ايشسيز
ايشسيز
يازان: حسين واحدي
يولوندا گئديب، دام- دووارا باخيردي. بيري دئييردي- بيري گولوردو. بيري ساواشيردي، بيري ماشيني ندا ماهني آچيب، سسين اوقدر چوخالتميشدي، ائله بيل اؤزگلره ايسته نيلن ماهني لاريني يايير. بيري هاراي چكيردي گلين آپارين يئرآلمانين اوچ كيلوسو ايكي مين تومن و...
آيخان ايسه ايره لى، گئديردي. آنسيز، گؤزو بير كاغيذا چارپدي، «ايكي نفر ساده ايشچي، قوتو باغلاماق اوچون ايسته ييريك، تئلفون نومره سي ايله آدرسيني ده»-يازميشدي. سئوينيب تئز كاغيذي دوواردان قوپارديب، موبايل ايله يازديقلاري تئلفون سايي سينا زنگ آچدي. بير خانيم تئلفون دا دانيشيب، صاباحيسي گونه آيخانا واخت وئردي. سحر تئزدن آيخان سئوينه-سئوينه يوخودان اويانيب ايشچي آختاران بيلديريشي وئرن شيركته ساري يوللاندي...
آيخان شيركت ده، ايداري بؤلومونه گئتدي. ايچري گيريب اورداكي آداما: «ايش اوچون گلميشم» دئدي. كيشى هئچ نه سوروشمادان، «پارتين وار؟»-دئيه سوروشدو!
آيخان، «يوخ» جوابي وئرديگينده، كيشي، گؤزلرين بره لديب، «ائله ده، سؤزو اوزالتماياق، گوله-گوله، هله ليك!»-دئدي.
Vətən sağ olsun
Vətən sağ olsun
yazan: Hüseyn vahedi
Bir an ayaq üstdə durub, neçə addım atmaq, dörd iliydi ona həsrət olmuşdu. Ata-ana yardımı ilə hər işini edirdi. Dörd il bundan öncə Ayaz-ın bir araba toqquşmasında, iki ayağı-da sınıb beli isə ağır zərbə görmüşdü. İmam Riza (ə) ziyarətinə gedəndə, "ya imam Riza (ə) mənə şəfa ver düzəlim, torpaqlarımızı düşmən əlindən qurtarmaq üçün Qarabağ savaşına gedim" – demişdi. Ana-sı ilə ata-sı əllərindən gələni əsirgəməmişdirlər. Ata-sı ev-lərində satıb Ayazın müalicəsinə xərc etmişdi, ana isə bütün qızılların. Doktorlar yavaş-yavaş Ayazın sağalmasına ümüdlənirdilər. Ayaz namazdan sonra saatlarca Quran oxuyub Tanrı-yla munacat edirdi...
Bala-bala ayaqları üstündə yol getməyi bacara bilmişdi. Sevincindən nə edəcəyini bilmirdi. Ata-anasına "yaşam boyu, sizə borcluyam"-deyirdi. Ayaz bir daha sağlamlığı ələ gətirib, arzısına yetişmişdi. O əsgərligə getməyi düşünürdü. Əmisi oğlu Aydın-la birlikdə əsgərliyə getməyə qərar vermişdirlər. Aydın-ın əsgərlik vaxtıydı, Ayaz-ın isə iki il xəstə olduğu üçün əsgərliyindən keçirdi. İkisidə əsgərliyə getmək hazırlıqların aparıb yollanmaq günü gəlib çatmışdı. Ata-anaları onları yola salmağa gəlmişdirlər.
Vətən övladları bir-bir ata-analarından sağollaşıb otobusa minirdirlər. Ayaz-ın ata-anası ondan ayrıla bilməyirdilər. Onların əzdirib becərdikləri elə təkcə bu bir uşağıydı...
Otobus yola düşmüşdü. Ayaz yolların gözəlliyinə baxa-baxa, düşünürdü. Aydın isə yanındakı əsgər ilə danışırdı. Axşam üstüydü, günəş Bakı-dan sağollaşmaqdaydı. Otobus saxlov-a yetişmişdi. Əsgərləri saxlovun içərisinə apardılar...
