من ایتن گون
قویون، اونودمامیش دئییم، منی تانیماغا، سؤزو اولمایان، باشقا بیر ایپ اوجو ایسه واردیر. جیب لریم تئیخا (همیشه) گونده لیك، درگی ایله كاغیذ لا دولودور. ال چانتاسی ایسه واریمدی. اونوندا ایچی تیخیلی دیر. زیپی زور ایله باغلانیر. چوخ السیز- آیاقسیز ایله آوارایام. شهرین یوخاریسینا گئتمك ایسته دیگیم ده، اؤزومو شهرین آشاغیسیندا تاپیرام. دوغویا گئتدیگیم چاغدا ایسه، باتی دان باش چیخاردیرام. گون آللاهین گونو گئجیكیرم. یادیمدا، هئچ كیمسه نی ساخلایانمیرام.
تئیخا زاد- مادیمی یئرده قویورام. گونده یوز دؤنه اؤزومدن، «قلمیمی هارا قویدوم؟ پولوم هارادادیر؟ ای وای مندیلیم هانی؟ دفتریم هانسی قبیرده؟»- سوروشورام. من، آدلیم آشاغی حافظه لی، پروفسورلاردانام.
فلسفه بیلیم یوردوندا، ایللردیر درس وئریرم. درس كیلاسیمی تاپماقدا، هله ده سورون (دردسر) چكیرم. فاكولته نین (دانشكده نین) آسانسور ایسه من له دوز دئمیر. سون قاتا گئتمك ایسته ینده، منی یئر آلتینا آپاریر. گون لرین چوخوندا قاپیسی منیم اوزومه آچیق اولماییر. آسانسورون قاپیلاری منیم بؤیوك دوشمنیم ساییلیر.
داواملی گیجلیك ایله، اشیالاریمی ایتیرمك دن علاوه ایسه اونوتقانام(فراموشكارام). پالتو ایله قهوه خانایا كئچسمده، ائشیگه چیخدیغیمدا پالتو اینیمده اولمور. هله یادیما گلنده، هانسی قهوه خانادا اولدوغومو خاطیرلایانمیرام. بؤرك، كیتاب، چتیر، یاغمورلوق (بارانی) ایله هر نه دن پیس ال یازیلاریمی ساغ- سول ایتیریرم.
بیر گئجه، ائوه چاتاغیما تله سیردیم. تاكسی چاغیردیم. تاكسی سوروجوسو، «هارا؟» دئدی. من ائویمین هارادا اولدوغونو یادا سالانمیردیم.
«ائوه گئدیرم!» دئدیم.
ـ چاشقین لیق لا، «یاخشی، آغانین ائوی هاردادیر؟» سوروشدو.
ـ «نه دئییم، یادیما گلمیر!» دئدیم.
ـ شریف آدینیز؟
ـ پروفسور اشلمیل.
سوروجو، «پروفسور، من سیزی بیر تئلفون كؤشكونون یانیناجان آپارارام. تئلفون باشقاریجی سینی (راهنماسینی) یارپاقلاییب، ائوینیزین آدرسینی تاپین.» دئدی.
سونرا، منی یول اوستونده اولان بیرینجی توختاجیلیغاجان (داروخانه یه جن) آپاردی. توختاجلیق دا بیر، هامیسال تئلفون كؤشكو وارییدی. ائندیگیمده، ایگیتلیگی اولمایان سوروجو، دایانمادان گازلاییب گئتدی.
هله، توختاجلیغا گیرمه دیگیمده، چانتامین تاكسی دا قالدیغینی خاطیرلادیم. تاكسی نین دالیجا قاچدیم. باغیردیم: «چانتام! چانتام!». آنجاق، تاكسی سسیمی ائشیتمه یه قه در اوزاقلاشمیشدی.
