سیچانلار
سیچانلار
یازار: حسین واحدی
اوقیانوسون اوزاغا دوشموش آدالارینین بیریندن کؤچوب اینسانلارین یوردونا گلدیلر، گیزلیجه. بیرگون گئجه شهرلره، کندلره تؤکولوب هرنه‌یی تالادیلار. بوغدالاری، چؤرک‌لری، سولاری، ائولری، اکین‌لری، خالچالاری، هرنه‌یی. بیر اوشاغین الینده اولان یاوانلیغی دا تالادیلار، سیچانلار.
گئتدیکجه هر یانی آلدیلار، هریانی. هر یئری اؤزلرینین کی بیلیب، دئدیلرگئتمه‌لیدیرلر، اینسانلار.
بیرگون گئجه، قیشین ان اوزون گئجه‌سی، لاپ او سویوق اولان زامان، بیر اینسان نئچه واخت بوندان اؤنجه، سیچانلاردان گیزلیجه قاییردیغی توزاقدا، - یئر آلتی دا، دییرمانین یانینا قویموشدو- بیر سیچانی توتدو!
آج قارین /حیکایه‌جیک/
آج قارین
یازار: حسین واحدی
آجیندان ال‌لری اسیم-اسیم اسیردی. یاغیش آلتیندا بازار آغزیندا دایانیب آج-آج گلیب- گئده‌نه باخیردی. آجلیق باغیرساقلارینی کسیردی. اؤزون ساخلایانمادی. یاغیش دامجی‌لارینا آمان وئرمه‌دی. او قدر یاغیش ایچدی بولودلار قورودولار. بئش- آلتی آددیم سولوندا بیر قوجا کیشی پاتداق ساتیردی. یاواش – یاواش اونا ساری گئدیب یانیندا دایاندی. سونرا تله‌سیک پاتداق‌لارین هامیسی‌نی یئییب قورتاردی. قوجا کیشی هوروت- هوروت اونا باخیردی، آنجاق الیندن بیر ایش گلمیردی.
آج آدام یئنه دویمادی. دلیجه قاچمایا باشلادی، یولو اوسته هر کیمسه‌نین هرنه حاققی وار ایدی یئدی. چوخلو یول گئدندن سونرا قویون کؤرپوسونون یانیندا دایاندی.
باشینی ساغا-سولا چئویریب بویان-اویانا باخدی. گؤزلری هرنه‌یی یاوانلیق گؤروردو. الینی اوزالدیب اورادا اولان ان اوجا تیکینتینی آغزینا تیخدی. بونو یئمکله داها آجیقدی. او بیری آپارتمانلاری دا یئدی. آما یئنه دویمادی. آرتیق هرکیم و هرنه یانیندان کئچیردی توتوب یئییردی. نئچه ساعاتدان سونرا شهرده هئچزاد قالمادی. شهر چؤله دؤنموشدو.
گئت- گئده جانی سیسقالاشیردی. یئدیکجه داها چوخ آجیخیردی.
آرتیق یئر اوزونده هرنه‌یی یئییب قورتاردی. گؤیه ساری باخدی. گؤیده اوچان قوشلارادا آمان وئرمه‌دی. داها سونرا بولودلاری اوددو. آیی، اولدوزلاری و سونرا گونشی قارنینا دولدوردو. آج آدامین باریساق‌لاری آجیندان سس سالمایا باشلادیلار. بیرآز فیکیرلشدی و سونرا زامانادا رحم ائتمه‌ییب دورمکله‌دی.
یاواش- یاواش آجیندان یئره سره‌له‌ندی. گؤزونه هئچ نه دیمیردی. پالتار باشماغینی چیخاردیب اونلاریدا یئمه‌یه باشلادی. لوت قالدی. اؤزونه تاماهی گئتدی. بالا- بالا آجیندان اؤزونو یئمه‌یه باشلادی. بارماقلار، بالدیرلار، دیزلرینه یئتیشنده آجلیق اونا آمان وئرمه‌ییب آجیندان اؤلدو.
کؤرپه‌لرده یوخو رئژیمی ساغلام اینکیشافین آچاری‌دیر
کؤرپه‌لرده یوخو رئژیمی ساغلام اینکیشافین آچاری‌دیر
حاضیرلایان: حسن واحدی
کؤرپه [نوزاد] بؤیودن عائله‌لرین یاشادیغی ان اهمیت‌لی چتینلیك‌لردن بیری، کؤرپه‌لری‌نین اوزون مدت قایدایا دوشمه‌ین گئجه یوخولاری‌دیر. دیلیمیزه یئرلشن "کؤرپه‌لر کیمی یاتماق" دئییمینه قارشی، کؤرپه‌لرین درین و کسیلمز بیر گئجه یوخوسونا گئتمه‌لری آنا-آتا‌لار اوچون چوخ واخت خیال‌دان او طرفه کئچمیر.
اوشاق ساعت 22.00 'ده ان درین یوخوسوندا اولما‌لی‌دیر!