İki ay, savaş öyrətimi, tezliklə sona çatdı. Əsgərlərin çoxu Qarabağ-a yaxın saxlovlara yollanıldılar. Ayaz ilə Aydın, bir yerə düşmüşdürlər. Günlər çox hızlı gedirdi və ana torpağa qulluq etmək onları gücdən salmırdı. Axşamları düşmən yaxın kəndlərə atəş açıb oradakı silahsız əsgərləri qorxuya salırdı. Ayaz ilə Aydın isə o atəşli xəttin ən yaxınlarındaydılar və hər gün başqa yoldaşları ilə birlikdə keşik verirdilər...
Günəş dağların başından əsgərlərə salam verə-verə göyə yüksəlirdi. Gündüün o çağında, bir əkinçi qaça-qaça saxlova sarı gəlirdi. Aydın, "dayan-dayan! ... səninləyəm dayan" –deyib, kişi dayanandan sonra "yüz başı-nı görmək istəyirəm" –dedi! Aydın tez yaxında olan əsgərlərin birindən yüz başı-nın çağırmasını istədi. Əkinçi, vay xəbəri gətirənlər kimi ağlaya-ağlaya başını döyürdü. Yüz başı əsgərlərə "qapını açın içəri gəlsin" –buyuruq etdi. Kişi içəri gəlib yüz başıya " sayın yüz başı, ailəm, qohumlarım, kəndlilər, ... hamısını düşmən gecə ilə qırıbdı!" –deyib, bir daha baş-gözünü döydü. Kişi "gecə yarısı Erməni-lər kəndi basıb, kiçikli-böyüklü hamını şəhid ediblər, məndə o gecə kənddə olmadığım üçün diri qalşışam" –Artırıb, "məndə ölüb bu günü görməyəydim" –dedı. Bütün saxlovu kədər bası. Hamı səssizcə öz işindəydi. Bəzilər göz yaşlarını saxlaya bilmədilər. Yüz başı, bu acı xəbəri mərkəzə verib neçə əsgər ilə birlikdə, saldırı olan kəndə getdilər. Ayaz isə gedənlərdəniydi. Az qalırdı yürəyi yerindən çıxıb, partlasın. Odlu baxışlarıyla bölgəyə baxırdı... Tanrım! Sən yaratdığın əşrəf-i məxluqat bunlardılarmı? İnsanda bu qədər yabanlıqmı (vəşiliqmi) var? Yerə-göyə atəş açıb, qurşunlar vurmuşdurlar. Körpə, qoca, gənc, qadın, kişi ... hamını öldürmüşdürlər. Yaxın kəndlərdən gələnlərin yardımı ilə şəhidləri quylayıb, əsgərlər isə əsgər evinə döndülər. Ayaz, "orda olub, düşməni qırardım" –deyirdi. Amma nə fayda...
Axşam çağlarıydı, Günəş doğa-ya sərmiş qızıl ilə parlaq saçlarını götürüb aparmaq istəyirdi. Bir azdan yüz başı, əsgərlərə danışmaq üçün onları səsləyib bir yerə yığdı. O "saın əsgərlər! Ölkənin igid qoçaqları, mərkəzin dediyinə görə və əlimizə çatan xəbərlərə görə, düşmən sabah gecə Çiçəkli kəndinə hücüm çəkəcək" –deyib, "bizdə onlarla savaşmağa, gedəcəyik" –artırdı. Əsgərlərin hamısı bir xoş xəbər eşidənlər kimi haray çəkib, bir-birlərini bağrılarına basdılar. Ayaz, Aydına "istədiyim vaxt gəlib çatıb, indi intiqam vaxtıdı" –dedi.
Səhər çağıydı, yaxın kəndlərdən əzan səsi ətirini göylərə səpələyirdi. Əsgərlər Tanrı-yla munacat edədib, silahların hazırlamaqdaydılar. Bir azdan Çiçəkli kəndinə doğru yürüyəcəkdirlər.
Gün orta olmuşdu. Günəş yaz-ın gözəl çağında doğaya hükümət edirdi. Kəndin adamları, uzaqdan əsgərləri görüb, sevindilər. Əsgərlər savaş arabalarıyla kəndə yetişdilər. Yüz başı, hər kimsənin harada dayanacığını göstərib, kişilər ilə birlikdə, kəndin ağ saqqalının evinə toplandılar. Qadın-lar ilə uşaqlar bir arxayın sığınacağa aparıldılar...
