آشیق نباتعلی علیزاده ایله دانیشیق
یازار yazar :حسین واحدى
تاریخ:1394.10.4-05:51
بیرینجی لیگینیزی تبریک دئیه رک، عزیز اوخوجولاریمیزا اؤزونوزو تانیتدیرین؟
چوخ ساغ اولون. من آشیق نباتعلی علیزاده 1337-جی ایلده، سلماسین شورگؤل کندینده دونیایا گلمیشم. اورمودا یاشاییرام.
آشیقلیغا نه زماندان علاقه تاپدینیز؟
ائله اوشاقلیق ایللریندن بیز کنده اکینچیلیک ائدردیک. او زمان آشیقلار رادیودا داستان تعریفلردیلر. بو داستانلارین زمانی چاتاندا، آغاما دئیه ردیم، قوی من بونلارا قولاق آسیم.
آغامدا دئیه ردی؛ اوغول گل ایشه، بونلار نه دیر؟
ایش بوندان واجبدیر.آما من دئیه ردیم، یوخ بو ایشدن واجبدیر. قدیم بیر توشیبا رادیوسو ایدی بیرده من. او زمانلار آشیق درویش، آشیق دهقان آشیق اسلان رادیودا اوخویاردیلار. آما منیم آشیق دهقاندان خوشوم گلمیشدی. دئیه ردیم، کاش بو آشیق دهقانی من گؤره بیله ایدیم. منیم داییم اورمیه ده ، بیر موزائیک سازی ده سرکارگر ایدی. داییمین وسیله سی ایله،آتامدان قاچاق، اورمیه ده آشیقلاری گؤرمگه گلدیم. ایسته ییردیم، گؤرم آشیق نه جور اولار. نه جور ساز چالیر، نه جور اوخویور. داییملا گئتدیک، میرغفار قهوه سینه. اورادا آشیق دهقان اوخویوردو. اوتوردوق، من آشیغا باشدان آیاغا بیر باخدیم. بیر لحظه ده گؤزومو گؤتورمه ییردیم. نه گؤزل اوخویوردو. نه گؤزل ساز چالیردی. بو ماجرادان سونرا، داییما دئدیم، منده اوخویاجایام. داییم دئدی، آخی باجارمازسان. دئدیم، یوخ گرک من اوخویام. سونرا نئچه قاطار سؤز اؤیره نمیشدیم.
ائله بو سؤزلری کندده آرا-سیرا دوز یا یانلیش اوخویاردیم. نئچه هاوانی تمرین ائدیب، اوخودوم. نئچه ایللر کئچدی، یئنی دن اورمیه یه، گلدیم. بیر مجلسده اؤیره ندیگیم، هاوالاری اوخودوم. هامی دئدی چوخ گؤزل اوخویورسان، گل آشیق اول. بیرینجی آشیقدا، آشیق بولود دئدی. آشیق بولود منه دئدی، گئت بیر ساز آل. اؤیره تمگی مندن. سونرادا اؤیره نمگه باشلادیم.
دئدینیز آشیق بولوددان بیر تعداد هاوا اؤیره نیبسینیز؟ اوستادینیز تکجه آشیق بولود اولوب مو؟
منیم اوستادلاریم، آشیق دهقان، آشیق بولود و آشیق علی قره آغاجی اولوب. آما اصلی اوستادیم آشیق علی اولوب. من چوخ سؤز-صحبتی اوندان اؤیره نمیشم. چوخ هاوالاریدا او منه دئییب.
بیرینجی هاوا هانسینی اؤیره نیبسینیز؟
بیرینجی گؤزللمه ایدی. سونرادا مصری.
آشیق نباتعلی بیر مجلسده اولا و اوندان نئچه هاوا ایسته یه لر، هانسی لاری اوخویار؟
بیرینجی مصری، سونرادا دوراخانی، هجران گؤزللمه و شرقی.
