وارلیق لارین دانان قونشو
وارلیق لارین دانان قونشو
یازان: بهرنگ منتخبی
گون باتان چاغیندا ائوه یئتیشدی. قاپینی آچیب، ایچه ری یه كئچدی.
- خانیم، من گلدیم!
خانیم مطبخین قاپیسیندان باخیب دئدی:
- یورولمیاسان. کوتویون چیخارت، چای دمله میشم، گتیریم ایچ!
آتاسینین سسین ائشیدن اوشاق، اویونجاقلارین اوتاقدا قویوب، مبل اوستونده اوتوران آتاسینا ساری قاچدی.
- آتا سلام
کیشی اوغولو باغرینا باسیب و اونون اوزوندن اؤپدو.
- سلام اوغول
اوشاق، آتاسینا باخیب دئدی:
- آتا جان، آشاغیداکی تزه قونشوموز، بیر آغ ماشین آلیب. بویوک دی، آدینی بیلمیرم، آمما نومره سی بیزیم ماشیندان فرقلی دیر. دئدیگین كیمی هر شهرین اؤز نومره سی وار و بیزیم شهرین ماشینلارینین نومره سی 17-27 اولمالیدیر؟ آتا! ندن بو فرقلی دیر؟
خانیم چای سینی سی الینده، کیشی یه یاخینلاشدی و كیشی ایله اوشاغا باخدی.
- بو سورغولار ندیر سن سوروشورسان؟ آتانین یورولماغین گؤرمه ییرسن؟
کیشی باشین یوخاری توتوب، خانیما باخیب دئدی:
- اللرین آغریماسین.
سونرا اوزون، اوشاغا چئویریب سؤیله دی:
- نازلیم، من بو یئنی قونشوموزو تانیمیرام، آمما ایمکانلی دیر، اونلار باشقا بیر شهردن گلیب لر. اولا بیلر ماشین لارینین نومره سینین فرقلی اولماسیدا اودور.
نئچه گون كئچدی. بیر گون کیشی ایش باشینا گئدرکن، گؤردو تازا قونشولاری، خانیمی ایله دانیشیرلار. کئف احوال ائله مک ایله تانیشلیق قاپیسین آچماق اوچون تئز پیلله لری ائندی. بونلار کیشی نی گؤرنده اؤز دیللرین دئییشیب و اوخولا گئدن اوشاغینان دا باشقا بیر دیلده دانیشدیلار. کیشی بیر آه چکیب، هئچ باشین قووزامادی و تئز پیلله لری ائندی. یولدا، ماشینین ایچینده، اوغلو سوروشان سورغونو بیر داها ذهنیندن کئچیرتدی و باشا دوشدو اوغلونا یالنیش جواب وئریب. کیشی، سورغونون دوزگون جوابینا ال تاپمیشدی! فیکیر ائله دی اوغلویلا باشقالاری اوخوماق و بیلمک اوچون، جاوابی ماشینین دال شیشه سینده یازدیرسین! اونا گوره ده آخشام، ماشینی ائوه گتیرنده بئله بیر یازی دالیندا یازیلمیشدی:
وارلیق لارین دانماغا باشقا بیر شهرین نومره سی ایله ماشین آلان آداملار!!
اوشاق لار و آذربایجان ناغیل لاری
اوشاق لار و آذربایجان ناغیل لاری
هامیمیزین اوشاق لیغیندا، ناغیل خاطیره لری واردیر و بؤیوك اولدوغوموزدادا او گون لری خاطیرلایاندا گؤزل دویغوسال آن لار (لحظه لر) یاشادیریق. او دؤوراندان الوان خاطیره لریمیز قالیر و بو خاطیره لرده او زامانین ناغیل لاریندان آلینیب دیر. عیبرتلی و فایدالی ناغیل لاریمیز ایندیده قولاق لاریمیزدا سسلنمكده دیر. آمما ایندیكی اوشاق لار بئلنچی ناغیل لاردان اوزاق قالیبلار.
آتا- آنالاریمیزدان اوشاق لیق لاریندان سوروشاندا، او زامانین تندیر داملاریندان، كورسو باشیندان و ناغیل سؤیله مه لریندن دئیه جكلر و او گون لردن سؤز آچماق دا، اونلارا یاخشی لحظه لر یارادیر.