Üç gecə-gündüzüydü əsgərlər kənd-dəydilər. Düşmən o üç gündə kənd-də gəlməmişdi. Kəndlilərin istəyi ilə, onlar bir gecədə orada qalmmalı oldular. Gündüz, gecə olmuşdu. Saat üçü göstərirdi. Ayaz ilə Aydın bir yerdəydilər. Onlar dörd gözlü buyan-oyana baxırdılar. Ayaz, Aydına "elə bil, üz-üzə olduğumuz, təpədən bir zadlar aşağı düşürlər" –dedi. Aydın hər yana baxıb ber zad görmədi. Ayaz diqqətlə birdə baxanda düşmən əsgərlərinin birinin kimlik boyun bağsının parlamasını görüb, tez yüz başı-ya xəbər verdi. Əsgərlər silahların atəş açmağa hazır etdilər. Yüz başı, əsgərlərə "mən deyəndə, atşə açın" –deyib öz yerinə getdi...
Yüz başı-nın atəş açın səsi ilə, qurşunlar açıldı! Düşmən çox yaxınlaşmışdı. Özlərin tapana neçəsi həlak oldu. Qalanlar, qayalar arxasında gizləndilər. İgid əsgərlər neçə saatıydı Düşmənlə döyüşürdülər. Ayaz ilə Aydın bir-birə yardım edib, düşmənə qurşrn açırdılar. Düşmənin çoxunu bunlar həlak edirdilər... Düşmən bunu anlamışdı və çalışırdı o açı-nı bağlasın ... və Ayaz vuruldu...
Ayaz-ın harayı yer-göyü sökə-sökə kəndə dağıldı. Qan axar bulaq kimi Ayazın bədənindən yerə axırdı. Aydın tez Ayaz-ı onlarla gələn doktorun çadırına apardı. Onların yerinə iki başqa əsgər keçib, yenə düşməni atəşə bağladılar. Aydın ağlayırdı. Ayazın qanı kəsilmirdi. Ayazı arabaya mindirib, xəstə xanaya aparmaq üçün yola düşdülər. Ayaz bayılmışdı. Aydın isə arabadaydı. Aydın, Ayaz-a "gözlərini aç, indi yetişərik" –deyirdi. Bir azdan Ayaz gözlərini açdı. Hüşü başına gələr-gəlməz, Aydin-a baxıb, "sonunda, arzıma çatıb, vətənə layiq bir oğul oldum" –dedi. Aydın göz yaşlarını saxlaya bilməyirdi...
Araba sürətlə gedirdi. Telsiz-dən yüz başı-nın səsi gəldi. Əsgə! Əsgər! Aydın cavab verib "buyurun sayın yüz başım" –dedi. Yüz başı uca səs ilə bağırıb dedi: Ayaz, oğlum!... Sən yaşamalısan... Sizlərin candan keçmələrinizlə düşməni həlak etdik... Bütün kəndliləri qoruduq...
Ayaz gülümsəyə-gülümsəyə, ağlayırdı! Tanrı-ya şükür edirdi. Aydın-a baxıb dedi: ana, mənim üçün ağlamasın, de! Oğlun qoçaq bir oğul kimi, vətən yolunda canından keçdi. Ona "VƏTƏN SAĞ OLSUN" –de. O anda Aydın, Ayaz-ın üzündən öpüb, "sən yaşamalısan" –dedi. Ayaz gülümsəsini pozmayıb, qoçaq igid kimi, gözlərini dünyaya bağladı...
تولكو و حاجي لئيلك
آذربايجان اوشاق ناغيل لاريندان
تولكو و حاجي لئيلك
گونلرين بير گونو بير حاجي لئيلك ايله بير تولكو قارداشليق ائديرديلر. اونلار بير يئرده چيخير، بير يئرده گزيرديلر. بير گون تولكو حاجي لئيله يه دئدي:
ـ قارداش، آخشام بيزه قوناق گلرسن؟
حاجي لئيلك او گون آخشامادك چؤرك يئمه دي، اؤزونو تولكونون قوناقليغينا ساخلادي. آخشام حاجي لئيلك قارداشليغي تولكونون ائوينه گلدي. تولكو دوردو بير قازان دووغا بيشيردي. بير بوشقابا تؤكدو، سوفره يه گتيردي. يئمه يه باشلاديلار. حاجي لئيلك هر دفعه ديمديگيني اوزادانا آنجا بيرجه دوگو گؤتوره بيليردي. او، بئش- آلتي – دوگو گؤتورمه ميش تولكو دووغاني تامام يالاييب قورتاردي.
