چوخ بيلميش قولو
چوخ بيلميش
قولو
اؤزونو چوخ بيليجي بير اينسان بيليردي و جمع ايچينده هانسي قونودان سؤز آچيلسايدي، يئردن – گؤيدن سؤز ييغيب اؤزونو بيلگيلي بيريسي گؤسته رردي، قوهوملار و تانيشلار گولونج اوزوندن آديني « چوخ بيلميش قولو» دئييرديلر!
گئييميده چوخ ماراقلييدي، يايين لاپ ايستي گونلرينده ده، كوتونو چيخارتمازييدي و بو ايشله اؤزونو كيلاسلي و بيليجي گؤسترمك ايسته ييردي!!
قولونون ديشلريده اؤز يئرينده دققت ائلمه لييديلر، اونون ديشلري ايللرييدي ديش فيرچاسي (مسواك) گؤرمه ميشديلر و لاپ موزه يه قويمالييديلار و حئسابلاسايديلار لاپ بئله گينئس كيتابيندا يازيمالييدي! آخي بيري يوخويدو دئيه: آرواد – اوشاغييين گوناهي نمنه دي سنين او پاسلي ديشلرييين تحمل ائديلر؟!
چوخ دانيشماغي آرواديدا ديغلاتميشدي و قولو چوخ دانيشديغي زامان، آرواد «قيريق راديو قورتار» دئيه ردي! گونلرين بيرينده، بحث ائليينده، آروادا قاييديب «هئچ سن بيليرسن من گونده نئچه درگي (مجله)، گونده ليك (روزنامه)، ... اوخورام؟» دئدي و آرواد ايسه « آخي قيريق راديو نييه بيز اونلاري گؤرموروك، هاردا گيزله ديبسن؟» جاواب وئردي!
قولو : «آرواد چوخ دانيشما !، اونلار دكه لرين قيراغيندادي، من گونده ايداره دن قاييداندا، ياريم ساعات دكه لرين قاباغيندا يئريمي ساليرام» دئدي!!
ار - آروادين داعواسي، نه دئيرلر؟ بلي، عيني يازين هاواسي! قولو كيشي بير گون ايشدن، ائوه قاييداندا، اوره يي آيران ايسته يير و يول اوستونده بير باققال توكانيندان دؤرد كيلو آيران آلير.
ايندينينده آيرانلاري چوخ ايشمه ليديرلر! آيراندان سونرا هر نه يين دادين تاپماق اولار!!
توكانچي دئير: آغا دببه وارينيزدي؟ قولو : «ده دم دببه ني نئيليرسن، من آيراني بؤركومده ائله آپارارام بير دامجي دا يئره تؤكولمز» دئدي!!
كيشي آيراني موشامبايا تؤكنده اوره يينده « اينشاللاه تؤكولر اوستو – باشييان، اوندا بللي اولار نجور آپارارسان؟» دئييب، آيراني قولويا وئردي!
قولو گونده كي كيمين يولو اوستونده اولان دكه دن بيلگي (معلومات) ييغماغا گئدر! آيرانيدا اوينادا – اوينادا بو اليندن او بيري الينه وئره – وئره دكه چينين يئره سرديغي نشريه لرين باشي اوستونده دورار.
ائله بيل بوگون فرقلي گوندور و بير آز چوخ بيلگي داليسيجادير و درگي لري و گونده ليك لري واراقلاييردي، اورادان قاچا بير اوغلان اوشاغينين اويونجاغي (اسباب بازي سي) آيرانين موشامباسيني ايله شيب، ييرتار، قولو اوغلانا دؤنوب باخاندا، آيران نشريه لرين چوخونون اوستونه سپيليب ايسلادار، دكه چينين هارايي گؤيه گئدر و اوغلان اوشاغيدا آرادان يوخ اولار!
ايندي قولونون ياخاسي اوجا بويلو و قوللو – بويونلو دكه چينين الينده قاليب و گؤزلويوده (گؤزلوك =عينك) يئره دوشوب آياقلاري آلتيندا ازيلر!
