آفتاب آذربايجان-ين 58-نجي ساييسي ياييلدي
اوخول لارين ايلك گونو!
اوخول لارين ايلك گونو!
چوخ چتين دير، اوخول لارين (مدرسه لرين) ايلك باشلانيش گونو! يئنه اوخول لار باشلانير و منيم آنا ديليم بو باشلانيشا دوروب باخماق دادير. اونون يئرينه داريخيرام. اودا اوتانير اوتوز بئش ميليون ديلي اولماقدان. دئيير: ندن بو اوتوز بئش ميليون منه ده ير وئرمه يير؟ مني اونودور. مني باشقا ديله دؤنده رير. ساييلاريمي باشقا ديلده دئيير. اوتانير مني قوللانماقدان. باشقالارينين دونونا گئيير. اوشاغينا باشقا ديل اؤيره دير. منيم اوخول لاردا دوروب باخماغيما اودا باخير، سسينده چيخارتمير.
بونلاري ائشيدنده اوره ييم سيخيلير. نه دئديييمه قالميشام. دوز دئيير، نه زامانا كيمي توركجه م اوخول لارين باشلاماغينا حسرت له باخاجاق؟!! ... ، ندن؟!!
يازان: حسين واحدي
اورمونون قاجار ائوله ريندن
اورمونون قاجار ائوله ريندن
بو ائو اورميه نين قاجار دؤورونمدن قالان تك ائولردن بيريدير. شكيل دن بللي
اولدوغو كيمي دللال لار ايله آپارتمان ديكن لر ايله اونلارين جيب لرينين دولماسي،
گؤزل اورميه، ايفتيخارلي آذربايجانين تاريخيندن اؤنملي و واجيب دير!!
ندن هئچ كيم بئله نچي
تاريخ دن قالان ايزلري قورماغا چاليشمير؟ ندن اورميه نين يئني دوروموندا تاريخ
ايزي سيلينمكده دير؟ شهره قوناق گلنده هاراني گؤسته ريب تاريخيميزدن دانيشاق؟
كيمسه نين قئيرتينه توخونمورمو؟
اومود ائديرم بيري بو
هارايلاري ائشيديب بير ايش ائتسين.
- شكيل:
اورميه، شورا خيياواني، مجيدي افشار ائوي (قاجار دؤورو)
90/6/27
زومار (شهريور) آيي - 1390
سوناي
سوناي
«سوناي» يوردوما خوش گليبسن. بيزي يامان يئرده يوخلاييبسان، كولتورمون آزقينليغيندا گونش اولدون يوردوما. سئوگيليله لر چوخداندي سني اونوتموشدولار. نئچه واختدي بير اؤزگه والئنتاين آدلي بيريسي اولوسومو آلداتميشدي. دئمه سنين يئرينه كئچمك ايسته ييرميش، يوخسا سن دورمو آنلاييب، قارا بولودلاري قيراغا آتيب، ساري ساچلي گونشيميزي بيزه گتيردين. سن بيرداها منيم وارليغيمي منه آنلاتدين. من اؤز وارليغيمي اونوتماق ايسته ميرم. سن گلن گون، 31 زومار (شهريور) يئر- گؤي سئوگي له نير. سئوگيليلر سئوگي دونو گئيير. سئوگيسيزلرده سئوگي ني آختارير. هامي قيرميزي بويالي اورك، قيزيل گول، سئوگي مكتوبو، ... و بوتون سئوگي قوخوسو وئرن شئي لري آلير. آنجاق سن بو گؤزلليگي ياراديسان. سئوگيليلر بو گونده گرچكدن بير- بيري دوشونولر. آيريليق لار كوسوب گئديرلر. باريش ايسه يورد سالير. گونش ساچلارين دارير. اورك لر بيرگه دؤيونور. سئوگي هر يئره ياغير. ساراي لار، خان چوبان لاري هارايلير. آنجاق سن هر ايل زومارين سون گونونده گل. هامي سني گؤزله يير. سن اولدوغوندا سئوگي ياشانير. گؤزل آذربايجان توركجه سينده نغمه لر قوشولور. آشيق لار، سازلاريندا اصلي- كرم سسلنديريرلر. يوردوم جننته دؤنور، گئجيكمه هئچ زامان، آمان دير تئز گل!
