عابباس بارز
علی داشقین «اوستاد بارز ین شعیرلرینه بیر باخیش» سونوجوندا یازیر:
«1
- شاعیر عاطفه ایله باغلی غزللرینده هر تصنع دن اوزاق،صمیمی
-صداقتلی-دویونسوز و اوز آخدیغی حالیندا شعرلرینی یازمیشدیر و اونا گوره
،یارین ایسته گیله موافق باشلانان غزللره بیر نئچه بئیت دن سونرا ایستر
ایستمز اجتماعی مضمون لارلاکی شاعرین اورک طلبیندن آسیلی اولور بزه نیر و
سونا چاتیر. توتاق کی بعضا شعر اوزونه عامیانه دیل آلیر،و نه یاخشی دیر کی
شاعرلرده بارز کیمی کونلو(باطنی)ایله موافق حرکت ائله سینلر و ظاهرسازلیق
لاردان و لفاظلیق لاردان اوزاق گزسین لر.
2- شاعرین بو گون قوجالیقدان
آسیلی اولاراق سیاستدن اوزاق گزیب و هئچ بیر اجلاسدا اشتراک ائتمه سینه
باخمایاراق اونون کئچمیشلرده ملی حرکتلری و یازدیغی اثرلری بارزی ائل
شاعیری و ملی بیر شخصیت کیمی تانیتدیرمیشدیر...»
اوز دوغما وطنینده
غریب‌لرکیمی حیات سورن شاعیر چاغی‌نین غدارلالرین، ستمکارلارین گؤزگؤره‌سی و
آیین شایینجاسینا ایرنج داورانیشلارینی سئیر ائدرکن، اوز اوره‌ک سؤزلرینی
قالارغی یادگار اولسون دئییه، مکتوبلاشدیرمیشدیر. یادداشسیز
اوستاد
شهریارین اونلارجا نظیره یازیلمیش «حیدربابایه سلام» تیپیک پئوماسینا نظیره
کیمی یازیلمیش، «یاسلی ساوالان» آدلی منظومه‌سی اودلار یوردونون ماوی
سمایه اوج ائتمیش ساوالان داغینه خطابیه کیمی سؤیله‌میش کی، بو گؤزه‌ل و
اوره‌یه یاتیم شاه اثر، دوشونجه‌لی شاعیرین درین حزنلی احساسلارین داشیر و
اونون حسرتلی نیسکیللرینی اؤز خولیا دونیاسیندا تصویر ائدیر.
هـر زامان كی باخیرام باشینـا قار وار گؤرورم
اوغلو اؤلموش آنا تك گؤزلرین آغلار گؤرورم
هـر طـرفدن چكیلیب سینه‌وه داغـلار گؤرورم
آی آلان اوستونو غم چیسگینی هریانی دومان
آی یاغان باشینا غملــر اودو یاسلی ساوالان
گؤرموشوك یازدا كوچكلـرده چیچكلر آچیلار
هـر طـرفدن چمنین سینه‌سینه گـول ساچیـلار
ماهنی‌لار قوشماغا باشلار یئنه‌ده قوشماچیــلار
یاز گلیب گئتدی یئنه گولمه‌دین اوچ آیدا بیر آن
آی آلان اوستونو غم چیسگینی هر یانی دومان
آی یاغان باشینا غملــر اودو، یاسلی ساوالان
قرینلـر كئچدی سنین گولمه‌دی بیـر لحظه اوزون
قانلی یاش توكدو سارالمیش اوزونه یاشلی گؤزون
غصه‌دن دونـدو قارانـلیق گئجه اولـدو گونـوزون
نه سوران حالینی اولدو نه‌ده بیر یاده سالان
آی آلان اوستونو غم چیسگینی هر یانی دومان
آی یاغان باشینا غملــر اودو، یاسلی ساوالان
آنـد وئـریـرم سنــی او قانه بلنمیش داشیوا
گئجه گوندوز او گؤزوندن توكولن قان یاشیوا
اورگین دردینی بیلدیـر او سهنــد قارداشیوا
سنی وارلیق، سنی تانری، سنی بو آه و فغان
آی آلان اوستونو غم چیسگینی هر یانی دومان
آی یاغان باشینا غملــر اودو، یاسلی ساوالان
سالارام یادیما بیر لحظه او كئچمیشلریوی
توكولن سنگ جفا ائیله او دور دیشلریوی
ایزلرم بیربیر او حیرت یارادان ایشلریوی
هامیدان من سنین احوالینا آرتیق نیگاران
آی آلان اوستونو غم چیسگینی هر یانی دومان
آی یاغان باشینا غملــر اودو، یاسلی ساوالان
ساكیت اول آغلاما قوی بیرجه چكیلسین بو دومان
گون چیخیب ظولمتی بیر یوللوغا قووسون بورادان
«نبی» گلسین «بوزآت» اولسون یئنه داغلار آتیلان
«هجرین» بلكه ییغیلسین گـؤزو یـولـدان آناجان
آی آلان اوستونو غم چیسگینی هر یانی دومان
آی یاغان باشینا غملــر اودو، یاسلی ساوالان
سوندوره بیلمدی گؤز یاشین اوركدن اودووی
چاغیریم قوی كومك ائتسین سنه اوز اولادیوی
ایفتیخاریله بوگون ذیكـر ائـده‌رم پاك آدیوی
مرد اوغولـلار بئجـریب خلقینه شهرت قازانان
آی آلان اوستونو غم چیسگینی هریانی دومان
آی یاغان باشینا غملـر اودو، یاسلی ساوالان
بابكین گئتدیسه بوش قالمادی آمما قوجاغین
دولودور مین ائله اوغلانلاریلا هـر بوجاغین
نه قدر یئل اسه طوفان قوپا سؤنمز اوجاغین
آی بـلالـر سپری خلقه یامان گونــده آمان
آی آلان اوستونو غم چیسگینی هر یانی دومان
آی یاغان باشینا غملــر اودو، یاسلی ساوالان
چنلی بئلده «ده لیلر» قوی یئنه قورسون بوساطی
«قوچ كور اوغلو» یئنه جولانه گتیرسین قیر آتی
هئچ زامان اصلین ایتیرمز او كی دوزگوندو ذاتی
آند اولا آدیوا آی گؤزلری آغـــلار یاشی قان
آی آلان اوستونو غم چیسگینی هر یانی دومان
آی یاغان باشینا غملـــر اودو یاسلی ساوالان
بابالاردان بیزه قالمیش بو مثل هاممی بیلیر
سو گلن آرخا دئییبلر یئنه بیر گون سو گلر
فلكین داش اوره‌گین داش اوخو آخیردا ده‌لر
«بارز» اوغلوندا یئتر سئودیگی یاره او زامان
آی آلان اوستونو غم چیسگینی هر یانی دومان
آی یاغان باشینا غملـــر اودو یاسلی ساوالان
-------------------------------------------------------
اوستاددان نئچه شكیل:
---------------------------------------------------
اوستادین تشییع جنازه سی:
-----------------------------------------------------------------------------------------------------------------
http://tarnabozan.blogfa.com/post-155.aspx
شكیللرین قایناغی:
http://kh1353.blogfa.com/
