هر شئی اعلادی
عمومیتله دئییم کی، آخیر واخت‌لار قاباغینا یئمکله دولو قاب قویدونمو اولورسان اونون بیر نؤمره‌لی دوشمنی، سنی او آن سؤیمه‌یه ده دیلی قاتلانار. آخی من گؤرورم کی، او، قابا نئجه نیفرتله تاماشا ائلییر، ایشتاهی اولمور بیلیرم، آما یئنه ده آخیرادک یئییر، اؤزو ده چؤرک‌دن ده تپیشدیریر آرادا. اوشاق‌لیقدا اونا اؤیردیب‌لر کی، یئمه‌یی چؤرکله یئیه‌سن گرک. بیر نؤوع عادتگرده[آلیشقان] اولوب، کندچی آدامدی، من اونو قینامیرام، اونون موحیطی، یاشادیغی جمعیت بئله دیکته ائله‌ییب، نئیله‌یه‌سن.
یادیمدادی هله اوچ-دؤرد ایل بوندان اوول آتام سحر اوباش‌دان دوروب، لاخلایان آیاقلارییلا اونون اوچون سوزولموش قهوه‌نین قویولدوغو ماسایا یاخینلاشار، اوستوفجا ایله‌شیب، دونقولداناردی: “جهنم اولسون هر شئی”. اما ایندی،-عؤمرونون لاقئیدلیکله یاشانما‌لی اولان بیر واختیندا-یعنی بو دونیا‌دان گئت‌هاگئت‌ده “هر شئی اعلادی” دئییر.
دوغرودان دا هر شئی اعلادی. بو سؤزلرین قیمتی یوخدو. آتامین خاصیتینه بلد اولان بیر آدام کیمی راحت‌لیقلا دئیه بیلرم کی، اونون بئله سؤزلر دئمه‌یه دیلی گلمزدی. یادیما گلیر آکویتانیا‌داکی ائویمیزده، یایین جیرهاجیریندا آتام سحردن آخشاماجان باغدا اللشر، بئلی، دیرمیخی الین‌دن یئره قویمازدی. او، ایشینی قورتاران واختادک من دویونجا فوتبول اویناییب، وئلوسیپئد[چارخ] سوردوک‌دن سونرا ائوه قاییتمیش اولاردیم. وئلوسیپئدیمی دیوارا دایاییب اونا یاخینلاشاردیم. یوخ، یوخ، او، منه هئچ واخت گول‌دن آغیر سؤز دئمزی، گؤزوم اوسته قاشیمین اولماسینی خاطیرلاتمازدی، آما قوجاقلاییب باغرینا دا باسمازدی، ائله آرادابیر گؤز آتیب گؤرردی کی، سالاماتام، وسلام. آنام اونا پیوه‌یله لیموناد گتیرردی، او دا آلیب دیبینه‌جن سومورردی، سونرا دا تشککور ائله‌یه‌ردی، آما اؤلدورسن ده بوگونکو کیمی “عنتیقه، لذت، اعلا” سایاق سؤزلر دئمزدی.
ایندی هر شئی آرخادا قالیب، او، بوتون رهبر صلاحیت‌لرینی ایتیریب، عائله ایداره‌چی‌لیگی الین‌دن چیخیب. بو گون اونو اوولکی اوتاغین‌دان باشقا اوتاغا کؤچوردولر-قدیم اوتاغین دؤشمه‌سی یئنی‌دن بویالانمالییدی-هئچ توکو ده قیمیلدانمادی، شالوارینا دا آلمادی.
گؤرورسوز، ایندی ده اوتوروب قهوه ایچه-ایچه آغزینی مارچیلدا‌دیر، ایکی دفعه دالبادال “هر شئی اعلادی” دئییر. آز قالا بیر عصر[یوز ایل] کئچیب، آما او، بونو ایندی دئییر. سکسن‌دوققوز ایله ایکی دفعه “اعلا، لذت” سؤزو بسمیش البت. دئییرم بلکه، گرگین کئچن حیات‌دان جانی دینجه‌لیب، بدنی بوشالیب، مسئولیت حسی اوزرین‌دن[قاباغیندان] گؤتورولوب دئیه بئله یاییلا-یاییلا دئییر بونو؟ بلکه ده، بو بیر جوت ایکی تک سؤز اونون آغزین‌دان اوزون ایللرین یورغون‌لوغونون نتیجه‌سی کیمی آنی اولا‌راق، شعورسوز شکیلده چیخیب؟. نئجه چیخیب، چیخیب. بونون هئچ بیر فرقی یوخ‌دور. آتام دئییر “هر شئی اعلادی”، دئمک، شیرین قهوه دؤشونه یاتیب، جانینا یاییلیب، آغزینا قویدوغو یومشاق کته لازیمی یئرینه گئدیب چاتیب، داها بوندان یاخشی نه اولا بیلر کی...
من امینم کی، او، “هر شئی اعلادی” فیکرینه چوخ دوشوب، گل کی، بونو سس‌لی، آشکارانه شکیلده دئمه‌یه زورومو دئییم، کیشیلیگیمی دئییم، بیلمیرم، چاتماییب. ایندی لاپ معطل قالمیشام: گؤرن آتام بو گون ایلک دفعه اولدوغو کیمی گؤروندو، یا ائله بو سحر دییشیب باشقا آدام اولدو؟_____
بو حیکایه نی آذربایجان تورکجه سینه چئویرن: جاوید جعفروو
