اوچ کیشی‌یه بیر تویوق
قیزیل دری‌لی، گؤز دولاندیریب، چاووش-ا باخدی، قاباقدان گلنلیک له: «چاووش، هانسی تویوق؟ من هئچ تویوق یئمه‌میشم!» چاووش اونون بوغازیندان یاپیشیب: «اوندا کیم یئییب؟» دئدی.
قیزیل دری‌لی جاواب وئردی: «من نه بیلیم. حتمن تولکو، یادا چاققال یئییب.»
ایندی چاووشون گولمک واختی ایدی: «عجب! بس دئمه تولکونون ایش ایدی. اسکیک تولکو! بورالاردا تاپیلان تکجه تولکو سنسن کوپک‌اوغلو، اوزدن دوشموش حوققاباز تولکو!». قیزیل دری‌لی ال- آیاغین ایتیریب دئدی: «چاووش باشی نه عرض ائدیم، حتمن تولکو ایشیدی.»
آلچاق کؤپک‌اوغلو! منی اله سالیبسان! سنی تویوقلاری قولتوغونا ووروب قاچاندا گؤروب‌لر.
آمما اولار روحانی دده نین دئییل‌دی.
اوندا هانسی یازیغین ایدیلار؟
عرض ائله‌دیم، اونلار هئچ تویوق دئییل دیرلر... منیم قولتوغومدا ساده‌جه بیر اوووج قاناد ایدی!
قاناد؟ نه قانادی؟
دوغروسو، من باشیمی آشاغی سالیب، اؤز یولومو گئدیردیم... بیردن- بیره گؤزوم، بیر اوووج قانادا ساتاشدی، اؤز- اؤزومله دئدیم جانیمسان، یاستیق قانادی!... اولاری ییغدیغیم دا کئشیش یتتیشدی.
حتمن، تویوق- خوروزلارینین دالیسیجایدی.
منی گؤروب هارای چکدی: آی رامون، دوز ووراق[بزنگاه] چاغی توتدوم سنی. اوغلان اوتانمیسان، منیم تویوق- جوجه‌لریمی اوغورلاییرسان؟
دئدیم: هانسی جوجه دده؟ سیز بو قانادلارا، جوجه دئییرسینیز؟
کئشیش دئدی: هرنه اولسادا منیم‌دیر. چاووش، آناما آند اولسون، هامیسی ائله بو ایدی، اونودا عرض ائله‌دیم.
چاووش قاپی‌یا ساری گئتدی. ائشیکده، یاغیش، آمان وئرمه‌دن یاغیردی. اؤز- اؤزویله فیکیر ائله‌دی، بو قیزیل دری‌لی لاپ او تورا دوشمه‌ین بالیق‌لاردان دی.
هیلارییو دده اؤز شمعدان‌لارین سیلیردی.
چاووش، روحانی دده ایله کئف-احوال ائله دی:« سلام روحانی دده.»
سالام اوغلوم.
قیزیل دری‌لی رامونو، توتموشام، همن اوتانماز اوغرونو.
چوخ یاخشی چاووش، اؤزونوز حئسابینا یئتیشن.
اونلارا جزا وئرمک سیزین گؤره‌وینیزدیر[وظیفه‌نیزدیر]. ائله ایندی‌دن قاباقلاریندا دورمانیز گرکلی‌دیر. هامیسی یومورتا اوغرولوغوندان باشلاییرلار. قاباقلارین آلمازسینیزسا... البته اوغرو، اوغرودور. بیر تویوق لا جوجه‌نین ائله بیر ده‌یه‌ری یوخدور... آما قاباغینی آلمازسینیزسا، لاپ پیس اولار.
چاووش سوزونون اورتاسینا آتیلیب: «دده، سیز حتمن بیلیرسینیز قیزیل دری‌لی تویوق لا خوروزلارینیزی اوغورلاییب؟!» دئدی.
بلی! نه ته‌هر اولدو؟! من ایکی گؤزومله گؤردوم. ندن بئله بیر سوال سوروشدوغونوزدان باش چیخارتمیرام؟
رامون ادعا ائلیر تویوق آپارماییب.
اوندا، نمنه آپاریب؟
من بیلمیرم... روحانی دده، سیز دقیقن نه گؤردونوز؟
بللی‌دیر... اؤز تویوغومو گؤردوم!
