شيخ صفي كيمي؟ قارا مجموعه سى نه دير؟
|
سلطان شيخ صفي‌الدين، ابوالفتح اسحاق بن امين‌الدين
جبرائيل‌كلخواراني اردبيلي، اردبيل شهري‌نين ياخينليغيندا يئرلشن «كلخوران»كندينده،
هجري يئددينجي عصرين ايكينجي ياريسيندا، بعضي‌آراشديرمالارا گؤره 650 - نجي
ايلده، دونيايا گلميش و 735 ه.ق(1334.م) ده اردبيلده وفات ائتميشدير. صفي‌الدين، اوشاقليغيندا ديني تربيت گؤرموش، وقارلي و متين ومقيد بؤيوموشدور. معتبر قايناقلاردا، اونون بئشينجي جدي «فيروزشاه قيزيل باش» آدلانير. فيروز شاهين اوغلو عوض، عوضين اوغلومحمد و محدين اوغلو صلاح‌الدين، و اونون اوغلو امين‌الدين‌جبرائيل، صفي‌الدينين جدلري ايديلر. شيخ امين‌الدين جبرائيل، «قوجا كمال الدين عربشاه اردبيلي»نين‌مريدي ايدي و زمانه‌سي‌نين تقوالي عاليملريندن، اولان اردبيلين‌ياخينليغيندا «باري» كندينده ياشايان «جمال‌الدين باروقي»نين‌عصمتلي قيزي «دؤلت خاتون» ايله ائولنميشدير. صفي‌الدين اسحاق،بو عصمتلي و تقوايا معروف اولان آنانين بئشينجي اوشاغي ايدي. بوتقوالي خانيم، صفي‌الديندن سونرا، ايكي اوغلان‌دا دونياياگتيرميشدير. امين‌الدين جبرائيلدن آلتي اوغلان و بير قيزدوغموشدور. اونلارين اوغلانلاري‌نين آدلاري بئله دير: محمد،رشيدالدين، اسماعيل، صفي‌الدين، يعقوب و فخرالدين.
قارا مجموعه‌سي امين‌الدين جبرائيل دونيادان كؤچنده، صفي‌الدين آلتي ياشيندا ايدي. آناسي اونو، باشقااوشاقلاري كيمي درين احساسلي و تقوالي و ديني خصلتلره صاحيب بؤيودور. آناسي «دؤلت‌خاتون» ساوادلي تورك خانيمي ايدي و شعر يازاردي. او، فارسجا و عربجه‌ده بيلرميش.صفي‌الدين توركجه ميزي و عربجه‌ني اؤز آناسي يانيندا اوخوموش و يئني يئتمه ايكن قرآني‌حفظ ائتميشدير، قرآن تفسيريني اؤز آناسيندان اؤيره‌نن صفي‌الدين، گنج ايكن آناسي‌نين‌توصيه‌سي و اذني ايله شيرازا گئدير كي، «شيخ نجيب‌الدين بوزگوش شيرازي» يانيندا درسه دوام‌ائتسين. او شيرازا، يئتيشنده، شيخ نجيب‌الدين وفات ائتميشدي. شيرازدا بير چوخ درويشلر وعاليملر ايله گؤروشور. اورادا، شيخ سعدي ايله‌ده معاشرت ائتميش و لاكين سعدي‌دن‌اينجيميش و اونون تقديم ائتديگي ديواني‌دا قبول ائتمه‌ميشدي!(1) شيرازدا شيخ نجيب‌الدين اوغلو ظهيرالدين بوز گوش اونا دئدي‌كي: «سني شيخ زاهد گيلاني‌راضي سالابيلر.» صفي‌الدين اسحاق دؤرد ايل اردبيلدن اوزاق قالديقدان سونرا، شيخ زاهد گيلاني‌نين يانيناگئتدي. او زامان شيخ زاهد آلتميش ياشيندا ايدي. شيخ صفي ايگيرمي ايكي ايل اونون يانينداقالدي. گيلك ديليني‌ده اورادا اؤيرندي و اونون قيزي «بي‌بي فاطمه» ايله ائولندي و اونا «فاطمه‌خاتون» لقبي وئردي. شيخ زاهد اؤلدوكدن سونرا، شيخ صفي اؤز شهري اردبيله قاييتدي و عؤمرونون سونونا قده‌رآنا وطنده ياشادي، چوخلو عاليم و عارف تربيت اتتديكدن سونرا، اوزمانين دانشگاهي اولان،اؤز زاويه‌سينده دفن ائديلدي.
