معشوقه‌یه گؤره پئشمان اولماق
بو گنج اوغلانین پاریسده اؤزون‌دن یاشجا بؤیوک اولان بیر کیشی ایله ائولنمیش معشوقه‌سی واردی. خانیم داریخیردی، اه‌یلنمک ایسته‌ییردی. قادین بایاغی[ان ساده]، یونگول خاصیت‌لی اولسا دا چوخ گؤزل ایدی. طلبه‌نین کافئدرال تابلوسونون قیمتینی سوروشدوغو گونون آخشامی همن بو معشوقه اونا بئله دئمیشدی:
- صاباحا تولون‌دان منی گؤرمه‌یه گلن مکتب رفیقمی گؤزله‌ییرم. اریمین ده بیزیمله گزینتییه چیخماغا واختی یوخدو. سیزه آرخایینام.
ائرته‌سی گونو قادین‌ین رفیقه‌سی گلیر. اوسته‌لیک یانیندا باشقا بیر قیز ایله. گنج طلبه بو اوچ خانیمی بیر نئچه گون عرضینده پاریسده گزدیرمه‌لی اولموشدو. یئمک، آرابا گزینتی‌سی، تاماشا کیمی اه‌یلنجه‌لرین خرج‌لرینی آنجاق اؤزو اؤده‌دییین‌دن، آیلیق مواجیبی چوخ تئز بیر زاماندا بیتمیشدی. مجبور اولوب یولداش‌لارینین بیرین‌دن بورجا پول آلمیش و آرتیق راحاتسیز اولماغا باشلادیقدا عمی‌سین‌دن جاواب مکتوبو گلمیشدی. ظرفین ایچینده ایکی مین فرانک وار ایدی. بوینون‌دان بؤیوک بیر یوک گؤتورولموش کیمی راحاتلانمیشدی. او، بورج‌لارینی قایتارمیش و معشوقه‌سینه بیر هدیه ده وئرمیشدی. هانسی‌سا رسم کولکسیونئری ایسه "کافئدرا‌لی "آلمیش و اوستون‌دن بیر خئیلی کئچدیک‌دن سونرا اؤز تابلولارینی لوور[Luvr] موزئیینه وصیت ائتمیشدی.
بودور، بیر واخت‌لارین گنج طلبه‌سی آرتیق قوجالمیش و مشهور یازیچی اولموشدو. قلبی هله ده گنج قالمیشدی. او، اول‌لر اولدوغو کیمی گؤزل منظره و یا گؤزل قادین قارشیسیندا دایاندیقدا، یئنه ده دویغولانیر. ائودن چیخدیقدا، چوخ واخت کوچه‌ده قونشو بینادا یاشایان یاشلی بیر قادینلا راستلاشیر. بو قادین اونون کئچمیش معشوقه‌سی‌دیر؛ اوزو پیی‌لندییین‌دن چیرکین‌لشه‌رک تانینماز حالا دوشوب، او گؤزل گؤزلری‌نین اوستو قوووق کیمی شیشیب، دوداغی‌نین اوستونو ایسه بوز توک‌لر اؤرتوب.
او، ائله چتین‌لیکله و لنگ یئریییردی، سانکی آیاق‌لاری ایندیجه اووولوب تؤکوله‌جکدی. یازیچی اونا اوزاق‌دان سلام وئریر، آنجاق آیاق ساخلاییب دایانمیر. چونکی اونون نئجه ایفریته قادین اولدوغونو بیلیر و نه واختسا او قادینی سئودییینی دوشونمک بئله اوندا ایکراه حسی یارا‌دیر. هردنبیر، او، لوور موزئیینه گیریر و هر دفعه ده “شارتر کافئدرال کیلسه‌سی”-نین نوماییش اولوندوغو سالونا قالخیر. تابلویا اوزون-اوزادی باخیر و درین‌دن آه چکیر.
چئویرن: فواد قولوبی‌لی
***
* Andre Morua
