هامي‌نين دوستو آنتون
“حئيوانا نه اولدو” دئيه دوشونوردوم كي، يانيمدا بيري‌نين آدديملاديغي‌نين فرقينه وارديم: اوتوز ياش‌لاريندا، يوخسول گؤركم‌لي، قالستوك‌سوز [كراوات‌سيز]، باشي آچيق بير آدام ايدي. ديلنچي حئساب ائديب، اليمي جئبيمه آپارماق ايسته‌ديم. لاكين ياد آدام، كؤهنه بير دوستونو گؤرموش كيمي آچيق ماوي گؤزلريله منه ساكيت-ساكيت گولومسه‌دي. ايتي گؤستره‌رك:
- يازيغا گنه ياپيشيب، دئدي. گل، قوپا‌راق.
كؤهنه دوست‌لار كيمي منيمله “سن”له، “من”له دانيشيردي، لاكين او قدر شيرين باخيشي واردي كي، بونا فيكير وئرمه‌ديم. بير تاختا ايسكاميايا [اوتوراجاغا] دوغرو گئتديك، يانيندا ايله‌شديم. اوزون بير فيت چاليب، ايتي چاغيردي.
قريبه‌دير، ياد آدام‌لاردان چكينن كاسپار بو دعوتي خوش قارشيلادي: گليب باشيني ياد آدامين ديزينه قويدو، او دا، اوزون حساس بارماقلارييلا حئيوانين دري‌سيني يوخلاماغا باشلادي. نهايت ممنون بير ايفاديله، "آها!.." دئدي و عملياتا گيريشدي. ايت آغري حس ائتديگي اوچون بير نئچه دفعه زينگيلده‌دي. آما بوتونلوكجه قاچماغا چاليشمادي. بيردن-بيره آدام اونو بوراخدي.
گوله-گوله اليني هاوايا قالديريب بير شئي گؤستره‌رك:
- باخ بئله، دئدي، ايندي قاچا بيلرسن بالاجا!..
ايت آتيليب-دوشمه‌يه باشلايينجا، ياد آدام قالخدي و باش ايشارسيله ساغوللاشاراق گئتدي. گئديشي او قدر آني اولدو كي، زحمت حاققي اولا‌راق نه ايسه وئرمه‌يه، حتي تشككور ائتمه‌يه بئله واخت تاپا بيلمديم. گلديگي كيمي، عيني ساكيت و اينام‌لي احواللا سس‌سيزجه اوزاقلاشميشدي.
ائوه دؤننه قدر، بو آدامين عجايب حركتيني دوشونوردوم. بو حادثني قوجا آشپازيما دانيشديم.
آشپاز:
- آنتون‌دور. اؤزونو هر شئيه يئتيرير.
پئشه‌سي‌نين نه اولدوغونو، دولانيشيق اوچون نه ايش گؤردوگونو سوروشدوم. آشپاز عمل‌لي-باش‌لي چاشدي:
- هئئئچ، جاواب وئردي. پئشه؟ پئشه اونون نيينه لازيم‌دير؟
- جانيم، دولانماق اوچون هر كسين بير پئشه‌يه احتياجي يوخدورمو؟
- آنتونون يوخ‌دور. اونا لازيم اولان شئي‌لري هامي كؤنول‌لو وئرير. او پولا قيمت وئرمير. پولا احتياجي يوخ‌دور.
دوغروسو، قريبه ايش ايدي. دونيانين بوتون باشقا شهرلرينده اولدوغو كيمي قصبه‌ميزده ده بير ديليم چؤره‌يين، بير ايستكان سويون قارشيليغيندا پول اؤدمك واجيب ايدي. بير ياتاقدا ياتماق، كورييني اؤرتمك اوچون ده پول لازيم ايدي. او كؤهنه شالوارلي آدام بئله بير قانونا قارشي چيخيب دردسيز، قايغي‌سيز ياشاماغي نئجه باجاريردي؟
اونون سيرلي مئتودونو كشف ائتمه‌يه قرار وئرديم و آشپازين دوز دانيشديغيني حس ائتديم. آنتون دئديك‌لري آدامين هئچ بير كونكرئت ايشي يوخ ايدي. سحردن آخشاما قدر، كوچه‌لرده گزمك‌دن باشقا هئچ نه ائتميردي. آما گؤزو باغلي گزميردي. آرابايا سهو قوشولموش آت گؤرسه آراباچيني ساخلاييب، سهويني گؤستريردي. بير تاختاپوشون چورومكده اولدوغونو حس ائله‌سه، صاحبيني چاغيريب بوياسيني تزه‌له‌مه‌يي توصيه ائديردي. عموميتله بو كيمي ايشلري اونا حواله ائدردي‌لر؛ چونكي هامي بيليردي كي، اونو بورا گتيرن آجگؤزلوك و تاماه دئييل، يالنيز خيدمت ائتمك احتياجي‌دير.
