حكايه‌جيك‌لر
۱- دايان، يارديم ايسته‌يير بو قادين!
هر گون شهرين كمر يولوندان كئچنده او ياشماقلي و اوزونو اؤرتموش ياشلي
قاديني گؤروردو، چوخ راحاتسيز ائديجي بير آن اولوردو. بئلي آزجا
بوكولموشدو و الين اللره آچميشدي…
ائلمان اوركدن آه چكيب تانريدان اونا يارديم ايسته‌دي. اونا ياخينلاشيب،
آراباني ساخلاييب، شوشه‌ني ائنديريب، آزجا پول وئريب؛ ننه تانريم سني
قوروسون، منه ده دوعا ائت- دئدي!
ياشلي قادين؛ اوغلوم! عؤمور بويو ساغلام ياشاياسان، تانري سني ساخلاسين، ايجاره ائوده اوتورورام و كيمسم يوخدور … دئدي.
ائلمان دريندن آه چكيب، حزين باخيشلا اوندان آيريليب، يولونون آردين توتدو…
۲- اوشاق محبتي
سئوين، پالتارلارين گئيمك ايسته‌ييردي، آمما كؤينه‌يين باشينا كئچيرده
بيلمه‌ييردي. تومانين ترسينه گئييردي! آناسي گليب اونا يارديم ائديب،
گئيينديردي. يانيجا آليب بازارا گئتديلر. بازارين توكانلارين بير- بير
گزير، آناسي ايسته‌دييي شئي‌لري آليردي. قيزيل بازاريندا، توكانلارين
بيرينين يانيندا، اوزو ياشماقلي بير قادين اونلارين يانينا گليب يارديم
ايسته‌دي! سئوين- ين آناسي اؤزونو توتاراق ائشيتمك ايسته‌مه‌دي بو سسي! او
حئيني آبيرلي ديله‌نن قادينين اوشاغي سئوين-دن دوندورماسيني ايسته‌دي.
سئوين ايسه، ائشيتدي بو سسي! سئوين ايكي الي ايله ياپيشدي دوندورماسيندان.
سئوينه- سئوينه وئردي اوشاغا!!
۳- يورولماز قاريشقا
اؤزوندن نئچه قات بؤيوك و آغير اولان بير بوغداني داشيييردي. چوخ دقتله
يولونو گئديردي. قاباقدا بير چؤپ واريدي و قاريشقا اونا يئتيريب داياندي.
سانكي “اورست” داغينين اؤنونده دايانميشدي.
ساعاتلارجا اورادا دايانمادان بوغداني اويانا كئچيرمه‌يه چابا گؤسته‌ريردي.
بؤيوك بير يئر كوره‌سي، اوجسوز- بوجاقسيز بير عالم و خيرداجا بير چؤپ و
بير يورولماز قاريشقا!
بوغداني ديكينه توتوردو، بوغدا يئنه آشيردي؛ آمما يوز دفعه بو يوران ايشي
تكرارلادي. بير دفعه اونو ديك توتماغي باجارا بيلسه‌يدي اونا يئترلييدي!
بويانا كئچيب،اويانا كئچيب، بوغدادان واز كئچمك ايسته‌ميردي. دونيادا بوتون
يئمك‌لر سونا چاتميش كيمي!!
… سونوندا بوغداني ديك توتوب چؤپه دايانديرا بيلمه‌يي باجاريب، اويانا آتدي
و اؤزوده چؤپدن كئچيب اوزون بير يولونا داوام ائتدي! گؤرن بو اوزون يولدا
نه قده‌ر چؤپ وار؟
۴- كؤچمن قارانقوش
سون باهار گلمك اوزره‌دير. يولداشلاريم دئيير: قالديغيميز يئردن باشقا يئره
گئده‌جه‌ييك. آتامدان سوروشاندا: هاراگئده‌جه‌ييك؟ من تانيماديغيم يئرلردن
سؤز آچير. هردن اؤز- اؤزومه ائله داريخيرام! دئييرم نه اولار ائله بو
يام-ياشيل يئرده قاليب ياشاياق. آمما آتام دئيير:
-بير آيين ايچينده بورادان گئتمه‌سك هاميميز سويوقدان اؤله‌ريك. قارانقوش‌لار ايستي يئرده ياشايارلار. ائليميزين بؤيوگو دئييب.
ايكي گوندن سونرا اورمو گؤلونون يانينا گئده‌جه‌ييك. آتام دئيير:اورمو
گؤلو، چوخ گؤزلدير و اورادا آياقلاري اوزون فيلامينقولار، ساري جئيرانلار،
قوچ‌لار و… ياشاييرلار. ايندي چوخ ماراقلي اولموشام تئزليك‌له قالديغيميز
يئردن اورمو گؤلونو گؤرمه‌يه گئدم…
كؤچمك گونو گليب يئتيشميشدي و يولداشلاريم‌ايله بيرليكده بير قيراقدا
اوچماغا حاضير اولموشدوق. ائلين بؤيوگونون اوچماغي‌ايله هاميميز گؤيه ساري
يوللانديق. شهرلرين اوستوندن كئچنده اوشاقلارين هاميسي بيزه ال
ساللاييرديلار و ائله بيل اونلار بيزيمله بيرگه اوچماق ايسته‌ييرديلر…
يول چوخ اوزونويدو، آمما هئچ يورولماق بيلمه‌ييرديم، يالنيز اورمو گؤلونه
چاتماق ايسته ييرديم. بؤيوكلو-كيچيكلي داغلاري، اورمانلاري، شهرلري آشيب
گئديرديك. گئتديگيميز يئره آز قاليرديق. آتام، آنام‌ايله بيرليكده يانيمدا
اوچوردولار و من چوخ سئوينيرديم.
… اوزون يولچولوقدان سونرا، آرزيسين چكديگيم يئره يئتيشميشديك، آمما اورمو
گؤلو… اورمو گؤلو من آرزيسين چكن دئييلميش. چوخ آغلاديم بورا گلديگيمه،
بورا چؤلدن باشقا بير زاد دئييلميش. آتام يانيما گليب، آغلاما قيزيم بورا
سولو بير گؤلويدو، قوروماسينين نده‌نيني بيلمه‌ييرم، سني آپاراجاغام گؤزل
«وان» گؤلونه، دئييرلر اورا چوخ سولو و گؤزل دير… سن آغلاما، گؤزل قيزيم …!
