تک صبیرگلیب، یوخسا جوت صبیر!؟
«تهاجم فرهنگی» تکجه ائله مستهجن فیلم لرله، سریال لاردا خلاصه اولماز، بو فرهنگی باسقینین یوزلرجه یولو وار، خورافه پرستلیک ده بیر گوستر گه سیدیر. فالا باخماق ایسه آیری بیر اؤرنک. خورافاتین دا با کیلاس بی کیلاسی واردیر! قدیم زامانلار شیش ایله فال توتسایدیرلار ایندی قهوه ایله توتدوروللار، قاباقلار توکانلارین قاباغینا آت قاطیر نالی وورسایدیلار ایندی اوغور داشی آسیرلار، بو آرادا دئیین یوخدور، قارداشیم سن مین تومنلیک جنسی اون مین تومنه ساتماسان مشترین ده اولار، یوخسا الوان الوان اوغور داشی آسماقیلا سنله کیمسه آلیش وئریش ائله مز.
هرحالدا جهل و خورافه پرستلیک عاغلین آفتیدیر ، بونا باخمایاراق بیر پارا اینسانلار اونی قارشیلاییرلار، حتا بونون آغیر جزاسین وئرسه لر بئله... عاییله محکمه لریندن خبریمیز اولسا بو قونودا چوخلو شئی لر آیئدیمیز اولار، بیر چوخلو عائله لر ائله همن بو جهل ایله خورافه پرستلیک و یئرسیز شوبهه لره خاطیر بیر بیریندن آیریلیبلار. نمونه اولاراق بیر فالا باخان آروادلارین دویغوسال احوالاتیندان سوء ایستیفاده ائده رک دئییر: ارینین علاقه و ایسته یی سنین اوچون آزالیب، ائله بو جومله نین یانیندا اؤز مشتریسینی اعتیمادین داها آرتیق قازانیب پوللارین سویماق اوچون دانیشیق حربه سیله مین بیر حیله یه ال آتیر.
دیققت ائدین! بیر فالا باخان او جومله لردن ایستیفاده ائدر کی، مشتری لری اؤزللیکله خانیم لار داها چوخ بیه نیب قبول ائدرلر،
تولکو جه سینه دئییرلر: یولداشلارینین، قوهوم آقرابانین ایچینده بیریسی سنله دوشمانچالیقی وار، سنین چوخ بؤیوک اوره یین وار و... ایندی فالا باخان بو آدامی دوزگون قوروب قورشالییاندان سونرا بختی دؤنموش کیشی گئجه نی هر بیر دلیله گؤره بیر ایکی ساعات ائوه گئج گلسه بوتون بو یانلیش سؤزلر حیات یولداشینا ثبوت کیمی نظره گلیر و بو خانیم یازیق کیشی یه یازیلمیش فرمانا اساسن جور به جور یئمک، ایشمه لی لری آزمایشگاه سیچانینا تای ارینه یئدیردیب ایچدیره جک کی بلکه حیات یولداشی نین اونا نیسبت سئوگیسی آرتا. آمما نهایت گؤره جکسن ارینی خسته خانایا آپاریب و کیشی هر نه یی بیله ندن سونرا محکمه دن باش چیخاریرلار.
ایندی سؤز بوراسییندادیر کی، بیزلر بو خورافاتا قارشی نه ایشلر گؤرموشیک؟، لوطفن جاواب وئرین! 10 مینه یاخین تیراژلی فال قهوه، کف بینی،و... گؤزل اوزلو! کیتابلار، کوپن و کاغاز سهمیله نئجه اولور راحاتجاسینا چاپ جوازی آلیرلار؟ نئجه اولور کی تاریخی، فرهنگی کیتابلارین عکسینه بو سایاق کیتابلار اون ایکینجی چاپا یئتیشیرلر؟
اولمایا کهلیک کیمی باشیمیزی قویلامیشیق قارا...؟!
باخین! کیچیک یاشلی معصوم اوشاقلاردا اللرینه بیر قفس آلیب فال ساتیر لار، فال حافظ ! بوردا داها آرتیق پامبیقلا باش کسیلیر، بو خورافاتی بیر نؤوع فرهنگ تانیدیریب یاییرلار، یوخسا فالا باخانلیقین کؤکو بیر دیر و بو آرادا حافظ اولا اولمایا آییرمامیز یوخدور.
تبریزلی ضییالی «عبدالرحیم طالیبوف» «مسالک المحسنین» آدلی کیتابیندا میللتین گئری ده قالمیش یانلیش اینام لارین دوشونرک، بیر خاطیره نقل ائلییب یازیرکی یئری گلمیشکن نقل ائده لیم، طالیبوف یازیر: «ناصیرالدین شاه زامانی، منله بیر نئچه یولداشیم آوروپادا عالی تحصیلات آلیب ایرانا قایئداندان سونرا دؤولت طرفیندن مامور اولدوق بیرینجی سفراولاراق «دماوند» داغینین اوجالیقین اولچوب شاها اعلان ائدک. بو فرمانی یئرینه یئتیرمک اوچون تهران دان چیخاندا شانسدان سا خیاوانلارین بیرینده تهرانین ایکی دسته لات لوتی بیر بیرینین جانینا دوشوب، سویوش دئییرکن قمه قدداره ایله بیرــ بیرین یاریردیرلار، بو آرادادا بیر طوی دسته سسی یاخینلا شاراق بی ــ گلینین فایتونون همن بو خیاواندان کئچیدیب آپارماق ایسته ییردیلر. من «طالیبوف» طوی آداملارینین بو ایشلریندن تعجب ائدرکن آغ ساققلارینین بیریندن سؤروشدوم، نه عجب ایصرار ائلییرسیز گلینی بو خییاواندان آپاراسیز بیر حالدا کی او بیری خیاوان ساکیت دیر!
توی آدامی قایئدیب دئدی: جاوان بو خییاوان «قیبله» یه ساریدیر! شویونی وار، بونا سبب گرک گلینی بو خییاوندان آپاراق!
بلی، حتا تویلاری عزا اولوب، قان سو یئرینه گئتسه بئله، گرک بو خییاواندان کئچه لر!!!
سیزلر نئجه ایسترسیز بو خییاواندان دان کئچه سیز؟ یوخسا...
قایناق لار:
ـ آفتاب آذربایجان درگی سی، 56- نجی سایی
ـ آغری نشریه سی، 114- ونجو سایی