اوشاق‌لارین یوخویا اولان احتیاج‌لاری و یوخو مدت‌لری بؤیومه دؤورلرینه گؤره دییشر. یئنی دوغولان دؤور، ان چوخ یوخویا احتیاجی اولان دؤوردور. یئنی دوغولان کؤرپه‌نین یوخوسو 18-20 ساعتا قدر چاتا بیلر. بؤیودوکجه قاوراما حیسسی اینکیشاف ائدن اوشاغین، یوخو مدتی ده قیسالاجاقتیر. بؤیومه هورمونو ساعت 22.00 اطرافیندا ان یوکسک سویه‌لره چاتا‌جاق. بو سببله اوشاق هانسی یاشدا اولورسا اولسون، بو ساعت‌لاردا درین یوخودا اولما‌لی‌دیر.
یول دوکتورو
یول دوکتورو
یازار: حسین واحدی
- اوچ مین بازار
آغزی...
- ایله‌ش...
- ماشین دا دوشمور... آلللاه سیزین ایشینیزی دوز
گتیرسین ...
- ساغ اولون ...
- باشینیزی ندن دسمال لا باغلاییب‌سیز؟
- یامان آغری‌ییر...
- احتمالا میقرئن دی... یئتیشدیز ائوه رنگلی چای
دمله‌ییب ایچینه زنجفیل تؤکون ایچین، سونرادا یاتین صوبحه توختایار...
- چوخ پس آغری‌ییر...
- البته اولا بیلر سینوزیت اولسون... اوندادا
یئتیشدیز ائوه بیر آز یارپیز دمله‌یین 2-3 ایستکان ایچندن سونرا یورقانی باشینیزا
چکین دینجه‌لین.
- صوبحدن اؤلورم... آمما بورجلویام... گرک ایشله‌یم...
- آهان یادیما دوشدو... بازار آغزیندان... تورش لیمو
آلین ایکی- اوچ گون سویون سیخین بیر لیوان سویا بیر قاشیق بال ایله ایچین...
- آی کیشی منه ایکی گوندو سویوق دییب باش آغریم
اوندان دی...
- بس اوندا بو ایکی سویوق دیمه حببینی ساخلایین
اینشاا... توختارسیز...
- جناب سیز دوکتورسونوز؟
- یوخ!... نئجه؟!
- بیتکی داوالاردان باشینیز چیخیر؟
- یوخ... نئجه؟!
داوا- درمان لا ایلگی‌سی اولان دؤوره‌سی کئچیردیب‌سینیز؟
- یوخ نئجه؟
- داواچی‌سیز؟
- یوخ... ندن سوروشورسونوز؟
- هئچ... یئتیشدیک... دوشه بیلیرسینیز...
اؤیکو، یالنیز دانیشیق دئییل
اؤیکو، یالنیز دانیشیق دئییل
گلوریا کمپتون*
فارسجادان چئویرن: حسین واحدی
گلوریا کمپتون*
نه زامان شخصیت‌لرین حیکایه‌ده دانیشمالاری گرکلی‌دیر؟ نه دئسین‌لر؟ نه دئمه‌سینلر؟ نئجه دئسین‌لر؟ دانیشیق‌لا نئجه ائتمک اولار شخصیت‌لرین هوسین اوزه چیخاردیب همده تانیملاما[شخصیت پردازی] ایله، اوخوجو اونلا جانداشلیق[همدلی] حسی تاپسین؟ نئجه کاراکتئرلرین دانیشیق‌لاری بحران‌لا آسلانیشی حیکایه‌ده چوخالدا بیله‌ریک؟
نئجه دانیشیق‌لاری حیکایه، روایت و حادثه‌لری ایله بیرلشدیره بیله‌ریک؟
نئجه حیکایه‌ده یئرله زامان بیلگی‌لرینی دانیشیقلاردا آچیقلایا بیله‌ریک؟
بو چئشید[نوع] سؤال‌لارا، خانیم کمپتون چالیشیب “دانیشیق” [دییالوق] آدلی اؤز کیتابیندا اوخوجولار اوچون ایضاح گتیرسین. یازیچی‌نین باخیشی ایله حیکایه‌ده دانیشیق یازما، چوخ دا چتین ایش دئییل، آما بیز اونو چتینلشدیریریک. او بو کیتابدا چالیشیب دانیشمانی اوخوجویا چوخ راحت و طبیعی صورت‌ده آچیقلاسین، نفس چکمه‌یه تای.
دئمک بیز نفس چکنده فکر ائدیب سونرا نفس چکیریک‌می؟ بو ایش اوچون کاراکتئرلرین دری‌سینه کئچیب اونلارلا بیر اولماق لازیم‌دیر. یازیچی توصیه ائدیر، دانیشیق یازما سیزه راحات اولسون دئیه، بئله دوشونون، بو ایش سیزه بیرجور باش قاتمادیر.