2-1. شيخ صفي‌نين شخصيتنه باخيش توركجه ميرزه يازيلان «قارا مجموعه»لر و ادبي - عرفاني قايناقلاردا، شيخ صفي‌ني اولو بيرمرشد و عاليم كيمي گؤروروك. اونو، بوتون كيتابلاردا «سلطان شيخ صفي قدس سره» كيمي قئيدائديرلر. اونو، «دده قورقود» كيمي ائلجه بيلن و كاميل مرشد وصف ائديرلر. فارسجا و عربجه قايناقلاردادا، شيخ صفي چون حؤرمتله ياد ائديلير. ميثال ايچون رضاقلي‌خان هدايتين «رياض العارفين» اثرينده وئرديگي قئيدلره دقت ائده‌ليم: «شيخ العارفين و برهان الواصلين القطب الاصفياء في‌الافاق صفي‌الدين اسحاق، نسب آن‌جناب به حضرت امام همام موسي‌الكاظم مي‌پيوندد و اجداد عظامش هاديان راه يقين و احفادكرامش حاميان دين مبين... زياده بر سي ساله به هدايت و ارشاد طالبان اشتغال داشت و زياده ازصد هزار كس تربيت فرمود.»(2) تاريخچيلر يازيرلار كي، شيخ صفي اؤز زمانيندا تانينميش و چوخ حؤرمتلي بير شخصيت‌ايميش. حتي ائلخانليلار، و اونلارين آدليم وزيري خواجه رشيدالدين فضل‌الله همداني، شيخ‌صفي‌يه، تشيّع معارفي‌نين تبليغي ايچون، هر ايل چوخلو پول و ارزاق گؤندريرديلر. شيخ صفي‌اولدوكدن سونرا، اونون حاققيندا كشف كرامات و تقواسينا عائد چوخلو افسانه‌لرده‌اويدورولموشدو. بودا، اونون تميز حيات سورمه‌سيندن بير علامت اولا بيلر. شيخ صفي شخصيتينه منفي باخيشلاردا واردير. بيرينجي منفي باخيش انگلتره‌لي «ادواردبراون» طرفيندن دير. ايكينجي باخيش ايسه اونون يولسوزلوغونو، حياسيز جاسينا تعقيب ائدن«احمد كسروي» طرفيندن دير. او، حتي شيخ صفي شخصيتي‌ني ترور ائتمه‌ك ايچون «شيخ‌صفي و تبارش» آدلي فارسجا، اوزدن ايراق بير علمي جزوه‌ده يازير.بو كيتابين اون سؤزونده‌يازيركي «.. من اثبات ائدجگم كي شيخ صفي: 1ـ سيد دگيلدي، 2ـ سني ايدي و شيعه دگيلدي،3ـ فارس ايدي و تورك دگيلدي(!)»(3) كسروي ائله همين سؤزلري يازديغي صحيفه‌ده تناقضه قاپيلير و دئيير: «زبان شيخ صفي آذري‌مي‌بوده و تركي نمي‌دانسته(!)»(4) و اؤزو بيلمه‌دن «فارسي» ايله «آذري»ني قاريشديرير. كسروي‌نين باشقا بير تناقضي بوكي، شيخ صفي‌نين گيلك ديلينده يازديغي 17 بيت شعري،ايلك اونجه تاليشجا و سونرا آذري‌جه(؟) آدلانديرير.(5) بيلينديگي‌كيمي، او جعل ائتديگي «آذري يا زبان باستان آذربايجان (؟)» نظريه سيني‌ده ائله بو17 بيت اساسيندا قورموشدور. كسروي، شيخ صفي‌نين شيعه اولماماسي ادعاسي ايچون‌ده گولونج دليل گتيرير. اودا بوكي:«در باب چهارم صفوة‌الصفا كه دربارة «كلمات و تحقيقات» شيخ صفي است، حديثهايي است كه‌ياد شده، حديثهاي سنيان است(!)» صفوة‌الصفاداكي تأكيدي‌ده قبول ائتمير دئيير(6): «سوال كردند از شيخ قدس سره كه شيخ رامذهب چيست؟ فرمود كه ما مذهب اهل بيت پيغمبر داريم كه ايشان نهايت تقوي و طهارت‌مري مي‌داشته‌اند و عمل مي‌نمود و از تساهل و نهادن در احكام شرع اجتناب مي‌فرمود تا به‌حدي كه به سنن مثل واجبات مواظبت مي‌كرد و از مكروهات مثل محرمات محترز بود.» ولاكين عموميتله صفويلرين هاميسي، و اينديده اردبيلده و دونيانين مختليف يئرلرينده‌ياشايان «صفوي زاده‌لر» اوزلري، سيدليك‌لرينه، شيعه‌ليك‌لرينه و توركلوك‌لرينه افتخارائتميشلر و ائديرلر و بو فخري آچيقجاسينا ديله گتيرميشلر و گتيريرلر. بورادا بونو قئيد ائتمه‌لييم‌صفوي زاده‌لرين يازيلان شجره‌لري، ايرانداكي بير چوخ خاندانلارين شجره‌لريندن داها معتبرشجره‌لر حساب اولونور و بير چوخلاري «آستان قدس رضوي» سندلرينده ثبت اولونموشدور. كسروي و اونون ال اوشاقلاري‌نين ادب سيزليك‌لري، اينديه قده‌ر شيخ صفي‌نين توركلوگو،شيعه‌ليگي و سيدليگي‌ني سؤال آلتينا آپارا بيلمه‌ميشدير.
