Günəş ilə Günəbaxan - hekayəcik
گونش ایله گونه‌باخان
یازان: حسین واحدی
ساری ساچلی گونش، گؤیه دیرماشمیش داغلارین آرخاسیندا، خوروزون بانلاماسینی گؤزله‌ییردی. آخشامدان، بوغدا تارلاسیندا اولان یالنیز گونه‌باخان ایسه قارا دنه‌لرینی گونشین باتان یئرینه توتوب، گونشی گؤرمك اومیدی ایله یوخلامیشدی.
بیر آزدان، خوروز، سسی‌نی باشینا آتدی. كند ائولرینین چیراق‌لاری بیر-بیر ایشیقلاندی. گونش گؤزله‌دییی آنی گؤرونجه دوغماغا باشلادی. گونه‌باخان، سئوینجك یوخودان اویاندی. سئودییی گونشی بیرداها گؤره بیله‌جه‌یینه چیچه‌یی چارتلادی.
چوخ کئچمه‌دی گونش گؤی اوزونده، هر یانی باخیشی آلتینا آلدی. گونه‌باخان، گونش بونون اوچون گلیب‌دیر دئیه، اوزون اوندان چئویرمیردی. او، اوچوب گونشین یانینا گئتمك آرزوسوندایدی.
یاواش-یاواش آخشام گلیب چاتیردی. گونش یئره سردییی ساچلارینی داراییب، هؤرمه‌یه باشلامیشدی. گونه‌باخان ایسه گونشین گئتمه‌سیندن اوزولوردو. او، بیلیردی بیرآزدان گونش باتی‌داكی اوجا داغین آرخاسینا گئدیب یوخ اولاجاق‌دیر.
چوخ چکمه‌دی گونش دالینا باخمادان، باتی‌نین لاپ او اوزاقلاریندا ایته‌رک قارانلیغی یادیگار قویدو.
