آشیق صبور شریفی: آشیق ائلینكیدی، ائل آشیقیندی
ـ آشیق لیغی نه زاماندان و نئجه باشلاییبسیز؟
ائل- طایفامیز، عاییله میز، آشیق چیلیق ایله ادبیاتا مارقلییدیلار. دوققوز یاشیندان سازیم اولوبدور. بیر گون، رحمتلیك آشیق درویش، اولان بیر مجلیسده آتام منی آشیغا تانیتدیردی. سازی سسلندیرب مجلیسین آلقیشینی قازاناندان سونرا، او رحمتلیك ایسه بیر پارلایان، بئش قیرانلیق منه پای وئریب، »همیشه سازین لا اول« دئدی. سونرالار جیددی اولاراق 21 یاشیمدان ساز گؤتورموشم. آشیق لیغی بوتونلوكجه آشیق درویش دن الهام آلمیشام. نئچه واخت بوندان اؤنجه »صفالی یازلار« آدیندا بیر كیتابیم چیخیب. یئنی كیتابلاریم ایسه حاضیرلانماق اوزره دیر.
ـ اوخوجولاریمیزا آشیق درویش دن دئیین.
من اوشاق لیقدان او بؤیوك اوستادین مجلیسلرینده اولموشام. درس آلمیشام. ساز اؤیرنمیشم. او بؤیوك آشیق معمولی بیر شخص دئییل دیر. ایلاهی بیر شخصیتی وارییدی. كامیل بیر اوستادییدی. هئچ یئرده سازیندا، سؤزونده نقص یوخویدور.
ـ اوستادینیز فقط آشیق درویش اولوبدور، یوخسا باشقا اوستادلارینیزدا وار؟
آشیق درویش منیم ایلك اوستادیم اولوبدور. او رحمتلیك دن سونرا اونون بؤیوك شاگیردی، آشیق اسمعلی، منیم ساز ایله سؤز اوستادیم اولوب..
ـ آشیق لارین یئرین، ادبیاتیمیزدا و جامعه میزده نئجه گؤرورسونوز؟
منجه آشیق صنعتینه چوخ دَیر وئریلمیر. تلویزیون دا چوخ گؤستریلمیر. آشیق موسیقی سی گؤزل و عرفانی بیر موسیقی دیر. اوزان موسیقی سی، عرفان قوللاریندان ساییلیر. گؤستریلمه سینه سیخینتی یوخدور. منجه گؤسته ریلمه مه سینه، هئچ بیر ندن اولا بیلمز.
ـ آشیق درویشین ساز-یندان خبرینیز وارمی؟
آشیق درویشین سازی ائوینده دیر. بایراما-لاردا (جشنواره لرده) من اوشاق لاریندان امانت آلیب آپارارام.
ـ او سازی آشیق درویش اؤزو قاییتدیرمیشدی، یوخسا پای وئرمیشدیرلر؟
او سازی رحمتلیك، تبریزلی »آشیق حسین« اونا پای وئرمیشدی. آشیق حسین بیر گون اورمویا گلنده آشیق درویش ساز ایله سؤزوندن خوشو گلیب بو سازی اونا، پای وئرمیشدیر. رحمتلیك آشیق درویش سونرالار، دئیردی، آشیق حسین-ه پولوندا وئرمك ایسته ییردیم آما قبول ائتمدی.
ـ آشیقی تعریف ائدین؟
آشیق-ا بیر بند دئمیشم، اونو دئمك ایسته ییرم:
... آشیق ائلینكیدی ائل آشیقیندی
داغ دره چشمه لر سئل آشیقیندی
ده ده قورقود گئدن یول آشیقیندی ...
آشیق، ده ده قورقود-دان قالمادی و اونون ایزین-یولون گئدن بیر یولدور.