3-1. اردبيل شهري، شيخ صفي‌نين ارشاد مركزي اردبيل سؤزونون كؤكو «اردؤول» اولماليدير. اسكي قايناقلاردادا «اردويل» يازيلير(7) بو سؤزايكي حصه‌دن عيبارتدير: 1- ار، (-ar)، ايگيد، جوانمرد، پهلوان، قهرمان، سرباز و سردار معناسيندا. نئجه‌كي، آذر (= آذ +ار) كلمه‌سينده و هابئله اراز (ار + آز) يا ارس كلمه‌سينده‌ده، كلمه‌نين باشيندا و يا سونونداايشلنميشدير و آذربايجاندا ياشايان تورك عشيره‌لريندن اولان «آز» عشيره‌سي‌نين آدي ايله‌باغليدير. «اردؤول» سؤزوده، «آذر» و «آراز» سؤزلري كيمي «ار» سؤزونون باشقا سؤزله بيرلشمه‌سي ايله‌حاصيل اولموشدور. 2- كلمه‌نين ايكنيجي حصه‌سي «دؤول» سؤزو ايسه، «دؤومك» dخvmek مصدري‌نين متعدي‌فورماسي‌نين امر شكلي اولماليدير. بو مقدس آدا اويدورولان «آرتاويل». كيمي اتيمولوژيلر، آريامهر شوونيزي‌نين اويدورمالاريندا ساييلا بيلر. اردبيل، اسلاميتدن قاباق، آذربايجان تورپاغي‌نين ان بؤيوك و مهم شهري ساييليردي و خزر (ويا آذر kaz(AZ)+er) توركلري‌نين پايتختي حساب اولونوردو. شيخ صفي بو شهرده، يوزمينلر عارف و عاليم تربيت ائتميشدير، اردبيل شهريني اوزطريفتي‌نين ارشاد و تبليغ مركزينه چئويرميشدير. تاريخي قايناقلار گؤستريركي، اونون معنوي نفوذو اوز زامانيندا اردبيلده يگانه و تايسيزايدي، وفاتيندان سونرا ايسه بوتون آذربايجان بؤلگه‌سيني بوروموش و «شيخ اوغلو شاه‌اسماعيل ختائي»نين ظهورونا منجر اولموشدور. ايران تاريخينده اردبيلليلر و صفويلرين بوراخديغي اهميتلي تأثير، تاريخين مسيريني‌دگيشميشدير و اينانيلماز بير يئني دوروما گتيرميشدير.
4-1. قارا مجموعه نه‌دير؟ هجري يئددينجي و سكگيزينجي عصرلرده، آذربايجاندا، معلم‌لر و مرشدلر طرفيندن مدرسه‌لرو زاويه‌لرده، سُفته‌لرده و مريدلره تدريس ائتمه مقصدي ايله يازيلان حجملي كيتابلارا «قارامجموعه» دئييليردي. بورادا «قارا» سؤزو، بيلينديگي كيمي، بؤيوك، گئنيش، توپلو و حجملي‌معناسيندا دير. نئجه‌كي قاراباغ، قاراداغ، قارادره، قارادنيز، قاراسو، قارابولاق، قاراتپه و قاراپاپاق‌سوزلرينده‌ده همين معنالاردا ايشلنميشدير. «قارا مجموعه» كيتابلاري، عموميتله «طريقت» و تصوفي زاويه‌لرده تدريس اولونور و همين‌موضوعلار ايله علاقه‌دار، شعر و نثر بؤلوملريني احتوا ائديرميش. تحميديه، نعت، منقبه،حكايه، روايه، تضرع، ايلاهي، مناجات، كرامات و بو كيمي موضوعلاردا يازيلان عرفاني اثرلر،توركجه‌ميزده بو آد آلتيندا توپلانميشدير. قارا مجموعه‌لرده گئدن متنلر، عموميتله نثرقطعه‌لرينده تشكيل تاپير. قارا مجموعه‌لرين خاص و يگانه مؤلفي يوخدور. اما، عموميتله بو كيتابلار بير مرشد آديناتوپلانارميش. شيخ صفي‌الدين اردبيلي زامانيندا، اونون آذربايجاندا عرفاني زاويه‌لرين‌توسعه‌سينده بؤيوك رولو اولدوغو اوچون، «قارا مجموعه» اونون آدي ايله باغلاندي. شيخ‌صفي‌دن سونرا، اونون مريدلري و عموميتله صفوي جوانلاري و اردبيللي عارفلر و عاليملرطرفيندن، توركجه ميزه بير چوخلو «قارا مجموعه» قازانديريلميشدير. تقديم ائتديگيميز بيراسكي قايناقلاردا، «قارا مجموعه» آدلي خاص بير كيتابين‌دا شيخ صفي‌الدين اردبيلي طرفيندن‌توركجه تأليف اولماسينا اشاره اولونور. اليميزده اولان قايناقلار آراسيندا «غربي»نين توركجه‌تذكره‌سيني آد آپارا بيليريك. هابئله «بقائي»نين فارسجا تذكره‌سينده‌ده بو مسأله‌يه اشاره اولونور.اونلار دئييرلركي، «... شيخ صفي‌نين قارا مجموعه آدلي اثري يالنيز صفوي سلطانلاري‌نين‌كيتابخانالاريندا تاپيلا بيلر و بو خزانه‌لردن ائشيگه چيخماز.»