حاجي لئيلك آج قالدي. اؤز- اؤزونه دئدي: « ياخشي، آي تولكو، عوضيني سندن چيخارارام».
حاجي لئيلك او گئجه ساباحادك آجيندان ياتا بيلمه دي، قارنيني اوووشدورا- اوووشدورا قالدي.
بير نئچه گون كئچدي. بير گون حاجي لئيلك ده دووغا بيشيريب، قارداشليغي تولكونو قوناق چاغيردي. حاجي لئيلك دووغاني بير بارداغا تؤكوب سوفره يه قويدو. سونرا اوزو ديمديگيني ساليب بارداقداكي دووغاني تامام ايچدي، تولكو آنجاق بارداغين قيراغينا تؤكولنلري يالادي. او، گئجه آج- آجينا ياتدي. سحر تئزدن دئيينه- دئيينه اؤز ائوينه گليب دئدي: «سندن منه قارداش اولماز، من سني يئييم، سنده تاماشا ائله».
بير موددت كئچدي. تولكو اوره ييندن آجيغيني چيخارتمادي. بير سحر تئزدن تولكو، حاجي لئيله يين يانينا گليب دئدي:
ـ قارداش، اوره ييم برك داريخير، دور گئدك گؤي چمنده بير آز گزك.
حاجي لئيلك راضي اولدو. هر ايكي سي بير- بيرينه قوشولوب، بير چمنه چاتدي. تولكو دئدي:
ـ قارداش، گل بو چمنده بير آز ياتاق.
ياشيل چمنده اوزانديلار. تولكو اؤزونو يالاندان يوخويا ووردو. حاجي لئيلك، يوخويا تزه جه گئتميشدي، تولكو بيردن يئردن قالخدي، حاجي لئيله گين بوغازيندان توتماق ايسته ينده، حاجي لئيلك اويانيب دئدي:
ـ قارداش نه ائله ييرسن؟
ـ تولكو دئدي: سني يوخودا گؤرموشدوم، اونا گؤره سني اؤپمك ايسته ديم.
حاجي لئيلك اونون حيله سيني باشا دوشدو. اؤز- اؤزونه دوشوندو.
ـ « ياخشي، گؤرك كيم كيمي اؤلدورر».
او، تولكويه دئدي:
ـ قارداش، داها ياتميرام، گل منيم قانادلاريمين اوستونه مين، هاوايا قالخاق، بير آزدا گؤيده گزك، سونرا گليب آرخايين ياتاريق.
تولكو حاجي لئيله گين قانادلارينين اوستونه ميندي. حاجي لئيلك هاوايا قالخدي. بير چوخ قالخاندان سونرا سوروشدو:
ـ قارداش نئجه گؤرونور؟
ـ خيرمان بويدا.
حاجي لئيلك بير آزدا قالخيب سوروشدو:
ـ قارداش ايندي نجور گؤرونور؟
ـ تولكو دئدي:
ايندي هئچ گؤرونمور؟
ـ حاجي ائيلك دايانيب دئدي:
قارداش داها قانادلاريم آغرييير، دوش بير آز دينجه ليم.
تولكو يالواريب دئدي:
ـ آي قارداش باشينا دؤنوم، قوربانين اولوم، من نه تهر دوشوم؟ آماندي مني آشاغي ايندير.
حاجي لئيلك دئدي:
ـ قانادلاريم آغرييير، دوشمه سن سني يئره سالاجاغام.
تولكو چوخ يالواريب، ياخاردي، گؤزلرينين ياشيني تؤكدو، آمما حاجي لئيله يي اوره يي يومشالمادي. حاجي لئيلك اونو توللاييب دئدي:
ـ حيله چي تولكو، بو مني يوخودا اؤپدويونون عوضيدير.
تولكو يئره دوشوب، شيل- كوت اولدو. حاجي لئيلك ده بالالارينين يانينا گليب، كئف له گون كئچيردي.