دكه چي هاوار چكيب دئير: آخماق كيشي! سنين 500 تومنين يوخدو گونده ليييي آليب ائوه آپاريب، آرخايينچيليقلا اوخوياسان؟! قورخوسوندان ال – آياغي تيتره ين قولو : « آغا گوناه او قاچان اوغلاندايدي، مني باغيشلا، هاميسينين پولون وئره جه يم» دئدي!!
دكه چي قولونو دكه نين ايچينه ساليب، آيرانلي نشريه لري آييريب، قييمتلرين چيخارديب، قولونو ائشييه چكيب: « آخماق كيشي 10 مين تومن ائله دي، تئز پولو وئر و يوخ اول!!» دئدي.
چوخ بيلميش قولو! هر جيبدن بير آز چيخارديب جريمه ني وئرر و دكه چي : « ايندي جانين راحات اولدو؟ جريمه وئردييين نشريه لر سنين دير، گؤتور آپار ائوده اوخو!» دئييب، ايشينه گئتدي.
قولودا تؤوبه ائديب اللري، آياقلاريندان اوزون يولونا دوشدو، يولدا گئده – گئده، اؤز – اؤزونه : «اوجور اولار ها، 400 – 500 تومني هر گون وئريب، گوندلييي آليب ائوه آپاريب راحاتجا اوخوسايديد، بير يئره ييغيشيب 10 مين تومن اولمازييدي» دئييردي!!
دئييرم نه اولار دكه لر قاباغيندا صف چكيب نشريه لره فقط باخانلارين!! هاميسينين الينده آيران اولاردي!!
يازان : حسين واحدي
آذربايجانين ادبي توپلومونا آجي خبر: «يحيي شيدا» ، تانرييا قاووشدو
يحيي شيدا تانري رحتينه گئتدي
| |
|||||
|
| |||||
اوستاد شيدا 1303-نجو گونش ايلينده تبريزين چرنداب محلله سينده دونيايا گؤز آچدي. آتاسي حسن يوزباشي چرندابي مشروطه ايله چرندابين مجاهدلريندن ساييليردي.
او 1327-نجي ايلدن مطبوعات ايله امكداشليغين باشلادي و بيرينجي آدديمدا «آذر مرد» نشريه سينده باش يازار اولدو.
او بير مدت تبريزين طالبيه اوخولوندا تحصيل ائتدي و توركجه، فارسجا، آلمانجا و عربجه ديللري ايله تانيش ايدي.
اوستادين نئچه اثرلرييندن، در زواياي تاريخ "نثر"، "تلواسه ها"، قصايد، غزليات، پسرخان (رمان)، درياي متلاطم، جنايات زن يا شاهكارهاي طبيعت (در زواياي ادبيات)، ادبيات اوجاغي در 3 قابيقدا، اودلار وطني، اودلو سؤزلر، اون جزوه، ميرزا علي معجزين "ياپيلماميش" شعر لري و بي ريانين اوره ك سوزلري-ندن آد آپارماق اولار.
تانري بو بؤيوك اينسانيميزا رحمت ائتسين و اينشاللاه يولو داواملي اولسون.
قارانقوش وبلاگي بو آجي خبري تورك و فارس ادبياتينا علاقه سي اولانلارا باش ساغليغي دئيير.
اوشاق لار و آذربايجان ناغيل لاري
اوشاق لار و آذربايجان ناغيل لاري
هاميميزين اوشاق ليغيندا، ناغيل خاطيره لري واردير و بؤيوك اولدوغوموزدادا او گون لري خاطيرلاياندا گؤزل دويغوسال آن لار (لحظه لر) ياشاديريق. او دؤوراندان الوان خاطيره لريميز قالير و بو خاطيره لرده او زامانين ناغيل لاريندان آلينيب دير. عيبرتلي و فايدالي ناغيل لاريميز اينديده قولاق لاريميزدا سسلنمكده دير. آمما اينديكي اوشاق لار بئلنچي ناغيل لاردان اوزاق قاليبلار.
