◄███▓▒░░ -[ Xatirələr durağı ]- ░░▒▓███►

اورمونون قاجار ائوله ريندن

بو ائو اورميه نين قاجار دؤورونمدن قالان تك ائولردن بيريدير. شكيل دن بللي اولدوغو كيمي دللال لار ايله آپارتمان ديكن لر ايله اونلارين جيب لرينين دولماسي، گؤزل اورميه، ايفتيخارلي آذربايجانين تاريخيندن اؤنملي و واجيب دير!!
ندن هئچ كيم بئله نچي تاريخ دن قالان ايزلري قورماغا چاليشمير؟ ندن اورميه نين يئني دوروموندا تاريخ ايزي سيلينمكده دير؟ شهره قوناق گلنده هاراني گؤسته ريب تاريخيميزدن دانيشاق؟ كيمسه نين قئيرتينه توخونمورمو؟
اومود ائديرم بيري بو هارايلاري ائشيديب بير ايش ائتسين.
- شكيل:‌ اورميه، شورا خيياواني، مجيدي افشار ائوي (قاجار دؤورو)

90/6/27

زومار (شهريور) آيي - 1390

سوناي

«سوناي» يوردوما خوش گليبسن. بيزي يامان يئرده يوخلاييبسان، كولتورمون آزقينليغيندا  گونش اولدون يوردوما. سئوگيليله لر چوخداندي سني اونوتموشدولار. نئچه واختدي بير اؤزگه والئنتاين آدلي بيريسي اولوسومو آلداتميشدي. دئمه سنين يئرينه كئچمك ايسته ييرميش، يوخسا سن دورمو آنلاييب، قارا بولودلاري قيراغا آتيب، ساري ساچلي گونشيميزي بيزه گتيردين. سن بيرداها منيم وارليغيمي منه آنلاتدين. من اؤز وارليغيمي اونوتماق ايسته ميرم. سن گلن گون، 31 زومار (شهريور) يئر- گؤي سئوگي له نير. سئوگيليلر سئوگي دونو گئيير. سئوگيسيزلرده سئوگي ني آختارير. هامي قيرميزي بويالي اورك، قيزيل گول، سئوگي مكتوبو، ... و بوتون سئوگي قوخوسو وئرن شئي لري آلير. آنجاق سن بو گؤزلليگي ياراديسان. سئوگيليلر بو گونده گرچكدن بير- بيري دوشونولر. آيريليق لار كوسوب گئديرلر. باريش ايسه يورد سالير. گونش ساچلارين دارير. اورك لر بيرگه دؤيونور. سئوگي هر يئره ياغير. ساراي لار، خان چوبان لاري هارايلير. آنجاق سن هر ايل زومارين سون گونونده گل. هامي سني گؤزله يير. سن اولدوغوندا سئوگي ياشانير. گؤزل آذربايجان توركجه سينده نغمه لر قوشولور. آشيق لار، سازلاريندا اصلي- كرم سسلنديريرلر. يوردوم جننته دؤنور، گئجيكمه هئچ زامان، آمان دير تئز گل!

يازان: حسين واحدي

ـ سوناي، آذربايجاندا سئوگيليلر گونون آديدير و هر ايل زومار (شهريور) آيينين 31-نده اولور.

اوشاق محببتي

سئوين، پالتارلارين گئيمك ايسته ييردي، آمما كؤينه يين باشينا كئچيرده بيلمه ييردي، تومانين ترسينه گئييردي! آناسي گليب اونا يارديم ائديب گئيينديردي، يانيجا آليب بازارا گئتديلر، بازارين توكانلارين بير- بير گزيرديلر، آناسي ايسته دييي شئي لري آليردي، قيزيل بازاريندا، توكانلارين بيرينين يانيندا، اوزو ياشماقلي، قوجا بير قادين اونلارين يانينا گليب يارديم ايسته دي! سئوين- ين آناسي اؤزونو توتاراق ائشيتمك ايسته مه دي بو سسي! او حئيني قوجا آبيرلي ديله نن قادينين اوشاغي سئوين-دن دوندورماسيني ايسته دي، سئوين ايسه، ائشيتدي بو سسي! سئوين ايكي الي ايله ياپيشدي دوندورماسيندان، سئوينه- سئوينه وئردي اوشاغا!!

يازان: حسين واحدي

شهريار شعر تانري سي

توركون ديلي

اونودماز وطن سني ..