حاضيرلايان: حسين واحدي
قايناق:
آذربايجان اوشاق ناغيل لاري/ معصومه اژدري
كؤچمن قارانقوش
كؤچمن قارانقوش
سون باهار گلمك اوزره دير. يولداشلاريم دئيير: قالديغيميز يئردن باشقا يئره گئده جه ييك. آتامدان سوروشاندا: هاراگئده جه ييك؟ من تانيماديغيم يئرلردن سؤز آچير.
هردن اؤز- اؤزومه ائله داريخيرام! دئييرم نه اولار ائله بو يام-ياشيل يئرده قاليب ياشاياق. آمما آتام دئيير: بير آيين ايچينده بورادان گئتمه سك هاميميز سويوقدان اؤله ريك. قارانقوش لار ايسي يئرده ياشايارلار. ائليميزين بؤيوگو دئييب: ايكي گوندن سونرا اورمو گؤلونون يانينا گئده جه ييك. آتام دئيير، اورمو گؤلو، چوخ گؤزلدير و اورادا آياقلاري اوزون فيلامينقولار، ساري جئيرانلار، قوچ لار و... ياشاييرلار.
ايندي چوخ ماراقلي اولموشام تئزليك له قالديغيميز يئردن اورمو گؤلونو گؤرمه يه گئدم... كؤچمك گونو گليب يئتيشميشدي و يولداشلاريم ايله بيرليكده بير قيراقدا اوچماغا حاضير اولموشدوق، ائلين بؤيوگونون اوچماغي ايله هاميميز گؤيه ساري يوللانديق، شهرلرين اوستوندن كئچنده اوشاق لارين هاميسي بيزه ال ساللاييرديلار و ائله بيل اونلار بيزيم له بيرگه اوچماق ايسته ييرلر...
يول چوخ اوزونويدو، آمما هئچ يورولماق بيلمه ييرديم، يالنيز اورمو گؤلونه چاتماق ايسته ييرديم، بؤيوكلو-كيچيكلي داغلاري، اورمانلاري، شهرلري آشيب گئديرديك. گئتديگيميز يئره آز قاليرديق، آتام، آنام ايله بير ليك ده يانيمدا اوچوردولار و من چوخ سئوينيرديم.
... اوزون يولجولوقدان سونرا، آرزيسين چكديگيم يئره يئتيشميشديك، آمما اورمو گؤلو... اورمو گؤلو من آرزيسين چكن دئيلميش، چوخ آغلاديم بورا گلديگيمه، بورا چؤلدن باشقا بير زاد دئييلميش، آتام يانيما گليب، آغلاما قيزيم بورا سولو بير گؤلويدو، قوروماسينين ندنين بيلمه ييرم، سني آپاراجاغام گؤزل «وان» گؤلونه، دئييرلر اورا چوخ سولو و گؤزل دير... سن آغلاما، گؤزل قيزيم ...
يازان: حسين واحدي
آدام اولماق!
آدام اولماق!
- يولداش، بؤيوك اولاندا، نه اولاجاقسان؟
- منيم يولداشيم، بيليرسنمي؟ هامي دئيير: عاليم اول، مهنديس اول، دوكتور اول و...
آمما بيلميرم ندن هئچ كيم دئمير: درس اوخو «آدام» اول!!
يازان: حسين واحدي
ايشسيز
ايشسيز
يولوندا گئديردي و دام- دووارا باخيردي، بيري دئييردي- بيري گولوردو، بيري ساواشيردي، بيري ماشينيندا ماهني آچميشدي و سسين اوقدر چوخالتميشدي، ائله بيل اؤزگلره ايسته نيلن ماهني لاريني يايير! بيري هاراي چكيردي گلين آپارين يئرآلمانين اوچ كيلوسو ايكي مين تومن! آيخان ايسه كدرلي گئديردي، بيردن گؤزو بير كاغيذا چارپدي: ايكي نفر ساده ايشچي، قوتو باغلاماق اوچون ايسته ييريك و آشاغيدا تئلفون نومره سي ايله آدرسيني يازميشدي.