آتا- آنالاريميزدان اوشاق ليق لاريندان سوروشاندا، او زامانين تندير داملاريندان، كورسو باشيندان و ناغيل سؤيله مه لريندن دئيه جكلر و او گون لردن سؤز آچماق دا، اونلارا ياخشي لحظه لر يارادير.
چئشيتلي ائشيتملي آذربايجان ناغيل لاري، گئتديكجه اونودولوب گئتمكده دير و نسيلدن نسيله گلن او عيبرتلي ناغيل لار كولتوروموزون بير بؤلومو اولاراق، اونودولوب گئديرسه كولتوروموزده آرادان گئده جك دير. ايندينين اوشاق لاري باتي (غرب) اؤلكه لرين ناغيل لارينين بير- بير آدلارين ساييب قهرمان لارين دئييرلر و بو ايش گئتديكجه اوشاق لا اؤز كولتورونون آراسيندا آرا آچيب اؤزگه كولتورونه ياخينليق دويغوسونو ياراداجاق دير.
قاباقجالار عاييله نين بؤيوك آتا يوخسا آناسي، اوشاق لاري بير يئره ييغيب اونلارا ناغيل سؤيله رديلر. اوشاق ايسه او ناغيل لاردا اؤزونو ناغيلين قهرمان لارينين يئرينه قويوب درين بير خييالا جوماردي. آنجاق بو ناغيل لار اؤزوموزون ايديلر و قهرمان لاريدا بيزيم قهرمان لارييديلار. زيرناچي ناغيلي، پيس پيسه لي پوسته خانيم، قوردون ناغيلي، گؤزل فاتما ايله ساري اينك، تولكو ايله قارغا، يالانچي چوبان، ... و مين لرجه بئلنچي گؤزل و ائشيتملي ناغيل لاريميز اؤز يئرلرين، بيزيم كولتوروموز ايله غريبه اولان و ساواشجيل باتي ناغيل لارينا وئريرلر.
تلويزيون ايله راديودادا بو ناغيل لار اؤز يئرلرين ايتيريب لر و يئرلرينه يابانجي اؤلكه لرين كارتون لارين گونو گوندن داها چوخ ياييرلار. اوستاني شبكه لر بو قونودا اؤنملي رول اويناييرلار و آنا ديليميزده اولان ناغيل لارين كارتون لارين توركجه ده دوزلديب اوشاق لاريميزا گؤسترمكده كئچميشدن قالان گؤزل ناغيل لاريميزيدا ديري ساخلايا بيله جكلر.
آتا- آنالار ايسه بو ناغيل لار ايله تانيش اولوب اونلاري گله جك نسيل لره تاپشيرماليديرلار. بونلارين يانيندا اوشاق لار باخچالاري ( مهد كودك لري) داها مهم نقش ايفا ائديرلر. اوشاقلارين چوخو اوشاق واختي بو يئره گئديرلر و اورادا رسمي ديليميزين يانيندا اوشاق لارين آنا ديللرينين ديري قالماسي و كئچميشدن قالان كولتوروموزو ديري ساخلاماليديرلار و فايدالي و تجروبه لي آذربايجان ناغيل لارين سؤيله مكله گله جك نسيل لره بؤيوك قوللوق ائده بيلرلر.
ناغيل لاردا ايسلامي و ايراني (هر بولگه ده اؤز ديل لرييله) كولتوروموزه يئر آييريب بو روحيه ني اوشاق لارا وئرمه لييك. ناغيل عؤمور وار كن اوشاغين ذهنينده قالير و اوشاق اؤزون او ناغيل لار ايچينده ياشادير. چوخلو اوشاق لار نصيحتدن قاچارلار و بونا گؤره چوخلو سؤزلري ائله بو ناغيل لارلا اوشاق لارا دئيه بيله ريك و اوشاغا نصيحتيده ناغيل عونوانيندا چاتديرا بيله ريك.