5-1. شيخ صفي‌نين باشقا اثرلري توركجه يازيلان قارا مجموعه‌دن باشقا، شيخ صفي‌نين بير نئچه توركجه و فارسجا و عربجه‌اثري‌ده اولموشدور. بو اثرلرين فهرستيني بئله سيرالاماق اولور: 1- مثنوي شرحي (توركجه) بو اثردن بير نسخه نجف‌ده اميرالمؤمنين(8) كيتابخاناسيندا 1099ساي آلتيندا ساخلانيلير. 2ـ فنا (فارسجا). بو اثردن بير نسخه تهران دانشگاهي مركز كيتابخاسيندا 4/4209 ساي آلتينداساخلانيلير. 3ـ صلة‌الفقيه (عربجه) 4ـ تحقيقات (توركجه) بو اثرين بعضي حصه‌لري «قارا مجموعه»لره داخيل ائديلميشدير. 5ـ تحقيقات (فارسجا) بو اثرين بير چوخ بؤلوملري «صفوة الصفا» كيتابينا داخيل‌ائديلميشدير.(9) 6-1. اليازمالار آراسيندا بشر تاريخينده، مسلمانلار قده‌ر باشقا امت و ملتلر كيتاب يازماميشلار. مسلمانلار عموميتله‌توركجه، عربجه و فارسجا اولاراق، يوز مينلر علم، ادبيات و اينجه صنعت ساحه‌لرينده كيتابلاريادگار قويموشلار. بو كيتابلار اليازمالار شكلينده بيزيم اليميزه گليب چاتميشدير. ايندي‌دونيانين كيتابخانالاريندا، ايكي ميليون جيلده ياخين توركجه، عربجه و فارسجا اليازماساخلانيليركي، اونلارين يالنيز اوچده بيري‌نين فهرستي يازيلميشدير و فهرستي يازيلان اليازمالارين ايسه يالنيز يوزده اونو چاپ اولموشدور. البته ودرديگيميز بو بيلگي هر أوچ ديلده يازيلان اثرلره عائددير. توركجه‌ميزه گلديكده، دوروم‌داهادا آجينا جاقلي‌دير. ميثال ايچون اولكه‌ميز ايرانين كيتابخانالاريندا ساخلانيلان توركجه‌اليازمالارين يوزده دوخسان بئشي هله فهرست اولماميشدير. يالنيز مشهدده «آستان قدس‌رضوي» و قم شهرينده «آيت الله نجفي مرعشي» كيتابخانالاري، بعضي توركجه الياز مالاريني‌داغينيق حالدا فهرست ائتميشلر و تهرانين «ملك» كيتابخاناسي اليازمالار داغينيق حالدا فهرست‌ائتميشلر و تهرانين «ملك» كيتابخاناسي اليازمالار فهرستينده توركجه بؤلومو آيريلميشدير.تبريزين «تربيت» و «ملي» كيتابخانالاري و هابئله تهرانين «ملي»، «شهيد مطهري» و «اسلامي‌شورا مجليسي» كيتابخانالاري‌نين فهرستلرينده ايسه داغينيق حالدا بعضي توركجه اليازمالارين‌توصيفلرينه راست گليريك. بو توصيفلر ايسه هاميسي فارسجا دير و بير چوخو مختصر و يانليش معلومات وئرير. و داهاآجيناجاقلي بوراسي كي، فهرست اولان بو يوزده بئش اليازمانين، اينديه‌كيمي هئچ بيريسي نشرائديلمه‌ميشدير. فهرست اولمايان توركجه اليازمالار ايسه، زمانه بلالاريندا قورتولوب قالان بؤيوك بير مدني‌ميراث كيمي ايندي، بيولوژيكي عاميللر، موذي بؤجكلر، گون ايشيغي و يا رطوبتلي هاواشرائطي آلتيندا، اولكه‌ميزين مهم