آذربایجاندا اوشاق کیتابلارینین اسکی نووع لاریندان
1- تنبیه الاطفال
الیمیزده اولان اسکی بیر تاریخه مالک اولان کیتابلاریمیزدان دیر کی ؛ گونش ایلی 1294 ده تبریز شهرینده چاپ هابئله یاینلانمیشدیر . کیتابین یازاری او دوورون تانینمیش یازیچیسی اولان توفارقانلی علی قلی واعظ ایدی کی کیتابین عنوانین تنبیه الاطفال سئچمیش و کیتابین باشیندا مخصوص نو آموزان زبان فارسی سوزون ذکر ائتمیشدیر . کیتاب جیبی قطعینده 40 صحیفه دن عیبارت اولان بیر اثر دیر کی 28 بولوم ده یازییا آلینمیشدیر .کیتاب یئنی یئتمه اوشاق لار ایچون مکتب لرده اوخونموش بیر درس لیک ایدی کی اویرینجی لر ایچون یازی قایدالاری هابئله لوغت لر و بیر سیرا باشقا درس لری اویره دیر دی .
2- مشوق الصبیان
بو نصابین یازاری زونوزلو میر مصطفی اوغلو میریحیی حسینی تبریزی ایدی کی شعرلرینده مضطر تخلص ائله ردی . همین اثر ده بئش یوزده ن چوخ تورکجه لغت لری اوشاقلار ایچون اویرتمیشلر . شاعیر مضطر هجری اونوچونجو و اوندوردونجو عصرین شاعیر لریندن اولموش ؛ آدی بیر سیرا تذکره لرده ماراقلا گلمیشدیر . اونون ان تانینمیش اثری گلزار بهار آدی ایله آذربایجان ادبیاتیندا تانینمیشدیر. همین اثرین بیرینجی چاپی هجری 1308 ینجی ایل تبریزده داش باسما طرزی ایله چاپ اولسا دا سونرالار بیر نئچه دونه چاپ اولموشدور . همین نصابین سون چاپی ایگیرمی صحیفه ده تبریزلی غلامرضا مخلصین همتی ایله 1376 ینجی ایل تبریزده گون ایشیغینا چیخا بیلمیشدیر .
3-بدرقه الصبیان
تانینمیش شاعیر هابئله معارف پرور تبریزلی سید مهدی اعتمادین اوشاقلارا عاید درس لیک کیتابلاریندان اولموشدور . همین کیتاب جیبی قطعینده 46 صحیفه ده هجری 1364 ینجی ایلده تبریز شهرینین اوزامانکی ایکی تانینمیش کیتاب ساتانلاری اولان مصباحی و علمیه نین همت لری ایله بئشینجی دونه اولاراق گون ایشیغینا چیخمیشدیر . کیتابدا مکتب اوشاقلارینا عاید پئشه لرین آدلاری ؛ سیاق حسابی ؛ تبریز محله لرینین آدلاری ؛ اولچو واحد لری و .. قئیده آلینمیشدیر . کیتابین قورتولوش حیصه سینده رحمتلی اعتمادین بیر اویود لی شعری ده ذکر اولونموشدور .
4- ترک – آذربایجان دیلینیگ ؛ مختصر صرف و نحوی
روس و مسلمان مکتبلرینده ترکجه اوخونان اوشاقلار ایچون دوزلدوبدر
آدیندان بللی اولدوغو کیمی بو کیتاب باکی شهرینده تانینمیش معاریف پرور و سیاستچی نریمان نریمانوف – ون قلمی ایله یازیلمیشدیر . بو 49 صحیفه لیک کیتابدا "ن" اسکی ایللرده یازیلمیش کیمی قئیده آلینمیشدیر . بو اوشاق کیتابی 1899 ینجی ایلده چاپا گئتمیشدیر . آدیندان بللی اولدوغو کیمی کیتاب یازی قایدالارینا عاید بیر درس لیک دیر .
5- تولکی و خوروز
تولکی و خوروز کیتابی اوشاقلار ایچون سویله نیلمیش گوزل بیر منظوم حئکایه دیر کی بویوک شاعیر عبدالله شایقین طبعیندن جوشموشدور . 14 صحیفه دن عیبارت اولان بو کیتاب گویا باکی شهرینده نشر اولموشدور . همین نسبتا اوزون شعر دن سونرا (( دوگزان قوردی )) آدلی باشقا بیر حئکایه ده نثر قالیبیندا 16 صحیفه دن عیبارت قئید اولموشدور کی اوزلویونده ماراقلی بیر ناغیل دیر . کیتابلارین باکی دا طبع اولدوسو آیدین دیر .
6- نسزائن الاطفال
اسکی مکتب لریمیزده اوشاق لارین تربیه سی ایچون بیر سیرا کیتابلار تدریس اولوناردی لار. اورنگ اولاراق سزائن الاطفال- کیتابین گوسترمک اولارکی، هجری قمری 1319 دا شیروانلی میر سیف الدین سیدوف –ون قلمی ایله تفلیس شهرینده 70 صحیفه ده ایشیق اوزو گوروب مکتب لرده تدریس اولوناردی . بو نظم و نثری ایفا ائدن کیتاب دا گوزل – گوزل حئکایه لر و تربیه وی مسئله لردن سوز – صحبت گئدیردی .
7-یاخشی آرقا
تولکی ؛ قارقا ؛ حاجی لک لک
بویوک شاعیر عبدالله شایقین باشقا دیرلی بیر اوشاقلارا عاید کیتابی دیر کی شعر صورتینده چوخ گوزلجه 17 صحیفه ده تاریخ سیز اولاراق باکی شهرینده نشر اولموشدور . همین کتابچه ده بیر سیرا تربیه وی مسئله لره یئر وئریلمیشدیر .
8-اوشاق گوزلیکی
طالب زاده عبدالله شایقین باشقا بیر اثری دیر کی ؛ ائوده و مکتبده اوشاقلارین اوخوماق – یازماغینا خدمت ائدن بیر اثر دیر . همین اثرین دوردونجو چاپی میلادی 1915 ینجی ایل باکی نین اوروج اوف قارداشلاری مطبعه سینده چوخ گوزل جه ایشیق اوزو گوره بیلمیشدیر .57 صحیفه دن عیبارت اولان بو کیتابدا بیر سیرا اوشاقلار ایچون دیرلی شکیل لره یئر وئریلمیشدیر .
