پوست‌مودئرن آزادلیق (حیکایه)
دئییردی آناسین‌دان ائشیدیب. آما من حس ائدیردیم، چوبان اولماق قویون اولماق‌دان یاخشیدی.
ان آزی ائوی داممیر. مجبور دئییل شوشه‌سیز پنجره‌دن باییرا باخسین.
یادیما گلیر بیر نئچه گون قاباق قارداش‌لاریمین بیرینی بیزدن آییریب آپاردی چوبان.
ایکی باشقا چوبان‌لارلا گلمیشدی. اولجه یاخشیجا بیزه باخدی‌لار سونرا قارداشیمین آیاق‌لارینی باغلاییب آپاردی‌لار.
آنام دا بیلمیردی هارا آپاریرلار. بیز ایسه بیلمیردیک ناراحات اولمالیییق یوخسا شاد؟
بلکه بو نمیش‌لی تؤوله‌دن یاخشی یئره آپاردی‌لار؟
آنام دئیردی: “هئچ واخت گئدن‌لردن گئری قایی‌دان اولماییب”.
هر حالدا بیلیردیک چوبانین یانیندادی. چوبان مئهریبان ایدی. هئچ واخت منی اینجیتمه‌میشدی.
یالنیز سوروموزو قورویان ایتدن شیکایتلیدیم. بیلمیرم نیه هردن گلیب قارشیمدا دایانیب اوزومه هورردی.
منده آرخامی چئویریب آناما طرف گئدیب اونو ایت یئرینه قویمازدیم. باشی خاراب!
آنام دئیردی ایتلرین هامی‌سی‌نین باشی خاراب اولار. دوغروسو اؤز قویونلوغوم‌دان راضی دئییلدیم آما قویون اولماغی ایت اولماق‌دان یاخشی بیلیردیم.
اونا گؤره ده باشیمی آشاغی سالیب یونجامی یئییردیم.
یاغیش شیرهاشیرلا یاغیردی. چوبان ایکی باشقا چوبانلا تؤوله‌نین قاپی‌سینی آچدی، اولجه هامیمیزا گؤز یئتیردی‌لر، سونرا ایسه چوبان‌لارین بیری بارماغیلا منی گؤستردی.
چوبان منه طرف گلیب منی ایکی اللی گؤیه گؤتوردو. سونرا قاپی‌نین قاباغیندا بؤیروم اوستونده ییخیب اللریمی و آیاق‌لاریمی باغلادی.
چیغیردیم: “آناااا منی هارا آپاریرلاااار؟”
دئدی: “بیلمیرهههم. یقین قارداشی‌نین یانیناااا. گووووجلو اووول. بیز ده بیر نئچه گون سونرا گلجه‌ییک.”
ایناندیم. یاغیش یاغیردی. منی بیر توربایا کئچیریب ماشینین آرخاسینا قویدولار.
بدنیم تامام ازیلمیشدی. اؤز-اؤزومه فیکیرلشدیم: بو نه یاخشی یئردی، گرک الی-قولو باغلی گئده‌سن؟
ماشینین هر حرکتیله بدنیم اویان-بویانا دییب ازیلیردی. چوخ کئچمه‌دی ماشین دایاندی.
منی توربا قاریشیق گؤتوروب یئره قویدولار. توربا‌دان چیخاردی‌لار و من اؤزومو بیر یئکه حه‌یط‌ده گؤردوم.
گؤزومو تیکدیم چوبانا. دئدیم بلکه گؤزلریم‌دکی سوا‌لی گؤرسون. گولوردو. همیشه‌کی کیمی مئهریبان باخیردی.
یانینداکی آداما دئدی: شیش‌لری یویوب‌سوز؟ مانقا‌لی چپرین آلتینا آپارین یاغیش سؤندورمه‌سین.
آی قیز! اوردان بیر موشامبا گتیر بونون آلتینا سالاق...
شیش؟ بیلدیم کی چوبان بیلیر شیش ندیر. دیلیمی قانسایدی سوروشاردیم.
چوخ معععع ائله‌دیم اما فایداسی یوخ ایدی. یاواش-یاواش قورخوردوم.
چوبان الین‌دکی بیچاغی بیر باشقا بیچاغا سورته‌رک یانیما گلدی. بوغازیمی اویناتدی. خوشوما گلدی.
یاغیش یاغیردی. فیکیرلشدیم: بس قارداشیم هاردا؟ معععع ائلدیم آما ندنسه سسیم چیخمیردی. اینانمادیم.
بیر ده معععع ائلدیم. بو دفعه سسیم لاپ آز چیخدی. بیر گؤزوم یئره یاپیشمیشدی، او بیری گؤزومو ده یاغیش قویموردو آچیم.
قورخدوم. بوتون بدنیمی آغری بوروموشدو. چوبان باشیمدان یاپیشیب گؤیه قالدیردی، بدنیمی گؤردوم. هر یئر قان ایدی. چوبان باشیمی کسمیشدی. اینانمادیم آما حقیقت ایدی.
: چوبان! چوبان! معععع ائلییه بیلمدیم. قارداشیم...! عائله‌م...دئمک بونا گؤره گئدن‌لر قاییتمیر...دئمک بونا گؤره آنام بیلمیر...شیش...
یاغیش یاغیردی...و من ایلک دفعه ایدی یاغیش آلتیندایدیم...