يازان: حسين واحدي
ـ سوناي، آذربايجاندا سئوگيليلر گونون آديدير و هر ايل زومار (شهريور) آيينين 31-نده اولور.
شهريار شعر تانري سي
شهريار شعر تانري سي
شهريار درسي ترك ائدندن سونرا دؤرد ايله دك خوراسانا گئديب مشهد و نئيشاپورون سند يازديرما (ثبت اسناد) ايداره سينده چاليشار. سونرالار شهريار تئرانا قاييديب 1315 نجي ايلينده اكينچيليك بانك-يندا ايشه باشلايير و بير موددتدن سونرا تبريزه داشينير. بو اولو (والا مقام/سبحان) شاعير عؤمرونون سونلاريندا آليز (مريض) اولوب تئراندا آليز ائوينده ياتيديرلار و سونوندا زومار (شهريور) آيينين 27-سينده ياشاما سون نوقطه ني قويوب تبريزين مقبرة الشعرا-سيندا توپراغا تاشيريلير.
شهريارين ياراديجيليغي
بؤيوك شعر اوستادي شهرياردان فارسجادا ياقلاشيق (تقريبا) 28 مين بئيت و توركجه ده ياقلاشيق 3 مين بئيت شعر ياديگار قاليب و شعرلري چاغداش و كئچميشده اولان شاعيرله رين هاميسيني اوتانديريب و رقيب سيز ساخلاييب دير.
شهريارين شعرلري تئيخا (هميشه) كوتله نين (مردم) ديلينده اوخونوب و شهريار آديني ديري ساخلاييب دير. حضرت علي (ع) اولان شعري كسين ليكله ايماملارا اولان تايسيز شعرلردن بيريدير و بو عزيز شاعيري ائمه اطهارلارين يانيندادا عزيز ائديب دير. شهريار توركجه ده ده «حئيدر بابايا سلام» ياراديجيليغي ايله ده توركجه يه يئني بير جان وئريب و پهلوي رئژيمينين او ظولوم و ازمك چاغلاريندا توركجه ميزي ديري ساخلاييب دير.
بو قيسا يازيدا بو اولو شاعيري تانيتماق و اونون ياراديجيليقلاريندا سؤز آچماغا يئر اولماياجاق و تكجه زومار ايينين 27-سي بو عزيزيميزين اولوولاما گونو موناسيبت ايله ايسته ديم اونون آديني ديللره سالام و شهريارين ياراديجيليقلارينا ديققت ائتمه يه كوتله ميزي چاغيرام.
سونوندا شهرياردان بير شعر سيز عزيزلريمه سونورام (تقديم ائليرم):
توركون ديلي
توركون ديلي تك سئوگيلي ايسته كلي ديل اولماز
اؤزگه ديله قاتسان بو اصيل ديل اصيل اولماز
اؤز شعريني فارسا – عربه قاتماسا شاعير
شعري اوخويانلار ، ائشيدنلر كسيل اولماز
فارس شاعري چوخ سؤزلريني بيزدن آپارميش
« صابير » كيمي بير سفره لي شاعير پخيل اولماز
توركون مثلي ، فولكلوري دونيادا تك دير
خان يورقاني ، كند ايچره مثل دير ، ميتيل اولماز
آذر قوشونو ، قيصر رومي اسير ائتميش
كسري سؤزودور بير بئله تاريخ ناغيل اولماز
پيشميش كيمي شعرين ده گرك داد دوزو اولسون
كند اهلي بيلرلر كي دوشابسيز خشيل اولماز
سؤزلرده جواهير كيمي دير ، اصلي بدلدن
تشخيص وئره ن اولسا بو قدير زير – زيبيل اولماز
شاعير اولابيلمزسن ، آنان دوغماسا شاعير
مس سن ، آبالام ، هر ساري كؤينك قيزيل اولماز
چوخ قيسسا بوي اولسان اوليسان جن كيمي شئيطان
چوق دا اوزون اولما ، كي اوزوندا عاغيل اولماز
مندن ده نه ظاليم چيخار ، اوغلوم ، نه قيصاص چي
بير دفعه بوني قان كي ايپكدن قزيل اولماز
آزاد قوي اوغول عشقي طبيعتده بولونسون
داغ – داشدا دوغولموش ده لي جيران حميل اولماز
انسان اودي دوتسون بو ذليل خلقين اليندن
الله هي سئوه رسن ، بئله انسان ذليل اولماز
چوق دا كي سرابين سويي وار ياغ – بالي واردير
باش عرشه ده چاتديرسا ، سراب اردبيل اولماز
ملت غمي اولسا ، بو جوجوقلار چؤپه دؤنمه ز
اربابلاريميزدان دا قارينلار طبيل اولماز
دوز واختا دولار تاختا – طاباق ادويه ايله
اونداكي ننه م سانجيلانار زنجفيل اولماز
بو « شهريار » ين طبعي كيمي چيممه لي چشمه
كوثر اولا بيلسه دئميرم ، سلسبيل اولماز
-- حاضيرلايان: حسين واحدي
اونودماز وطن سني ..