سئوينيب تئز كاغيذي دوواردان قوپارتدي و آپاريب ائودن يازديقلاري تئلفون سايي سينا زنگ آچدي. بير خانيم تئلفوندا دانيشيب و ساباحيسي گون آيخان- ا واخت وئردي. سحر تئزدن آيخان سئوينه- سئوينه يوخودان اويانيب ايشچي آختاران بيلديريشي وئرن شيركته ساري يوللاندي. آيخان شيركته كئچيب ايداري قيسمه تينه گئتدي، ايچري گيريب اورداكي آداما: «ايش اوچون گلميشم» دئدي. آدام هئچ نه سوروشمادان: «پارتين وار؟» دئدي و آيخان يوخ جوابي وئرديينده كيشي: حيرصله نيب :« آخي نه يه بيزيم واختيميزي توتوبسان قاييت گئت » دئدي!
يازان: حسين واحدي
چوخ بيلميش قولو
چوخ بيلميش
قولو
اؤزونو چوخ بيليجي بير اينسان بيليردي و جمع ايچينده هانسي قونودان سؤز آچيلسايدي، يئردن – گؤيدن سؤز ييغيب اؤزونو بيلگيلي بيريسي گؤسته رردي، قوهوملار و تانيشلار گولونج اوزوندن آديني « چوخ بيلميش قولو» دئييرديلر!
گئييميده چوخ ماراقلييدي، يايين لاپ ايستي گونلرينده ده، كوتونو چيخارتمازييدي و بو ايشله اؤزونو كيلاسلي و بيليجي گؤسترمك ايسته ييردي!!
قولونون ديشلريده اؤز يئرينده دققت ائلمه لييديلر، اونون ديشلري ايللرييدي ديش فيرچاسي (مسواك) گؤرمه ميشديلر و لاپ موزه يه قويمالييديلار و حئسابلاسايديلار لاپ بئله گينئس كيتابيندا يازيمالييدي! آخي بيري يوخويدو دئيه: آرواد – اوشاغييين گوناهي نمنه دي سنين او پاسلي ديشلرييين تحمل ائديلر؟!
چوخ دانيشماغي آرواديدا ديغلاتميشدي و قولو چوخ دانيشديغي زامان، آرواد «قيريق راديو قورتار» دئيه ردي! گونلرين بيرينده، بحث ائليينده، آروادا قاييديب «هئچ سن بيليرسن من گونده نئچه درگي (مجله)، گونده ليك (روزنامه)، ... اوخورام؟» دئدي و آرواد ايسه « آخي قيريق راديو نييه بيز اونلاري گؤرموروك، هاردا گيزله ديبسن؟» جاواب وئردي!
قولو : «آرواد چوخ دانيشما !، اونلار دكه لرين قيراغيندادي، من گونده ايداره دن قاييداندا، ياريم ساعات دكه لرين قاباغيندا يئريمي ساليرام» دئدي!!
ار - آروادين داعواسي، نه دئيرلر؟ بلي، عيني يازين هاواسي! قولو كيشي بير گون ايشدن، ائوه قاييداندا، اوره يي آيران ايسته يير و يول اوستونده بير باققال توكانيندان دؤرد كيلو آيران آلير.
ايندينينده آيرانلاري چوخ ايشمه ليديرلر! آيراندان سونرا هر نه يين دادين تاپماق اولار!!
توكانچي دئير: آغا دببه وارينيزدي؟ قولو : «ده دم دببه ني نئيليرسن، من آيراني بؤركومده ائله آپارارام بير دامجي دا يئره تؤكولمز» دئدي!!
كيشي آيراني موشامبايا تؤكنده اوره يينده « اينشاللاه تؤكولر اوستو – باشييان، اوندا بللي اولار نجور آپارارسان؟» دئييب، آيراني قولويا وئردي!
قولو گونده كي كيمين يولو اوستونده اولان دكه دن بيلگي (معلومات) ييغماغا گئدر! آيرانيدا اوينادا – اوينادا بو اليندن او بيري الينه وئره – وئره دكه چينين يئره سرديغي نشريه لرين باشي اوستونده دورار.
ائله بيل بوگون فرقلي گوندور و بير آز چوخ بيلگي داليسيجادير و درگي لري و گونده ليك لري واراقلاييردي، اورادان قاچا بير اوغلان اوشاغينين اويونجاغي (اسباب بازي سي) آيرانين موشامباسيني ايله شيب، ييرتار، قولو اوغلانا دؤنوب باخاندا، آيران نشريه لرين چوخونون اوستونه سپيليب ايسلادار، دكه چينين هارايي گؤيه گئدر و اوغلان اوشاغيدا آرادان يوخ اولار!
