قیزیل داغ
آیاق آستیدن چیققن بلادیک، نیمه بؤلدی- یو، اؤن إیککینچی صنفنی اؤقیب تورگن طاهر انه شو تلاشی قیله یاتگنلر قؤلیگه توشدی. شولردن بیری اونگه :
- قنی اسنادینگنی کؤره یلیک چی! - دیدی ساووق بیر آوازده و کؤرسه تیلگن حجّتنی تیتکیلی باشله شدی.
- قی یردن بؤله سن اؤزی؟
- آتیم طاهر. میمنه دن بؤله من. آتمنینگ آتی ظاهر. اوکیشی بولتور خوست اوروشلریده شهید بؤلدی. منه شو تاغ بیتیده گی اویلردن بیرده،- اؤنگ قؤلی بیلن تیپه لیکنی اؤرسه ته توریب،- آنم، اوکه لریم، سینگیللریم بیلن، کیرایه بیریب یشب توریبمیز. یریم کون مکتب اؤقیمن، یریم إیشله یمن اکه لر.
- یاشینگ اؤن سککیزدن اؤتیبدی-کو، أیگیت! وطننی حمایه قیلیشینگ کیره ک، سینی عسکرلیککه جؤنته میز. خوبمی؟
- یؤق. مین اوروشگه کیتمئمن. اسنادیم تؤغری. اویده گیلر آچ قاله دی. آنمنینگ کؤز یاشلری هلی قؤریگنی یؤق، - دیدی طاهر هیجان باسگن بیر حالتده.
- یور، آلغه،- دؤق قیلیب طاهرنینگ ایلکه سیدن سوریب موترگه سالماقچی بؤلدیلر،- گپنی چؤزمه سدن سوریل قنی!!
- قؤیب یوبارینگلر، مین مکتبده اؤقیمن. اؤزیز چیقرگن قانونگه اؤزلریز نیمه گه رعایه قیلمی سیزلر؟
- قانون اوروش میدانلریده یازیلگن و کؤمیلگن بؤله دی. بیراق، اونی سین اؤقیمه یسن، کؤرمی سن، لیکن، اونینگ چیزیقلری اوستیدن یوریشگه مجبورسن! «حزب» دیب«وطن»- دیب شیرین جانیدن ائریله یاتگنلردن سین اوستونمی سن! قیزیل عسکرلردن هم سینینگ جانینگ شیرینمی؟
- یؤق. مین بو«وطن» یؤلیده قان تؤکیشنی إیسته میمن.
- آزادلیک درختی إیگیتلرنینگ قانیدن قوّت آله دی؛ اوزراق تامیر آتیب یه شه یدی.
- کیچیره سیز، قاندن کوچ آله دیگن، هرقنده ی غایه و حتــّا اینگ اولوغ نرسه لردن- ده، نفرتله نه من. مین اوچون جان هر نرسه دن عزیز.
- عقلینگ اؤسیب اؤزینگدن اوزونله بتدی اوکه. یور قنی،- قؤللریدن تارتیشدی حزبیلر!
- آخــخـــخ.....قؤیب بیرینگلر. هیچ بؤمه سه آنمگه خبر قیلی،- دیدی طاهر
زورغه قدّینی تیکله گن طاهر قؤللری بیلن بؤینیگه اؤره لگن کؤیه گینی کئیشگه اورینرکن، قرشیلیک قیلدی. حزبیلر طاهرنی تؤرت کیشیله شیب سودره گنچه تلاشینینگ موتریگه سودره ب، آلیب باریب تیقدیلر. موتر جایدن قؤزغه لیب، ایندی حرکت قیله یاتگندی یمکی، طاهر آنه!! مینی اوروشگه آلیب کیته یاتیلر! اگرتریک قئته آلمسم، آق سوتیزگه راضی بؤلینگ آنه جان!!!- دیب بار تاووشی بیلن قیچقیردی.
کؤپ اؤتمی، تلاشینینگ موتری کؤزدن غایب بؤلدی. طاهرنی تؤپلاق یرلردن تاپیب چیقریب آلیشگه کیچ بؤلگندی. اونی اؤلیمدن اسره ب قالیشگه جان کویری هم یؤق ایدی اصلیده.
***
کؤچه ده گیلردن کیمدیر طاهرنینگ آنه سیگه بو ساووق خبرنی یتکزگن چمه سی. کؤنگلی ویران آنه - اؤغیللری قربان و جؤره نی اویده قالدیریب، سراسیمه احوالده قاره یاپینغیچینی باشیگه تارتیب، بیردن کؤچه گه آتیلیب چیقدی. آرتیدن سککیز یاشر قیزچه سی سیوگیل هم ایرگشدی. قیزیگه«سین قئت!»- دیگنی فایده قیلمه دی شیکیللی قیزچه سی کیتیدن یؤرتمه لب کیله بیردی. هلی ماتمدن باش کؤترمه گن آنه«اوییم کویدی، دربدر بؤلدیم، داد طاهریمدن ائریلدیم!»- دیه چیرپیره ک اوریب تیپه لیکدن کتته یؤل یاققه سیگ توشیب کیلدی.
- کیمنی قیدیره سیز بو کتته شهرده آنه،- دیدی یؤل یاقه سیدن تیک تورگن سلله لی بیر کیشی.
- قیشلاقده مجاهدلر ، شهرده بؤلسه، حزیبلر کون بیرمسه- یه، قیسی مزارگه باش اوره ین اکه! طاهریمنی آلیب کیتیلر اوروشگه،- دیدی عیال.
إیسیدن آزگنگه اؤخشب آنه نیمه قیله رینی بیلمی، یؤلنینگ نریگه تامانیده تورگن بیر- بیر منصبدارگه عرض قیلگنی بارماقچی ایدی. شاشیلیب، یؤلنی کیسیب، اؤتماقچی بؤلیب تورگن ایدی. آنه آدملی باشله دی. قیزگینه سی هم آنه سینینگ آرقه سیدن چاپدی. کتته یؤلنینگ نری یاقیگه اؤتیب آلگن آنه، آرقه سیگه بیر تیسه ریلیب قره دی. نی کؤز بیلن کؤرسینکی، سیوگیل گینه سی یؤل اؤرته سیده قانیگه بیله نیب یاتگن ایدی...
۱۹۸۳- تاشکینت