چئشیتلی ائشیتملی آذربایجان ناغیل لاری، گئتدیكجه اونودولوب گئتمكده دیر و نسیلدن نسیله گلن او عیبرتلی ناغیل لار كولتوروموزون بیر بؤلومو اولاراق، اونودولوب گئدیرسه كولتوروموزده آرادان گئده جك دیر. ایندینین اوشاق لاری باتی (غرب) اؤلكه لرین ناغیل لارینین بیر- بیر آدلارین ساییب قهرمان لارین دئییرلر و بو ایش گئتدیكجه اوشاق لا اؤز كولتورونون آراسیندا آرا آچیب اؤزگه كولتورونه یاخینلیق دویغوسونو یاراداجاق دیر.
قاباقجالار عاییله نین بؤیوك آتا یوخسا آناسی، اوشاق لاری بیر یئره ییغیب اونلارا ناغیل سؤیله ردیلر. اوشاق ایسه او ناغیل لاردا اؤزونو ناغیلین قهرمان لارینین یئرینه قویوب درین بیر خییالا جوماردی. آنجاق بو ناغیل لار اؤزوموزون ایدیلر و قهرمان لاریدا بیزیم قهرمان لارییدیلار. زیرناچی ناغیلی، پیس پیسه لی پوسته خانیم، قوردون ناغیلی، گؤزل فاتما ایله ساری اینك، تولكو ایله قارغا، یالانچی چوبان، ... و مین لرجه بئلنچی گؤزل و ائشیتملی ناغیل لاریمیز اؤز یئرلرین، بیزیم كولتوروموز ایله غریبه اولان و ساواشجیل باتی ناغیل لارینا وئریرلر.
تلویزیون ایله رادیودادا بو ناغیل لار اؤز یئرلرین ایتیریب لر و یئرلرینه یابانجی اؤلكه لرین كارتون لارین گونو گوندن داها چوخ یاییرلار. اوستانی شبكه لر بو قونودا اؤنملی رول اویناییرلار و آنا دیلیمیزده اولان ناغیل لارین كارتون لارین توركجه ده دوزلدیب اوشاق لاریمیزا گؤسترمكده كئچمیشدن قالان گؤزل ناغیل لاریمیزیدا دیری ساخلایا بیله جكلر.
آتا- آنالار ایسه بو ناغیل لار ایله تانیش اولوب اونلاری گله جك نسیل لره تاپشیرمالیدیرلار. بونلارین یانیندا اوشاق لار باخچالاری ( مهد كودك لری) داها مهم نقش ایفا ائدیرلر. اوشاقلارین چوخو اوشاق واختی بو یئره گئدیرلر و اورادا رسمی دیلیمیزین یانیندا اوشاق لارین آنا دیللرینین دیری قالماسی و كئچمیشدن قالان كولتوروموزو دیری ساخلامالیدیرلار و فایدالی و تجروبه لی آذربایجان ناغیل لارین سؤیله مكله گله جك نسیل لره بؤیوك قوللوق ائده بیلرلر.
ناغیل لاردا ایسلامی و ایرانی (هر بولگه ده اؤز دیل لرییله) كولتوروموزه یئر آییریب بو روحیه نی اوشاق لارا وئرمه لییك. ناغیل عؤمور وار كن اوشاغین ذهنینده قالیر و اوشاق اؤزون او ناغیل لار ایچینده یاشادیر. چوخلو اوشاق لار نصیحتدن قاچارلار و بونا گؤره چوخلو سؤزلری ائله بو ناغیل لارلا اوشاق لارا دئیه بیله ریك و اوشاغا نصیحتیده ناغیل عونوانیندا چاتدیرا بیله ریك.
حسین واحدی
زامانین دؤنوشو
زامانین دؤنوشو
یول اوزون، ماشین قوجا، من یورغون، آیاغیمی گازا باسیب گئدیم، تابلولاری ایزله ییرم و بیر آندا، قاباقدا رستوران وار تابلو سونو گؤردوم، 2 كیلومتر گئدندن سونرا رستورانا یئتیشدیم، لپ تاپیمی دا اؤزومله ایچه ری آپاردیم، یئمك لرین لیسته سینی دووارا وورموشدولار و من اونلارین ایچیندن تورك كابابینی سئچدیم!