توز باسيب ائشيتمير صدفلي سازين

گلمير قولاغيما او خوش آوازين

قاريشدي تورپاغا صؤحبتين سؤزون

يانيرام سنده كي كامالا درويش

اورميه نين آدليملاري كيتابيندان رحمتليك آشيق «درويش»- ين ياشامي ني اوخويوب قورتولاندان سونرا اوره ييمي غم باسيب اوركدن آه چكديم. ندن بئلنچي بير اينسانلاريميز اونودولوبلار؟!! بونا گؤره ماراقلانديم آشيغين كندينه گئديب، قبريني زييارت ائدم. يولداشلاريمين بيريله بو قونويو آرايا قويوب اونون كندينه گئتمه يي قرارا گتيرديك.

قراريميز جومعه گونونه يدي و زامانين اوچدوغونا گؤره بو گون تئزليكله گليب چاتدي، گون اورتادان سونرا «كوردلر» كندينه ساري يوللانديق، كند اورميه نين چي چست يولونون 5 كيلومترلييينده يدي،كنده يئتيشيب، اورادا ياشايانلاردان قبيرسانليغين يولونو سوروشدوق، نئچه دقيقه دن سونرا كنددن آزجا ائشيكده اولان قبيرسانليغا يئتيشديق، تورپاقلي بير يول و سس سيز بير آخيرت ائولري.. آخيرته قاووشانلارا بير فاتيحه وئرندن سونرا، ته له سه رك تئز قبيرلري بير- بير آختاريب يازيلارينا ديققت ائديرديك، آما رحمتليك درويش-ين قبيريني تاپا بيلمه ديك. اورالاردان كئچن بير چوباندان آشيغين قبيريني سوروشدوق و كاشكي سوروشماسايديق! ، چوبان او كندين ياشايانلاريندان اولاراق آشيغين قبيريني تانيميردي!!

نئيله مك دئمه آشيق ائله اؤز كندينده ده قريبييميش.گؤي ده بو قريبلييه دؤزه بيلمه ييردي و آغلاماق ايسته ييردي.. اومودلريميزي پوزماياراق،بيرينين يولدان كئچمه سيني گؤزله ييرديك،او آندا بير پيكان قبيرسانليغا ساري گلدي،دئمه تانري يئتيردي! بيزيم يانيميزا يئتيشه نده اوندان آشيغين قبيريني سوروشدوق و شوكورلر اولسون سوروجو قبيري تانييرميش و اونو بيزه گؤسته ره رك اؤزوده بيزيمله قبيرين يانينا گلدي، اللي ياشيندا اولان او معرفتلي بي (ياري جينابلاري) بيزه حورمتله ياناشيب، آشيغا فاتيحه گؤندرندن سونرا آزجا اونون ياشاميني بيزيم اوچون آچيقلادي و سورولاريما جاواب وئردي.

رحمتليك آشيق درويشين قيساجا ياشاميندان بئله دئمك اولار:

آشيق درويش فرهاد اوغلو 1309 – نجو گونش (شمسي) ايلينده اورميه نين «كوردلر» كندينده دونيايا گؤز آچميشدير. او ده يرلي اوستاد آشيق فرهاد كيمي آذربايجانين سنتي موسيقي سينين آدليملاريندان ساييلير. آشيق درويشين گؤزل، ايستي و صميمي سه سينه گؤره آشيق فرهادين شاگيردي اولموشدور. درويش چالان ساز سه سي جانلارا كئچيب و گؤزل سه سيله اونودولموش  اثرلره جان باغيشلاييردي. بو اونودولماز اوستاد 1372 ـ نجي ايلين قويروق دوغان(مورداد) آيينين دوققوزوندا، گؤزلرين دونيايا يوموب،اؤز دوغوم يئري اولان «كوردلر» كندينده تورپاغا تاپشيريلدي. آشيغين تشييع-ي جنازه سينده اينه سالماغا يئر يوخويموش و بو اونون خالق ايچينده نه قدر سئويملي اولدوغونو گؤسته ريردي.

