گؤزلمه زالی (حیکایه)
سالون ائله ایدی کی، 35 نفر صندلی‌ده اوتورا بیلیردی. یاریسی دولوب، بعضی‌لری ایسه تئلفون ایله واخت آلدیقلاری اوچون یاواش- یاواش گلیردیلر.
ساعات 16:32 ایدی. دوکتورون قاپی‌سی‌نین اؤنونده سیرالاری یئتیشن‌لر دایانمیشدیلار. ایچه‌ری‌دن مریض چیخدیقدا بیری یئنی‌دن ایچه‌ری گئدیب آیری مریض ایسه قاپی اؤنونه گلیردی. ساعاتاین عقربه‌لرینه تای اولموشدو، ثانیه، دقیقه، ساعات.
هله یالنیز دؤرد نفر ویزیت اولموشدو. ساغ الیمده دؤرد قادین بیر بیری ایله دانیشیردیلار:
- هن اوجوردو، بو بیمه بیلمیرم نه درده ده‌ییر، دیش‌لریمیزی بیمه توتمور، باهالی داوا- درمانلارا پول وئرمیر، بیمه کلینیک‌لرینده یاخشی باخمیرلار...
- بیزیم آغامیز اؤزونه ایشله‌ر، هئچ بیمه زادیمیزدا یوخدو...
- بیزیم بیمه‌میز وار آما هئچ واخت مریض اولاندا بیمه نین خسته‌خانالارینا یادا کلینیک‌لرینه گئتمه‌ریک، ائله بیل پولسوز بیر باهالی اؤدول وئریرلر اورادا، صوبح گونش اوز- گؤزون یومامیش، یئریندن دوران، مریض‌دیر دئیه اورانین دوکتورلارینا گئدیرلر...
دؤردونجو قادین ایسه ساعاتینا باخیب سونرا اودا دانیشیق دان آرخادا قالماسین دئیه:
-هه یه... اوجوردو... بیمه چیخاردانین...!
قاتدی یامان- یوووزون آلتینا.
ایستر، استه‌مز اونلارا یاخین اولدوغوم اوچون دانیشیق‌لارین ائشیردیردیم.
ساعات 17:12 دقیقه ایدی. بئلیمین آغری‌سیندان صندلی‌ده داها دیک اوتوردوم. بوآن بیر تمیز گئییملی 40-45 یاشیندا بیر کیشی ایچه‌ری گیردی. دینمز- سؤیله‌مز دئدی:
-آغالار- خانیم‌لار، اوشاغیم مریض‌دی، خسته‌خانادان پولوم یوخ چیخارتمایا، من ده اورمیه‌ده غریبم، هرنه کؤمک ائله‌سز عوضین آللاه وئرسین...
منشی، ال- آیاغین ایتیریب: "آغا چیخ ائشییه، بورا مطب‌دی... چیخ ائشییه" دئییب، یئریندن قالخیب اونا ساری گئدیب، قولوندان یاپیشیب ائشیگه اؤتوردو.
سونرا یئرینه دؤنرکن اؤز- اؤزو ایله دئدی:
- عجاییب زمانه دی ... جاماعاتین اینانجلاریندان یاخشی فایدالانیرلار... یالانچی کیشی‌نین یالانچی اوغلو...
بئلیمین آغری سی قویمادی صندلی‌ده اوتورام. آیاغا قالخدیم. بو هایدی- هایدی دا ایسه اوراداکیلار او دیلنمه‌یه گلن کیشی‌یه گؤره هر کیمسه اؤز یانین‌داکی ایله آغیز- آغیزا وئردی.
من آیاغا دوران آن، تئز آیاق اوسته دوران بیر قادین یئریمی توتدو. من ایسه آیاق اوسته قالیب سالونون ساغ الینده اؤز یئریمده بویان-اویانا گئتدیم.
بئش دقیقه سونرا قاپی یاواشجا آچیلدی. بیر گنج قادین ایچه‌ری سوزدو.
بیرآن نفس‌لر سینه ده دوستاقلاندی، سس‌لر دُوْنوب، باخیشلار ایسه رئژه کیمی بیرآندا قادینا ساری دؤندو.