كيتابخانالاري‌نين زئر زميلرينده چورومكده ديرلر: كئچكميشده توركجه اليازمالارين امحاء ائديلمه‌سي، ايراندا، حاكيملر طرفيندن بير «ملي‌وظيفه» كيمي قلمه آلينيردي. بير روايته گؤره افغان ياد ائلليلري اصفهاني اله كئچيرتديكدن‌سونرا، اصفهانين بؤيوك حاماملاريني قيزديرماق ايچون، توركجه كيتابلاري آلتي آي‌يانديرديلار. پهلوي زمانيندا ايسه ساوا كين گيزلي فرماني ايله، قالاق - قالاق توركجه اليازمالارامحاء ائديلميش و آرادان آپاريلميشدير و توركجه‌ميز، علم و يازي ديلي يوخ، بلكه «فحش ودشنام و اوباش و اراذل» ديلي كيمي تانيتديريلميشدير. تهران دانشگاهي‌نين مركزي‌كيتابخاناسيندا ساخلانيلان بير چوخ اليازمانين سون حصه‌لري امحاء ائديلميشدير و امحاءائديلين بؤلومون يئرينده يازميشلار: «چون مابقي اثر هم تركي بود و هم خالي از هر گونه فائده‌ادبي، از گنجاندن آن در برگه‌دان خودداري گرديد.» قالان اليازمالاريميزي قوروماق، مرمت ائتمك و ساخلاماق اسلام مدنيتي ايچون چوخ‌اهميتلي دير. مسلمانلار، اليازمالار و واسيطه‌سي ايله چوخ بويوك و عجايب بير مدني ميراث‌قويوب گئتميشلركي، بو ميراثين بؤيوك بير بؤلومو توركجه‌دير. بو، اينانيلماز درجه‌ده قيمتلي بيرميراثدير و بيزيم ايندي او اثرلر و اثرلر صاحيبلري‌نين آدلاريندان، اوزوموزون خبريميزيوخدور. بو بؤيوك و افتخارا شايان علمي - مدني ميراثي تانيماقلا، بيز بشر علملر تاريخيني‌تدوين ائده بيله‌جه‌ييك. بو يولدا، بيرينجي آدديم، اليازما نسخه‌لريني تانيماق و اونلاري‌توصيف ائتمك و بلكه اوندان قاباق، مملكتيميز ايرانين كيتابخانالاريندا ساخلانيلان توركجه‌اليازمالاري امحاء آفتلري و صدمه‌لريندن قوروماق و ساخلاماقدير. بو مقدس ايش ايچون، البته‌مسئوللاريميزين خصوصي دقت، دغدغه و امريه‌لري گوزله‌نيلمكده دير. بوگون، دونيادا بوتون دؤلتلر، اليازمالاري مرمت و حيفظ ائتمگي اؤزلرينه بورج بيليرلر.ايراندادا فارس ديلينده اولان اليازمالار، اينديه قده‌ر حمد اولسون‌كي ياخشي قورونموشلار و بواليازمالار اوچون يوزلر توصيفي و تحليلي فهرست يازيلميشدير و مُدرن تجهيزات ايله‌ساخلانيلير. مملكتيمزده موجود اولان مينلر توركجه اليازمالارين قورونماسي دا البته دؤلت‌مسئوللاري‌نين بوينوندا بير وظيفه‌دير. بو اليازمالارين موضوعلاري چوخ متنوع و چشيدلي‌اولموشدور. طب، نجوم، ادبيات و ديني بحثلردن توتموش تا اكينچيليك، كيمياگرليك،علم‌الحيل، مكانيك و ناغيللارا، توركجه اليازمالاردا راست گلمك اولار. بيزيم بير چوخ مدني آبيده‌ميز ايندي آرادان گئتميشدير و بعضيلريندن يالنيز بير - ايكي