ماسانین یانیندا اوتوروب یئمه ییمی گوزله دیم لپ تابیمی ماسانین اوستونه قویدوم و آچیب اینترنته گئتدیم ، زامانی بیلمه دن یئمك ماسا اوستونه گلدی و یئمه یی ئییندن سونرا یئنه اینترنته قاییتدیم، وبلاگیما باش چكدیم، یئنی یوروملاری بیر- بیر اوخودوم، یوروملارین بیرینده قیزیمین آدینی گوردوم و ماراقلا یورومونو اوخوماغا باشلادیم قیزیم « آتا جان هارداسان؟ بیر ازدا بیزی دوشون ساباح منیم دوغوم گونومدور سن من سئو سیدین ائوه دؤنه ردین» یازمیشدی یورومونو اوخویاندان سونرا، گولوب، اینترنتدن چیخدیم، حئساب- كیتابی وئریب یولوما دوشدوم. گؤزلرریم یورقونویدوف آمما گئجه یه كیمی ائوه یئتیشمه لییدم
و قیزیمین اوره یین اله آلمالییدم، ساعات گون اورتا دان سونرا 3:52 سوووشوردو قاباقدا بؤیوك تابلودا سورعتیزی آزالدین یول خارابدیر یازمیشدی، آیاغیمی ترمز پدالینا آپاریب ماشینی ساخلاماق ایسته دییمده، پدال بوشا گئتدی، اؤنومده تیرئلیلر وارییدی و من 140 سورعتله اونلارا توققو شاجایدیم او آندا موبایلیم زنگ چالدی، ائویمین نومره سییدی، تئلفونو آچدیغیمدا، قیزیمین سه سییدی و من دوغوم گونون تبریك دئیه- دئیه زامان قورتولدو و هئچ نه یی بیلمه دیم...
قیزیمین سسیله یوخودان اویاندیم و گوردوم ائوده یاتاقین اوستونده یم، ساعات 8 اولموشدو و هر نه یوخودا قالمیشدی تئز تاریخی سوروشدوم و زامانی بیلدییمده قیزیمین دوغوم گونونو آنلادیم، زامان یئنیدن باشلانمیشدی و عاییله می سئویندرمه یه واختیم اولموشدو و تئز پول چانتامدان پول گوتوروب قیزیما وئردیم اوزوندن اؤپوب «قیزیم اوزون و بركتلی عؤمرون اولسون، دوغوم گونون قوتلو اولسون» دئدیم و یاشامیین قدرینی بیلمه یی دوشوندوم!
یازان: حسین واحدی
یاشلی لار؛ دونه نین گنج لری، بوگونون اونودولموشلاری
یاشلی لار؛ دونه نین گنج لری، بوگونون
اونودولموشلاری ایندی یه دك
یاشلی لاری (سالمندان) دوشونموشوك مو؟ اونلارین ایستك لرینی و احتیاجلارینی بو
گونكو ایمكانلارلا اویغونلاشدیرمیشیك می؟ یاشلی لارا ده یر وئرمه یه نه قدر اؤنم
(اهمیت) وئرمیشیك؟ ... و بونلارا تای چوخ سورولار اولا بیلر، آمما جاواب لاری نه
قدر منطق لیدیر؟ خزل (مهر) آیینین دوققوزو یاشلی لار گونو آدلانیب، آمما كیم لر بو
گوندن خبری وار و كیم لر بو گونه ده یر وئریب؟ یاشلی لار
ایستر- ایسته مز هر بیر توپلومون (جامعه نین) ده یرلی و تجروبه لی اینسانلاری ساییلیر،
دئمك اولار یاشلی لاریمیز دونن ایله بوگون آراسیندا كؤرپو قوران و كولتوروموزو و
ده یرلریمیزی ساباح لارا داشییان (انتقال وئرن) ان ده یرلی وارلیق لاریمیزدیر. بو
اینسان لار عؤمورلرینین چوخونو توپلوما و اؤلكه یه قویدوقلاری اوچون عؤمورلرینین
سونونا كیمی راحاتچیلیق دا اولماق و ایستك لرینه ده یر وئریب اونلارا یئتیشمك حق لری
واردیر. اونلار بیزلری بو گونلره و گله جه یه حاضیرلاییب لار و گرك بیزده اونلارا
دینج و راحات بیر یاشاییش یاراداق، قویمایاق بیرینه موحتاج اولسونلار. دؤؤلت ده
بونلارا ده یر وئرمه لیدیر و توپلومدا بونلار اوچون بعضی ایشلری ائتمه لیدیر.
