یادیمدادیر...
آرتیق سنین صیفت ایفاده‌لرین‌دن کئفی‌نین یاخشی و یا پیس اولدوغونو آنلاییردیم. گولوشونو گؤرنده دونیا‌لار سانکی منیم اولوردو. یئمک یئدیگینی گؤروردوم او پنجره‌دن. سن ده منیم تئز-تئز چای ایچمه‌ییمی گؤروب، تعجب‌له‌نیردین. بیر سؤزله بیر-بیریمیزین حیات طرزینه چئوریلمیشدیک. هر گون بیلیم‌یوردون‌دان چیخیب او پنجره‌نین اؤنونده اوتورماغا تله‌سیردیم. سنی گؤرمه‌یه تله‌سیردیم. لاکین بیر گون او پنجرنی قرارسیزلیغین، اعتیناسیزلیغینلا سن سیندیردین.
یادیمدادیر، او گون سن‌دن سوروشدوم، آرامیزداکی مسافه‌لری كسمك ایسته‌ییرسنمی؟ “آتام چوخ حیرسله‌نه‌ر، ایجازه وئرمز دئدین.” سونرا یئنه سوروشدوم: “بس گلمک ایسته‌ردینمی؟” باخ بو سوالین جاوابی ایللرله یاندیردی منی. دونیامی یئرله بیر ائتدی همین گون. “امین دئییلم” دئدین. “تاماممی. داواممی؟” دئدیم. “سن قرار وئر” دئدین.
بیلیرسن، اوندان سونرا ائله بیر دوعا ائتدیم ، رببیمه... ایچدن، هیچقیرا-هیچقیرا... تئز بیر زاماندا دا قبول اولدو. دوغرو دئییرلرمیش صمیمی ائدیلن هئچ بیر دوعانی رببیم گئری چئویرمیر. “آللاهیم ایچیمده، قلبیمده بؤیوک بیر بوشلوق یارات، دویغوسوز اولماق ایسته‌ییرم. سویوققان‌لی اولماق ایسته‌ییرم” دئدیم. داها آجی چکمه‌مک اوچون بوتون حیس‌لریم‌دن ایمتینا ائتدیم همین گون. بیلمیرم همین دوعانین قبول اولدوغو اوچون ایندی پئشمان اولوم، یوخسا سئوینیم. دویغوسوزلوق چوخ قریبه‌دیر...
ایللر کئچدی، ایندی سنین یاشادیغین، نفس آلیب-وئردیگین تورپاقدایام. نه قریبه بیر دویغودور....
بوردا اولدوغومو بیلمیسن. یقین پنجره‌دن گؤرموسن... منه اوردا مئساژدا قویموسان “نه زامان گلدین؟” دئیه. جاواب وئرمه‌ییمی گؤزله‌ییرسن. بلکه گؤروشمه‌ییمیزی ده... آما آرتیق من امین دئییلم. عائله‌لی اولدوغوم اوچون. ائله سن ده...
یادیمدادیر. ایلک اوغلون اولاندا منه یازیب دئمیشدین، اوغلوم سنه بنزه‌ییر. منیم اوغلومون شکیلینی گؤردوکده ایسه “آسلان” دئمیشدین اونا. دئمک اولار، عینی واخت‌لاردا نیشانلاندیق. ائولندیک. آما باشقا-باشقا آدام‌لارلا.
ایندی اوتوبوسون پنجره‌سین‌دن باییرا باخیب اورییمده سنینله دانیشیرام. بیلمیرم سنی قیناییم، یوخسا تشککور ائدیم اولان‌لارا گؤره. آما ان چوخ لعنت‌له‌مک ایسته‌ییرم. سنه گؤره ائتدیگیم دوعا سببین‌دن ایندی دویغوسوز اولدوغوم اوچون. بیلیرسن بیر قادین کیمی دویغوسوز یاشاماق نئجه چتین‌دیر؟..