اليازماالده دير. ياخشي بيليريك‌كي «دده قورقود» آبيده‌سيندن ايندي دونيادا ساخلانيلان يالنيز ايكي‌اليازما قانينميشدير. «قوتادغو بيليغ» و «عتبة‌الحقايق» منظومه‌لريندن ده چوخ آز نسخه معرفي اولموشدور. بيرچوخ «اوغوزنامه» و «سلجوق نامه‌لر»يميزدن قالان اليازمالار ايندي تانينماميش اولموشلار. دارالارشاد اردبيل شهرينده شيخ صفي مقبره‌سي محلينده، ساخلانيلان يوزمين اليازمادان،روسلار و سونرا رضا شاهين 1318 ش. غارتيندن سونرا، ايندي بير نسخه‌ده قالماميشدير. شيخ‌صفي‌نين «قارا مجموعه» اثري‌نين حصه‌لريندن ايسه يالنيز بير نسخه تانينميشدير و «مناقب شيخ‌صفي» آدي ايله تهراندا فهرست اولونموشدور. بو اليازمالار بيزيم ديني، مدني، تاريخي، ادبي، و قومي كيمليگيميز و سيجيلليميزدير. توركجه‌اليازمالارين بير حصه‌سي ائولرده ساخلانيلير. بو نفيس اليازمالاردا تانيتديريلمالي وقورونماليدير. كئچميشده آذربايجانليلار پهلوي حكومتي مزدورلارينا اعتماد ائتمه‌ديكلري‌ايچون، توركجه اليازمالاري گيزلتميش و يا ايراندان چيخارتميشلار. اودوركي، ايندي بير چوخ‌توركجه شيعه اليازمالاري «نجف» و «كربلا» كيتابخانالاريندا ساخلانيلير. «قارا مجموعه»نين تام متني‌ني تاپيب برپا ائتمه ايچون، گنج نسليميز، شيخ صفي‌يه منسوب‌اولان بوتون اليازمالاري آراماليدير. هله‌ليك، بيزيم بورادا نشر ائتديگيميز مجموعه‌لرده علاوه،دونيا كيتابخانالاريندا، «سلطان شيخ صفي‌الدين اردبيلي»يه منسوب اولان توركجه «مناقب»،«كلمات» آدلي بعضي اليازمالارين توصيفيني آشاغيدا تقديم ائديريك: 1ـ تبريز ملي كيتابخاناسي‌نين حاج حسين آقا نخجواني بؤلومونده ساخلانيلان 710ـ نمره‌لي‌توركجه اليازما. بو اليازماني محمدبن حسين الكاتب استنساخ ائتميشدير. او، اليازمانين‌استنساخيني هيجري 949 ـ نجو ايلده باشلاميش و 950ـ نجي ايلده قورتارميشدير. ايليازماشيرازدا يازيلميشدير. 2ـ تهران، قاباق‌كي سلطنتي كيتابخانانين مجموعه‌سينه عائد اولان 2761 ـ نمره‌لي‌توركجه اليازما. بو اليازماني محمود خوشنويس شيرازي هيجري 949 - نجو ايلده استنساخ‌ائتميشدير. 3ـ پترز بورگ شهري‌نين شرق شناسليق انستيتوسو كيتابخاناسيندا ساخلانيلان توركجه اليازما. 4ـ سالتيكوف شئچدرين عمومي كيتابخاناسيندا ساخلانيلان توركجه اليازما. 5ـ تهرانين «ملت» كيتابخاناسيندا ساخلانيلان 3608 نمره‌لي اليازما. 6- نجفين اميرالمؤمنين كيتابخاناسيندا ساخلانيلان 485 ساييلي اليازما. 7- تهران دانشگاهيندا ساخلانيلان 4/4209 ساييلي اليازما. بو نسخه‌لرين هاميسي نشر اولماليدير. و بو مقدس ايش گنج نسليميزين بورجودور.