نه زماندان مجلس دولاندیریبسینیز؟
دوز یادیمدادیر، 1370-جی ایلده ایدی. من بیر قولای ساز چالاردیم. آما گؤزل اوخویاردیم. خویون دیزه دیز کندینده بیر توی مجلسی وار ایدی. ایسته ییردیلر، گئده لر آشیق گتیره لر منده اوردا ایدیم. اوردا دئدیلر، بودا ساز چالار. سونرادا نئچه سینی اوخودوم. دئدیلر، ائله دوز اوخویور، بیزی گؤرر، سازیدا بیر قولای چالسا عیبی یوخ. من اوردا او تویو ائیله دیم. او منیم بیرینجی مجلسیم ایدی.اوندان سونرا¬دا مجلسلره و تویلارا قاتیلدیم و ایندیه دکده خدمتینیزده وارام.
نسلی از آفتاب آشیق موسیقی فئستیوالیندا، اورمو مکتبی اوزره بیرینجی اولوبسینیز، بوندان اؤنجه ده مقلاملارینیز اولوب مو؟
بلی اولوب. منیم مختلف جشنواره لردن دؤردونجو، اوچونجو، ایکینجی مقامیم وارایدی. آما ایکی ایلدیر، آردیجیل اولاراق، نسلی از آفتاب موسیقی فئستیوالیندا آللاهین کؤمکلیگی ایله، بیرینجی اولورام.
سیزین هانسی هاوانیز، نسلی از آفتابدا مقام گتیردی؟ بو هاوانی بیر آز آچیقلایین؟
هاوامیز دوراخانی ایدی. بو هاوا بیر حماسی هاوادیر. بو هاوادا هیجان وار.چتین هاوادیر. دوراخانی نین یئندیرمه سی، قووزاماسی و اوجو وار، او بیری هاوالارا گؤره بیر آز چتیندیر. قوشما شعرلری ایله ده اوخونار.
بوجور و بونا اوخشار فئستیواللارین آشیق موسیقی سینین قالخینماسیندا تأثیری نه اولا بیلر؟
چوخ تأثیری اولا بیلر. بیرینجی تأثیری بودور؛ آشیقلار دئییرلر بیزه ده صاحب چیخانلار وار، اونا گؤره روحیه لنیرلر و هیجان ایله بو فئستیواللاری گؤزله ییرلر. سونرادا، بیر آشیق مقام گتیرمه یه نده، چالیشیر اؤزونو داها یاخشی لاشدیرا و گلن ایللرده مقام گتیره. مقام گتیرنلرده اونلاردان دالی قالماسین دئیه، دائم چالیشیرلار و اؤزلرینی قاباغا آپاریرلار.
کئچمیش، ایندیکی، گله جک آشیقلاری نئجه گؤرورسینیز؟ نه فرقلری اولاجاق؟
آشیقلیغیمیز گئتدیکجه گؤزللشیر. مثلا بیزیم دؤورده اولان آشیقلار، قاباقکیلار گؤره یاخشی چالیردیلار. گله جکده بیزدن یاخشی چالاجاق. چون ایندی بو صنعته گلنلرین چوخ ساوادلی انسانلاردیلار. ساواد ایله ده بو صنعت چوخ قاباغا گئده جک. ایندی باخین آشیق مجیده. آشیق مجید بیر جوان آشیقدیر. 29 یاشی وار. او چالان پیشرولاری، قاباق آشیقلارین هئچ بیری درویش عزیز،دهقان، یوسف و حتی بیزلرده چالا بیلمه ییریک.
غربی آذربایجانین حوزه هنریسی بیر آشیقلار درنگی آچیب، آشیقلاردا هر هفته دوزگونلری(دوشنبه لر) 5-7 یه قدر گئدیب، اورادا ساز چالیرلار، ائلیمیزده گلیب اوردا آشیقلاریمیزی گؤرور، بو درنکده دئیین، آشیقلارا تأثیری اولوبمو؟
بلی اولوب. آشیقلار بو درنک آچیلدیغی گوندن اؤزلرینه گووه نیرلر. نیه کی، دئییرلر بیزلره ده صاحب چیخانلار وار. اورادا آشیقلار نوبت ایله گلیب اوخویورلار. ملتیمیزده گلیب آشیقلاریمیزلا، تانیش اولورلار. ایندی ده یاواش_-یاواش تأثیری گؤرسه نیر. بو صنعت ائلیمیز ایچینده اسکی حؤرمتینی قازانیر و جوانلاردا آزدا اولسا بو یولا چکیلیرلر. حوزه هنریده اولانلاردان تشکر ائده رک، آرزو ائدیرم بونداندا آرتیق چالیشسینلار.
