آشیق بولود ساعد ایله دانیشیق/ دانیشیق آپاران: احمد اسدی
اوستاد ایلک سؤالیمیزی بئله سوروشوم، نه زماندان آشیقلیغا علاقه تاپیبسینیز؟
منیم تقریباً 12 یاشیم وار ایدی، آشیقلارا علاقه یئتیره ردیم. رحمتلیک آشیق درویش، بیر قهوه ده اوخویاردی. اوشاقلاری قهوه خانایا قویمادیقلاری اوچون گئدیب، پنجره دن اونا باخاردیم. گؤزل اوخویاردی. سونرالار من نقاشلیق ایشینه باخدیم. بیرگون آشیق دهقان منی بو یولا دعوت ائتدی. دئدی نقاشلیغی اؤتور. سن گل آشیق اول. سن یاخشی آشیق اولارسان. بو صنعتی ادامه وئر. سن حئییفسن آشیقلیقدا استعدادین وار.
بس بو حسابلا اوستادینیز تکجه آشیق دهقان اولوبدور؟
یوخ. من اوللر، آشیق حمید عباسزاده دن ساز اؤیره نمیشدیم. یعنی سازی نه جور چالارلار، نه جور اوخویارلار. ایلک دفعه اوندان اؤیره نمیشدیم. سونرالار دئدیگیم کیمی نقاش ایدیم. بیرگون آشیق دهقان منی آشیقلیغا دعوت ائتدی. منده نقاشلیغی بوراخدیم. ائله گئدیب دهقانین یانیندا شاگردلیک ائتدیم. 1363-جو ایلدنده آشیقلیق ائدیرم. او زماندان بویانادا ائله چوخ تویلاردا آشیق دهقان ایله بیرلیکده چیخیش ائدیردیک. ائله ایندیده بؤیوک مراسم اولاندا و مجلسده چوخ آدام اولاندا، آشیق دهقان ایله من بیرگه چیخیش ائدیریک. چوخ یئرلره بیرگه گئتمیشیک، تویلارا،مراسملره، باکی یا، تورکیه یه و ... .
نئچه ایلده ساز اؤیره ندینیز؟
ائله ایندیده اؤیره نیرم. هله قورتالماییب کی. سازی اؤیره نیب قورتولماسی یوخدور. من هرگون یئنی شئیلر اؤیرهنیرم. هئچ کیم دئیه بیلمز، من اؤیره ندیم قورتولدو. کامل اوستاد یوخوموزدور. آشیقلیقدا علم کیمی دیر، علمه سون قویماق اولارمی؟
نئچه آشیق داستانی بیلیرسینیز؟
من 27 داستان یازمیشام، آما سینه دن 18 داستان دئیه بیلرم.
داستانلارین مضمونو نه دیر، سیزجه؟
بیری بودور، انسانلاری همیشه چالیشماغا دعوت ائدیر. مسلمانچیلیغا دعوت ائدیر، باخین بیری واردی، عالم سؤزونه قولاق آسمیر، آما آشیق بو داستانلارلا اونا ائله دئییر کی، اؤزو هر نه پیس عملی ده اولسا، قویور یئره. آشیقدا ائله عالم دئیه نلری دئییر.
قورآندا بیاندیر، مبارک آدی
محمدمصطفی حبیب خدا
محفل امانت، بحر عدالت
محمد مصطفی حبیب خدا
***
آنادان دوغولدو ختم پیامبر
نور ایله دونیانی ائتدی منور
هر یانی بورودو الله اکبر
محمد مصطفی حبیب خدا
***
قدرت عالمینده ائیله دی کرم
مشرف بویوردو دونیایا قدم
سیدمرسل رسول اکرم
محمدمصطفی حبیب خدا
مگر بو سؤزلر،عالم دئیه ن سؤزلردن دگیل لر.
هاوالارینیزدا هانسی شاعرلرین شعرلرینی آرتیقراق اوخویارسینیز؟
دوللو مصطفی، بالوولو مسکین،علعسگر، خسته قاسم، پورآذر، اوشناوالی قنبر. آما علعسگرین شعرلری آیری بیر زاددیر. علعسگرین شعرلری هئچ واخت یادلاردان سیلینمه یه جک. آشیقلیقدا چوخ زحمت چکیب. آشیق علعسگرین شعرلری، هم آشیق اوخویور، هم خواننده اوخویور، همده ائله ائودهف کوچه ده ، اویاندا بویاندا هامی نین دیلینده دیر. چوخ گوجلو شعرلری وار.
آشیق هاوالارینا گؤره نه دئیه بیلرسینیز، قدیملر بیلیریک ایندیکیندن چوخ ایدی، سیزجه سببی نه اولوب، بیر سیرا هاوالاریمیز آرادان گئده؟
آشیق ائل ایله اوتوروب، دورار. ائل نه ایسته سه، آشیقدا اونو چالار. قدیملر اولا بیلر هاوالاریمیز چوخ ایمیش. آما مجلسلرده آشیقلاردان ایسته مه ییبلر، دا یادلاردان سیلینیب. من اؤزوم همیشه دئیه رم، اوجور هاوالار حیف اولوب. کئشکه بوگونده او هاوالاریمیز قالاردی.