اوتوبوس دا، خییاوان لاردا، پارك لاردا و... هر یئرده بونلار اوچون دینجلمك و
راحاتجا گزمك ایمكانلاری قویمالیدیر. كئچمیش لرده بیر آغ ساققال آدام اوتوبوسا
مینن ده گنج لر و اوشاق لار اؤز یئرلرینی بو اینسانلارا وئرردیرلر، آمما گئتدیكجه
بو گؤزل دب اؤز یئرین الدن وئریر و عاییله لر بو ده یرلی كولتوره دیققت ائتمیرلر،
چوخ گؤرونور بیر آتا یوخسا آنا 10 یاشیندا اوشاغینی یانیندا اوتوردوب و بیر یاشلی
آدام اوتوبوسا میننده اوشاغا اؤیرتمیر، اینسان یاشلی یا حؤرمت ائتمه لیدیر و بو
حؤرمتی ساخلاماق اوچون یئرین یاشلی یا وئرمه لیدیر، البته بو حق دن كئچمك دئییل و
باتی (غرب) اؤلكه لری كیمی بیزیم ایسلامی اؤلكه میزده بو قونو فرق ائلیر و كوتله
(مردم) بو ایشی بیر سایغی و حؤرمت بیلیر و بو ایش گرك هر یئرده قورونا و
ساخلانیلا. جامعه ده
دؤولت و میللت نه قدر یاشلی لارا ایمكانلار یاراتسا ائله بیل اؤزوموزون گله جه
ییمیزه ایشله ییرك، هئچ فیكیرلشمیریك بیر گونده بو دؤوران بیزه چاتاجاق دیر و
بیزده توپلومون یاشلی سی اولاجاییق و او زامان بعضی گؤرمه دییمیز ایشلرین حسرتین
چكه جه ییك! سانكی یاشام بویو گنج قالان كیمی یاشلی لارا یان گؤز له باخمامالییق و
اونلاری یاشامیمیزین آرتیق تیكه سی بیلمه مه لییك! بعضی اؤؤلاد لار بو ایشده یامان
مهارت لری واردیر و بیر آز دینجلییه یئتیشنده یاشلی آتا- آنالارینی قوجالار ائوینه
تاپشیریرلار، بعضی لری آیاق لارین بوندان دا داها چوخ اوزالدیب، اونلارین مال-
مولك لرین اله كئچیردیب بیله لرینه زحمت چكیب بؤیودوب بورا یئتیردیك لری اینسان
لاری ائودن ائشیگه آتیب هئچ بیر ذره ده آتا- آنا لارینی دوشونمه ییرلر. یاشلی لیك
دا، اوشاق لیق و گنج لیك دؤورانینا تای بیر عؤمور سیراسی دیر و او بیری دؤوره لرین
ترسینه بو دؤوره ده انرژی و گوج دن خبر یوخدور و بدنین قووتی آزالیر و بدن
راحاتچیلیق ایسته ییر و بونو دوشونن هر كیمسه یاشلی لارا دینج بیر یاشام
حاضیرلامالیدیر. بعضی دیققت سیزلیك لره گؤره بعضن خیااوانلاردا و ایش یئرلرینده
اوشاق لارین آتا- آنالاریندان صاحاب چیخماماسی اوچون یاشلی لار یئنیدن بو دؤوره ده
ایشله ییرلر. یاشلی لیق
فقیرچیلیك و یوخسول لوق لا بیر یئرده اولماسی یاشلی اوچون زور بیر دوروم یاراداجاق
و یاشلی نین یاخین لاری و اوغول- اوشاق لاری بو دورومون یارانماسینا ایجازه وئرمه
مه لیدیرلر، یوخسا عؤمورون سون لارینی فلاكته دوغرو آپاراجاق دیر. یاشلی لارا
نه لر ائده بیله ریك: 1. اونلار بیزلری اوشاق واختی قول-
قانادلاری آلتینا توتوب بئجه ریب لر و بیزده اونلارا تای بو ایشی یاشلی لیق
دؤورانیندا گؤرمه لییك. 2. اونلارین ریفاه لاری اوچون
ایمكانلار یاراتمالییق. 3. بو یاش قوروپونا فایدالی قانون لار
یازمالییق. 4. یاشلی لارا حؤرمت ساخلماغی اوشاق
لاریمیزا اؤیرتمه لییك. 5. اونلارین بوش واخت لارینا ده یر
وئریب، علاقه لری اولدوغو ایش لری ائتمك لرینه و گزمك لرینه یول آچمالییق. 6. ایشلریمیزده اونلاریدا ساییب و
اونلارین تجروبه لریندن یارالانمالییق. 7. جامعه ده راحاتجا گزیب، ائشیگه
چیخماقلارینا ایمكانلار قویمالییق. 8. ایستیراحت واخت لاری اونلارین دینج
بیر یئرده یاشامالارینی دوشونمه لییك. 9. اؤنجه دن بو دؤوره یه
حاضیرلانمالییق و پول و راحات یاشاییش اوچون واخت آییرمالییق. 10. اونلاردان یاشاماق اومودونو كسمه
ییب، بیزیم یانیمیزدا شن (شاد) بیر یاشاییش كئچیرمه له رینه ایمكان وئرمه لییك... بو قونودا چوخ سؤزلر دئمك اولار و هر
كیمسه نین چئشیتلی باخیشی اولا بیلر، آنجاق بو قیسا یازیدا هدفیم بو عزیزلری
خاطیرلاماق و اونلارا واخت آییرماغی گؤسترمك اییدی و اومود ائدیرم بیزیم جامعه
میزده هئچ بیر یاشلی اومودسوز و دینجسیز بیر یاشامی اولمایاجاق و گنج لر داها
آرتیق بو اینسانلارا ده یر وئره جك لر. سونوندا دئمه لییم اونوتمایاق ساباح بیزده
یاشلی اولاجاییق و او گونون گلیب یئتیشمه سینه حاضیر اولمالییق. یازان: حسین واحدی بو گون بوتون یاشلیلارا قوتلو اولسون 
سؤزلرده سؤز وار
سؤزلرده سؤز وار كیبریت
چؤپو بیر نفر كوچه
دن كئچیردی گؤردو قارانلیقدا بیری كیبریت یاندیریب، یئرده بیر شئیین دالیجا گزیر.