اونودماز وطن سني ..
توز باسيب ائشيتمير صدفلي سازين
گلمير قولاغيما او خوش آوازين
قاريشدي تورپاغا صؤحبتين سؤزون
يانيرام سنده كي كامالا درويش
اورميه نين آدليملاري كيتابيندان رحمتليك آشيق «درويش»- ين ياشامي ني اوخويوب قورتولاندان سونرا اوره ييمي غم باسيب اوركدن آه چكديم. ندن بئلنچي بير اينسانلاريميز اونودولوبلار؟!! بونا گؤره ماراقلانديم آشيغين كندينه گئديب، قبريني زييارت ائدم. يولداشلاريمين بيريله بو قونويو آرايا قويوب اونون كندينه گئتمه يي قرارا گتيرديك.
قراريميز جومعه گونونه يدي و زامانين اوچدوغونا گؤره بو گون تئزليكله گليب چاتدي، گون اورتادان سونرا «كوردلر» كندينه ساري يوللانديق، كند اورميه نين چي چست يولونون 5 كيلومترلييينده يدي،كنده يئتيشيب، اورادا ياشايانلاردان قبيرسانليغين يولونو سوروشدوق، نئچه دقيقه دن سونرا كنددن آزجا ائشيكده اولان قبيرسانليغا يئتيشديق، تورپاقلي بير يول و سس سيز بير آخيرت ائولري.. آخيرته قاووشانلارا بير فاتيحه وئرندن سونرا، ته له سه رك تئز قبيرلري بير- بير آختاريب يازيلارينا ديققت ائديرديك، آما رحمتليك درويش-ين قبيريني تاپا بيلمه ديك. اورالاردان كئچن بير چوباندان آشيغين قبيريني سوروشدوق و كاشكي سوروشماسايديق! ، چوبان او كندين ياشايانلاريندان اولاراق آشيغين قبيريني تانيميردي!!
نئيله مك دئمه آشيق ائله اؤز كندينده ده قريبييميش.گؤي ده بو قريبلييه دؤزه بيلمه ييردي و آغلاماق ايسته ييردي.. اومودلريميزي پوزماياراق،بيرينين يولدان كئچمه سيني گؤزله ييرديك،او آندا بير پيكان قبيرسانليغا ساري گلدي،دئمه تانري يئتيردي! بيزيم يانيميزا يئتيشه نده اوندان آشيغين قبيريني سوروشدوق و شوكورلر اولسون سوروجو قبيري تانييرميش و اونو بيزه گؤسته ره رك اؤزوده بيزيمله قبيرين يانينا گلدي، اللي ياشيندا اولان او معرفتلي بي (ياري جينابلاري) بيزه حورمتله ياناشيب، آشيغا فاتيحه گؤندرندن سونرا آزجا اونون ياشاميني بيزيم اوچون آچيقلادي و سورولاريما جاواب وئردي.
