و اودا توركجه ميزه هر ديلدن قاتماسي ندني (سببي) دير. همن آدام باشقا ديلده دانيشاندا چاليشير هم تميز، همده لهجه سيز دانيشسين!! و بيري بيلمه دن آيري بير ديلين كلمه سين او ديله قاتاندا، ايش گولمه يه چكير!
ديليميزين آرادان گئتمه سي ائله بو عددلر ايله بويالار و جمله ميزده تكجه توركجه بير فعلي ايشلتمك دن باشلايير، نه زامانا كيمين، بير-بيريميزه، واز گئچ نه اولاجاق -دئيه جه ييك؟ دوروم بئله گئديرسه، ساباح ديليميزدن قورو بير آد قالار!!
ديليميزي قوروماق ايسته ييريك سه، بوتون دَيرلي يازيچيلاريميز، تميز و توركجه قيرامئرينده يازماليديرلار. ان اؤنملي سي، كه/كي، اگر، چونكي، آيا و... كلمه لريني قوللانماق لا ديليميزه آغير بير ضربه وورماغا داوام ائديريك. آمما اونلاري ديليميزدن آييرماق لا ديليميز داها گؤزللشه جك دير. بو ايش ايسه يازيچيلاريميزين وظيفه سيني آغيرلادير. اونلار توپلومون آيديني اولاراق، ديليميزي جانلي و تميز ياشاديب، ساخلاماسي اوچون داها چوخ چاليشيب، زحمت چكمه ليديرلر.
ديليميزي ياشاتما، يئرلرين بيري ايسه اينترنت دير. وبلاگ لار ايله سايت لاريميزدا توركجه ميزه اؤزل يئر وئريب اونو قوللانماق لا بير آيري يارديم ائده بيله ريك.
بو قيسا يازيدا ايسته ييم آنا ديليميزي قوروماغي خاطيرلاتماق دير و هر بير آذربايجان توركونه اؤز ديليني قوللانماق و اونو ياشاديب گله جك نسيل لريميزه ساخلاماق، آنا ديلي بورجودور. اومود ائديرم ديليميز ياشام بويو ياشاياجاق دير.