اوندان سوروشدو: ـ آی قارداش
نه آختاریرسان، هئی كیبریت چكیرسن؟ ـ دئدی: بیر
دانا كیبریت چؤپوم یئره دوشوب اونو اختاریرام! آنا
دیلی معللیم
شاگیرددن سوروشدو: نییه دئییرلر «آنا دیلی»، دئمه ییرلر «آتا دیلی» . شاگیرد
جاوابیندا دئدی: ائوده دائمن آنام دانیشیشیر و هئچ ماجال وئرمه ییر بیر كلمه ده
آتام دانیشا، بونا گؤره، «آنا دیلی» آدلانیب دیر! قبریستان
اهلی عاریف لردن
بیریسی دئییر: گونلردن بیر گون قبریستانا ساری گئدیردیم، بهلول ایله توش گلدیم.
سوروشدوم قبریستاندا نه ائیلیرسن؟ ـ دئدی: منه،
آزار ائتمه ین، آخیرتی یادیما سالان، اونلاردان آیریلاندا دالیمجا صفحه قویماییب،
غیبت ائتمه ین، جماعت ایله اوتوروب دورورام! خام
خییال بیر یوخسول
كیشی، گئجه چاغی آروادینا دئدی: ایسته سك ساباح گئجه آخشام یئمه یینه پیلوو یئیه ك
و من گوندوز بیر تلیس دویو آلام، نه قدر یاغ لازیمدی؟ ـ آرواد
جاواب وئردی: ایكی باتمان یاغ احتیاج دی. كیشی تعجب له
سوروشدو: نه جور بیر تای دویویه ایكی باتمان یاغ لازیمدی؟ ـ آرواد
دئدی: بیز خییال ایله پیلوو بیشیریریك نه عئیبی وار یاغلی یئیه ك؟! * حاضیرلایان: حسین واحدی قایناق:شهامت نشریه سی
آتا
آتا
هر بیر اینسانین آرخاسی، قوللاریمیزین توم گوجو، اورگیمیزین اورگی،كیراللار-كیرالی، آتادیر،
گئجه-گوندوزون یوخ ائدیر، آئیله سی ایسه شن یاشاییر، جننت ایسه آنالاریندیر!
آتا، بوتون دونیالارین پادیشاهیدیر، دونیانین كؤكو بیزیمده اولسا «یئنه سولطان آتادیر»
آتا گوجدور، باشا تاج قلبه فرحدیر، او حورمت دیر، كیشیلیكدیر،تومجه لره گلمه ین بیر اینساندیر،
آتا شرفدیر، آتا شؤوكتدیر، زیروه دیر، آتا رب دیر، آتا بیزی دونیایا پای وئرندیر،
آتا، آتادیر...
یازان: حسین واحدی
یاشامین پیس اوزو
یاشامین پیس اوزو
آنا، اوشاغین، قولوندان، چكه-چكه، كوچه دن آپارماق ایسته ییردی، اوشاق ایسه منه دوندورما آل دئیردی. آنا قونشولارین یانیندا اوزو قیزارا-قیزارا اوشاغی ائوه آپاردی، چورویوب، پاسلانمیش قاپیلارین ایشیلله ییب ایچه ری گیردیلر، اوشاغین آغلاماق سسی ائوی آلتینا آلمیشدی، اوشاق حه یه طده قالدی، گؤز یاشلاری اونون تكجه یولداشییدی!
