آرزو مختاری: هر یازدیغیم شعر سونوندا سئوگی شعری اولور
هانسی موضوع لاردا شعر یازماغی سئویرسینیز؟
بیرچوخ قونولاردا شعر یازماق ایسته ردیم. چوخ یازارم آما یازاندان سونرا گؤررم سئوگی شعری اولدو. شعرلریمین اساس موضوعسو سئوگی دیر.
بیر جوششی شعریمیز وار بیرده کوششی. سیز کوششی شعرله راضیلاشیرسیزمی؟
یوخ، منجه شعر گرک اورکدن گلسین. اؤزومون شعرلریم بئله دیلر. بیر شعریم اولماییب کی، اونو تجربه ائلهمهمیش اولام. اؤز باشیما یاخود یولداشلاریمین باشینا گلن اولایلاری یازمیشام. چوخلاری شعریمی اوخویاندا بونو دوشونوب مندن سوروشورلار؛ دوغرودان بو اولای سنه اوز وئریب؟ اما ایسته رم هر یئرده نظم اولسون. یاشاییشیمدا دا نظملی اینسانام اونا گؤره شعرلریمی اؤزل قالیب ده یازارام. سر بست ده یازارام اما چوخ خوشلامارام.
ایلهام آلدیغینیز قایناقلار نهلر اولار؟
چوخ شاعیرلر سئوینج چاغلاریندا یازارلار اما من نه زامان آجی، کدر گؤرسم یازارام. بیر شی دن اینجیسم گرکلی دیر اونو یازام، یوخسا آرام توتمارام.
هانسی درنک لره گئدر سیز؟
«انجمن ادبی تبریز» درنه یی ایله خانیم عبدالجبارین ائوینده اولان «کیمیا» درنه یینه گئدرم.
درنک لرده گؤزل استعدادلار وار. گنج لریمیز یاخشی باشلاییبلار. بیر زامان واریدی منیم اؤزومه تورکجه یازماق رویا اولموشدو، آما ایندی یئنی یئتمه لرده تورکجه یازیب اوخویورلار. بو آذربایجان ادبیاتی نین یاخشی گله جهیه دوغرو آددیملادیغین گؤسته ریر. بونو دئملی یم گله جک آیدین دیر.
«قرنفیل اوچ گول آچار» کیتابینیزدان دانیشین؟
من او اینسانلاردانام کی یازیب ساخلارام و سئومهرم یازیلاریم کیتاب اولسون. بیر دؤنه یولداشلاریم «بهرام سورگون» ایله «یالچین سهند» شعرلریمی اوخوماغا آلدیلار بیر آن گؤردوم اوچوموزون شعریمیز کیتاب اولماقدا دیر. البته من اؤزومو اونلارین یانیندا شاعیر سانمیرم.
بو کیتاب اوخوجولار آراسیندا نئجه قارشیلاندی؟
چوخ یاخشی ایدی. ۲۰۰۰ تیراژی اولدو، چوخ تئز ساتیلدی.
باشقا کیتابینیز چاپا بوراخیلاجاقمی؟
«سنسیزلیکدن گله جه یم فریادا» آدلی بیر شعر مجموعه سی واریمیدیر. بیرده «قشم نجف اوا»نین بیر کیتابین تورکجه دن فارسجایا چئویرمیشم کی ایکیسیده یاخین گله جکده چاپ اولاجاقلار. آیری آدلا «یاشار کمال»- دان بیر رومان کؤچورموشم.
دئملی نثر ساحه سینده چالیشمانیز واردیر؟
بلی. حیکایه، اؤیکو ده یازارام. یالنیز اؤزومه ساخلامیشام گاهدان درگی لرده وورورلار.
سیزجه آذربایجان ادبیاتی نین ایندی کی دورمو نئجه دیر؟
یاخشی دیر. گنج لر ادبیاتیمیزا ماراق گؤستریرلر، آما قادین شعری آزدیر. ایندیه دک آغالار، آغالار اوچون شعر یازیبلار، قادین لار دا آغالارا. شعرده گرک قادینلیق گؤزه چارپسین.
سیز دئدییینیز سبک ده شاعیرلریمیز وارمی؟
بلی، رقیه خانیم کبیری دوغرودان قادین شعری یازیر. سمیه فیروزی و لیلا شکوریان دا گؤزل یازیرلار.
اوره ییزده بیر قونو وار کی اونا شعر یازماق ایستهیهسینیز؟
بلی، سئویرم آذربایجانا شعر یازام. یازمیشام سئومه میشم، هله ده کی هله دیر وطنیمه لایق شعر دئمه میشم.
گنج لره نه سؤزونوز اولا بیلر؟
واختلارین هدره وئرمه سینلر. اونلارین اعتیادیندان قورخورام، گؤرنده اللرینده سیگارا وار دیکسینیرم، سیگارا آلیشدیقجا اوره ییم آلیشیر.
سون سؤز؟
حیات یولداشیم رضا طاعتی جنابلاریندان تشکورومو بیلدیریرم. شاعیر ایله یاشاماق چتیندیر اما حیات یولداشیم هئچ زامان منی تک بوراخماییب. سیزدن ده تشکور ائدیرم، آذربایجاندا بیر درگی کی نئچه ایل داواملی چاپ اولا آز گؤرموشم. اما «آفتاب آذربایجان» داواملی دیر داواملی دا اولاجاق.
کؤنلومه اود ووروب تالانلاییرسان
بو سئودییین قیزا اینانماییرسان
یالانچی اینسان آاای یالانچی اینسان
دای سنی سئومه ییب، سئومه یه جه یم!
یالانچی اینسان آاای یالانچی اینسان
خولیاسان، رؤیاسان باش تاپ گومانسان
اؤزونه بیر گلیب بونا اینانسان
دای سنی سئومه ییب، سئومه یه جه یم
گئدیسن یوللاری قاییتما بیرده
دایانیب سئوگیمیز بیر تک صبیرده
گلسن گؤره جک سن منی قبیرده
دای سنی سئومه ییب، سئومه یه جه یم
چیچک لر آچسالار بیزیم شهرده
اوستومه چکسه لر گون پرده پرده
اؤره ییم بوغولسا غمده، قهرده
دای سنی سئومه ییب، سئومه یه جه یم
قاییدیب گلسن ده گؤزلری یاشلی
توپراقلار آلتیندا بیر قارا ساچلی
داش یورقان اوستونده بؤیله تاراشلی
دای سنی سئومه ییب، سئومه یه جه یم
سئودام توپراق اولسا، یئل لر آپارسا
گؤز یاشین یاراق تک قلبیمی یارسا
یادیمدان اؤزومو زامان چیخارسا
دای سنی سئومه ییب، سئومه یه جه یم
ترسینه یاغسالار یاغمولار یارا
گؤی یارا سئل لری سارا آپارا
منی مین بیر دفعه چکسه لر دارا
دای سنی سئومه ییب سئومه یه جه یم
شیلتاقلی گوزلریم دولسا نیفرته
چئوریلسه نیفرتیم مین محبته
یابانجی دونیا دا هئچ نه قیمته
دای سنی سئومه ییب، سئومه یه جه یم
ماوی لر گؤزونده قالسا، آی سودا
یاشایا بیلمز سن منسیز آی سودا
گؤزو یاشلی قالسا سنسیز، آیسودا
دای سنی سئومه ییب، سئومه یه جه یم
ماهنامه آفتاب آذربایجان – مصاحبه : شیوا حاجی محمدی
قایناق