ايندي قولونون ياخاسي اوجا بويلو و قوللو – بويونلو دكه چينين الينده قاليب و گؤزلويوده (گؤزلوك =عينك) يئره دوشوب آياقلاري آلتيندا ازيلر!
دكه چي هاوار چكيب دئير: آخماق كيشي! سنين 500 تومنين يوخدو گونده ليييي آليب ائوه آپاريب، آرخايينچيليقلا اوخوياسان؟! قورخوسوندان ال – آياغي تيتره ين قولو : « آغا گوناه او قاچان اوغلاندايدي، مني باغيشلا، هاميسينين پولون وئره جه يم» دئدي!!
دكه چي قولونو دكه نين ايچينه ساليب، آيرانلي نشريه لري آييريب، قييمتلرين چيخارديب، قولونو ائشييه چكيب: « آخماق كيشي 10 مين تومن ائله دي، تئز پولو وئر و يوخ اول!!» دئدي.
چوخ بيلميش قولو! هر جيبدن بير آز چيخارديب جريمه ني وئرر و دكه چي : « ايندي جانين راحات اولدو؟ جريمه وئردييين نشريه لر سنين دير، گؤتور آپار ائوده اوخو!» دئييب، ايشينه گئتدي.
قولودا تؤوبه ائديب اللري، آياقلاريندان اوزون يولونا دوشدو، يولدا گئده – گئده، اؤز – اؤزونه : «اوجور اولار ها، 400 – 500 تومني هر گون وئريب، گوندلييي آليب ائوه آپاريب راحاتجا اوخوسايديد، بير يئره ييغيشيب 10 مين تومن اولمازييدي» دئييردي!!
دئييرم نه اولار دكه لر قاباغيندا صف چكيب نشريه لره فقط باخانلارين!! هاميسينين الينده آيران اولاردي!!
يازان : حسين واحدي
اورك‍ـ ده قالان سئـوگي
اورك‍ـ ده قالان سئـوگي
اورگي دؤيونوردو. قافاسيندان يوزلرجه دوشونجه گليب، كئچيردي. نه ائده جه ييني بيلمه ييردي. اوشاق لار كيمي آغلاييردي. اوتاغينين قاپيسيني باغلاييب، پنجره قيراغيندا دوروب، كوچه يه باخدي. بيري قاچيردي. بيري هاراي چكيردي. اوشاقلار اويناييرديلار. قونشو قادين لار ايسه تره سئچيرديلر، آمما ائلاي كدر ايچينده بوغولوردو. اورك سؤزون هئچ كيمسه يه آچيقلايا بيلمه ديگي اوچون داها چوخ عذاب چكيردي. آخشام يولدايدي و بير آزدان شهري آلتينا آلاجاغييدي. گونش كؤچمك دوروموندايدي. ائلاي پنجره قيراغيندان بيلگي سايار يانينا گئتدي. بيلگي سايارين يانديريب، اينتئرنئته گيردي. بيليم يوردوندا اولان ان صميمي يولداشي چت اوتاغيندايدي. سئوينيب اونلا چتلشمه يه باشلادي. اورگينده قالديغي آغريني اسمره آنلاتماق اوچون چابا گؤسته ريردي. هارادان و نئجه آنلاتما سينا قالميشدي.
اسمر ائلاي-ين نه دئيه جه گينه ماراقلانميشدي، آمما ائلاي اوتانيردي. ائلاي آغلاماق آيكونونو ووروب آرديجا «من عاشيق اولموشام» يازدي! اسمر ايسه دالبادال گولمك آيكونلارين صحيفه يه دوزدو. ائلاي راحاتسيز اولوب، « اسمر، گولمه! بورادا قيزين، اوغلانا عاشيق اولماسينين چتينليك لريني بيليرسنمي؟» يازدي. من قونشوموز اوغلو آيدين-ا عاشيق اولموشام، امما دئمك اولارمي؟
يازيق اولموشام. دارما- داغين قالميشام. اورگيمي پارتلاتميشام. جانيما آغري سالميشام. اوغلانلار عاشيق اولاندا، قيزلارا دئيه بيليرلر، آمما من نئجه دئييم و اورگيمي نه ته هر دينجلديم؟! مين جوره آد قويارلار!!