سونرا‌دان اونون نئجه الوان ايشلر باجارديغيني گؤردوم!.. بير دفعه چكمچي كؤشكونده اوتوروب، آياققابيلاري تعمير ائدردي. باشقا بير گون، ضيافتده شئف قارسونلوق ائتديگي‌نين شاهيدي اولدوم. نؤوبتي دفعه ده اوشاق‌لاري گزمه‌يه آپاريردي. دقت يئتيرديم، كيمين بير احتياجي اولسا، يئرينده آنتونا مراجعت ائديردي. بير گون بازاردا آلما ساتديغيني گؤردوم: زاهيليق ياتاغيندا اولان ساتيجي قاديني اوز ائديردي.
شهرلرده خصوصي پئشه‌لري اولمايان چوخلو اينسان اولدوغونو بيليرم. آاما آنتون او بيري‌لر كيمي دئييلدي: لازيم اولان‌دان چوخ پول آلمازدي. ايشلري يولوندا اولدوغو زامان‌لاردا عموميتله هئچ نه آلمازدي.
“احتياجيم اولسا، سونرا گليب دئيه‌رم”، دئيه‌ردي. او قريبه گؤركم‌لي و خئيير ايسته‌ين آدامين اؤزو اوچون يئني بير اقتصادي سيستئم ايجاد ائتمه‌سي‌نين فرقينه وارديم. اينسان‌لارين دوز‌لوگونه گوونيردي. قناعت ائديب پول ييغماق عوضينه، هم‌يئرلي‌لري‌نين ميننتدارليق حس‌لريني بانك حئسابي كيمي ايستيفاده ائديردي. واري-يوخو، بو گؤزگؤرونمز قناعت حئسابينا توپلانيردي. قارشيسينداكينا بير ياخشي‌ليق ائديرميش كيمي، قارشيليق ايسته‌مه‌يي دوشونمه‌دن خيدمت ائدن بو آدامين حاققيني كسمك ان سيرتيق آدامين دا آغلينا گلميردي.
نه قدر حؤرمت‌لي اولدوغونو باشا دوشمك اوچون كوچه‌دن كئچمه‌ييني سئير ائتمك كيفايت ايدي. هامي اونا گولر اوزله "سالام" وئرر، هامي اليني سيخاردي. بو دردسيز آدام، سورتولموش پئنجه‌ييله كوچه‌ده، ماليكانه‌سيني تفتيش ائدن بير مولك صاحبي اداسييلا گزردي. اوريي ايسته‌ين ائوه گيره بيلر، اوريي ايستديگي سوفره‌نين باشيندا ايلشه بيلردي: هر شئي امرينه منتظردي. صاباحي دوشونمه‌مه‌يين و طالع ايله باريشماغين سيررينه واقيف اولان بير آدامين باشقا‌لاري اوزرينده نه قدر نفوذ صاحبي اولا بيلجه‌ييني هئچ بير زامان بو قدر ياخشي آنلاماميشديم.
دوغروسو، نه يالان دانيشيم، او گنه صحبتين‌دن سونرا آنتونا راست گلنده منه ياد آدام كيمي باشي ايله، اؤتري سالام وئرمه‌سي ختريمه دييردي. يقين كي، منه بير خيدمتي توخوندوغونو خاطيرلاتماق ايسته‌ميردي. عيني زاماندا بو اعتينا‌سيزليق منه بؤيوك بير دوست چئوره‌سين‌دن كناردا قالديغيم حيسسيني ياشاديردي. اونا گؤره نه واخت ائوده بير تعمير ايشي چيخسا، (مثلا، تعميره احتياجي اولان ناوالچا [نوودان]) آشپازا آنتونو چاغيرماسيني تاپشيرميشديم.
“هارا‌دان چاغيراق”، دئميشدي:
- بير يئرده دايانمير كي... آما اونا خبر گؤندررم.
بئله‌جه بو عجايب آدامين يئري-يوردو اولماديغيني اؤيرنديم. آما يئنه ده اونو تاپماق سون درجه آسان بير ايش ايدي. سانكي سيم‌سيز تئلئقراف اونو بوتون شهرله علاقه‌سيني قوروردو. راست گلديگينيز ايلك اينسانا "آنتونا احتياجيميز وار" دئمه‌يينيز كيفايت ايدي. بو خبر، آغيزدان آغيزا گزر، نهايت كيمسه اونونلا راستلاشاردي.
حقيقتن، او دفعه يئرينده، همين گون، گون اورتا‌دان سونرا گلديگيني گؤردوك. هر طرفه نظر سالدي، باغچا‌دان كئچركن بير تينگين بودانيلماغا، بير آغاجين يئري‌نين دييشديريلمه‌يه احتياجي اولدوغونو بيلديردي. نهايت ناوالچاني گؤزدن كئچيريب، ايشه باشلادي.
ايكي ساعت سونرا تعمير ايشي‌نين بيتديگيني خبر وئريب و هئچ تشككور ائتمه‌ييمه ايمكان وئرمه‌دن چيخيب گئتدي. آما بو دفعه آشپازا اونا بؤيوك ميقداردا پول وئرمه‌سيني تاپشيرميشديم. قادين‌دان، "آنتون راضي قالديمي؟" دئيه سوروشدوم.