هر نه‌یسه، سؤز، سیزین سؤزونوزدور... من قیزیل دری‌لی نی، سیزله اوزلشدیرمه‌یه گتیرمیشم.
قیزیل دری‌لی ایچه‌ری گیردی. بؤرکونو گؤتوردو. هئچ ایلگی‌سی اولمایان و سویوق بیر گولومسه چاووشون دوداقلاریندا آخدی. دیوار یانینداکی ماسایا دایاندی. دده، شمعدانی‌نی قیراغا قویوب، دئدی: «رامون یاخشی، ایندی چالدیغین تویوق لا خوروزو دانیرسان؟»
رامون دئدی: «من هئچ نه‌یی دانمیرام.»
کئشیش دئدی: «چاووش باشی گؤرورسونوز؟.»
رامون دئدی: «من چاووش-ا، سیزین تویوق لا خوروزلارینیزی گؤرمه‌دیگیمی دئمیشم.»
کئشیش، بو سؤزه قارشی چیخیب: «عجب! من سنی گؤرمه‌دیم؟! چیغیرمادیم‌می، او تویوغو بیراخ؟ سن، تو دابانا قاچدین!»
نه‌یه؟ قاچدیم. آما قاچماق سوچ دئییل کی. آنلامی دا سیزین تویوغو من اوغورلامیشام دئییل، اوجور دئییل؟
کئشیش دئدی: یوخ سوچ دئییل. آما منیم تویوغومو اوغورلاییب، قاچیبسان، بونا شوبهه‌سیزم.»
رامون جاواب وئردی:« روحانی دده... سیزین گؤردویونوز یالنیز، بیر اوووج قاناد ایدی.»
قاناد؟! قیلیفتی[دغل‌باز] اوغرو! یاخشی هرنه‌یی بیر- بیرینه توخویا بیلیرسن. آللاه سندن کئچمه‌سین کی، سن، قارا یاش[فلک وورموش] کئشیش‌ین دؤرد دنه تویوق لا بیر خوروزوندان کئچمه‌دین.
چاووش بؤرکونو دوزه‌لدیب، قیزیل دری‌لی‌نین یاخاسیندان یاپیشیب چیغیردی: «بوش سؤز دانیشما، یولا دوش! نان‌کور!»
کئشیش اونلارا اوز چئویریب دئدی: «تویوقلارین پولونو وئرمه‌لیدیر.»
چاووش قیزیل دری‌لی‌نی قاپی‌دان ائشیگه چیخاردیب دئدی:« گؤردون، روحانی دده حاقلی ایدی. تویوقلاری آپاریب‌سان. ایندی اونلارین پولون وئرمه‌لی‌سن!»
قیزیل دری‌لی دئدی: «نه تویوغو چاووش باشی؟!»
چاووش دئدی:« حتمن یئنه دئیه‌جکسن تویوق دئییل‌دی!»
قیزیل دری لی اوزلولوکله دئدی:« تویوق دئییل یوخ کی. بیر توراتان‌دان دا سسیقایدیلار. بیر آز قاناد لا سوموک! بو حئسابلا دئییرم تویوق دئییل‌دی.
نه قدر خرج قویموشام بیرآز جان تاپالار. ایندی گؤرسن ایناناجاقسان. یاخشی کؤپپه‌له‌شیب‌لر[چاق و چله اولوبلار].»
چاووش اونا گؤز زیلله‌ییب دئدی: «بس گئت گتیر، روحانی دده‌یه قایتار».
قیزیل دری لی دئدی: «دوغرودان، یوخسا دئمه‌میشدینیز، صاباح تعطیل اولدوغو اوچون منیم ائویمه گلیب قارنینا قوللوق ائده‌جکسن؟»
چاووش دوشونه‌رک، دئدی:« صاباح! عجب!»
قیزیل دری‌لی میزی- میزی گولوب دئدی: «بلی صاباح!»، سونرا یولا دوشدو.
چاووش دابانی اوسته فیرلانیب، تله سیک، دفترینه ساری گئتدی.
یاغیش آخیم- آخیم یاغیردی.
* -Fernando silvaنیکارا قوئه‌لی دوکتور، شاعیر و حیکایه یازاری
سؤزلوک:
چاووش çavuş: گروهبان
کیشی kişi: نفر
اؤده‌مک ödəmək: پرداخت کردن
سوچ suç: گوناه
ووراق vuraq: بزنگاه
گؤره‌و görəv: وظیفه
