سؤزلرده سؤز وار
سؤزلرده سؤز وار
یئرسیز غصه
حئسابی دوزگون اولمایان بیر شخص یولداشی ایله توش گلدی، دوستو اوندان سوروشدو: نه اوچون بیر بئله غصه لیسن، اولمایا گمی لرین قرق اولوب؟
جاوابیندا دئدی: بیر نفره بورجلویام اونو اؤده مك اولمور، اونا گؤره راحاتسیزام.
دوستو دئدی: رحمتلیك اوغلو، وئردیگی پولو الده ائده بیلمه دیگی اوچون، قوی بورج وئرن راحاتسیز اولسون.
جیب یا حافظه
بیر نفر اؤز حافظه سیندن و هوشلو- باشلی لیغیندان مجلیسده تعریف ائدیب دئییردی:
هر نه منیم حافیظه مه تاپشیریلسا، اونودماغیم ایمكانسیزدیر.
بیر نفر بو سؤزه اعتراض ائدیب دئدی: فیكر ائله میرم بو سؤز دوزگون اولسون، بیر ایلدیر مندن بورج آلیبسان یادیندا دئییل وئره سن.
كیشی قاییدیب دئدی: ندنی (سببی) بودرو؛ او منیم جیبیمه گیریب، نه حافظه مه!
یوخسوللوق
بیر مجلیسده بیر عده، پول خوشبختلیك گتیرر باره سینده بحث ائدیردیلر.
بیر گؤركملی (تجروبه لی) بیلیگن (عالم) سؤزونه بئله سون قویدو:
پول هئچواخت خوشبخت لیك گتیرمز، پولسوزلوق ایسه اؤزو فلاكت و موصیبت دیر.
چیچك ایله قیزیلجا
چیچك ایله قیزیلجا دانیشیردیلار. چیچك دئدی: من گئدیرم گؤزون آپارام. قیزیلجا دئدی: من گئدیرم اؤزون آپارام!
قیسمت اولسا گلر یمن دن
قدیم زامان بیر تاجیر یمن دن پارچا گتیریب ساتاردی. یمن ده آلدیغی پارچالاری توپ- توپ تلیسه مشغول اولدوقدا، یمن دكی تاجیر طرفی، بیر بادامی سیندیریر و ایچینی تاجیرین آغزینا قویماق ایسته ییر. بادامین ایچی تاجیرین دوداغیندان زویور و تلیسین ایچینه دوشور. پارچالاری تلیسدن چیخارتماق زحمتی، بادام ایچینی تاپماغا دیمزدیر.
تاجیر گتیریر اؤز شهرینده پارچالاری تلیسدن چیخارداندا، تاجیرین اوغلو بادام ایچینی گؤرور و گؤتوروب یئییر.
تاجیر دئییر: قیسمت اولسا گلر یمن دن، قیسمت اولماسا، دوشر آغیزدان!
حاضیرلایان: حسین واحدی
قایناق: سؤزلرده سؤز وار/یازان: باقر رشادتی