رحمتليك آشيق درويشين قيساجا ياشاميندان بئله دئمك اولار:
آشيق درويش فرهاد اوغلو 1309 – نجو گونش (شمسي) ايلينده اورميه نين «كوردلر» كندينده دونيايا گؤز آچميشدير. او ده يرلي اوستاد آشيق فرهاد كيمي آذربايجانين سنتي موسيقي سينين آدليملاريندان ساييلير. آشيق درويشين گؤزل، ايستي و صميمي سه سينه گؤره آشيق فرهادين شاگيردي اولموشدور. درويش چالان ساز سه سي جانلارا كئچيب و گؤزل سه سيله اونودولموش اثرلره جان باغيشلاييردي. بو اونودولماز اوستاد 1372 ـ نجي ايلين قويروق دوغان(مورداد) آيينين دوققوزوندا، گؤزلرين دونيايا يوموب،اؤز دوغوم يئري اولان «كوردلر» كندينده تورپاغا تاپشيريلدي. آشيغين تشييع-ي جنازه سينده اينه سالماغا يئر يوخويموش و بو اونون خالق ايچينده نه قدر سئويملي اولدوغونو گؤسته ريردي.
آشيق درويش ياشام بويو (هميشه ليك) آذربايجانين سنتي موسيقي سيني سئورلرين اوره يينده قالاجاقدير و بو سه س اورميه اوچون قالارگي بير سه س اولوبدور. رحمتليك درويش ايرانين بوتون ميللي موسيقي فئستيواللارينا قاتيلب و يوكسك يئرلره ال تاپيب،اؤدول لر قازانيب دير. او نئچه ايللرده اورميه راديو، تلويزيونويلادا ايش بيرليگي آپاريبدير. او ده يه رلي اوستاد چوخلو شاگيردلرده موسيقي دونياميزا تربيه ائديب دير، اونلاردان، آشيق اسمعلي (اورميه – اونون بيرينجي شاگيردي)، آشيق صبور شريفي (اورميه)، آشيق عبدالله اشرفي (قورد تپه)، آشيق ذكريا ملكي(قولونجو)، آشيق رضا پوينده (سولدوز) و ...آد آپارماق اولار.
آشيق درويش، متين، ويقارلي و عاريف بير كيشي ايدي، دئمك اولار او خصلت ايله صنعت ده، اصيل و نمونه بير آشيق و اوزان دير. رحمتليك درويش آشيق صنعتينه اؤزونه مخصوص اولان نئچه هاوا ياديگار قويوب. اونلاردان «شكر يازي هاواسي» و «غربتي هاواسي»- ني آد آپارماق اولار. بو هاوالار اينديده اورمو آشيق لارينين آراسيندا چالينماقدادير.
سونوندا دئمه لييم بئله نچي اينسانلاريميزا سايغي گؤسته رمه لييك و اونون شانينده اولان بير مزارليق تيكيب هئچ اولماسا آدينا بير خيياوان ياراديب هئيكلين پاركلارا قويمالييق.
منه يارديم ائدن، «شكاري» و «ياري» جينابلارينداندا تشككور ائديرم و اونلارا جان ساغليغي آرزيلاييرام.
يازيب، حاضيرلايان : حسين واحدي
عيرفاني بير دانيشيق
عيرفاني بير دانيشيق
ـ ائي تانريم،بو نعمت لر مني آزديرير،اونلاري آل.
ـ يوخ،اونلاردان اؤزون ال چكمه ليسن.
ـ ائي تانريم،منه صبر عطا ائت.
ـ يوخ،صبر آغري ـ آجيلاردا قازانيلار،وئريلمز،اؤيره نيلر.
ـ ائي تانريم،مني خوشبخت ائت.
ـ يوخ،من سنه نعمت لر وئريرم،خوشبخت اولماق ايسه اؤز ايشيندير.
ـ ائي تانريم،مني عذاب لاردان قورتار.
ـ يوخ،عذاب لار سني دونيادان اوزاخلاشديريب،منه ياخينلاشديرير.
ـ ائي تانريم،منه ذؤوق آلماقدا يارديمجي اول.
ـ يوخ،سنه ياشاييش وئرميشم،ذؤوق آلماغا چاليش.
ـ ائي تانريم،سن مني سئوديگين قدر منده باشقالاريني سئوه بيلديييمه،منه يارديمجي اول.
ـ سونوندا اؤيره ندين!
· حاضيرلايان: حسين واحدي