آنا اوتاقدان، گئجه یاغیش یاغان زامان ایچه رییه قویان قابلاری حه یه طه گتیردی و تاواندان دامان سولاری كردی یه بوشالدیردی، اوشاق، باشین حه یه طده اولان گولدانا دایاییب، درین یوخویا آددیم آتمیشدی!
قاپی دؤیولدو، آنا قاپینی آچماغا گئتدی، اؤزگه دئییل، ائوین آتاسیدیر!
آنا «كیشی نه اولدو؟» «قاییتدین؟» -دئدی!
آتا: «اوچ ساعاتدی فهله مئیدانیندا بونا-اونا یالوارماقدان یورولدوم، ایش یوخدویدو» -دئدی!
یازان: حسین واحدی
وطن ساغ اولسون
وطن ساغ اولسون
بیر آن آیاق اوستده دوروب، نئچه آددیم آتماق دؤرد ایلییدی اونا حسرت اولموشدو. آتا- آنا یاردیم ایله هر ایشینه ائدیردی، دؤرد ایل بوندان اؤنجه آیازین بیر آرابا توققوشما سیندا ایكی آیاغیدا سینیب بئلیده آغیر ضربه گؤرموشدو. ایمام رضا(ع) زیارتینه گئدنده، «یا ایمام ریضا منه شفا وئر ، دوزلیم و تورپاقلاریمی دوشمن الیندن قورتارماق اوچون قاراباغ ساواشینا گئدیم» -دئمیشدی. یازیق آناسی ایله آتاسی الیندن گلنی، آیاز اوچون اسیرگمه میشدیرلر، آخی آیاز اونلارین تكجه اوشاقلاریدی، ان اوزمان دوكتورلار، ان باهالی و مجهز خسته خانالار، آیازین قوللوغوندا اولموشدورلار.آتاسی ائولرینده ساتیب، اوغلونون درمانینا خرجله میشدی، آناسی ایسه بوتون قیزیل لارین! دوكتورلار یاواش- یاواش آیازین ساغالماسینا اومودلنیردیرلر. آیاز نامازدان سونرا ساعاتلارجا قورآن اوخویوب تانریسییلا موناجات ائده ردی...
بالا- بالا آیاقلاری اوستونده یول گئتمه یی باجارا بیلمیشدی، سئوینجیندن نه ائتدیگینی بیلمه ییردی و «یاشام بویو، آتا- آنا سیزه بورجلویام» -دئییردی. آیاز آرزیسینا یئتیشمیشدی و بیر داها ساغلاملیغینی اله گتیرمیشدی، عسگرلییه گئتمه یی دوشونوردو و عمی سی اوغلو آیدین لا بیرلیكده عسگرلیه گئتمه یه قرارلاشمیشدیرلار. آیدین- نین عسگرلیك واختییدی و آیازین- دا خسته اولدوغونا گؤره عسگرلییندن ایكی ایل كئچمیشدی. ایكیسینینده آتا- آناسی اونلاری یولا سالماغا گلمیشدیرلر، اوتوبوس گلمیشدی و وطن اؤولادلاری بیر- بیر آتا- آنالارییلا ساغوللاشیب اوتوبوسا مینیردیرلر، آیازین آتا- آناسی اوندان آیریلا بیلمه ییردیرلر، آخی اونلارین ازدیریب- بئجه ردیكلری ائله بو بیر دانا اوشاغیدی آمما نه ائیلمك، هر اؤولادا وطن اوچون قوللوغ ائتمك بورجدور...
یولدا، آیاز اوتوبوسون پنجره سیندن یوللارین گؤزللیگینه باخیردی و فیكیره گئتمیشدی ،آیدین ایسه، یانینداكی اوغلان ایله دانیشیردی. آخشام اوستویدوو گونش باكی ایله ساغوللاشیردی، اوتوبوس ساخلووا(پادیگانا) یئتیشدی و عسگرلری ایچری آپاردیلار...
... ایكی آی اؤیره تیم چوخ تئزلیكله سونا چاتدی و عسگرلرین چوخو قاراباغا یاخین ساخلوولارا یوللانیلدیلار، آیاز ایله آیدین بیر یئره دوشدولر. گونلر چوخ هیزلی گئدیردی و آنا تورپاغا قوللوغ ائتمك اونلاری یورموردو. آخشاملاری دوشمن یاخین كندلره آتش آچیب اورداكی سیلاحسیز اكینچیلری قورخویا سالیردی. آیاز ایله آیدین ایسه او آتشلی خططین ان یاخینیندایدیلار و هر گون باشقا یولداشلاریله بیر لیكده كئشیك دوروردولار..