توختاجیلیق دا تئلفون كیتابچاسینی گؤتوروب، یارپاقلادیم. «ش» حرفین آلتینا باخدیغیمدا باشیمدان توستو قالخدی. یئددی- سگگیز اشلمیل-ی سیرالامیشدیرلار. آنجاق منیم آدیم آرالاریندا دئییل دیر. او آندا، نئچه آی بوندان اؤنجه یاشام یولداشیمین، تئلفون باشقاریجی دفتریندن (دفتر راهنمای تلفن)، آدیمیزی پوزماق تصمیمینین توتماسینی خاطیرلادیم. ندنی ایسه منطق لی ایدی. اؤیرنجیلریم، گئجه- گؤندوز تانیماییب، ایسته دیكلری ساعاتدا بیزی راحاتسیز ائدیردیلر. اوندان كئچسكده، باشقا اشلمیل لر له ایشلری اولانلار یانلیشجا بیزیم نمره میزی توتوردولار.
باشیما نه كول اله دیگیمده قالمیشدیم. نه ته هر ائوه دؤنوم. اولدوقجا، الیمه چاتان بیتیك (نامه) لری، یان جیبیمه قویاردیم. آنجاق پیس شانسیمدان اوگون جیب لریمی تمیزله میشدیم. آیریجا ایشی گتیردیگی بو گون دوغوم گونوم اولدوغو اوچون یاشام یولداشیم دوستلاریمیزی شاما چاغیرمیشدی. بالاجیق، بؤیوك كئیك پیشیریب، اوستونه گؤزل شمع لر ایله بزه میشدی.
یقین، یازیق قوناقلار، منه تبریك دئمه یه ایله شیب، گؤزله ییرلر. من ایسه بورادا توختاجیلیق دا دوروب، ائویمین تاپماغینا چالیشیرام.
آنسیز(ناگهان)، یولداشلاریمین بیرینین تئلفون نومره سین خاطیرلادیم. «دوكتور مادرهه، ایندی اونا زنگ آچارام.» نومره سین توتدوم. بیر گنج قیز دسته یی گؤتوردو.
ـ «دوكتور مادرهه بی ین تشریفی وار؟»
ـ بالاجا قیز، «یوخ» دئدی.
ـ خانیمی ایسه یوخدورلار؟
ـ یوخ، ایكیسیده ائشیكده دیرلر.
ـ هارادا تاپا بیلمك لرینی، بیلیرسینیز؟
ـ من اوشاق باخیجی سییام (پرستارییام)، آقا ایله خانیم، پروفسور اشلمیل-ین ائوینه تشریف آپاریب لار. سؤزونوز اولورسا بویورون. اونلارا كیم تئلفون ائدیب دیر، دئییم؟
ـ پروفسور اشلمیل.
ـ آقا ایله خانیم، بیر ساعات اؤنجه، سیزین ائوه گئتمه یه، یولا دوشوبلر.
ـ باغیشلایین هارا گئتدیكلرینی بیلیرسینیز؟
ـ ایندی سؤیله دیم، اونلار، سیزین ائوه گئدیبلر.
ـ منیم ائویمی تانیییرسینیز؟
ـ آغا شوخلوق ائدیرسیز؟
نئچه دقیقه دن سونرا باشقا یولداشلاریمدان نئچه سینین آد ایله تئلفون نومره لری یادیما گلدی. اونلارین هامیسینا تئلفون ائتدیم. آنجاق هامیسی پروفسور اشلمیل-ین ائوینه گئتمیشدیرلر. گیج ایله مایماق لیق لا، خیاواندا دایانیب، نه ائتدیگیمی بیلمه ییردیم. آنسیز یاغیش یاغدی. چتیریمی آچماق ایسته دیم:«چتیریم هاردادی؟» بونودا سوروشارلار؟
یادیما گلدی. اولا بیلر، بیر یئرده قویموشام! یاواشجا، بیر ائوین قاپی اوستو تالواری-نین (سایبان) آلتینا سیغیندیم. ائله بیل گؤیون تاوانی (سقفی) دلینیب دیر. ایلدیریم باغیریب، پارلاییردی. بو شانسا لعنت!