حسين واحدي
نئچه نفر...؟
نئچه نفر...؟
اوستاد كيلاسا گيردي. هامي آياغينا دوردو. سلام عليك دن سونرا، كيلاسداكيلاري حاظير- غاييب ائتدي.
- ساناي؟
- حاضير- وارام؟!
- احمد؟
- وارام!
- ائلگون؟
- وارام!
- ارسان؟
- يوخدو!
...
اوستاد تخته ده او گونون وئره جه يي درسين، درس باشليقلارين يازدي. درسي ايضاح ائدن زامان توركجه سوردو:نئچه نفر فارس وار؟
40 نفرين ايچيندن ايكي نفر اللرين قالديرديلار!
و اوستاد 38 نفرين ديلين قيراغا قويوب ايكي نفرين ديلي ايله (فارسجا) درسه داوام وئردي...!!
حسين واحدي
تهران - غربي آذربايجان يئدديجه سي
تهران - غربي آذربايجان يئدديجه سسندن شكيللر
Tehran- batı Azərbaycan yeddicəsi (həftəsi) - şəkillər
آذربايجانين بؤيوك و قهرمان اوغوللارينين غرفه سي
وئرليشين اولان يئري
آذربايجان رقص قوروپو - اورمو قوروپو
تاريخي و اونودولمايان بير گئجه
آشيق عسگر ساعد، آشيق بولودون اوغلو - سعد آباد - تئهران
تايسيز ساز چالما - آشيق ساعد
يانيق كرمي - آشيق ساعد
اورمو قوروپو
urmu qurupu
بؤيوك توي
böyük toy
آشيق عسگر ساعد - بؤيوك توي
unudulma gecə - Aşıq verlişi
اونودولماز گئجه - آشيق وئرليشي
آشيق عسگرين اوشاغي
aşıq Əsgər,in uşağı
شكيللر: آينا نيوز
آذربايجان
آذربايجان
سن گونشلي بير ياكاموزسان،
ايچيمده دؤيونن قلبيمين ايچينده سن،
سن ياغمورلو بير بولودسان،
اولوسونا خئيير- بركت وئرن بولود.
سن اولوسونا داياقسان،
ناموسونو قورويان يوردوم.
سن توركجه ني ياشادان يوردسان،
ديلسيز- آغيزسيز بير ديل.
سن آناسان اوشاق لارينا،
بوتون آناسيزليق چكن اوشاقلارا.
سن اينتئرنئت صيفه لرينين بزه يي سن،
همده لاپ او فيلتئر اولانلارين باشيندا.
هارايسيز اولوسونا اولان هاراي.
سن بيزه آنا تورپاقسان،
بيزده سني قورويان عسگر.
سن سوسما باغير، هاراي چك،
بوغولسون سنه خور باخان دوشمن.
سن ياشايان، اؤلمه ين وارليقسان،
توم وارليقلارين چلنگي آذربايجان.
ياتاق!
ياتاق
بير اوشاق،
وارييدي دونيادا.
ياشاييردي، خيياوانلاردا.
آتاسي آليشقان،
آناسي آراليقدا.
ياتيردي، كارتن لاردا،
ايستي ايسه سويوق لاردا.
آرزيسين، هر زامان،
اوندان سوراندا،
دئيردي: اولاردي منيم اوچون،
بوتون دونيادا،
بير اوتاق،
بير يورقان،
بيرده تك ياتاق!