آشيق درويش ياشام بويو (هميشه ليك) آذربايجانين سنتي موسيقي سيني سئورلرين اوره يينده قالاجاقدير و بو سه س اورميه اوچون قالارگي بير سه س اولوبدور. رحمتليك درويش ايرانين بوتون ميللي موسيقي فئستيواللارينا قاتيلب و يوكسك يئرلره ال تاپيب،اؤدول لر قازانيب دير. او نئچه ايللرده اورميه راديو، تلويزيونويلادا ايش بيرليگي آپاريبدير. او ده يه رلي اوستاد چوخلو شاگيردلرده موسيقي دونياميزا تربيه ائديب دير، اونلاردان، آشيق اسمعلي (اورميه – اونون بيرينجي شاگيردي)، آشيق صبور شريفي (اورميه)، آشيق عبدالله اشرفي (قورد تپه)، آشيق ذكريا ملكي(قولونجو)، آشيق رضا پوينده (سولدوز) و ...آد آپارماق اولار.

آشيق درويش، متين، ويقارلي و عاريف بير كيشي ايدي، دئمك اولار او خصلت ايله صنعت ده، اصيل و نمونه بير آشيق و اوزان دير. رحمتليك درويش آشيق صنعتينه اؤزونه مخصوص اولان نئچه هاوا ياديگار قويوب. اونلاردان «شكر يازي هاواسي» و «غربتي هاواسي»- ني آد آپارماق اولار. بو هاوالار اينديده اورمو آشيق لارينين آراسيندا چالينماقدادير.

سونوندا دئمه لييم بئله نچي اينسانلاريميزا سايغي گؤسته رمه لييك و اونون شانينده اولان بير مزارليق تيكيب هئچ اولماسا آدينا بير خيياوان ياراديب هئيكلين پاركلارا قويمالييق.

منه يارديم ائدن، «شكاري» و «ياري» جينابلارينداندا تشككور ائديرم و اونلارا جان ساغليغي آرزيلاييرام.

يازيب، حاضيرلايان : حسين واحدي

مناجات

مدد سندن اولسون ائي بار ايلاهيم           ديليم دئييب مولا دالدالانيبدي

يوخ يئردن ياراتدين كل جهاني                   قلبيمده بير صلا دالدالانيبدي

اون سگگيز مين عالم ليل ايلن نهار             كريمسن،غفورسان،رحيمسن،قهار

لاشريكسن،شككيم يوخدو كردگار          اوره گيم دئييب لا دالدالانيبدي

اون سگگيز مين عالم ييغيلار هامي               يوز ييرمي دؤرد مين كئچر ايامي

اوّل كعبه دن سونرا بيت الحرامي                رب لم يزالا دالدالانيبدي

كل كايناتين ميزاني بيردير                           گؤندرن كيتابي قورآني بيردير

شاعير:  دول لو مصطفي

حاضيرلايان: حسين واحدي

ديريييك يوخسا ياشاييريق؟

قاتارين گلمه سينه بير ربع دا واختيم قالير.بو 15 دقيقه ده نه ايشلر گؤره بيلرم؟ لاپ ياخشيسي، بير آز تخصصي سؤزلوك اوخوماغيم دير. يوخ،ائله بيل كيتابيمي گتيرمه ميشم.باشقا بير كيتاب اوخوماغادا يئترلي واختيم يوخدور. كيتابي آچديغيما، قاطار يولدان يئتيشيب،دوشونجه لريمين تئليني قيرار.

لاپ ياخشي سي، ايشيم اوچون اولان زنگ لريمي آچيم. يوخ،صبح ساعات 6- دي و ايندي امكداشلاريم ياتيبديلار. نه ايش گؤروم آللاهيم؟ آزجا يئني پروژه مي دوشونوم. توتدوغوم بو تصميم خوشدو، داها بوندا ترديد ائتمك ايسته مز. بو بوش واخيميمين بوشونا گئتمه سينه حئييف اولسون. بو گونلر بير داها اله دوشمزلر..

بير آندا اوره ييم بير زاد  ايسته يير. سئويرم بير قدر آدديم آتيب، هئچ زادادا فيكير وئرمه يم. دينج اولام.نيگرانسيز دونيايا باخام. دمير يولونون دوراغينين ديكينتيسيندن ائشيگه چيخيرام. راحاتجاسينا آدديم آتيرام.