7-1. قارا مجموعه‌نين نثري اسلاميتدن سونراكي توركجه ادبيات تاريخيميزده دؤرد جوره نثر ايشه آپاريلميشدير: 1-7-1. آغير نثر عموميتله عربجه و فارسجا تأثيري آلتيندا، آغير كلمه‌لر و عيبارت‌لر، طنطنه‌لي جمله‌لرايشله‌دن، اسكي منشي‌لر بو نثره رغبت گؤسترميشلر. بعضي تذكره‌لر و منشآت مجموعه‌لري بونثر ايله يازيمليشدير. بو نثري ياخشي باشا دوشمك ايچون هر اوچ ديلي، توركجه، فارسجا وعربجه‌ني اويرنمك لازمدير. ميثال ايچون ويسي‌نين، «درة‌التاج» و منشآت كيتابلاري بو نثرنمونه‌لريندن ساييلير. 2-7-1. بزه‌كلي نثر توركجه‌ميزين قانونلارينا اويماق ايسته‌ين و لاكين نثري ادبي بزكلر و سوسلر ايله بزه‌ين نثريازانلاريميز، بو شيوه‌يه عمل ائتميشلر. اثرلرينده ادبي اوستادليقلاريني گؤسترمك ايچون،چوخلو سجع و تشبيه‌لر ايشه آپارميشلار. «نهج‌الفراديس» كيتابي بو شيوه‌دن بير نمونه‌دير. 3-7-1. اورتا نثر بو يازي ديلي خلقين دانيشيق ديليندن بير آز فاصله آچان بير ديله چئوريلميشدير. آيه‌لر،حديثلر، عربجه و فارسي عيباره‌لر و شعرلر ايله دولو اولان بو نثر بعضاً ده ساده نثره ياخينلاشير.«حديثة‌السعدا» و «صفوة‌الصفا» بئله بير نثر ايله يازيلميشدير. 4-7-1. ساده نثر خلقين دانشيق ديليني اساس توتان بير شيوه‌دير. عموميتله قرآن تفسيرلري، حديث كيتابلاري،مرثيه اثرلري، مناقب نامه‌لر، فئوت نامه‌لر، فئوت نامه‌لر، اوغوز نامه‌لر، سياحت نامه‌لر و عاشيق‌حكايه‌لري بو نثر ايله يازيلميشدير. بو شيون ايچون «دده قورقود كيتابي» و «اوغوزنامه» و «اصلي‌و كرم» و «كور اوغلو» آدلي اثرلري ميثال گتيرمك اولار. «مزكي النفوس»، «البويوروق»، «مغلطه‌روايتي»، «كؤنول» رساله‌سي و «صفوة‌الصفا» اثرلري‌ده بو شيوه ايله يازيلميشلار.
8-1. توركجه‌ميزين املاءسي بيلينديگي كيمي توركجه‌ميز، سومر (Sدmer)، گؤي تورك (Gخy Tدrk) و اويغور (Uygur)الفبالاريندان سونرا، توركلرين اسلامينه بويون اگديكلري ايله علاقه‌دار، قرآني الفبا ايله‌يازيمليشير. مسلمانلار همين الفبا ايله، توركجه‌ميزده بير دريا نظم و نثر اثرلري ياراتميشلار. اسلام الفباسي‌نين توركجه‌ميزين تاريخ بويونجا، چئشيدلي اقليملرده، مختليف منيمسه‌مه‌لري‌اولموشدور، اودور كي، بيزيم عصريميزه كيمي ثابت بير املاء قايدالارينا گليب چاتماميشدير. ولاكين، هر دؤرده اوزونه مخصوصي قايدالاردان تبعيّت ائتميشدير. هيجري 3ـ نجو عصردن آلتينجي عصره قده‌ر، قرآني الفبا ايله يازيلان توركجه متنلريميز،اعرابلي و حركه‌لي اولموشدور. اليميزده اولان «نهج الفراديس» اثري و «يونس امره»نين‌ديواني‌نين اليازمالاريني ميثال كيمي گؤسترمك اولار.(10) سونرا، سسلي حرفلري الفبا سيستمينه داخيل ائتمكله، حركه‌لي يازما ايشي قالديريلميشدير.خصوصيله صفوي دؤروندن اولكه‌ميزده توركجه متنلر گؤزل نستعليق خطي ايله و حركه‌سيزيازيلميشدير. املاء شيوه‌لريميز هله لازمي قده‌ر دقتله اؤيره‌نيلمه‌ميشدير. قاجار دؤرونون سونلاريندا نشراولان توركجه كيتابلاريميزين املاءسي، صفويه دؤرو املاءسي ايله چوخ فرقلي حاللار داشيير وچاغداش املاءميز ايسه، هله ثابت بير نقطه‌يه گليب چاتا بيلمه‌ميشدير. پهلوي رژيمي و شوونيزمي‌نين توركجه‌ميز ايله دوشمنليگي، املاء قايدالاريميزداقارماقاريشيقليغا يول آچان اساس عاميل كيمي دگرلنديريلير. بونونلا بئله، ضياليلار جوره - جوره املاء شيوه‌لري ابداع ائتمكده ديرلر و لاكين بئله‌نظره‌گليركي، بيز علمي اصللره اويغون و عموم خلقين منيمسه ديگي بير املاء شيوه‌سيندن‌هله‌ليك