“طبيعي”، دئدي:
- او هميشه راضي‌دير. اونا آلتي شيللينق وئرمك ايستديم، آما جمعي ايكي شيللينق قبول ائتدي. “بو گونه ده، صاباحا دا چاتا‌جاق” دئدي. آما دئدي كي، اگر جنابين كؤهنه بير پالتوسو وارسا...
بو آداما(آدامين وئريلن‌دن داها آزيني گؤتوردوگونه ايلك دفعه راست گليرديم) احتياجي اولان بير شئيي وئره بيله‌جه‌ييم اوچون نه قدر سئوينديگيمي ايضاح ائده بيلمرم. درحال آرخاسينجا قاچديم:
- آنتون!.. آنتون!.. سنه پالتو وئره‌جه‌يم!...
باخيش‌لاري‌نين ساكيت پاريلتيسي‌يلا يئني‌دن قارشيلاشديم. بير اينسانين اؤزونه گرك‌سيز بير پالتونو، بؤيوك احتياجي اولان بير باشقاسينا وئرمه‌سي اونون نظرينده چوخ طبيعي بير شئي ايدي.
آشپازا بوتون كؤهنه پالتارلاريمي گتيزديرديم. آنتون پالتار ييغينيني نظردن كئچيردي، ايچين‌دن بير پالتو سئچيب آييردي، گئيينيب يوخلادي و:
“بو منيم ايشيمه يارايار”، دئدي.
بو سؤزو، بير ماغازادا اؤنونه دوزولموش مال‌لار آراسين‌دان بير دنه‌سيني بينن بير جناب اداسييلا دئدي. سونرا او بيري پالتارلارا بير داها نظر سالدي:
- بو آياققابيلاري سالسئرگراسسئ‌دكي فريتزه وئره بيلرسن. بير جوت آياق‌قابييا احتياجي وار. بو كؤينك‌لري ده سقوارئ‌دكي ژوزئفه وئرسن ياخشي اولار. بير آز تمير ائدر، وسسالام. ايسته‌سن، اونلاري سنين آدين‌دان اونلارا چات‌ديريم.
بون‌لاري، سيزه اؤز ايستيي ايله ياخشي‌ليق ائدن بير اينسانين اصيل‌زاده اداسييلا سؤيله‌دي. اشيا‌لاريمي هئچ تانيماديغيم اينسان‌لارا آپاريب پايلاماسي اوچون اونا تشككور ائتمييمين لازيم گلديگيني دوشوندوم.
كؤينك‌لرله آياققابيلاري بوكركن علاوه ائتدي:
- دوزو، ياخشي آدامسان، بون‌لاري وئريرسن...
سونرا چيخيب گئتدي.
دوزونو بيلمك ايسته‌سه‌نيز، كيتاب‌لاريم حاقيندا به-به‌لي تنقيدلردن هئچ بيري بو صاف ايلتيفات قدر خوشوما گلمه‌ميشدي. سونراكي ايللرده، آنتونو تئز-تئز دوشونوردوم، هم ده بير ميننتدارليق دويغوسويلا. چونكي منه اونون قدر معنوي كؤمك ائتميش آز اينسان وار. چوخ واخت معنا‌سيز، كيچيك پول مسئله‌لريني اؤزومه چتين ائتديگيم واخت‌لار، احتياج‌لاري گونون صرورت‌لريني آشا بيلمديگي اوچون گوندن-گونه داها ساكيت و اعتبارلي بير حيات ياشايان او آدامي خاتيرلاديم. هر دفعه ده عيني نتيجه‌يه گلديم.
"بو قارشيليق‌لي اعتبارين سيرريني هر كس اؤيرنه بيلسه، دونيادا نه پوليس اولاردي، نه محكمه، نه حبس‌خانا... پولا دا احتياج قالمازدي. هر فرد او آدام كيمي، الين‌دن گلديگي قدر چوخ شئي وئرن، بونون قارشي‌سيندا احتياجي اولما‌دان چوخو قبول ائتمه‌ين او آدام كيمي ياشاسايدي، باش چيخارماق مومكون اولمايان اقتصادي سيستئميميز بير آز دوزلمزدييديمي؟"
ايللردير آنتون‌دان دانيشيلديغيني ائشيتمه‌ميشم. آما حاققيندا بير ناراحات‌ليق دا ائشيتميرم: تانري‌نين و اينسان‌لارين(بو داها نادير بير حادثه‌دير) اونو اصلا چاره‌سيز قويمايا‌جاق‌لارينا اينانيرام.
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
*Stefan Sveyq
آچيقلاما: ايستئفان سوئيق، فارسجادا اشتفان تسوايگ يازيلير. بو يازيچي آووستريالي دير (اتريشلى دير). ايستئفان سوئيق (آلمانجا Stefan Zweig، 28 نويابر 1881، وييانا، آووستريا — 23 فئورال 1942، پئتروپوليس، برازيليا) — آلمان رومانچي، بيوقرافيا يازاري، آراشديرماچي و پوبليسيست.