کؤمک اول آللاهیم
کؤمک اول آللاهیم
ائی آللاه، بو سویوق‌دا [شاختادا] بوتون یوخسوللارا،
عسگرلره،
ائشیکدا چالیشانلارا،
الده ساتیجیلیق ائدنلره،
پولیس‌لره،
ایشچی‌لره،
مریض‌لره،
ایستی‌ائوی اولمایانلارا،
سویوق‌دا قالان حئیوانلارا
و...
کؤمک اول.
(آمین)
بیلمز Bilməz
بیلمز
یازار: قیزئلا ائلسنئر
چئویرن: حسین واحدی
اونلار بیر- بیرینین یانیندایدیلار و هامیسی بیر اؤلچوده بیلیردیلر و اینانیردیلار او بیلدیک‌لری چوخ-چوخدور. آرالاریندا بیری، اونلارجا بیلمه‌ییردی، اونا دئییردیلر، بیلمز. او "تریبول" ایدی. بیلمز اولدوغونو دویاندا، آلچاق کؤنول اولدو، هئچ کیمسه اونو بیر داها گؤرمه‌سین دئیه، گیزلندی.
آنجاق باشقالاری اونلا قایغی‌داشلیق[همدردی] ائتمه‌ییب دالیسیجا دوشوب، اونا باخدیلار و اونلا هرنه بیلمه‌ییردی اوندان دانیشیردیلار. تریبول-ون نه‌قدر اینجی‌مه‌سینی گؤروب، سئوینیردیلر اونو اینجی‌دنلر بونلاردیرلار.
آما دونیا دییشدی و آیین‌شایین تریبول بیلن[عاغیللی] اولدو، او‌بیری‌لر ایسه بیلمز، اوندان داها چوخ بیلمز، تریبول باشقالارینین اونون باشینا گتیردیک‌لریندن آجیق آچماق ایسته‌ییردی. اونلارلا ائله دانیشیردی، هئچ نه بیلمه‌ییردیلر، چونکی هر نه او بیلیردی او‌بیری‌لر بیلمه‌ییردیلر. آما اونلار اونو آلقیشلاییردیلار، هئچ کیم تریبول بیله‌نی او بیلمه‌دیگی اوچون اوتانماییردی، تریبول ایسه اونلارلا قایغی‌داشلیق ائدیب، اونلاری اینجیده بیلمه‌ییردی. او بیلیردی همیشه آیری جور و یالنیز ایدی. او قورخو ایله گؤزله‌ییردی، بیر گون زامان قاییداجاق- بونو دقیق بیلیردی- او زامان دونیا بیرداها دییشه‌جک و باشقالاری یئنه اونو اینجی‌ده‌جک ایدیلر.
ادبیات اؤدولو، اورمیه ایله تبریز
آدسیز حیکایه‌جیک
حاضیرلایان: حسین واحدی
ـ آلو، سالام آنا...
ـ علیکوم سالام... هاراداسان؟
ـ آنا قیزلار گئدیر گزمه‌یه... من‌ده گئدیم؟
ـ من بیلمرم ... اونو آتان بیلر... ده‌سته‌یی وئردیم اونا...
ـ سالام آتا...
ـ سالام، نه اولوب؟
ـ آتا برزیل بوگون اویونون اوددو؟
ـ هه...
ـ یاخشی دسته‌یی وئر آناما...
ـ آنا آتام هه دئدین ائشیتدین؟ من گئتدیم!
قولو ائو ایله اداره‌ده/حیکایه‌جیک
قولو ائو ایله اداره‌ده
یازان: حسین واحدی
ساعات سحرچاغی یئددی‌نی گؤستریردی، قولو یوخویا قالمیشدی، کؤرپه اوشاغی یوخودان اویانیب، اینقه-اینقه ائتمه‌یه باشلادی. بو سس‌له قولودا یوخودان دوروب ال-اوزون یومادان، تله‌سیک گئینییردی. قادینی، تئز چای-چؤرک حاضیرلاییب، قولو ایسه سوفرا باشیندا اوتوردو. چؤره‌ک بوغازیندان آشاغی ائنمه‌میش دئدی:
"آی آرواد، یئنه برک- برک تاپیشیریرام ها، سویو آز آچین، سوبانین خورتون لاپ آزا قویون، هله باجارسان سؤندور، گئجه یاندیرارسان، پرده‌لری قیراغا چک ائوه گونش دوشسون، چیراق‌لاریدا، قارانلیق دوشمه‌یینجه یاندیرما و...!
آز قالیردی بوغولا، آما تاپیشیریقلاریندان ال چکمیردی. یئمکدن قورتولوب ایداره‌یه ساری یوللا دوشدو.
ساعات اون‌ایکی‌نی گؤسته‌ریردی، قولو ایداره‌ده لم وئریب اوتورموشدو، ایش یئرینه اینترنتده گزیردی، گونشین ایشیغی اوتاغیندان دولوب داشیردی، چیراق‌لار ایسه اوغلان تویوندایدیلار، سوبا آلوو ایچینده قالمیشدی.
قولو، ماسا آرخاسیندان آیریب، پنجره قاباغینا گئدیب، سیقار آلیشدیردی.