گنج قادین ایچه‌ری کئچیب، منشی‌یه ساری گئتدی. دار شالوار چوخ قیسا مانتو و ایکی قاریش انینده لئچک. قیرمیزی باشماق. قاش، گؤز، دوداق لار ایسه بزکلی-بویالی.
هامی ایش- گوجون اؤتوروب سانکی بیر اؤنملی اولای اولوبدور دئیه او قادینی گؤزلری اوسته ساخلادیلار. دوز او گنج اورادا اولانادک هامی منشی‌نین باشی اوسته وورولان "لطفا سس‌سیز اولون" شکیلینین سؤزونه باخدیلار.
منشی قادین ایله بیرلیک‌ده دوکتورون اوتاغینین قاپی‌سین چالیب ایچه‌ری کئچدیلر. سونرا منشی نه‌لر دئییب- دئمه‌ییب ائشیگه چیخدی. بوآرادا بیر نفردن سس چیخمادی او قادینین سیراسی وار ایدی‌می؟ یوخ ایدی‌می؟
منشی یئرینه دؤندو، های-کوی باشلاندی. من صندلی‌دن دوروب آددیم آتان یئرده بیر یاشلی قادین تامام یاشماقلی اوتورموشدو. من اورادا آددیم آتاندان سونرا یاشماق بورونون دا اوستونه چیخدی. یامانجا گؤزلری ایله منی بوسوردو. من ساغا، گؤزلرده ساغا من سولا گؤزلرده سولا.
بیرآزدا ائله دوشوندوم بو قادین منیم اورادا اولدوغومدان حرص یئییب عذاب چکیر. سالونا بیر گؤز دولاندیردیم گؤردوم اورانی دا الدن وئرسم یاخشی بیر یئر یوخدو آیاق اوسته دورماغا.
قادین ایکی- اوچ سئری آیاغا قالخیب چادیراسینی دوزلدیب، داها کیپ اؤزونه بورودو.
یاواش- یاواش گؤزلری باشینا دیرماشدی. اوزوندن گؤرونن تکجه آلینی، آغاپپاق اولدو.
اؤز- اؤزمله دئدیم ایندی دی: یوخاری گتیره، یادیما دوشدو جئبیمده بیر موشامبا وار. اونو چیخاردیب قادینا ساری گئتدیم. ایسته‌دیم اونا دئیم:
خانیم حالینیز خوش دئییل، بو موشامبا سیزده اولسون. قادین چادیراسین یئره آتیب: شاپالاغی قولاغیما دویونله‌دی.
الی سینمیشدا عجاییب گوج وار ایدی. باشیم یاریم سانت یئریندن اولدو!
من بیرزاد دئیه‌نه باشماق تایی آیاق‌دان چیخدی الینه یاپیشدی. منیم قولومدان یاپیشیب چکن بیر کیشی اولماسایدی، بیر عؤمورلوک یادیگار قالاجاق ایدی گؤزوم اوسته.
سس بیر ان باتدی سونرا های- کوی اوجالدی. قاری قادین باشلادی سؤیمه‌یه:
کؤپک اوغلو دئییر بلکه بیلمیرم نه‌یه گلدین بورا؟ یاریم ساعاتدی گؤزلرینی مندن چکمیسن... گئدیر بویانیما گلیر اویانیما... دئییر بلکه منده او قیرمیزی باشماقلی قیزلاردانام... وورارام آدام دادار دورار...
جاماعاتین سس- صداسی ایله دوکتوردا اوتاقدان ائشیگه چیخدی.
دلی‌باز جاماعات میمون آختاریرمیشلار اویناتماغا.
بیر قوجا کیشی دئدی:
- ایندی‌نین جاوانلاری اوتانمازدی... خالقین ناموسونا دولاشیر دئییر بلکه هامی اونون کیمی اوتانمازدی...آبیرسیزدی... زنگ ورون پولیسه...
هر آغیزدان بیر هاوا چیخدی. من ایسه دیلیم توتولموشدو. دووارداکی سس‌سیز اولان شکیل یئرینده قوروموشدو.
دوکتور منه ساری گلیب دئدی:
- آغا بورادان تئز چیخماساز، پولیسه زنگ ائده‌جه‌یم.
هئچ نه دئمه‌ییب، تئز مطبی ترک ائله‌دیم. ساعات 18:33 ایدی. ائشیکده بولودلار یامانجا کؤینک‌لرین یویوردولار.
