دئن مؤرفی / حیکایه
“دئن مؤرفی آدلی بیر گنج، کؤنوللو اولا‌راق اوردو سیرا‌لارینا یازیلمیش و بؤیوک جسارتله ووروشموشدو. بوتون یولداش‌لاری اونون خاطرینی چوخ ایسته‌ییردی. ائله بونا گؤره ده، آلدیغی یارا اونو ضعیف‌له‌دیب الدن سالاندا، حتی توفنگ ده اونون اوچون آغیر بیر یوک اولاندا، سلاحداش‌لاری سؤزو بیر یئره قویا‌راق، اونا اوردودا ساتیجی کیمی ایشله‌مه‌یی اؤنردیلر [تکلیف ائتدی‌لر]. بوندان سونرا پول قازانماغا باشلایان دئن پول ییغماق اوچون حیات یولداشینا گؤندرردی. بو ایللر ایچینده پالتار یویوب اوتولمکله دولانان بو قادی‌نین قازاندیغی آغیر تجربه اونا پولو نئجه ساخلاماغی چوخ یاخشی اؤیرتمیشدی. نئجه دئیرلر، قیران‌‌ینین دا قدرینی بیلیردی. آنجاق هر جور چتین‌لیک گؤرموش بو قادین، بانک حسابی آرتدیقجا داها دا خسیس‌لشیردی. یوخسول قادین باشاریلی حیاتا هئچ جور اؤیرشه بیلمیردی. یوخسوللوغون ، آجلیغین، سویوغون، کؤمکسیزلیگین، بو دونیادا پول‌سوز قالماغین نه اولدوغونو چوخ یاخشی بیلدیگی اوچون، یئنی‌دن او گون‌لرین گئری دؤنه‌جه‌یی قورخوسو اونا راحت‌لیق وئرمیر، بیر کابوس کیمی اونو ایزله‌ییردی. و سونوندا، دئن اؤلدو. سلاحداش‌لاری ایسه اونون کیمی بیر یازیغین عادتی اوزره بیر چوخورا آتیلاجاغینی، سونرا ایسه هئچ نه اولمامیش کیمی اطراف‌داکی‌لارا اونون باشینا گلن‌لرین ناغیل ائدیله‌جه‌یینی بیلدیک‌لرین‌دن، اونا بسله‌دیک‌لری درین حؤرمت و عزتین ثبوتو اولا‌راق، اونون حیات یولداشی خانیم مؤرفییه تئلئقرام وورا‌راق، یولداشی‌نین مومیالانیب ائوه گؤندریلمه‌سینی ایسته‌ییب-ایسته‌مه‌مه‌‌سینی اوندان خبر آلدیلار. خانیم مؤرفی جسدین مومیالانماسی‌نین جمعی ایکی-اوچ دول‌لار ائدجه‌یینی دوشونوب، اونلارین تکلیفینی قبول ائتدی. مومیا اوچون خرجین قبضی ایسه ائوین خانیمینا یالنیز “اویاق قالما” مراسیمینده گلیب چاتدی. ائله هر شئی ده بوندان سونرا باشلادی. قبض‌دکی مبلغی گؤرن قادین هر کسین قلبینی پارچالایان آجی، کدرلی بیر آغی دئیه‌رک ناله قوپارتدی : “دئنی باسدیرماق اوچون یئتمیش بئش دول‌لار، من ده ائله بیلیردیم موزئیه قویا‌جاق‌لار، یوخسا هئچ واخت بئله بیر ایشه باش قوشوب، بو قدر خرج چکمزدیم!”
بو منظره‌یه شاهیدلیک ائتمیش بانک ایشچی‌سی دئییردی، بو سؤزلردن سونرا ائوده هامی گؤز یاشی تؤکوردو.
* “اویاق قالما” مراسیمی اؤلومله علاقه‌دار بیر مراسیم اولوب، اساساً آخشام ساعات‌لاریندا جنازه ائوده اولارکن اؤلموش شخصین ائوینده حیاتا کئچیریلیر.
چئویرن: تامئللا آبدییئوا