اوستاد آشیق کیمه دئیه رسینیز؟
اوستاد آشیغین گرک اولده معرفتی و ادبی اولا. بو ایکیسی اولماسا، هرنه قدرده گوجلو آشیق اولسان، هئچ فایداسی یوخدور. سونرادا اؤز صنعیتینه دگر وئره و بو صنعته جاندان باغلی اولا. ائل ایچینده دوز اوتورا- دوز دورا. یاخشی چالیب اوخویا. بیلیجی بیر انسان اولا.
آشیقلیق ائتدیگینیز ایللرده، اوستاد آشیق کیمی گؤردونوز؟
اوستاد آشیق من آشیق درویشه دئیه رم. بو کیشی ده ادب، معرفت، لیاقت هرنه وار ایدی. تکجه من یوخ، بوتون آشیقلار بونو دئیه ر. بیر ذره ده شکینیز اولماسین. بو قالسین بیر یانا، آشیق درویش ساز چیگنینه سالیب مجلسده دولاناندا آدام دئیه ردی، خدایا ائله بو سازی چالسین و دولانسین، منده بونا باخیم.
ائله بیل کهلیک ایدی، مجلسی گزردی. داستانلاری ائله تعریفلردی کی، آدام اؤزونو ائله او صحنه نین ایچینده گؤرردی. من سیزه عباس توفارقانلی¬نین داستانینی دئدیم، باخین مین دفعه مندن یاخشی دئیه ردی.
آشیق اسلاندا اوستاد ایدی.
50-60 ایل بوندان اؤنجه یه، قاییداق، او زمانلار آشیقلار شاعر شعرینی چوخ آز اوخویاردیلار. هامیسی داستانلاری تعریفله یردیلر. آما زمان بیزه دوغرو گلدیکجه شاعرلرین شعرلری داستانلاری آرادان چیخارتدیلار، بوگونده دا آشیقلارین چوخو شاعرلرین سؤزلرینی اوخویورلار، سببی نه دیر؟
باخین، او زمانلار تویلار 4 گون اولاردی. بو دؤرد گونده آشیق شاعر سؤزو ایله، مجلس دولاندیرا بیلمزدی. نه قدر شاعر سؤزو اوخویاردی کی، بو مجلس قورتولا. اونا گؤره ده داستانلاری اوخویاردیلار.
بیر دنه داستان باشلایاردیلار، نئچه گونده اونون شعرلری و سؤزلری ایله اوخویاردیلار. داستان آشیغین لنگری ایدی. سونرادا تویلار دؤرد گوندن اوچ گونه، اوچ گوندن ایکی گونه و سونرادا بیر گونه یئتیشدی. ایندیده تویلار ایکی ساعات اولوب. جمعیتده چوخالیب، مجلسلرده سس- های کوی چوخالیب. دا آشیق داستانینا نه واخت وار اوخویاسان، نه ده مجلسده حوصله و دقت.
بونا گؤره ده ائله تک هاوا شاعرلرین شعرلریندن اوخویوروق. مجلس باشا گلیر.
آشیقلیغیمیز قاباغا گئتمگه گؤره بیر یول قویون؟
گرک ال-اله وئریب، بو یولدا بیرلیکده چالیشاق. ایندی حوزه هنریده یاخشی ایشله ییرلر. آشیقلاردا گرک اؤزلری اؤز سطحلرینی یوخاری چکه لر و بوگونه اویغون اولالار. سونرادا اصلی ایشی رادیو و تلویزیون ائده بیلر.
بیزیم آشیقلاری اورا چکیب و تلویزیوندا سازیمیزی و اؤزوموزو گؤسترسه، ائده بیلریک بو صنعتی یاشاداق و ایره لیه آپاراق. اگر تلویزیوندا آشیقلاری قویسالار ایشلرین چوخو حل اولار. بیر نفر منی گؤرمسه هاردان بیله جک اورمودا آشیق وار یا آشیق نئجه دیر.
دگرلی واختینیزی بیزیم اختیاریمیزا قویدوغونوزا گؤره تشکر ائدیرم و یئنه ده سیزه مبارک اولسون دئییرم .چوخ ساغ اولون.
سیزده ساغ اولون .
باخیش لار(5)
[cb:post_like]