بو آغاجلار نه زاماندان بورداديرلار؟ بو ايكي ايلده بير سفر(سئري) - ده اونلاري گؤرمه ميشم. سون سئري يالنيز اؤزوم اوچون و باشقا شئي اوچون يوخ،نه زامان ائودن ائشيگه چيخميشام؟ هئچ ياديما گلمير. هميشه نيگران و تله سه – تله سه ائودن چيخميشام.گرك گؤرم، ايشلري دوشونورم. امكداشيمداندا باشقاسينين قوصورونا گؤره ايشينين دالي دوشمسيندن عذر ايستمه ييمين گؤرونتوسو(تصوير) بير آن مندن آيريلمير. داها باشقا بير شئي لري گؤرمورم. نه بو ماوي گؤيو، نه بو آغاجلاري، نه ده بؤيوك آتامين قديمي ائوين ياديما سالان بو گؤيچك حوووضو. ائله بيل بو دغدغه لرين ايچينده ايتميشم. ائله بيل، قاچماقلا ديري قالماق اوچون قاچماغين آراسيندا، ياشاماغي اونوتموشام. اوره ييم چوخ ايسته يير بو باساراق گونلرين بيريني تعطيل ائدم؛ سحر چاغي دينجليك له اؤزومه سحر يئمه يي حاضيرلايام. راحاتجا بير بوتون سحر يئمه يي يئييب، ملايم بير موسيقي يه قولاق وئرم. سونرا اوره ييم ايسته دييي ايشلري ائلييم. هر هانسي ايشي من ايسته ييرم.

سئويرم، بير سله (سبد) گؤتورم، دينجليكله گون بازاريندا آدديم آتام. ديققت له علاقه م اولدوغو غذايا لازيم اولانلاري سئچم. بير بوش گونوم اولسا، اوره ييم نه لر ايسته مير! اوره ييم ايسته يير مبل اوستونده لم وئريب تئلويزييونا باخام، يوخومدا آپارسا، نيگران اولمايام. اوره ييم ايسته يير، گئجه، سويوقدا، او ائشيكده هامي قاچديغي چاغدا، دونيايا باخام. خالقا، نه اوچون قاچيرسيز، دئيم؟ ياخشي باشاريلارا يئتيره سيز؟ نه اولا؟ داها چوخ پول اله گتيره سيز؟ نه اولا؟ ياخشي ياشاياسيز؟ داها چوخ قاچيرسيزياخشي دوروم لار اله گتيره سيز و ياخشي دوروملاري الده ائتديغينيز زامان،داها چوخ قاچماغا مجبورسونوز. هر آنداندا بير، بو سورونو (سؤالي) اؤزونوزدن سوروشون: من نه اوچون ياشاييرام؟ ياشاماق اوچون ايشله ييرم يوخسا ايشله مك اوچون ياشاييرام؟

ائله بيل چوخوموز ياشاماغي اونوتموشوق. ياشاييشدا، لاپ ياخشي كيفيت هميشه ياخشي مقام ايله، لاپ چوخ پول، ان پارلاق اجتماعي موقعيت و ...اله گلمز.

آما سيزين خوشبختچيليق دويغونوز (احساسينيز) يوخدور. سوروملولوقلار (مسئوليت لر) ندني سيزي آييله نيزدن اوزاق ساليبلار. بلليدير ايشينيز سيزه چوخ استرس وئرير. پوللارينيز سيزه راحاتچيليق وئرمك يئرينه، سيز اونلارا گؤزتچي (نگهبان) اولوبسونوز. سيزين خوشبخت اولماغينيز، يالنيز خوشبختچيلغي دوشوندويونوز زاماندير. بوتون دونيا سيزين اولوبدور، آما اوره يينيز بير تعطيل گونونده ساحيلده اوتوروب، دنيزه باخماق اوچون داريخير، دئمك سيزين بير يئرده آزليغينيز واردير، حتتا بوتون دونيا سيزين اولدوغو زامان.

آما بير سيزسئون معمولي ايشينيز وارسا، آييله نيزين يانيندا اولماغا يئترلي فورصتينيز وارسا، بير كلمه ده، ياشاييشدان لذذت آپاريرسينيزسا، سيز خوشبختسينيز.

سيزين دونيانيز، اؤز ايچينيزده دير، ياشام دان (زندگي دن) راضي اولماق دويغوسو(حيسسي)، خوشبختچيليق دويغوسو، چتينليكلرين بؤيوك و كيچيك اولماغيني دوشونمك و ... هاميسي سيزين ايچينيزدن ، ائشيگه داشير. ائله بيل هر تك-تكيميزين ياشاييشيندا اولان يوك بوتونلوكجه اؤز چيگين لريميزده دير و هر بيريميز اؤزوموزه عاييد اولان دونيانين سوروملوسويوق. واختيميز اولورسا،اؤزوموزه ده باش چكه ك.