كاش عاشيق اولماسايديم! ... كاش!! ...
يازان: حسين واحدي
زامانين دؤنوشو
زامانين دؤنوشو
يول اوزون، ماشين قوجا، من يورغون، آياغيمي گازا باسيب گئديم، تابلولاري ايزله ييرم و بير آندا، قاباقدا رستوران وار تابلو سونو گؤردوم، 2 كيلومتر گئدندن سونرا رستورانا يئتيشديم، لپ تاپيمي دا اؤزومله ايچه ري آپارديم، يئمك لرين ليسته سيني دووارا وورموشدولار و من اونلارين ايچيندن تورك كابابيني سئچديم!
ماسانين يانيندا اوتوروب يئمه ييمي گوزله ديم لپ تابيمي ماسانين اوستونه قويدوم و آچيب اينترنته گئتديم ، زاماني بيلمه دن يئمك ماسا اوستونه گلدي و يئمه يي ئييندن سونرا يئنه اينترنته قاييتديم، وبلاگيما باش چكديم، يئني يوروملاري بير- بير اوخودوم، يوروملارين بيرينده قيزيمين آديني گوردوم و ماراقلا يورومونو اوخوماغا باشلاديم قيزيم « آتا جان هارداسان؟ بير ازدا بيزي دوشون ساباح منيم دوغوم گونومدور سن من سئو سيدين ائوه دؤنه ردين» يازميشدي يورومونو اوخوياندان سونرا، گولوب، اينترنتدن چيخديم، حئساب- كيتابي وئريب يولوما دوشدوم. گؤزلرريم يورقونويدوف آمما گئجه يه كيمي ائوه يئتيشمه لييدم
و قيزيمين اوره يين اله آلمالييدم، ساعات گون اورتا دان سونرا 3:52 سوووشوردو قاباقدا بؤيوك تابلودا سورعتيزي آزالدين يول خارابدير يازميشدي، آياغيمي ترمز پدالينا آپاريب ماشيني ساخلاماق ايسته دييمده، پدال بوشا گئتدي، اؤنومده تيرئليلر وارييدي و من 140 سورعتله اونلارا توققو شاجايديم او آندا موبايليم زنگ چالدي، ائويمين نومره سييدي، تئلفونو آچديغيمدا، قيزيمين سه سييدي و من دوغوم گونون تبريك دئيه- دئيه زامان قورتولدو و هئچ نه يي بيلمه ديم...
قيزيمين سسيله يوخودان اويانديم و گوردوم ائوده ياتاقين اوستونده يم، ساعات 8 اولموشدو و هر نه يوخودا قالميشدي تئز تاريخي سوروشدوم و زاماني بيلدييمده قيزيمين دوغوم گونونو آنلاديم، زامان يئنيدن باشلانميشدي و عاييله مي سئويندرمه يه واختيم اولموشدو و تئز پول چانتامدان پول گوتوروب قيزيما وئرديم اوزوندن اؤپوب «قيزيم اوزون و بركتلي عؤمرون اولسون، دوغوم گونون قوتلو اولسون» دئديم و ياشاميين قدريني بيلمه يي دوشوندوم!
يازان: حسين واحدي
اوشاق محببتي
اوشاق محببتي
سئوين، پالتارلارين گئيمك ايسته ييردي، آمما كؤينه يين باشينا كئچيرده بيلمه ييردي، تومانين ترسينه گئييردي! آناسي گليب اونا يارديم ائديب گئيينديردي، يانيجا آليب بازارا گئتديلر، بازارين توكانلارين بير- بير گزيرديلر، آناسي ايسته دييي شئي لري آليردي، قيزيل بازاريندا، توكانلارين بيرينين يانيندا، اوزو ياشماقلي، قوجا بير قادين اونلارين يانينا گليب يارديم ايسته دي! سئوين- ين آناسي اؤزونو توتاراق ائشيتمك ايسته مه دي بو سسي! او حئيني قوجا آبيرلي ديله نن قادينين اوشاغي سئوين-دن دوندورماسيني ايسته دي، سئوين ايسه، ائشيتدي بو سسي! سئوين ايكي الي ايله ياپيشدي دوندورماسيندان، سئوينه- سئوينه وئردي اوشاغا!!
يازان: حسين واحدي