گونون بوتونو هاوا ایستی ایله گونشلی ایدی. ایندی ایسه من ایتمیشدیم، همده چتریمی ایتیرمیشدیم، توفان گلیب دیر.
ائله بیل یاغیش كسیلمك ایسته مه ییردی. اؤزومو مشغول ائتمك اوچون تویوق ایله یومورتانین اؤنجه لیك فلسفی قضیه سینین چؤزمه سینه، باشلادیم. هئچ باجاریقلی فیلسوف بو قضیه یه اویغون ایله دوزگون جاواب وئره بیلمه ییب دیر. قاچینماز (لابد)، تقدیریمیش من بو مسئله نی دوشونم. اولابیلر، بیر اویغون جاواب تاپام.
سویو گؤیدن دولچا ایله تؤكوردولر، سانیردیم. یاغیش سویو اوست- باشیما دامیب، منی ایسلادیردی. سویوق جانیمین كؤكونو بوروموشدو. بورنومون سویو آخیردی. آسقیریق، آسقیریق دالیجا.
بورنومو سیله جك (دستمال) ایله تمیز له مك ایسته دیم. آنجاق سیله جه گیمی ایسه باشقا یئرده ایتیرمیشدیم.
او آندا، یاغیشدان ایسلانمیش، تیتره ییب ، كدرلی باخیشینی منه دیكن، بؤیوك قارا بیر ایتی گؤردوم. تئزجه باش بارماغیم، ایت ایسه اؤزیولونو ایتیریبدیری دویدو (حس ائتدی). او ایسه ائوینین آدرسینی خاطیرلامیردی. یازیق ایت! بیله سینه فیشقالادیم. ایت دایانمادان یانیما قاچدی. محبتی اورگیمه یاتدی. اونلا دانیشدیم. ائله بیل آدام دیلی بیلیردی. «یولداش من له سن قایغیداشیق. من شانسی اولمایان، آوارایام. سن ایسه آوارا ایله یازیق ایت سن.
قاچینماز، بو گون سنینده دوغوم گونوندور. یقین، سنه ده قوتلاما (جشن) توتوبلار. ایندی ایسه مینم كیمی شانس سیز، آدامین اوره گی سنه یانماق اوچون، بورادا دایانیب تیتره ییر سن.
حتمن ییه ن ایسه قاپی- قاپی سنی آختاریر. اولمایا سنده منیم كیمی آجسان؟»- دئدیم.
ایتین ایسلاق باشینا ال چكدیم. ایت ایسه قویروق توولاییب، باشین ترپتدی. «هر نه منیم باشیما گلسه، سنین ده باشینا گله جكدیر. سنی یالنیز بیراخمارام. هر ایكی میز ایسه ائویمیزی تاپاجاییق. سنین ییه نی تاپمازساق سا، سنی ائوه آپارارام. الینی وئر گؤروم.»- دئدیم.
ایت ساغ الین قووزاییب، الیمه قویدو. قوشقوسوز (بی تردید)، نه دئدیگیمی آنلاییردی. بیر تاكسی توو ایله یانیمیزدان كئچیب، خیاوانین پالچیغینی اوست- باشیمیزا سپه له دی. نئچه مئتر قاباقدا آنسیز دایاندی. بیری هارای چكدی: «اشلمیل، اشلمیل». باشیمی قالدیردیم. گؤردوم، تاكسی نین قاپیسی آچیلدی. بیری ائشیگه چیخیب، هارای چكدی: «اشلمیل، بورادا نه ائدیرسن؟ بیرینی گؤزله ییرسن؟»
ـ «هارا گئدیرسن؟» دئدیم.
ـ «بونو سوروشماق ایسته میر. سیزین ائوه گئدیرم. گئج اولوب، آنجاق گئج گئتمك، گئتمه مكدن یاخشی دیر. هله ندن اؤزون ائوه گئتمه ییب سن؟ بو ایتی هارادان گتیریب سن؟» -دئدی.
