حیاتین ایلك و سون آنلامی سئوگی‌دیر
1. شعره نئجه باشلادینیز؟
دئمك اولار شعر منی باشلاتدی و بیر زامان گؤردوم یازیرام. پیس یاخشی یادیمدا دئییل، یازماغیم یادیما گلیر آنجاق. سونرا منی شعر بؤیودوب اولوب ایندی.
2. هانسی شاعیرلر، مکتب‌لر سیزده تاثیر قویوب؟
ذاتاً، فیكریمجه هر تورك یازار یا شاعیرین یولو اؤنجه شهریاردان كئچیب. هر شعری اوخویارام، آنجاق واسواسیم وار شعیر سئومكده. محمدرضا لوایی منجه تام منیم شعر آنلامیمین یاخشی اؤرنه‌یی دی. سهراب، نیما و اخوان، بونلار بئینیمی بسله‌ین شاعیرلر اولوب‌لار ایللرجه. ایندیسه اوره‌ك اوخشایان هر شاعری سئویرم.
3. شعرده نه‌یین دالیسیجاسینیز؟
شعرده تام ال‌له لمس ائده بیلن قونولار، اؤرنه‌یین یوخسوللوق، زوراكی باش اه‌یمك، دینمه‌مك، بشرین روح آزادلیغی كیمی قونولار منی ماراقلاندیریر و چالیشیرام شعرلریم هامی‌نین گؤروب و لمس ائده بیلدییی فضالاری یارادیب سونام.
4. سیزجه شعر، شاعری یاشادیر یوخسا شاعر، شعری؟
البته كی شعردیر شاعیری یاشادان، اینسانلیغا یاخینلادان و اونو دورولاندیران!
5. سیزین شعرلرینیزده کیملیک موضوع‌لاری داها چوخ گؤزه ده‌ییر، بودا سیزین سئویملی اولدوغونوزدا تاثیر قویور بونو نئجه ده‌یرلندیریرسینیز؟
هرنه چكیریك كیملیكدن دی.بیلمیرم یقین بو درد تام بیزیم دردیمیزدیر. اینسان جالیب بیر وارلیق‌دیر. دردین ائشیتدیكجه اوره‌یی دورولار سانكی!
6. شعر احوال روحیه‌سی ایله یاشاماق عادی یاشاییشینیزدا نئجه گؤرونور؟ یاخینلارینیزین عکس‌العملی نئجه‌دیر؟
شعرله یاشاماق بیراز چتیندی. شاعرلیك اینسانی الینده فیرفیرا كیمی اوینادیر! و گاهدان سئویملی، گاهدان دا سئویمسیز اینسانا چئویریر منی. تئز اوزولوب تئز اؤز تكلیییمه سیغیشارام، بودا چوخراق چئورمده‌كی لری سینسیدر. البته توفاندان سونرا گه‌لن مهریبانچیلیغیم یاخشی دردیمه ده‌ییر ، منی باغیشلاماقدان باشقا یوللاری یوخ!
7. شعرلرینیزین ایلک ائشیده‌نی کیم اولور؟ خوشلاماسا همن شعری یاییرسینیز یوخسا سیلیب پوزورسونوز؟
شعرلریمی دوغال اولاراق حیات یولداشیم ائشیدر، سئومه‌سه قاشین آتار گؤیه، همن منده سیلیب آتارام. سئوسه باشین توغلایار بیله‌رم سئودی و ا و شعر منله قالار.
8. ادبی چالیشمالارینیزدان بویورون.
91جی ایلده "بیر كامیون قورخو" آدلی كیتابیم ایشیق اوزو گؤردو. چوخراق درگی‌لرده میثال آفتاب آذربایجانین نئچه ساییسیندا، اولدوز درگی‌سی، باكی‌نین قزئته‌سینده، اورمونون آغری قزئتینده چاپ اولموش شعرلریم واردیر و بیر ایكی دانیشیق و احوالات اولوب.
9. منه ائله گلیر شعرسیز رعنا خانیمی تصور ائتمک اولماز؟ بونا گؤره فیکیرینیز نه‌دیر؟
شعیرسیز بیر رعنا... یوخ، اولاماز، اولماییب بیلیرم‌ده اولاماز. دئدیم قاباقجا شعیردیر رعنانی رعنا ائدن، یاشادان.
10. گله‌جک ایشلرینیزدن بیرآز آچیقلایین؟
ایكینجی كیتابیم مجوز یولوندادی. اومودوم وار یاخین زاماندا اوخوجولارین الینه چاتا. سئویلدیكجه یازماغا دوام ائده‌جه‌یم سئویلمه‌سه تامام، عناد ائتمه‌م.
11. بو سؤزلری آچیقلایین:
رعنا زارع؟
سئوگی دولو...
آذربایجان؟
اؤلومسوز...
قوجامان تبریز؟
تبریز ... تبریز ... سؤزجوکلر آزدی...
اورمو گؤلو؟
گؤز یاشی...
آنا ایله آتا؟
نیسگیل...
آنا دیلی؟
اوره‌ک آغریسی
شهریار؟
دوشونجه...
موسیقی؟
روحون لای-لایی
20. سون سؤزونوز؟
حیاتین ایلك و سون آنلامی، سئوگی‌دیر. هرنه‌یه آد وئرن، معنالاندیران، سئوگی‌دیر. سئوگی‌لریمیزدن گؤز اولماساق، اوچوب گئدر قاییدماز یوللارا. اورمو گؤلو كیمی... ساغ اولون مینت‌دارام بوتون اوخوجولاریما.
قایناق:
بایرام درگی‌سی، 51جی سایی – زنجان – 1393 قیش