ـ دیلیمیزین یاشانماسی ایله آشیق صنعتینین ایلگی سین نئجه گؤرورسونوز؟
ادبیاتیمیز، اؤزللیك له آشیق ادبیاتی، سینه دن سینه یه، ائل دن ائله گلیب چاتاندیر. آشیق لار، سینه لرینده اولان، فولكلور ادبیاتی نی، ائل دن ائله، دولانیب اونو یاییب، یاشادیرلار. بونلاری اؤیرنمه یه بیر یول اولسا داها یاخشی دیری قالار. آشیق صنعیتینین دیلیمیزی یاشاتماقدا چوخ مهم نقشی واردیر.
ـ شاگیردلرینیزده وارمی؟
بلی نئچه نفر اؤیرنجی (دانشجو) شاگیردیم وار. داستان لاردان نئچه سینده اؤیرتمیشم. سنتی قهوه خانامدا شاگیردلریم گلیب، اؤیره نیرلر.
ـ آشیق صنعتینین یانیندا نه ایش لر ایله مشغولسونوز؟
من بزیرگانلیق ایله داشچیلیق ایشین ده اولورام. گلیرم ایسه بو ایكیسیندندیر. آشیق صنعتیم له پول قازانمارام. مجلیس لره ده، پولسوز گئدرم. پول ایسه وئریلنده، بگ اوغلانا وئررم.
ـ آشیق صبورو تعریف ائدین.
تعریفی ائل دئمه لیدیر. هئچ كیم اؤزونو تعریف ائده بیلمز. یالنیز دئیه بیلرم، من اؤز صنعتیمه و شعره چوخ علاقم وار. هر كس ده بو سئوگی و دویغو اولا بیلمز. ویجدانیمین یانیندا دینجم و ائلیم له اولدوغوما هر زامان فخر ائدیرم.
ـ آشیق لیغینیزدان بیر خوش خاطیره؟
تهراندا اقوام بایراما-سینا چاغیرمیشدیلار. اوردا اولدوغوم آن لار منیم اوچون قالارگی و خوش خاطیره ساییلیر. بوتون لحظه لریم منیم اوچون خاطیره دیر. یازسام بیر كیتاب اولار.
ـ آشیق هاوالاریندان هانسی لاری سئویرسینیز؟
رحمتلیك اوستاد درویشین سبكینده، قوربتی سین، عوثمانلی بری سین سئورم. داها دوغروسو هاوالارین هامیسین سئورم. اوشاقلاریمیز كیمین ساییلیرلار و آرالاریندا سئچگیلیك قویماق اولمور.
ـ گنج لریمیزه، اؤزللیكله یئنی گنج آشیق لارینا اؤیودلرینیز (نصیحت لرینیز)؟
گنج لریمیزدن ایسته ییرم، آتا-بابالاریمیزدان یادیگار قالان ادبیاتیمیزدان، فولكلورموزدان، آغیز ادبیاتیمیزدان، صاحاب چیخسینلار. بونلاری پول ایله آل وئر ائتمك اولماز. بونلارین ایچینده، تاریخیمیز، كئچمیشیمیز، كیشیلیك لر، معنوی دَیرلریمیز، یاخشیلیق لار، اؤیودلر، قوچاق لیق لار وار دیر. بونلاری یاددان چیخاتماسینلار.
ـ داها چوخ، هانسی شاعیرلرین شعرلرین، آشیق هاوالاریندا قوللانارسینیز؟
دئمك اولار، تقریبا شاعیرلریمیزین چوخوندان سؤزوم واردیر. مصطفی دان، میسكین دن، خسته قاسیم و... . آمما بیری آدین آشیق قویدو اؤزوندن ایسه سؤزو اولمالیدیر.
ـ سون سؤزونوز؟
ائلیمه، یوردوما یاشام بویو ساغلیق ایسته ییرم. آشیق صنعتین دن، كولتوروموزدن ادبیاتیمیزدان موغایات اولوب، ساخلایاسینیز اینشاللاه.