ذوق لو اولوب، سئوینج له «سنی، تانری یوللاییب دیر! نه گئجه یدی! ائویمین آدرسینی اونوتموشدوم. چانتام تاكسی دا قالیبدیر. چتیریمی ایسه ایتیرمیشم. یاغمورلوغومو ایسه هارادا قالدیغینی بیلمه ییرم.» - دئدیم.
یولداشیم، «اشلمیل! دونیادا آشاغی حافیظه لی پروفسور گئرچك دن وارسا، سن اؤزون اونون كسین سیمگه سی سن!» - دئدی.
آپارتمان-ین زنگین چالدیغیمدا، یاشام یولداشیم قاپینی آچدی. منی گؤردویو آن، «اشلمیل، ایندی یه جه هانسی خارابادایدین؟ چانتان هانی؟ بوقوناقلارین هامیسی آخشامدان ایندی یه جن سنی گؤزله ییب لر. چتیرین؟ یاغمورلوغون؟ بو ایتی هارادان گتیردین؟»- دئییه چیغیردی.
یولداشلاریم بیزی دؤوره له یب، سوروشدولار: «هاردایدین؟ سنه چوخ نیگران اولدوغوموزدان، قوناقلیق بورنوموزدان گلدی. اولا بیلر، باشینا بیر قادا گلیب دیر، دوشوندوك.» یاشام یولداشیم بیر داها، «بو ایت كیمین دیر؟»- سوروشدو.
آزاقدان (بالاخره)، «بیلمیرم! ویلان خیاوانیندایدی. ائوه گتیردیم. ایندیلیك (عجالتا‍ً) آدینی هاپی قویاق!»- دئدیم.
حیات یولداشیم (همسرم) آغزینی بوروب، «هاپی! اللرین آغریماسین. پیشیگیمیزین ایت دن آجیغی گلدیگینی بیلیرسن. پاپاغانلار ایسه اونو گؤردوكده، یقین سكته ائدرلر.»- دئدی.
ـ «اینجیدن ایت دئییل. پیشیك ایله آلیشار. یقین قوشلارا دا سئوگی باغیشلار. یاغیش دا تیتره مه ده قویدوغوم اینصاف دئییل دیر. گؤزل حئیواندیر.»- دئدیم.
بو سؤزو دئدیگیمده، ایت اورك یاخان ونگیلتی چكدی. پیشیك اوتاغین ایچینه قاچدی. ایتی گؤردوكده آرخاسینی اَییب، اوستونه آتیلدی. ائله بیل گؤزونو چیخارماق ایسته ییردی. پاپاغانلار ایسه قفس لرینده قاناد چالیردیلار. چیغیریب هارای چكیردیرلر. داغیناق بازاركیمی ایدی. گل گؤره سن!
اوره یینیز، ماجرانین سونون بیلمك ایسته ییر؟ هاپی، هله ده بیزیم ائوده قالیر. پیشیك له او بیر- بیرله آلیشیب لار.
حیات یولداشیم، هاپی- نی مندن چوخ سئویر. هر زامان ایتی ائشیگه آپاردیغیمدا، ائشیم، «ایندی ائوینیزین آدرسینی اونوتمایاسینیز! ایكی نیزیده دئییرم.»- دئییر.
چانتام هئچ زامان تاپیلمادی، سؤز یوخ، چتیر ایله یاغمورلوغودا. مندن اؤنجه كی بوتون فیلسوفلارا تای، تویوق ایله یومورتا چتینلیگی نین چؤزمه سینین خئیریندن واز كئچدیم. یئرینه بیر كیتابین یازماسینی باشلامیشام. آدی «اشلمیل، خاطیره لری»- دیر.
البته، ال یازیلاریمی تاكسی دا، رستوران دا، یوخسا پارك اوتوراجاغیندا (نیمكت ده) قویماسام سا، تئزلیك له اونو گؤره جكسینیز. ایندیلیك بو بؤلومو، اؤرنك اولاراق ساخلایین.