گونش داغلارین باشیندان عسگرلره سالام وئره وئره گؤیه یوكسه لیردی، كندلیلرین بیری قاچا- قاچا ساخلووا یاخینلاشیردی، آیدین؛ «دایان، دایان! سنین له یم ... دایان!» -دئیب، كیشی دایاندی و «یوز باشی نی گؤرمك ایسته ییرم» -دئدی! آیدین تئز یاخین لاردا اولان عسگرلرین بیرینه دئییب اودا یوز باشینی چاغیردی، سانكی بیر وای خبری گتیرن لر كیمی باشینا چالیب آغلاییردی، یوز باشی عسگرلره قاپینی آچین ایچری گلسین بویوروق ائتدی، كیشی آغلایا- آغلایا ایچری گلیب؛ سایین یوز باشی؛ بالام، كندلی لر و... دوشمن لر هامیسین قیریبلار و یئنه باش گؤزونو دؤیدو.گئجه یاریسی چوخ سایی دا ائرمنی كنده یوروش چكیب بوتون كندلی لری شهید ائدیب لر، من ایسه او گئجه یولداشیم گیلین كندلرینده ایشیم وارییدی و اوردا قالدیغیم اوچون ساغ- سالامات قالمیشام، كاش قالمایایدیم - دئدی. بوتون ساخلووو كدر باسدی و هامی سس سیز اؤز ایشینده یدی، بعضی لریسه گؤزلرینین یاشلارین ساخلایا بیلمه ییردیرلر، یوز باشی، بو آجی خبری تئز مركزه وئریب، نئچه عسگرله بیرلیكده سالدیری اولان كنده گئتدیلر، آیاز دا گئدنلرین ایچینده یدی و آز قالیردی اوره یی پارتلاییب یئریندن چیخسین و آجی باخیشلارییلا بؤلگه یه باخیردی...
تانریم سن یارادتدیغین اشرف-ی مخلوقات بونلاردیلارمی؟! اینساندا بو قدر یابانلیق (وحشیت) می وار؟! یئره گؤیه آتش لر آچمیش، قورشونلار وورولموشدورلار، كؤرپه، قوجا، قاری، گنج و ... هامینی اؤلدورموشدولر. شهید لری قویلاییب، عسگرلر ایسه قم ایچینده عسگر ائوینه قاییتدیلار، هامی اوره یینده، كاش اوردا اولوب دوشمنی قیراردیم دئییردی، آمما نه فایدا...
آخشام كؤچمكده یدی و گونش داغلارا سرمیش قیزیل و پارلاق ساچلارینی گؤتوروب آپارماغا چابالیردی، آیاز كئشیك ده ن بو آخار- باخاری ایزله ییردی بو آنلار آیاز اوچون ان گؤزل چاغ سایلیردی. بیر آزدان یوز باشی عسگرلری بیر یئره ییغیب دانیشماق اوچون سسله دی، «سایین عسگرلر و وطنین قوچاق ایگیدلری مركزین دئدیینه گؤره و الیمیزه یئتیشن خبرلره گؤره دوشمن ساباح گئجه چیچك لی كندینه هوجوم چكه جك» -دئییب، بیزده گئده جه ییك آرتیردی. عسگرلر هامیسی هارای چكیب بیر خوشبخت اینسان كیمی آتیلیب بیر- بیرلرینی باغریلارینا باسدیلار، آیاز، آیدینا، ایسته دییم چاغ گلیب چاتیب و اینتیقام واختی دی، -دئدی...
سحر چاغییدی و یاخین كندلردن گؤزل اذان سسی، عطرینی گؤیلره سه په له ییردی، آیاز باشقا عسگرلره تای نامازین قیلیب توفنگین و باشقا آراجلارین حاضیرلاماقدایدی، نئچه ساعات دان سونرا چیچك لی یه دوغرو یورویه جه یدیلر...
ساعات اون ایكی اولموشدو و گونش گؤزل یاز هاواسییلا بیر لیكده دوغایا حوكومت ائدیردی، كندین اهالی سی اوزاقدان عسگرلری گؤروب سئوین دیلر، عسگرلر ساواش آرابالاری لا كنده یئتیشدیلر. یوز باشی هر كیمسه نین هارادا اولدوغونو گؤستریب، كندین كیشی لریله بیر لیكده، كندین آغ ساققالینین ائوینه ییغیشدیلار. اوشاقلارییلا قادینلار بیر آرخایین سیغیناجاغا آپاریلدیلار...