ایندی نه ائده بیله ریک، بوگونکو هاوالاریمیزی قوروماغیندا؟
ایندی ائله بو آشیقلارین سسلرینی ضبط ائتمکله بو هاوالار گله جگه یادگار قالیر. آما آشیقلیق آرادان گئدیر. تویلارین چوخو ایندی ارکست آپاریرلار. اورمودادا لاپ چوخ آپاریرلار. یعنی او بیری شهرلرین وضعیتی اورمودان یاخشی دیر. شاید اینانمایاسینیز، من بو ایلده اصفهاندا، شیرازدا، تهراندا، کرجده، قوشاچایدا، ماراغادا تویلاریم اورمودان قات-قات چوخ اولوب. اورمو وضعیتی بیرجور، چوخلارینین آشیقلیغا علاقه سی اولماسینا باخمایاراق، تویلارا آشیق آپارماییرلار.
تویلاردان دئیین، ایندیده قدیمکیلره سایاق تویلارینیز اولورمو؟
اولور. ائله کندلریمیزده قدیمکیلره تای، تویلاریمیز اولور. هله ائله کندلر اولور، قدیمکیلردنده یاخشی اولور. آشیق گئدیر، نئچه ساعات چالیب اوخویور. بیر ایله یاخیندا اولارکی، هله کندلرده مجلسلریمیزده سیغاریدا ییغیشدیریبلار. آما ائله کندلرده وار، بالا-بالا اونلاردا آشیقلاردان فاصله تاپیرلار و ارکسته ساری گئدیرلر.
بو ارکستلردن سؤز آچدینیز، سیزین اؤز اوغلونوز آشیق عسگرین بیر ارکست گروهو وار، من و چوخلارینین دئدیگینه گؤره ده ، اورمونون باشاریلی و موفق ارکستلریندندیر. بو ارکستین بیر اؤزللیگیده وار، اودا آشیق سازینیندا ارگ ایله بیرگه چیخیش ائتمه سی و آشیق موسیقی سینین بو گروهدا فعال اشتراکی، بونا گؤره نه دئیه بیلرسینیز؟
آشیق بولودون اوغلو- آشیق عسگر
دئدیگینیز کیمی، ایندی بو گروهو چوخ سئویرلر. عسگرین بیرگونده تویلاردان مجالی یوخدور. بو سازی ، یئنی دن و یئنی فورمادا مجلسلرده اشتراک ائتمه سیده بؤیوک ایشدیر. ان آزی اونلارکی تویلارینا آشیق چاغیرماق ایسته مه ییرلر، بو گروه واسطه سی ایله آشیق موسیقی سی ایله تانیش اولورلار. من بو ایشی سئویرم و دئییرم آشیقلیق ایندیکی فورمادا تویلاردا بیرگون اولماسا، گنجلریمیز گلیب بو ایشی گؤرسونلر.
شاگردلرینیزدن دئیین، کیملردیلر؟
منیم شاگردلریمین اوچونون آدی علی دیر. آشیق نباتعلی، آشیق علی خویلو، آشیق علی قوشاچایلی. بیرده اؤز اوغلومدور. بیر نفرده تهراندا آشیق اکبر واردی. اما او تویلارا گئتمز و ائوده اؤزونه چالار.
دونیاسینی دگیشمیش آشیقلاریمیزدان نئچه سینی خاطرلاییرسینیز؟
آشیق درویش، علی قابچی، نجف، رسول، محمود، مختار امانی.
آشیقلیغین فلسفه سی نه دیر، آشیقلیق نئجه دیر؟
منجه آشیقلیقدان بؤیوک مقام یوخدور. ایندی منه هرنه مقام وئرسه لر، آشیقلیقدان ال چکمرم. من آشیق دگیلم ها. آشیغین مقامی چوخ بؤیوکدر، چالیشیرام آشیقلارین یولونو گئده م. باخسانیز، یئددی-سککیز مین ایل بوندا قاباغا عائد اولان ساخسی قابلاردا بیر نفر ساز الینده دوروب. بو صنعت دده قورقودون یادگاری دیر. دده قورقوددا پیغمبرین محضرینه گئدیب و اوندان اجازه سینی آلیب.
یئنی نسله، تزه بو یولا قدم قویانلارا دئیه جگینیز سؤز وارسا بویورون؟
یئنی نسله سؤزوم بو اولا بیلر، بو صنعت بیزیم وارلیغیمیزدیر، گرک قویمایاق آرادان گئده. سونرادا بونو دئیه رم، آشیق اولانلاردا، تکجه آشیق اولماسینلار، گئدیب بیر یئرده ایش تاپسینلار، سونرا آشیقلیغا علاقه ایله دوام وئرسینلر. ایندی زمانه ائله اولوب، تکجه آشیقلیق ایله باش دولاندیرماق اولماز. باخمایین کی، بیر تعداد آشیقلاریمیز تکجه ائله آشیقلیق ایله مشغولدولار و وضعیتلری آللاها شوکور یاخشی دیر، آما ائله هر صنعتده بیر نئچه نفر چیخارکی، تانینا و او صنعتدن پول چیخاردا. منیم سؤزوم بودور، اؤنجه ایش تاپسینلار، سونرادا قویماسینلار بو صنعت آرادان گئده.
واختینیزی بیزیم اختیاریمیزدا قویماغینیزا گؤره تشکر ائدیرم. چوخ ساغ اولون.
سیزدنده تشکر ائدیرم. سیزده ساغ اولون.
آشیق بولود- احمد اسدی
آشیق بولودون اوغلو، آشیق عسگرین شکیللری:
آشیق عسگر ساعد (آشیق بولود-ون اوغلو)
