حكايه‌جيك‌لر
حكايه‌جيك‌لر/ حسين واحدي
شانس‌سيز اوغرو
گئجه‌نين لاپ او شيرين يوخو گلن زاماني، دووارين ياپيشيغينداكي آغاجدان ديرماشيب ائوين حيطينه آتيلدي. سينه-سينه ائوه ساري گئديب، الين ياپيشاجاغا آتيب قاپينين آچيق اولدوغونو گؤروب، سئويندي!
ايچه‌ري گيرنده، بير كيشي‌نين اوتاقدا يوخودا اولدوغونو گؤردو. آي‌ين ايچه‌ري‌يه دوشن ايشيغيندا ائوي آلت-اوست ائتدي، آما آپارماق اوچون درده ده‌ين بير زاد تاپا بيلمه‌دي. اومودو پوزولوب قاچماق ايسته‌ديگي آن، ائو ييه‌سي يوخولو-يوخولو، “آي باشي داشلي اوغرو گون ايشيغيندا من بو ائوده بيرزاد تاپا بيلميرم، سن، آي ايشيغيندا تاپماق ايسته‌ييرسن؟” دئييب، يورقاني تپه‌سينه چكدي!
گونش ايله گونه‌باخان
ساري ساچلي گونش، گؤيه ديرماشميش داغلارين آرخاسيندا، خوروزون بانلاماسيني گؤزله‌ييردي. آخشامدان، بوغدا تارلاسيندا اولان يالنيز گونه‌باخان ايسه قارا دنه‌لريني گونشين باتان يئرينه توتوب، گونشي گؤرمك اوميدي ايله يوخلاميشدي.
بير آزدان، خوروز، سسي‌ني باشينا آتدي. كند ائولرينين چيراق‌لاري بير-بير ايشيقلاندي. گونش گؤزله‌دييي آني گؤرونجه دوغماغا باشلادي. گونه‌باخان، سئوينجك اولوب، اوياندي. سئودييي گونشي بيرداها گؤره بيله‌جه‌يينه چيچه‌يي چارتلادي…
آرتيق، گونش گؤي اوزونده، هر ياني باخيشي آلتينا آلميشدي. گونه‌باخان، گونش بونون اوچون گليب‌دير دئيه، اوزون اوندان چئويرميردي. او، اوچوب گونشين يانينا گئتمك آرزوسوندايدي.
ياواش-ياواش آخشام گليب چاتيردي. گونش يئره سردييي ساچلاريني داراييب، هؤرمه‌يه باشلاميشدي. گونه‌باخان ايسه گونشين گئتمه‌سيندن اوزولوردو. او، بيليردي بير آزدان گونش باتي‌داكي اوجا داغين آرخاسينا گئديب يوخ اولاجاق‌دير…
گونش، گئتدي! آنجاق هئچ بيلمه‌دي گونه‌باخان‌نين آدي‌دا اونون آديندان آلينيب‌دير. او هئچ بيلمه‌دي، گونه‌باخان بوتون ياشاييشيندا اونون سئوگي‌سي ايله ياشادي!
قورخولوق
آخشام اوستو كئچن گونلره تاي، قارغالار، اوزوم باغينا هجوم چكديلر. كئفلري چكينجه اوزوم يئييب باغي كورلاديلار.
قورخولوق آنلاملي سس‌سيزليك له، باغين اورتاسيندا اونلارا باخيردي. اليندن بير ايش گلميردي، او ساده‌جه اؤز گله‌جه‌ييني دوشونوردو! دونن آخشام، باغ ييه‌سي، باغدان آيريلاندا، «صاباح‌دا گليب گؤرسم قارغالار، باغي كورلاييب، قورخولوغو يئريندن چيخارديب، يانديرجايام» دئميشدي!
بونلاري دوشونه‌رك، قورخولوغون اوره‌يي دولوب، خيمير-خيمير آغلاماغا باشلادي!