ياديميزدا اولسون: ياشام يولوندا،باشيميزين قاتيشماسي ندن ايله يولون سونونو اونوتماياق.

يازان: مليكا بهزادي

عيرفاني بير دانيشيق

ـ ائي تانريم،بو نعمت لر مني آزديرير،اونلاري آل.

ـ يوخ،اونلاردان اؤزون ال چكمه ليسن.

ـ ائي تانريم،منه صبر عطا ائت.

ـ يوخ،صبر آغري ـ آجيلاردا قازانيلار،وئريلمز،اؤيره نيلر.

ـ ائي تانريم،مني خوشبخت ائت.

ـ يوخ،من سنه نعمت لر وئريرم،خوشبخت اولماق ايسه اؤز ايشيندير.

ـ ائي تانريم،مني عذاب لاردان قورتار.

ـ يوخ،عذاب لار سني دونيادان اوزاخلاشديريب،منه ياخينلاشديرير.

ـ ائي تانريم،منه ذؤوق آلماقدا يارديمجي اول.

ـ يوخ،سنه ياشاييش وئرميشم،ذؤوق آلماغا چاليش.

ـ ائي تانريم،سن مني سئوديگين قدر منده باشقالاريني سئوه بيلديييمه،منه يارديمجي اول.

ـ سونوندا اؤيره ندين!

·       حاضيرلايان: حسين واحدي

كاسيبين احوالاتي...

...آرواد واللاه يوخومدو،هله آيليغيمي آلماميشام دئيه، ائودن ائشيگه چيخدي.ائولريندن ايشلديگي فابريكايا گئتمه يه خيياوان باشينداكي دوراقدا دوروب ماشينا مينيب شيركته يوللاندي.

سئرويسده اؤز- اؤزونه دئيينيردي.فابريكايا يئتيشيب ايش يئرينه كئچدي.او پروفيل بوروسونون فابريكاسيندا چاليشيردي.نئچه ساعات چاليشاندان سونرا يولداشلارينين بيري يانينا گليب نئچه دقيقه بئينيني يئيندن سونرا، يوز مين تومن منه پول وئر ،دئدي.

يازيق كيشي چاشيب حئيران قالدي.جيبده پول يوخ،آروادلا ساواشيب،بورج ايچينده قرق ،اينديده امكداشي بوندان پول ايسته ييردي.يئنه آندا-ماند ائديب،بير قيران پولوم يوخدور دئدي و امكداشدا راحاتسيز اولوب گئتدي.

شيركت ساعات 10 دا سحر يئمه يي(صبحانه)وئريردي.ساعات دوز اون اولموشدور.اوبيري امكداشلاريلا بيرليكده آش ائوينه (آشپزخانا) دوغرو گئتدي.ماسا باشيندا ايلشيب بير آز آرخايينچيليقلا يئمه يه مشغولويدو،ائله يئمه يين شيرين يئرينده شيركتين ساتيش ائوينين (فروشگاهين) سوروملوسو (مسئولو) بونون يانينا گليب بئله دئدي: بي قارداش بورجون ساتيش ائوينه 300 مينه يئتيشديگينه گؤره و سنين بو بورجو واختيندا وئرمديينه گؤره دئميشم ياريسين بو آيين آيليغيندان چيخسينلار.بونو دئييب گئتدي.قيدا (غذا ) بوغازيندا قاليب آز قالدي بوغولسون.يئمه يي ياريدا قويوب ايش يئرينه قاييتدي.

ايداري واخت قورتولاناجاق بير كيمسه ايله دانيشمادي.آخي نه ائيله سين آلديغي 400 مي تومن آيليغيدي اونوندا 150 مين تومنين ساتيش ائوي بورجونا چيخاجايديي.

يورقون-آرغين قاپيني آچيب ائوه كئچنده آروادين آغلاماسين گؤردو.نه اولوب آي آرواد دئيه-دئيه،اوتاغا گيردي.آرواد بير كيشي يه باخيب اوشاغا باخيب بئله دئدي:

آي كيشي نه جور دئييم اوشاق 3 دانا درسده تجديد اولوبدو و ...نه جور دئييم،بيلدير آلان بوز دولابي (يخچال) ائله بيل گئجه يانيبدير و پولوموز باتيبدي!!!

يازان: حسين واحدي