سؤز: حسين واحدي
اورك‍ـ ده قالان سئـوگي
اورك‍ـ ده قالان سئـوگي
اورگي دؤيونوردو. قافاسيندان يوزلرجه دوشونجه گليب، كئچيردي. نه ائده جه ييني بيلمه ييردي. اوشاق لار كيمي آغلاييردي. اوتاغينين قاپيسيني باغلاييب، پنجره قيراغيندا دوروب، كوچه يه باخدي. بيري قاچيردي. بيري هاراي چكيردي. اوشاقلار اويناييرديلار. قونشو قادين لار ايسه تره سئچيرديلر، آمما ائلاي كدر ايچينده بوغولوردو. اورك سؤزون هئچ كيمسه يه آچيقلايا بيلمه ديگي اوچون داها چوخ عذاب چكيردي. آخشام يولدايدي و بير آزدان شهري آلتينا آلاجاغييدي. گونش كؤچمك دوروموندايدي. ائلاي پنجره قيراغيندان بيلگي سايار يانينا گئتدي. بيلگي سايارين يانديريب، اينتئرنئته گيردي. بيليم يوردوندا اولان ان صميمي يولداشي چت اوتاغيندايدي. سئوينيب اونلا چتلشمه يه باشلادي. اورگينده قالديغي آغريني اسمره آنلاتماق اوچون چابا گؤسته ريردي. هارادان و نئجه آنلاتما سينا قالميشدي.
اسمر ائلاي-ين نه دئيه جه گينه ماراقلانميشدي، آمما ائلاي اوتانيردي. ائلاي آغلاماق آيكونونو ووروب آرديجا «من عاشيق اولموشام» يازدي! اسمر ايسه دالبادال گولمك آيكونلارين صحيفه يه دوزدو. ائلاي راحاتسيز اولوب، « اسمر، گولمه! بورادا قيزين، اوغلانا عاشيق اولماسينين چتينليك لريني بيليرسنمي؟» يازدي. من قونشوموز اوغلو آيدين-ا عاشيق اولموشام، امما دئمك اولارمي؟
يازيق اولموشام. دارما- داغين قالميشام. اورگيمي پارتلاتميشام. جانيما آغري سالميشام. اوغلانلار عاشيق اولاندا، قيزلارا دئيه بيليرلر، آمما من نئجه دئييم و اورگيمي نه ته هر دينجلديم؟! مين جوره آد قويارلار!!
كاش عاشيق اولماسايديم! ... كاش!! ...
يازان: حسين واحدي
احمد شاه-ين اورمويا گلمه سي
قاجار شاهي « احمد شاه»-ين اورمودان گؤروشو
چاغ: قاجارين سونلاري
şəkilin yüksək necəlikdə izliyi
http://s2.picofile.com/file/7153243866/DSC00182.gif
گؤزل اورمو
گؤزل اورمو
اورمو دئينده يام- ياشيل باغلار گؤز اؤنونده سيرالانيرلار، گؤزلليك لر گؤسته ريشه چيخيرلار، اورمو آدي گلنده دوزلو اورمو گؤلو آني لارا گلير، گونشين دوغماسي و يايدا اوزمك. اورمودان سؤز آچاندا آذربايجان يئني بير جان تاپير، چون كاظيم خان لار اونون آرخاسيندا دايانيب لار، حئيدرخان لار ايسه دؤرد نال آت چاپيرلار، ياغي لار اوتانيب قاچيرلار، اورمو آدي ديلده سسلننده باكري لر اؤنه چيخيرلار، دوشمن لر ايسه باجادان يوخ اولورلار، اورمو آدي، صفي الدين اورموي ني يوخلايير و آشيق فرهادلار سازلاري ايله گؤزل ماهني لار چاليب اوخويورلار، اوخومالاريندا كور اوغلولاري چنلي بئلده آذربايجان اوغروندا دوشمن اؤنونده ساواشا چاغيريرلار، اورمو بو اولو آدي خاطيرلاياندا، بوتون آذربايجان دينجه لير، هامي اورمويا گؤوه نير، اورمو آدي شيرين تورك ديليني و او ديلده دئييلن لاي- لاي لاري قولاق لارا اوخودور و اورمو هله ياشايير، ياشادير و آذربايجانا جان وئرير...
