Nizami Gəncəvinin söz inciləri
نظامی گنجوی‌نین سؤز اینجی‌لری
کؤچورن: حسین واحدى
اؤیله بیر اختیار اولسایدی منده،
قویمازدیم بنده‌یه محتاج بیر بنده.
پیس فیکره دوشرسه یاخشی بیر اینسان،
اؤزونه یامان‌لیق ائدر هر زامان.
شوشه قلبه گل سن وورما داش، کسک،
قیریلسا چتین‌دیر اونو دوزلتمک!
اینصافلا یاشایان مرددیر، کیشی‌دیر،
کیمسه نی سئوممک نامرد ایشی‌دیر!
چوخ دا آجیقلانما، برک ساواش اولار،
تورپاق برکیدیکجه، دؤنوب داش اولار.
دونیایا فاتح اولماز، ظولومکارلیق، رذالت،
یئر اوزونون فاتحی، عدالت‌دیر، عدالت!
دونیانین ایشینی یاخشی دوشون سن،
نه اکسن اونو دا سن بیچه‌جکسن،
یاخشی ایشده گؤرسن، پیس ایشده اینان،
اونوتماز اونلاری بو قوجا دؤوران!
یاخشی‌لار جیلووو وئرمزلر پیسه،
ساتمازلار، دوست‌لاری یادا، ناکسه.
بیر اولسا یولداشین، دوستون عملی،
داش‌دان سو چیخارار اونلارین الی.
نفاق اولان یئرده فلاکت ده وار،
سعادت گونشی بیرلیک‌دن دوغار.
هونرلی دونیادا تختو-تاج آلار،
آلچالماز هئچ زامان، باشی اوجا‌لار!
آغاج اکن زامان ائله یئرده اک،
کی، یقین بیله‌سن او بار وئره‌جک.
تورپاغا مرحمت خئییردیر اینان،
لوطف ائتسن گول وئرر، ظلم ائتسن تیکان!
