صفالى نفسلى، قالارگى سسلى، آشیق عزیز مراد خان
صفالى نفسلى، قالارگى سسلى، آشیق عزیز مراد خان
یازان: حسین واحدی
کئچمیشدن ایندییه دک، آذربایجانین اصیل آشیق موسیقی سینین درنه یى اولان، اورمیه نین دول ماحالى بؤلگه سى، تاریخ بویو آشیق موسیقی سینه، بؤیوک اوستادلار پاى وئریب دیر. اونلاردان، ، دوللو مصطفی، دوللو اباذر، آشیق فرهاد، دوللو محمد، و ... آد چکمک اولار.
دول دا یاشایان اینسانلار آشیق بئله اولماسالاردا، آشیقلیقدان باش چیخاریب، قاینار بولاغا تاى سینه لریندن شعر قاینایاجاق دیر.
آدلارین چکدیغیم اینسانلارین یانیندا، یاز هوسلى، باهار سسلى، آشیق صنعتینین بؤیوک ایله تایسیز اوستادلاریندان بیرى اولان، رحمتلیک آشیق «عزیز مراد خان» دیر.
حسن اوغلو، آشیق عزیز مرادخان 1301- جی ایلده اورمونون دول ماحالیندا یئرلشن سامیرتی کندینده دونیایا گؤز آچدى. او، دول ماحالین دا، آشیقلیق صنعتى یاشادیغى اوچون، یئنى یئتمه چاغلاریندان، آشیقلیق ایله تانیش اولوب، آشیق موسیقى سى ایله یاشایار. آشیق عزیز اؤنجه لر، توى لاردا آد چیخاریب، اؤز هونرین هامى یا گؤستریب دیر. اونون تایسیز ایله فرقلى سسى، آدینى دیل لره سالیب، سئویملى بیر شخصیت کیمى تانیدیر.
آشیق عزیز، آشیق لیغى، اورمیه نین باشقا آدلیم آشیغى اولان، رحمتلیک آشیق فرهاد-دان اؤیرنیب دیر. آشیق فرهاد، آشیق عزیز ایله تانیش اولان دا، اونون یئتهنهگین، آنلاییب، شاگیردلیگه قبول ائدر.
چوخ آلچاق کؤنول، باش آشاغى ایله متین اولان، آشیق عزیز، اوستاسینین یانیندا ایسه حؤرمت قازانیب، سئویلمیشدیر. مراسیم لرده، آشیق عزیز مجلیسه قاتیلان دا، آشیق فرهاد اونون آیاغینا قالخیب، حؤرمت له یاناشارمیش. مجلس ده کیلر، آشیق فرهاد دان، «نه دن، اؤز شاگیردینه بو قهدر سایغى گؤستهریرسن؟» سوروشاندا، او ایسه، «من، یاش ایله شاگیردلیک اوچون یوخ، اونون معرفت ایله آنلاغینا حؤرمت ائدیرم» جاواب وئررمیش.
اورمو اهالیسی ده چوخ چاغ لار، آشیق عزیزى مجلسلری ایله توی شنلیکلرینه چاغیراردیلار. او، چالدیغی هاوالاردا آشیق فرهادین یولونون داوامچیسی اولموشدور. آشیق عزیز توی-شنلیک مراسملریندن علاوه هم ده اورمیه رادیوسوندا بایراملاردا و مختلف وئرلیشلرده چیخیش ائدرکن، باتى آذربایجان اهالیسینین ائولرینه بو واسطه ایله قوناق اولور. بؤیوک اوستادی آشیق فرهادی یادلارا سالان عزیز، دئییلنلره گؤره اونون تکجه شاگردی و یا ان آزی اونون یولونون دوامچیسی اولان تکجه شاگرد ایمیش. آشیق عزیز گؤزل ایله ملاحتلی سسی له، هله ده اورمو آشیق صنعتی سئورلرینین ذهنینده و کؤنوللرینده خوش خاطرهلر له آنیلیر.
آشیق عزیز، ساز یانیندا، دگیرمانچیلیق ائدرمیش. او بؤیوک اوستاد، عؤمورونون سونوناجان، دگیرمانچیلیق ائدیب، سازى ایسه اؤزوندن آییرماییر. آنجاق دگیرمانچیلیق گئت-گئده سسینده اثر قویوب، سونرالار دا، آسم خسته لیگی توتوب، ائله بو سبب له،، هله اورتا یاشلارینا یئنى آددیم قویسادا دونیادان وداع لاشیب 7/10/1351 تاریخینده یاشاما گؤز یومور.
آنجاق، صفالى نفسلى، قالارگى سسلى آشیق عزیز-ین یاشام چاغیندان قیرخ ایل کئچسه ده، یادى ایله خاطیره سى هله ده اورکلرده دیرى قالیب، یاشام وارکن، قالارگى اولاجاق دیر.
اومود ائدیرم، بئله اینسانلاریمیزین ساغ ایکن، قه دیرلرین بیلیب، کئچمیشده یاشاییب، گئدنلریده یاشام بویو آدلارین یاشاتماغا چالیشاق.
قایناق لار:
ـ یازیچى، شاعیر ایله گنج آشیق اولان قلمداشیم جناب احمد اسدى نین ایضاحلارى
ـ www.arturmia.ir
ـ gencashiqlar.blogfa.com