تبعيت ائتمه‌لييك. ميثال: گبي، گيبي، گب، گيب ايله، اله، الا، ايلا نجه، نيجه، نيچه، نچه اوله، اولا، اله، اولا 1-8-1. ب. پ، ج/ چ، د/ط، س/ص حرفلري توركجه سؤزلرده قاريشيق وضعيتده‌ايشله‌نيلير. ميثال: پاشا/باشا، جونكي/چونكي، چري/جري، جكسه / چكسه، صو/سو، سانكي/صانكي 2-8-1. توركجه‌ده ايشلننن عربجه و فارسجا سؤزلرده عموميتله توركجه تلفظ اساس‌ساييلمير و اولدوغو كيمي يازيلير: حاضر، افطار، بيت، سماع، نماز، مجلس، غاليب، عقل، نقل و... بيز بو سؤزلرين املاسيني بعضاً دگيشديك، ميثال: مجليس، عاغيل و... 3-8-1. بعضي واخت توركجه‌ميزده ايشلنن عربجه و فارسجا سؤزلر، توركجه تلفظ ايله‌يازيلير: ميثال: اوميد (اميد)، تز (تيز)، زيره (زيرا)، دوشمان (دوشمن)، خوجه (خواجه)، صپاره (سه‌پاره). 4-8-1.هاي غير ملفوظا ختم اولان عربجه و فارسجا سؤزلرده، توركجه اكلر ايله بيرلشنده،غيرملفوظ هادوشور. ميثال: قافلدن (قافله‌دن)، توبسي (توبه‌سي)، زمرسنه (زمره‌سنه)، معامليه (معامله‌يه)، خزينلر(خزينه‌لر)، مكدن (مكه‌دن)، سايسنده (سايه‌سنده) 5-8-1. توركجه سؤزلرده بير چوخ يئرده سسلي حرفلر ايشلنمير و سسليلرين يئرينه حركه‌ايشلنير، بو، ان اسكي توركجه املا قايداسي حساب اولونا بيلر. ميثال: قيننداً (قوينوندان)، بيرغن (بويروغون)، الر (ايله‌ري)، صكجي (سون اوجون)، گمي(گمي‌يه)، اچند (ايچينده)، برقدغ (بوارقدوغو)، ورلر (وئره‌لر)، قند (قوندو)، دو (دوه). 6-9-1. قارا مجموعه‌ده توركجه سؤزلرين، ديالكتولوژيك املاءلاري، عموميتله اردبيل‌لهجه‌سينده اولموشدور. بودا گؤسترير كي، قارا مجموعه متنلري‌نين ايلك يازان عاليملري،اردبيلليلر اولموشلار و ادعا ائتمك اولاركي، بيزيم تصوفي متنلريميزين ديل قايداسي گئديشي،اردبيل آغزي اساسيندا قورولموشدور. باشقا سؤزله دئسك، اردبيل آغزي، توركجه عرفاني‌متنلريميزين شاه بئيتي حساب اولونور. بو شيوه عموميتله فعللرين تلفظ‌لرينده ساخلانيلميشدير. ميثال: چلنور (چالينير)، گتور (گتير)، واردوغندان (وارديغيندان)، يومشاغ (يومشاق)، بيراوغور (بوارخير)، يتشور (يئتيشير). بو اوزلليكلري آرتيرماق اولار. نشر ائتديگيمز متنلر، املا خزينه‌سي كيمي نظر دقته‌آلينماليدير. بيزدن قاباق قارا مجموعه‌نين بعضي پارچالاريني نشر ائدن عاليملرده همين مسأله‌يه‌دقت ائتميشلر.(11)
پاورقي 1ـ فارسجا قايناقلاردا يازيلير: «معاشرت او پسند خاطرش نيفتاد و نسخه‌ي اشعار او را نپذيرفت» خارجي سياحلار، اوجمله‌دن «شاردن» ده بو مساله‌يه اشاره ائتميشدير. 2ـ رضاقلي‌خان هدايت، رياض‌العارفين، داش باسماسي، ص 101. 3ـ احمد كسروي، شيخ صفي و تبارش، تهران، كتيبه، 1355، ص 4. 4ـ همان يئر. 5- احمد كسروي، آذري يا زبان باستان آذربايگان، 1354، ص 31. 6- احمد كسروي، شيخ صفي و تبارش، همان ص 20. 7ـ ميثال ايچون، حدود العالم من المشرق الي المغرب اثري (فارسجا) و يا صورة‌الارض (عربجه) كتابلارينا باخين. 8ـ «غربي» نين همين تذكره‌سيني بو ياخينليقدا نشر ائدجه‌ييك. 9ـ بو اثرلرين فهرستي ايچون باخ. احمد منزوي، فهرست نسخه‌هاي خطي، ج 2، ص 1799. 10ـ بو ايكي اعرابلي اليازمانين فتو صورتي نشر ائديلميشدير. باخ: نهج‌الفردايس، تورك ديل قورومو نشري، آنكارا،1948 - و - يونس امره، ديوان، تورك ديل قورومو بشري. آنكارا، 1989. 11ـ او جمله‌دن مرحوم پروفسور فاخر ايز «اسكي تورك ادبياتيندا نشر» مجموعه‌سي (استانبول 1964) و احمد حامدالصراف «اشبك» كيتابي (بغداد 1954) نشرينده بو مسأله‌يه دقت ائتميشلر. |