اوچ گونویدو عسگرلر كندده یدیرلر و دوشمن كنده گلمه میشدی، آغ ساققال لارین ایسته یینه گؤره عسگرلر بو گئجه نی ده قالمیش اولدولار. گئجه ساعات ایكی ایدی و آیاز ایله آیدین ایكیسی ده بیر یئرده دوروب اویان- بویانا باخیردیلار. آیاز، آیدینا ائله بیل او تپه دن بیر شئی لر آشاغی دوشور- دئدی. آیدین دا سورعتله اورایا باخدی، آمما بیر زاد گؤرمه دی، آیاز دیققت له بیر ده باخاندا دوشمن عسگرلرینین كیملیك بویون باغینین پارلاماسینی گؤروب تئز یوز باشینا خبر وئردیلر...
هامی تئز و سس سیز حاضیر اولدولار، یوز باشی، عسگرلره، من دئینده آتش آچین دئییب، اؤز یئرینه گئتدی...
آتش آچین! قورشون سسی قولاق لاری دلیردی، دوشمن چوخ یاخین لارا چاتمیشدی و اؤزلرین تاپانا نئچه نفرلری هلاك اولدو و باشقالاری قایالار آرخاسیندا گیزلندیلر. نئچه ساعاتییدی چاتیشما داوام ائدیردی و آیدین ایله آیاز بیر- بیره یاردیم ائدیب دوشمنه قورشون آچیردیلار و چوخلاریندا بونلار هلاك ائتدیلر... دوشمن بونو آنلامیشدی و چالیشیردی او آچینی (زاویه نی) باغلاسین ... و آیاز وورولدو...
آیازین هارایی یئر- گویو سؤكه- سؤكه كنده داغیلدی، قان آخار بولاق كیمی آیازین بو خوموندان( بدنیندن) یئره آخیردی، آیدین تئز آیازی باغرینا آلیب موداوا اوچون عسگرلر له گلن دوكتورون چادیرینا آپاردی، اونلارین یئرینه ایكی نفر باشقا عسگر كئچیب یئنه دوشمنی آتشه باغلادیلار... قان چادیری دولدورموشدو و آیدین آغلاییردی ، آیاز باییلمیشدی و نئچه دقیقه دن سونرا بیله سین آرابایا میندیریب خسته خانایا داشیدیلار، آیدین ایسه اونلا بیرلیكده گئتدی، یولدا، آیدین، آیازا «گؤزله رینی قاپاتما ایندی یئتیشه ریك» -دئییردی. آیاز، سونوندا آرزیما یئتیریب وطنه لاییق بیر اوغول اولدوم دئییردی آیدین ایسه گؤزلرین یوموب آغلاماقدایدی...
تئل سیز دن یوز باشینین سسی گلدی، عسگر! عسگر!، آیدین گیلی سسله ییردی، آیدین تئز جاوابین وئردی و بویور كوماندام دئدی. عسگر، آیاز نه دورومدا دئدی و آیدین، حالی خوش دئییل یوز باشیم آما نفس چكیر دئدی. یوز باشی اوجا سس له باغیریب دئدی: آیاز، اوغلوم! سن یاشامالیسان سیزلرین جان كئچمه لرییله دوشمنی هلاك ائتدیك و بوتون كندلی لری قورودوق، آیازین گؤزو دولوب، گؤز یاشلاری اوزوندن آخمایا باشلادی، اوره یینده تانرییا شوكور ائدیب، گولومسه ندی، سونرا آیدینا باخیب دئدی: آناما دئ، آغلاماسین منیم اوچون و اوغلون قوچاق بیر اوغول كیمی وطن یولوندا جانیندان كئچدی، «وطن ساغ اولسون» سؤیله، او آندا آیدین تئز اوزوندن اؤپوب، سن یاشامالیسان دئدی، آیاز گؤلومسه سین پوزمایا- پوزمایا قوچاق ایگیدلر كیمی گؤزلرین دونیایا باغلادی....
یازان: حسین واحدی
آتا
آتا
يازان: حسين واحدي
هر بير اينسانين آرخاسي، قوللاريميزين توم گوجو، اورگيميزين اورگي،كرال لار- كرالي، آتادير.
گئجه- گوندوزون يوخ ائدير. عايله سي ايسه شن ياشايير. جننت ايسه آنالاريندير!
آتا، بوتون دونيانين پاديشاهيدير. دونيانين كؤكو بيزيمده اولسا، «يئنه سولطان آتادير.»
آتا، گوجدور، باشا تاج، قلبه فرحدير. او حورمت دير، كيشيليكدير، تومجه لره (جمله لره) گلمه ين بير ديريليك دير.
آتا شرفدير، شؤوكتدير، زيروه دير، ربّ دير. آتا بيزي دونيايا پاي وئرن ان قيمت لى ملك دير.
آتا، آتادير...
