«حیدربابا» منیم خاطیره بئشیگیم دیر
منیم بونا خوشلوغوم روحومدا ده‌رین تاثیر یارالتدی، دؤنیاوی سوسلردن بئزیكدیم، هر نه اؤره‌ییم ایسته دی آیاغیم آلتینا قویدوم، هر نه سئویردیم اوندان اؤزچئویردیم حتی مهربان آنامدان دا.
شعریله قدیم قیریلماز باغلی لیغیم وارایدی، هر یازدیغیم بیر قطعه نی، بیر عزیزین داغی منه بخش ائتمیشدی..
اؤ عزیزلرین ابدی وداعلاشمالاریندا حسرتله گؤزیاشی جار ائله‌مك منه طبیعی بیر سؤزایدی، سون وداعلاشماغیمین گوزیاشلاری «حیدر بابایا سلام» -«آنام وای» منظومه‌لرین یارالتدی.
داغ گؤیلره یاووق دور.
داغ پیغمبرلرین ایلهام - وحی قایناغی و طبیعتین قاباریق شاهكارلاریندان دیر.
قایالارین جیگریندن سؤزه‌ن سولار، ان صاف، ان دوروسولاردان دیر.
داغ‌لا صنعتكارلار و هنرمندلرین طبعی نین و همتی بیر - بیره باغلی لیغی وار.
حیدر بابادا بیر داغ دیر!..
حیدربابا بیر داغ آدی دیر «قیئیش قورشاق» كندی نین برابرینده، منیم خاطیره‌لر بئشیگیم‌دیر، كی چای كناریندا، قره چمن و شنگول آوانین اورتاسیندایئرله‌شیب‌دیر.
منیم بو اثریمده حیدربابا، اقتدارلی بیر كدخدادیر كی همیشه چئوره‌سینه مسلط اولوب تاریخین گؤزو كیمی بوتون حادثه‌لری ثبت ائتمه‌یه خلقین ایشلرینه‌نظارت ائله‌مه‌یه و شاعیرین آجی فریادلارین گؤیلرده عكس ائتدیریب، بوتون افق‌لرین قولاغینا چاتدیرماغا، مسئولیتی وار.
عزیز اوخوجولار بو مجموعه‌نین بویوك نقصانی كی وار:
1- شعرلرین فارسجایا ترجمه اولماسی دیر، تقصیر منده دیر و شاید گله جكده اونو جبران ائده‌یم.
2- رنگ‌لی گراورین اولمادیغی دیر كی، تبریز ده بو ایشه آز امكانات وار عذرومو قبول ائدین. لاكین اوندا اولان حسن‌لر:
1- بو مجموعه خط اوستادی، طاهر خوشنویس جنابلاری‌نین خطی ایله زینت‌له‌نیب‌كی، اؤز یئرینده نادر و مثل‌سیزدیر.
اؤ، فرهنگین كؤهنه خادملریندن دیر، كی ایندی آذربایجاندا چوخ خط اوستادلاری اونون شاگردلریندن دیلر. اونون گؤزه‌ل اخلاقی، حقیقته ایمانی نظرلرده‌اونون واقعی بیر اینسان اولدوغون جانلاندیریر
2- كیتابین كلیشه‌لری اوستاد هنر صاحیبی «عبدالوهاب شعاری» واسطه‌سی‌له دؤزه‌لیب، اونلار بیلیك‌لی عالیم‌لردن دیلركی، قاباقدا «طالبیه»مدرسه‌سی‌نین مدرسی (درس وئره‌نی) اولوب، ایندیسه تبریزین خیلك شهرتلی و مشخص آداملاری اونون مكتبی‌نین شاگیردلریندن دیرلر، من اؤزوم‌شخصاً «مقامات حریری» كیتابین اؤنون محضرینده اوخوموشام.
اؤ وارسته بیر شخصیت دیر كی، درس وئرمكدن ال چكندن سونرا، تكجه مطالعه اثرینده و كیتابلارا دقت ائله‌مك نتیجه‌سینده ائله‌یه بیلدی كلیشه سازلیق‌صنعتین اؤز فیكیری و ابتكاری كؤلگه‌سینده، الده ائتسین و تبریز اهالی سینه بو یول ایله خدمت گؤسترسین.
3- بیلیك‌لی دوستلاریم، «روشن ضمیر» و «كارنگ» جنابلاری بو مجموعه یه باشلانغیچ یازمیشلار و كیتابی سوسله میشلر.
اؤلینجی اورپا تحصیل كرده سی، فرهنگ اداره‌سی نین معاونی، شاعیر - یازیچی - ترجمه كار و بوگونكو دونیا ادبیاتینا وارد و بونلاردان اؤستون اؤره‌ك دییلن‌دویان دور.
ایكینجی سی ایسه ادبیات لیسانسه‌سی آلمیش تبریزین دانشسراسی‌نین آبرولو دبیری، تام معنادا شعر و تحقیق اهلی دیر.
4- جیلدی‌نین عكاسلیق و نقاشلیغی هنرلی گنج «مرتضی نخجوانی» نین اثرلریندن دیر كی، تهراندا «هنرستان عالی» گؤروب، عكاسلیق و نقاشلیقدامهارت الده ائدیبدیر.
5- بومجموعه نین چاپ ایشی اطلاعات چاپخاناسیندا باش توتوب كی مدیری آقای زغیری دیر. اونون مجهز چاپخاناسی تبریزده ائشسیز و تایسیز دیر.
6- بو كیتابی ترتیبه سالیب و نظارت ائتمه‌یینده راه شوسه اداره‌سی‌نین بایگانی مدیری آقای حسن تقویمی چوخ تالاش ائدیب. اؤنلارین تبریزین فعال‌گنج‌لریندن و مطبوعاتا علاقه‌دار شخصیت‌لریندن دیرلر.
اونلارین منی بو اثرین چاپ اولماغیا تشبث ائتدیلر و بو ایشده بوتون وسیله، اسبابی یاراتدیلار، ایندی بو مجموعه‌نی اؤز طرفیمدن و هامی دوستلار طرفینده‌ن كی هره‌سی بیرنوع بو كیتابین توپلانیب یاییلماسیندا یاردیم ائدیب‌لر، بوتون اؤز آذربایجانلی همشهریلریمه (كندلی - شهرلی) یه اتحاف ائدر، آذربایجانین همیشه باشی اوجالیغین وآذربایجانلی‌نین افتخارلا یاشاماغین اؤره‌كدن ایسته‌ییرم.
سید محمدحسین شهریار
تبریز اسفند
